[1] Jesusqa nillarqantaqmi: —Runakunaq ñawpaqenpi rikunallankupaq yanapaykuy ruwayniykichistaqa, qankuna kikiykichis allinta qhawakuychis. Mana hinaqa, hanaq pachapi kashaq Yayaykichismantan premionta mana chaskiwaqchischu.
[2] Limosnata qospaykiqa, ama iskay-uyakuna hinaqa ñawpaqeykipi kornetata tokachiychu. Paykunaqa, llaqta kallekunapi, hinallataq judío runakunaq huñukunanku wasikunapi, runakunaq hatunchasqan kayta munaspallankun, chaytaqa ruwanku. Amayá chay hinataqa ruwaychischu. Cheqaqtan niykichis: ‘Chay hina ruwaqkunaqa, ñan premioyoqña kanku,’ nispay.
[3] Limosnata qan qoqtiykiqa, ama paña makiykiq ruwasqanta lloq'e makiyki yachachunchu.
[4] Chay hinapin, limosna qosqaykiqa, pakallapi ruwasqa kanqa. Hinan pakallapi rikuq Yayaykiqa, premioykita sut'ipi qopusunki, nispa.
[5] Nillarqantaqmi: —Diosman parlaspaykiqa, ama iskay-uyakuna hinachu kaychis. Paykunaqa, judío runakunaq huñukunanku wasikunapipas, llaqta kallekunaq eskinankunapipas runakunaq rikusqan kanankupaqmi sayaykuspanku, Diosman parlayta munanku. Cheqaqtan niykichis: ‘Ñan paykunaqa, premioyoqña kanku,’ nispay.
[6] Qantaq ichaqa, Diosman parlaspaykiqa, wasiyki ukhuman haykuy. Hinaspataq punkuta wisq'aspayki, pakallapi kashaq Yayaykiman parlaykuy. Hinan pakallapi rikuq Yayaykiqa, sut'ipi premioykita qopusunki.
[7] Diosman parlaspaykichisqa, ama mana-judío runakuna hina kaq simikunallatachu thawtiychis. Paykunaqa, askha rimasqankuwanmi uyarisqa kanankupaq yuyanku.
[8] Yayaykichisqa, imakunachus pisisqasunkichista, manaraq mañakushaqtiykichismi yachanña. Chayrayku, amapuni chay mana-judío runakuna hinaqa ruwaychischu.
[9] Chay hinaqa, kay hinatayá qankuna Diosman parlaychis: ‘Hanaq pachapi kashaq Yayayku, sutiyki yupaychasqa kachun.
[10] Qhapaq suyuyki hamuchun. Imaynan hanaq pachapipas munayniyki ruwasqa, chay hinallataq kay pachapipas munayniyki ruwasqa kachun.
[11] Sapa p'unchay t'antaykuta kunan qowayku.
[12] Imaynan ñoqaykupas mana allin ruwawaqniykuta pampachayku, chay hinallatataq mana allin ruwasqaykutapas pampachawayku.
[13] Qhapaq suyupas, atiypas, hinallataq k'ancharishaq kaypas, wiñay wiñaypaq qanpapunin. Chayrayku, amapuni wateqaymanqa pusawaykuchu, aswanpas mana allin kaqmanta kacharichiwayku. Ahinapuni kachun,’ nispaykichis.
[14] Chay hinaqa, sichus runakunaq mana allin ruwasqasunkichista pampachankichis chayqa, hanaq pachapi kashaq Yayaykichisqa qankunatapas pampachallasunkichistaqmi.
[15] Ichaqa, manachus runakunaq mana allin ruwasqasunkichiskunata pampachankichis chayqa, manallataqmi Yayaykichispas huchallikusqaykichiskunata pampachallasunkichistaqchu, nispa.
[16] Jesusqa nillarqantaqmi: —Ayunaspaykichisqa, ama iskay-uyakuna hinachu khuyay uyayoqman tukuychis. Paykunaqa ayunasqankuta runakunaman rikuchinankupaqmi, uyankuta umphuyachinku. Cheqaqtan niykichis: ‘Paykunaqa ñan premioyoqña kanku,’ nispay.
[17] Qan ayunaspaykitaq ichaqa, umaykita ñaqchakuy, hinallataq uyaykitapas uphakuy.
[18] Chay hinapin runakunaqa, ayunasqaykita mana rikunqakuchu. Aswanpas pakallapi kashaq Yayayki rikunqa. Hinan pakallapi rikuq Yayaykiqa, sut'ipi qanman premioykita qopusunki, nispa.
[19] Nillarqantaqmi: —Ama kay hallp'a pachapiqa, maypichus thutaq thutananpi, ismuypas ismuchinanpi, hinallataq suwakunapas t'oqospanku suwananpi qhapaq kaytaqa huñuychischu.
[20] Aswanpas hanaq pachapi qhapaq kaytaqa huñukuychis. Chaypiqa, manan thutapas thutanchu, nitaq ismuypas ismuchinchu, nillataqmi suwakunapas t'oqospanku suwakunkuchu.
[21] Chay hinaqa, maypichus qhapaq kayniykichis kashan, chayllapitaqmi sonqoykichispas kashanqa, nispa.
[22] Jesusqa nillarqantaqmi: —Aycha kuerpoq k'anchayninqa ñawin. Chay hinaqa, sichus ñawiyki allin kashan chayqa, llapan kuerpoykipas k'anchaywan hunt'aykusqan kashanqa.
[23] Ichaqa, sichus ñawiyki mana allinchu kashan chayqa, llapan kuerpoykipas laqha-tutapin kashanqa. Chay hinaqa, qanpi k'anchaychus tutayaq kashan chayqa, ¡imaynaniraq laqha-tutayaqraqchá kanman! nispa.
[24] Nillarqantaqmi: —Manan pipas iskay patronkunataqa serbiyta atinmanchu. Huknintan munakunman, huk kaqtataqmi cheqnikunman. Otaq huknintan allinpaq hap'inman, huk kaqtataqmi pisichanman. Diostawan, qhapaq kaytawanqa, manan serbiyta atiwaqchischu.
[25] Chay hinaqa niykichismi: ‘Kawsanaykichispaq, imatachus mikhunaykichismantaqa, imatachus ukyanaykichismantapas, aycha kuerpoykichista imawanchus p'achakunaykichismantapas ama llakikuychischu,’ nispay. ¿Manachu kawsayqa mikhunamantapas aswan balorniyoq, hinallataq aycha kuerpopas p'achamantaqa aswan balorniyoq?
[26] Phalaq animalkunata qhawariychis. Manan tarpunkuchu, nitaq ichhunkupaschu, nillataqmi taqenkupaschu. Ichaqa, hanaq pacha Yayaykichismi paykunaman mikhuchin. ¿Manachu qankunaqa, phalaq animalkunamantapas aswan balorniyoq kankichis?
[27] ¿Qankunamanta mayqenniykichistaq, sinchita llakipakuspa sayayninman huk maki khukuchu sayayllatapas yapaykuyta atiwaqchis?
[28] ¿Imanaqtintaq p'achamantari llakipakunkichis? Kampopi t'ikakuna imaynatachus wiñasqankuta qhawariychis. Manan llank'ankuchu, nitaq puskankupaschu.
[29] Ichaqa niykichismi: ‘Salomonpas tukuy qhapaq kayninwan, manan huk kaqnin t'ika hinallapas p'achakurqanchu,’ nispay.
[30] Kampopi qorakunaqa, kunan p'unchaymi kashan. Paqarintaqmi ichaqa, hornopiña ruphachisqa kashanqa. Diosmi chay qorakunataqa, chay hinata p'achachin. Pisi iñiyniyoq runakuna, ¿manachu aswan allintaraq qankunata Diosqa p'achachisunkichisman?
[31] Chay hinaqa, ama llakipakuychischu: ¿Imatataq mikhusun, ukyasunpas, imawantaq p'achakusunpasri?’ nispaykichisqa.
[32] Mana iñiq runakunallan tukuy llakipakuywan chaykunataqa maskhanku. Ichaqa hanaq pacha Yayaykichismi tukuy chay imakunachus pisisqasunkichistaqa yachanña.
[33] Ichaqa, Diospa qhapaq suyunta, chanin kaynintawan ñawpaqtaqa maskhaychis. Hinan tukuy chay imaymanakunaqa, yapasqa kasunkichis.
[34] Paqarin p'unchayqa, kikinpin mana allin llakikuykunata apamun. Sapa p'unchaypi mana allinkunaqa, chayllaña kachun. Chayrayku paqarin kaqmantaqa ama llakikuychischu, nispa.