[1] Chay simikuna niyta tukuruspantaqmi, Jesusqa Galilea probinsiamanta, Jordán mayuq chimpanpi kashaq Judea probinsiaq qorpanman puriripurqan.
[2] Ancha askha runakunataqmi qatikurqanku. Hinan onqosqakunata chaypi qhaliyachirqan.
[3] Hinaqtinmi fariseokunaqa, Jesusman asuykurqanku. Hinan wateqanankupaq tapurqanku: —¿Runapaq ima hawallapas warminmanta t'aqakunan atikunmanchu? nispanku.
[4] Kutichispantaq Jesusqa paykunata nirqan: —¿Qallariypi kamaqpa nisqanta manachu ñawincharqanki- chis? Qelqaqa ninmi: ‘Qharitawan warmitawanmi kamarqan,’ nispan, nispa. (Gén. 1:27)
[5] Nillarqantaqmi: —Qelqaqa ninmi: ‘Chaymi qhariqa, taytantapas mamantapas saqepunqa. Warminmantaq hukllachaykakapunqa. Hinan iskayninku ch'ulla aychallaña kapunqaku,’ nispan. (Gén. 2:24)
[6] Chay hinaqa, manan iskayñachu, aswanpas ch'ulla aychallañan kanku. Chayrayku Diospa hukllachasqantaqa, amapuni pi runapas t'aqachunchu, nispa.
[7] Hinan Jesusta tapullarqankutaq: —¿Imanaqtintaq Moisesri t'aqanakuy kartata haywaspa, t'aqanakunallankupaq, kamachikurqan? nispanku.
[8] Jesustaq paykunata nirqan: —Rumi-sonqo kasqaykichisraykun, Moisesqa warmiykichis wikch'upunaykichista, hinallata saqerqasunkichis. Qallariymantapachataqmi ichaqa, mana chay hinachu karqan.
[9] Ñoqataqmi ichaqa niykichis: ‘Pipas warminta, chay warmin mana wak qhariwan qhelli puriypi purishaqtin wikch'upun, hinaspataq wak warmiwan kasarakun chayqa, wasanchanmi,’ nispay, nispa.
[10] Yachachisqankunataq Jesusta nirqanku: —Sichus kasarasqa qhari warminwan chay hinata kawsanman chayqa, manamá kasarakuyqa allinchu kanman, nispanku.
[11] Hinaqtinmi Jesusqa, paykunata nirqan: —Manan llapa runachu kay nisqay simikunata chaskikunankupaq hinaqa kanku. Aswanpas chay pikunamanchus Diosqa qon, paykunallan yuyayninkupi hap'inkuman.
[12] Chay hinaqa, mamanpa wiksanmantapacha mana warmiyoq kananpaq chay hinapuni naseqkunaqa kanmi. Runakunaq kapasqan, hinallataq wakin hanaq pacha qhapaq suyurayku, kikinkuta mana warmiyoq kanankupaq yuyaykukuqkunapas kallantaqmi. Pipas chay hina kayta munan chayqa, kallachun, nispa.
[13] Hinaqtinmi wawakunaq pataman makinta churaykuspa, Diosman parlananpaq wawakunata Jesusman pusamurqanku. Yachachisqankunataqmi ichaqa phiñarikurqanku.
[14] Jesustaqmi ichaqa, paykunata nirqan: —Hanaq pacha qhapaq suyuqa wawakunaqmi. Chayrayku wawakunaqa hinalla ñoqaman hamuchunku, amataq hamunankutaqa hark'aychischu, nispa.
[15] Wawakuna pataman makinta churaykusqan qhepatataq, chay cheqasmanta puriripurqan.
[16] Chayllamanmi, huk runa Jesusman asuykamuspa tapurqan: —Allin Yachachikuq, ¿wiñay kawsayniyoq kanaypaqri, ima allin kaqtataq ruwasaq? nispa.
[17] Jesustaq ichaqa, payman kutichispa nirqan: —¿Imanaqtintaq allin nispari sutiyawanki? Allin kaqqa sapan Diosllan. Ichaqa sichus kawsayman haykuyta munanki chayqa, kamachikuykunata hunt'ay, nispa.
[18] Runataqmi nirqan: —¿Mayqen kamachikuykunatataqri? nispa. Hinan Jesusqa nirqan: —Aman wañuchinkichu, aman wasanchankichu, aman suwakunkichu, aman runamasiykita yanqa qasinmanta tumpankichu.
[19] Taytaykitapas, mamaykitapas allinpaq qhawariy. (Éxo. 20:12-16 Deut. 5:16-20) Hinallataq runamasiykitapas qan kikiykita hinapuni munakunki, nispa. (Leb. 19:18)
[20] Waynataq Jesusta nirqan: —Llapan kay kamachikuykunataqa wayna kasqaymantapacharaqmi hunt'arqani. ¿Imakunatawanraqtaq ruwanayri kashan? nispa.
[21] Jesustaq payta nirqan: —K'apakpuni kayta munanki chayqa, kutipuspayki tukuy kaqniykikunata bendemuspa wakchakunaman qomuy. Hinan hanaq pachapi qhapaq kayniykiqa kapusunki. Hamuspaykitaq qatikuway, nispa.
[22] Chay waynaqa, askha kaqniyoqmi karqan. Chayraykun chay simita uyarispa khuyaypuni ripurqan.
[23] Hinan Jesusqa, yachachisqankunata nirqan: —Cheqaqtan niykichis: ‘May sasapunin huk qhapaq runaq hanaq pacha qhapaq suyuman haykuyninqa,’ nispay.
[24] Huktawanmi nillaykichistaq: ‘Huk qhapaq runaq Diospa hanaq pacha qhapaq suyunman haykunanmantaqa, yawriq ninrinta huk kamelloq suskhuyninraqchá atikunmanpas,’ nispay, nispa.
[25] Chayta uyarispankutaq, yachachisqankunaqa sinchi mana yuyayninkuman kabesqa kaspa nirqanku: —¿Chay hinari, pitaq qespichisqa kaytari atinqa? nispanku.
[26] Jesustaq qhawarispan paykunata nirqan: —Kayqa, runakunapaq sinchi sasapunin. Diospaqmi ichaqa, tukuypas atikuqllapuni, nispa.
[27] Hinaqtinmi Jesusman kutichispa, Pedroqa nirqan: —Qhawariy, ñoqaykuqa tukuy kaqniykuta saqemuspan qatikamushaykiku. ¿Imataq ñoqaykupaqri kanqa? nispa.
[28] Jesustaq paykunata nirqan: —Cheqaqtan niykichis: ‘Tukuy imaymanatapas Diospa mosoqyachinan tiempopin Runaq Churinqa, k'ancharishaq kamachikuq tiyananpi tiyaykunqa. Hinan qankuna qatikuqninkunapas chunka iskayniyoq Israel aylluta chaninchanaykichispaq, chunka iskayniyoq kamachikuq tiyanapi, tiyaykullankichistaq.
[29] Pikunachus wasintapas, otaq wawqenkunatapas, otaq panankunatapas, otaq taytantapas, otaq mamantapas, otaq warmintapas, otaq wawankunatapas, otaq chakrankunatapas, sutiyrayku saqeqqa, pachak kutimantapas aswantaraqmi chaskinqaku. Hinallataqmi wiñay kawsaytapas chaskillanqakutaq,’ nispay.
[30] Ichaqa askha ñawpaq kaqkunan qhepapi kanqaku. Askha qhepapi kaqkunataqmi ñawpaqpi kanqaku, nispa.