[1] Soqta p'unchay qhepatataqmi, Jesusqa Pedrota, Jakobota, hinallataq wawqen Juantawan pusarikuspa, huk alto orqoman wicharqan.
[2] Chaypitaqmi, paykunaq ñawpaqenkupi, Jesuspa rikch'ayninqa huk niraqman tukurqan. Uyanpas inti hinaraqmi k'ancharirqan. Hinallataq p'achankunapas k'anchay hinaraqmi yuraqman tukurqan.
[3] Chayllamanmi Moiseswan, Eliaspiwan paykunaman rikhurimurqan. Hinan paykunaqa Jesuswan rimasharqanku.
[4] Hinaqtinmi Pedroqa Jesusta nirqan: —Señor, ñoqaykuq kaypi kashasqaykuqa, ancha allinmi. Sichus munanki chayqa, kaypi kinsa ch'ukllakunata ruwasaqku. Hukta qanpaq, huktataq Moisespaq, huktataq Eliaspaq ruwapusqaykiku, nispa.
[5] Pedro manaraq rimayta tukushaqtintaqmi, qonqaylla huk k'anchashaq phuyu paykunata pakaykurqan. Hinan chayllaman phuyu ukhumanta huk kunka nimurqan: —Munasqay Churiyqa kaymi. Paypin anchatapuni kusikuni. Payta uyariychis, nispa.
[6] Yachachisqankunataq chayta uyarispanku, sinchi mancharikuymanta pampakamaraq k'umuykurqanku.
[7] Hinaqtinmi Jesusqa, paykunaman asuykurqan. Llamiykuspantaq nirqan: —Sayariychis, amaña mancharikuychisñachu, nispa.
[8] Qhawarispankutaq, paykunaqa manaña pitapas rikurqankuchu. Aswanpas sapan Jesusllatañan rikurqanku.
[9] Paykuna orqomanta uraykamushaqtinkutaq, Jesusqa kamachirqan. Nirqantaq: —Kay rikhuriy rikusqaykichistaqa, Runaq Churin wañusqakunapuramanta kawsarimpunankaman ama pimanpas rimarinkichischu, nispan.
[10] Hinan yachachisqankunaqa, Jesusta tapuspa nirqanku: —¿Imanaqtintaq kamachikuy simita yachachiqkunari ninku: ‘Nawpaqtaqa Eliasraqmi hamunan,’ nispari? nispanku.
[11] Kutichispantaq, Jesusqa paykunata nirqan: —Cheqaqtan Eliasqa ñawpaqta hamunqa. Hinan tukuy imaymanakunata allichanqa.
[12] Ñoqataqmi ichaqa, niykichis: ‘Eliasqa hamurqanñan, ichaqa manan reqsirqankuchu. Aswanpas paytaqa munasqankutan ruwarqanku,’ nispay. Chay hinallataqmi Runaq Churinpas paykunaq ñak'arichisqan kallanqataq, nispa.
[13] Hinaqtinmi yachachisqankunaqa, Bautisaq Juanmanta rimashasqanta entiendirqanku.
[14] Askha runaq kasqanman chayaqtinkutaqmi, huk runa Jesusman hamuspa, paypa ñawpaqenpi qonqoriykukurqan.
[15] Hinan nirqan: —Señor, churiyta yanapaykapuway, millay ataki onqoywanmi sinchitapuni ñak'arishan. Mayninpin ninaman urmaykun. Mayninpitaqmi unuman urmaykun.
[16] Hinan yachachisqaykikunaman apamurqani. Ichaqa manataqmi qhaliyachiyta atirqankuchu, nispa.
[17] Jesustaq kutichispa nirqan: —¡Yaw mana iñiq, hinallataq waqllisqa runa-miraykuna! ¿Hayk'aqkamataq qankunawanqa kasaq? ¿Hayk'aqkamataq umaytari nanachiwankichis? Chay waynata kayman apamuwaychis, nispa.
[18] Hinan Jesús, chay supayta phiñarikuqtin, waynamanta lloqsipurqan. Chay ratumantapachataqmi waynaqa, qhali kapurqan.
[19] Chay qhepatataq yachachisqankunaqa, Jesusman sapaqllapi asuykuspa nirqanku: —¿Imanaqtintaq ñoqaykuri mana qarqoyta atirqaykuchu? nispanku.
[20] Jesustaq paykunata nirqan: —Cheqaqtan niykichis: ‘Iñiyniykichischus huk mostasa ruru hinallapas kanman chayqa, kay orqotan niwaqchis: “Kaymanta haqay ladoman suchuriy,” nispa, chayqa suchurinmanmi. Manataqmi imapas mana atinaykichisqa kanmanchu,’ nispa. Chaymi pisi iñiyniyoq kasqaykichisrayku mana qarqoytaqa atirqankichischu.
[21] Chay hina supayqa, manan lloqsiyta atinmanchu. Aswanpas Diosman parlaywan, ayunaywan imallan lloqsiytaqa atin, nispan.
[22] Galilea probinsiapi kashaspallankuraqmi, Jesusqa paykunata nirqan: —Runaq Churinqa, runakunaq makinkumanmi hap'ichisqa kanqa.
[23] Hinan wañuchinqaku. Kinsa p'unchaymantataqmi ichaqa, kawsarimpunqa, nispa. Chaymi yachachisqankunaqa, sinchitapuni llakikurqanku.
[24] Paykuna Kapernaum llaqtaman chayaqtinkutaq, tributo qolqe kobraqkuna kobranankupaq Pedroman hamuspanku nirqanku: —¿Yachachiqniykichisri, manachu iskaynin drakma qolqeta pagan? nispanku.
[25] Pedrotaq ichaqa nirqan: —Paganmi, nispa. Wasiman haykuspankutaq ñawpaqta Jesusqa rimaykurqan: —¿Simón, imaynataq rikch'akusunki? Kay pachapi reykunaqa, ¿pikunamantataq tribututa, otaq impuestuta kobranku? ¿Wawankumantachu, icha wak llaqtayoqkunamantachu kobranku? nispan.
[26] Pedrotaq payta nirqan: —Wak llaqtayoq runakunamantan, nispa. Jesustaqmi payta nirqan: —Wawakunan ichaqa, mana pagankuchu.
[27] Paykunata ama phiñachinanchispaqtaq ichaqa, phaway, qochata rispa ansuelota wikch'uykamuy. Hinaspataq hap'isqayki ñawpaq kaq challwaq siminta kicharispa huk estatero qolqeta tarinki. Chayta apaspaykitaq qanmanta, ñoqamantawan tribututa pagamunaykipaq aypaq kanqa, nispa.