[1] Hinaqtinmi Jesusqa, chunka iskayniyoq yachachisqankunata waqyarqan. Hinan lliw qhelli supaykunata qarqonankupaq, llapan onqoykunatapas, llapan nanaykunatapas qhaliyachinankupaq paykunaman atiyta qorqan.
[2] Chunka iskayniyoq apostolkunaq sutinkuqa, kaykunan: Ñawpaq kaqmi, Pedro sutiwan sutichasqa Simón, wawqen Andrespiwan; Zebedeoq churin Jakobo, wawqen Juanpiwan kanku.
[3] Hinallataq Felipe, Bartolomé, Tomás, tributo qolqe kobraq Mateo, Alfeoq churin Jakobo, Tadeo sutiwan sutichasqa Lebeopiwan kanku.
[4] Hinallataq kananista nisqa Simonpiwan, Jesusta hap'ichiq Judas Iskariotepiwan kanku.
[5] Chay chunka iskayniyoqtataq Jesusqa kay hinata yuyaychaykuspa kacharqan. Nirqantaq: —Mana-judío runakunaq ñannintaqa, aman rinkichischu. Samaria probinsiapi llaqtakunamanpas amallataqmi haykunkichispaschu.
[6] Aswanpas ñawpaqtaqa, Israel llaqtamanta chinkasqa obehakunamanraq riychis.
[7] Rispaykichistaq willamuychis: ‘Hanaq pacha qhapaq suyun sispaykamunña,’ nispa.
[8] Onqosqakunata qhaliyachimuychis, lepra onqoyniyoqkunata qhaliyachimuychis, wañusqakunata kawsarichimuychis, supaykunata qarqomuychis, yanqallanmi chaskirqankichis, qankunapas yanqallanyá qoychis.
[9] Aman qoritapas, qolqetapas, kobretapas sinturaykichispi apankichischu.
[10] Nitaq ñanniykichispaq wayaqatapas, nitaq iskay p'achakunatapas, nitaq husut'atapas, nitaq tawnatapas apankichischu. Llank'aqqa llank'asqanmanta mikhunanpunin.
[11] Ichaqa mayqen hatun llaqtapipas, otaq llaqta kantu huch'uy llaqtakunamanña haykunkichis chaypas, pichus chaypi chaskinanpaq hina kasqantan tapukunkichis. Hinaspan chayllapiña ripunaykichiskama samakunkichis.
[12] Wasiman haykuspaykichistaq, napaykukunkichis.
[13] Sichus chay wasipi thak kayniykichista chaskinankupaq hina kankuman chayqa, thak kayniykichis paykunawan kachun. Ichaqa, sichus mana chaypaq hina kankuman chaytaq, thak kayniykichisqa qankunaman kutimpusunkichis.
[14] Manachus pipas chaskisunkichis, nitaq rimasqaykichiskunatapas uyarisunkichischu chayqa, chay wasimanta, otaq llaqtamanta lloqsipuspaykichis, chakiykichismanta hallp'ata chhaphchikunkichis.
[15] Cheqaqtan niykichis: ‘Taripay p'unchaypiqa, Sodoma llaqtamantapas, Gomorra llaqtamantapas, aswantaraqmi chay llaqtaqa muchuchiyta chaskinqa,’ nispay.
[16] Jesusqa nillarqantaqmi: —Qhawariychis, lobokunaq chawpinpi obehakunata hinan, ñoqaqa kachaykichis. Mach'aqway hina yuyaysapa, hinallataq paloma hina llamp'u sonqo kaychis.
[17] Runakunan Konsilio Sanedrinpi kaqkunaman hap'ichisunkichis. Judío runakunaq huñunakunanku wasikunapitaqmi soq'achisunkichis. Chayrayku paykunamantaqa, kuidakuychis.
[18] Kamachikuqkunaq, hinallataq reykunaq ñawpaqenmanraqmi ñoqarayku apasunkichis. Paykunapas, mana-judío runakunapas rikuspanku yachanankupaqmi apasunkichis.
[19] Maypachachus hap'ichisunkichis chayqa, imaynatachus, otaq imatachus rimanaykichismantaqa, ama llakikuychischu. Chay orapin, imachus rimanaykichispaqqa qosqa kasunkichis.
[20] Manan qankunachu rimaqqa kankichis. Aswanpas Yayaykichispa Espiritunmi qankunapiqa rimanqa.
[21] Wawqenmi, wawqellantataq wañunanpaq hap'ichinqa. Hinallataq taytanpas, wawanta wañunanpaq hap'ichinqa. Hinallataq wawakunapas tayta-mamankuq kontranpi hatarispa wañuchichinqaku.
[22] Sutiyraykutaqmi, llapa runakunaq cheqnisqan kankichis. P'uchukaykama sayaqmi ichaqa, qespisqa kanqa.
[23] Cheqaqtan niykichis: ‘Runaq Churin hamunankamaqa, manan llapan Israel llaqtakunata purispa tukunkichischu,’ nispay. Chayrayku, huk llaqtapi qatiykachasunkichis chayqa, huk kaq llaqtaman ayqekuychis.
[24] Yachachisqaqa, manan yachachiqninmanta aswanqa kanmanchu. Nitaqmi kamachipas, patronninmanta aswanqa kanmanchu.
[25] Yachachisqa yachachiqnin hina kayninqa, hinallataq kamachiq patron hina kayninqa allinmi. Wasiyoq wiraqochatachus Beelsebú nispa sutiyanku chayqa, ¡imataraqchá wasinpi kaqkunataqa sutiyanqaku! nispa.
[26] Jesusqa nillarqantaqmi: —Manan imapas pakasqa mana sut'iman lloqsiqqa kanchu. Nitaqmi imapas pakallapi mana yachakuqqa kanchu. Chayrayku ama paykunataqa manchakuychischu.
[27] Tutayaqpi nisqaytaqa, k'anchaypi niychis. Hinallataq ninrillaykichispi nisqaytapas wasi patakunamanta qapariychis.
[28] Aycha kuerpota wañuchiqkunaqa, manan almataqa wañuchiyta atinkumanchu. Chayrayku, ama paykunataqa manchakuychischu. Aswanpas, alma chinkachiqta, hinallataq aycha kuerpotapas infiernopi chinkachiqta manchakuychis.
[29] ¿Manachu iskay urpichakunataqa, huk huch'uy qolqechallaman bendikun? Chay tukuywanpas manan hukchallanpas Yayaykichis mana munaqtinqa pampaman urmanmanchu.
[30] Chay hinaqa, qankunaq chukchaykichiskunapas llapachallanmi yupasqa kashan.
[31] Qankunaqa, askha urpichakunamantapas aswan balorniyoqmi kankichis. Chayrayku ama manchakuychischu, nispa.
[32] Jesusqa nillarqantaqmi: —Chay hinaqa, pipas ñoqamanta runakunaq ñawpaqenpi rimariqtan, ñoqapas hanaq pachapi kashaq Yayaypa ñawpaqenpi paymanta rimarillasaqtaq.
[33] Ichaqa pipas runakunaq ñawpaqenpi mananchawaqniytan, ñoqapas hanaq pachapi kashaq Yayaypa ñawpaqenpi mananchallasaqtaq, nispa.
[34] Nillarqantaqmi: —Ama kay pachapaq thak kayta apamuspa hamusqaytachu yuyaychis. Ñoqaqa, manan thak kaytachu apamurqani. Aswanpas espadatan apamurqani.
[35] Runata taytanpa kontranpi, ususintataq mamanpa kontranpi, hinallataq qhachuntapas suegranpa kontranpi huchatariyman churanaypaqmi hamurqani.
[36] Chay hinaqa, runaq awqankunaqa, wasillanmantataqmi kanqaku. (Mik. 7:6)
[37] Pipas taytanta, otaq mamanta ñoqamanta aswanta munakuqqa, manan ñoqaq kananpaq hinachu. Hinallataq pipas churinta, otaq ususinta ñoqamanta aswanta munakuqqa, manallataqmi ñoqaq kananpaq hinachu.
[38] Hinallataq pipas krusninta apayukuspa mana qhepayta hamuqqa, manan ñoqaq kananpaq hinachu.
[39] Pipas kawsayninta tariqqa, kawsaynintaqa chinkachipunqan. Hinallataq pipas ñoqarayku kawsayninta chinkachiqtaqmi ichaqa, kawsayninta tarinqa.
[40] Pipas qankunata chaskiqqa, ñoqatan chaskiwan. Pipas ñoqata chaskiwaqtaqmi, kachamuwaqniyta chaskin.
[41] Pipas Diospa rantinpi rimaqta chaskiqqa, Diospa rantinpi rimaq kasqanraykun, Diospa rantinpi rimaqpa chaskinan premiota chaskinqa. Hinallataq pipas huk chanin runata chaskiqqa, chanin runa kasqanraykun chanin runaq chaskinan premiota chaskinqa.
[42] Pillapas kay huch'uykunallaman huk baso chiri unuchallatapas haywarinqa chayqa, cheqaqtan niykichis: ‘Yachachisqay kasqanraykun manapuni premiontaqa chinkachinqachu,’ nispay, nispa.