[1] Qespikuspankuñan, chay isla Malta sutiyoq kasqantaqa yacharqanku.
[2] Chay islapi tiyaqkunataq, may ancha munakuywan, sumaq rikuyninkuwan ima, llapaykuta chaskiwarqanku. Hinan paramusqan, hinallataq chirimusqanhawa huk ninata hap'ichipuwarqanku.
[3] Pablotaqmi marq'ayninpi llant'ata hoqarispan ninaman wikch'uykusharqan. Wikch'uykushaqtintaq benenoyoq huk mach'aqway ninamanta ayqemuspan, makinta kanispa warkurukurqan.
[4] Pabloq makinman mach'aqway kanispa warkukuqta rikuspankutaq, chay islapi tiyaqkunaqa ninakurqanku: —Kay runaqa, runa wañuchiqpunichá. Chaychá qochamantaña qespikamun chaypas chanin kayqa manapuni kawsachinchu, nispanku.
[5] Hinaqtinmi Pabloqa, chay millay mach'aqwayta ninaman chhaphchirparikurqan. Ichaqa manataqmi ima mana allinpas paypaqqa karqanchu.
[6] Chaykamataq paykunaqa punkillikuy qallarinanta otaq wañusqa qonqaylla urmananta suyasharqanku. Ichaqa unaytaña suyaqtinku, mana imapas kasqanta rikuspankun, huk niraqtañataq yuyayninkupi nirqanku: —Kay runaqa, huk diospunin kanman, nispanku.
[7] Chay cheqasqa, islapi umalliq Publio sutiyoq runaq hallp'ankunan karqan. Paymi wasinpi munakuywan chaskiwaspanku, kinsa p'unchayta qorpachawarqanku.
[8] Chay hina kaqtintaq, Publioq taytanqa puñunapi ruphapakuy onqoywan, hinallataq ruphariymanta q'echapakuy onqoypiwan kasharqan. Pabloqa, onqoqpa kasqanman haykuspataq, Diosman parlarqan. Hinan makinkunata onqoqpa patanman churaspan payta qhaliyachirqan.
[9] Chay pasasqan qhepatataq, chay islapi wakin tiyaqkunamanta onqoyniyoqkunapas Pabloman hamullarqankutaq. Paykunatataq qhaliyachirqan.
[10] Paykunapas ancha sumaqta qhawariwaspankun, chaskiwarqanku. Barkopi manaraq puririshaqtiykutaq lliw imaymana pisiwasqankuta q'epichaykuwarqanku.
[11] Chay hinaqa, chay islapin kinsa killa karqayku. Chaymi Alejandría llaqtamanta paray tiempo pasaq barkopi mamaqochanta puriripurqayku. Chay barkoq ñawpaqenpitaqmi, kuska naseq dioskunaq rikch'aynin pintasqa kasharqan.
[12] Sirakusa llaqtaman chayaspaykutaq kinsa p'unchayta chaypi qhepakurqayku.
[13] Chaymanta qocha kantunta muyurimuspaykutaq, Regio llaqtaman chayarqayku. Huk kaqnin p'unchayta uraywayra qonqaylla wayramuqtintaq, iskay p'unchaymantaña Putioli llaqtaman chayarqayku.
[14] Chaypin wawqe-panakunata tarirqayku, hinaspataq qanchis p'unchayta paykunawan qhepakunaykupaq balikuwarqanku. Chay hinapitaqmi, Roma llaqtaman chayarqayku.
[15] Ñoqaykuq chayasqaykuta uyarispankutaq, Roma llaqtapi kaq wawqe-panakunaqa Apio llaqta plasakama, hinallataq kinsa tambo nisqa llaqtakama chaskiwanankupaq aypamuwarqanku. Pabloqa paykunata rikuspanmi Diosman grasiasta qorqan, hinan aswantaraq kallpachakurqan.
[16] Roma llaqtaman chayaqtiykutaq, senturionqa, presokunata soldadokunaq kapitanninman hap'ichirqan. Chay senturiontaq, Pabloqa huk soldadoq kuidasqan sapaqllapi tiyananpaq saqellarqan.
[17] Chay hinapin Pabloqa, kinsa p'unchay qhepata judío runakunaq umalliqnin kaqkunata waqyachimurqan. Huñukamuqtinkutaqmi paykunata nirqan: —Wawqeykuna, ñoqaqa manan llaqtanchispa kontranpipas nitaq machulanchiskunaq ruwayninkuq kontranpipas imatapas ruwarqanichu. Ichaqa Jerusalén llaqtamantapacha, Roma llaqtamanta kamachikuqkunaq makinmanmi presota hap'ichimuwarqanku.
[18] Mana imapas wañunaypaq hina kasqanraykun, paykunaqa allinta tapuwaspanku kacharipuyta munawarqanku.
[19] Ichaqa judío runakunan, kachariwananku kontra rimarqanku. Chayraykun rey Cesarman pasachimuwanankutapuni munarqani. Chaywanpas llaqtaypa kontranpiqa manan imapas yanqanmanta huchachayniyqa kanchu.
[20] Chayraykun qankunawan rikunaykukunaypaq, hinallataq qankunawan rimanaypaq waqyachimurqaykichis. Hinan Israelpa suyakuyninhawa kay kadenawan watasqa kashani.
[21] Hinan paykunaqa nirqanku: —Ñoqaykuqa manan ima kartatapas kontraykipiqa Judea probinsiamanta chaskirqaykuchu. Manallataqmi chaymanta hamuq mayqen wawqepas, ima mana allintapas otaq ima kihakuytapas, qanmantaqa rimarqanpaschu.
[22] Tukuy cheqaspi chay pantasqa t'aqaq kontranpi rimasqankutan yachayku. Chayraykun qanpa yuyaykusqaykita uyariyta munayku, nispa.
[23] Maypichus Pabloq qorpachakusqanman hamunankupaqmi, rimanakurqanku. Chaymi chay p'unchay askha hamurqanku. Paykunamantaqmi tutamantanmanta ch'isiyanankamaraq Diospa qhapaq suyunmanta willarqan. Hinan Moisespa Kamachikuy Siminmanta, hinallataq Diospa rantinpi rimaqkunaq qelqasqankumantapacharaq qallarispan, Jesusmanta yachachirqan.
[24] Pabloq chay nisqanwantaq wakinqa kreechisqa karqanku, hukkunataq mana kreerqankuchu.
[25] Paykunapurapi mana ch'ulla yuyaylla kaspankutaqmi, Pabloq kay p'uchukay simita nishallaqtin ripurqanku. Pabloqa nirqanmi: Allintan Santo Espirituqa Diospa rantinpi rimaq Isaiaspa chawpinta machulanchiskunaman rimarqan.
[26] Nirqantaq: ‘Kay llaqtaman rispayki nimuy: “Ninriykichiswan uyarishaspapas, manapunin hayk'aqpas yuyayniykichispi hap'inkichischu. Ñawiykichiswan rikushaspapas, manapunin reparankichispunichu.
[27] Kay llaqtaq sonqonqa rumiyapunmi. Ninrinkupas roqt'oyapunmi. Ñawinkupas ñawsayapunmi. Manachus chay hina kanman chayqa, Ñawinkuwanmi rikunkuman. Ninrinkuwanmi uyarinkuman, Sonqonkupitaqmi hap'inkuman. Ñoqaman kutirikamuwaqtinkutaq, paykunata qhaliyachiyman karqan,” nispayki,’ nispa. (Isa. 6:9-10)
[28] Chayraykun kunanqa, mana-judío runakunaman Diosqa paypa qespikuyninta apachishan, paykunataqmi uyarinqaku. Chayta yachaychis, nispan.
[29] Chayta Pablo niqtintaqmi, judío runakunaqa, paykunapurapi sinchita churanakuspanku ripurqanku.
[30] Pabloqa alkilakusqan wasipin iskay wata hunt'a tiyakurqan. Lliw payman hamuqkunatataqmi chay wasipi allin hamukuywan chaskillaqpuni.
[31] Mana imatapas manchakuspanmi Diospa qhapaq suyunmanta willarqan. Hinallataqmi Señor Jesucristomanta yachachirqan. Manataqmi pipas paytaqa hark'akurqanchu.