[1] Ananías sutiyoq huk runataqmi ichaqa, esposan Safirapiwan, kaqninkuta bendepurqanku.
[2] Hinan payqa, esposanpas yachashaqtin, bendesqan qolqemanta horqokurqan. Wakillanta apamuspantaqmi, apostolkunaq ñawpaqenkuman churaykurqan.
[3] Hinan Pedroqa nirqan: —Ananías, ¿imanaqtinmi Santo Espirituman llullakunaykipaq, hinallataq chakra bendesqayki qolqemanta horqokunaykipaq Satanás sonqoykita hunt'aykurqan?
[4] Manaraq bendeshaqtiykiqa, ¿manachu qanpa karqan? Benderuqtiykipas, ¿manachu qolqeri makiykipi kasharqan? ¿Imanaqtintaq kay hina ruwaytari sonqoykiman churarqanki? Manan runakunamanchu llullakurqanki, aswanpas Diosmanmi llullakurqanki, nispa.
[5] Hinaqtinmi Ananiasqa, chay simikunata uyarispan, pampaman urmarqan. Hinan wañupurqan. Chaykunata llapan uyariqkunataqmi anchatapuni mancharikurqanku.
[6] Waynakunataqmi sayarispanku, ayanta k'uyurqanku. Hinan hawaman horqospanku, p'ampampurqanku.
[7] Yaqa kinsa ora hinamantataqmi, esposan Safirapas, imachus pasasqanta mana yachaspa haykumullarqantaq.
[8] Hinaqtinmi Pedroqa, payta nirqan: —Niway, ¿chay hinallamanpunichu chakrata bendemurqankichis? nispa. Paytaq nirqan: —Arí, chay hinallamanpunin, nispa.
[9] Hinan Pedroqa payta nirqan: —¿Imanaqtinmi Señorpa Espiritunta pruebaman churanayki- chispaq rimanakamurqankichis? Qhawariy, qosaykita p'ampamuqkunaqa punkupiñan kashanku. Qantapas horqollasunkikutaqmi, nispa.
[10] Kasqan ratupachataqmi, Safiraqa Pedroq ñawpaqenman urmaspa, wañupurqan. Hinan waynakuna haykumuspanku, wañusqata tarirqanku. Horqospankutaq, qosanpa ladonman p'ampampurqanku.
[11] Hinan llapa iñiq t'aqapas, tukuy chay imaymanakunata uyariqkunapas, anchatapuni mancharikurqanku.
[12] Apostolkunataqmi, askha señalkunata, hinallataq musphana ruwaykunatapas runakunapurapi ruwarqanku. Hinallataqmi llapallanku huk sonqolla, ‘Salomonpa portalnin’ nisqa cheqaspi kasharqanku.
[13] Wakin runakunataqmi ichaqa, mana paykunaman huñukuyta munarqankuchu. Chaywanpas chay runakunaqa, anchatapunin paykunata hatuncharqanku.
[14] Señorpi iñikuqkunataqmi, aswan-aswantaraq yapakurqanku. Hinan ancha askha qharikunapas, warmikunapas karqanku.
[15] Chay hinaqa, kallekunaman onqosqakunata horqomuspankun, puñunakunapi, hinallataq kamillakunapipas churarqanku. Pedro chayninta pasaqtin, llanthullanwanpas llanthuykunanpaqmi churarqanku.
[16] Jerusalén llaqtaq qayllan llaqtakunamantaraqmi, askha runakuna Jerusalén llaqtaman hamurqanku. Onqosqakunatapas, qhelli supay espiritukunaq ñak'arichisqankunatapas apayukuspan hamurqanku. Hinan apostolkunaqa, llapan onqosqakunata qhaliyachirqanku.
[17] Hinaqtinmi hatun umalliq saserdoteqa, saduseo pantasqa t'aqamanta llapan paywan kashaqkunapiwan sayarispanku, enbidiakuywan hunt'aykusqa kasharqanku.
[18] Hinan apostolkunata hap'ispanku, llaqtapi karselman wisq'arqanku.
[19] Señorpa huk angelnintaqmi ichaqa, karselpa punkunkunata tuta kicharaspan, paykunata hawaman horqorqan.
[20] Nirqantaq: —Dios yupaychana wasiman riychis. Hinaspa chaypi sayarispa, tukuy kay kawsay simikunamanta llaqta runaman rimaykamuychis, nispa.
[21] Chayta uyarispankutaq, pacha illarimuyta Dios yupaychana wasiman haykuspanku, yachachirqanku. Chay hina kashanankamataq, hatun umalliq saserdoteqa, paywan kaqkunapiwan rispanku Konsilio Sanedrinta, hinallataq Israelpa wawankuna manta llapan kurak runakunatawan waqyamurqanku. Hinan apostolkunata apamunankupaq karselman soldadokunata kacharqanku.
[22] Soldadokunataq chayaspanku, paykunata karselpi mana tarirqankuchu. Hinaqtinmi, kutispanku, kay hinata willarqanku.
[23] Nirqankutaq: —Karseltaqa allin wisq'asqatan tarimuyku. Hinallataq punkukunapi guardiakunatapas sayashaqtan tarimuyku. Kichaqtiykutaqmi ichaqa, mana pitapas ukhupi tarimuykuchu, nispanku.
[24] Chay simikunata uyarispankutaqmi, hatun umalliq saserdotepas, Dios yupaychana wasipi guardiaq kapitanninpas, hinallataq umalliq saserdotekunapas iskayrayarqanku. Hinan imaynaraq chay kananmanta tapunakurqanku.
[25] Ichaqa hukmi hamuspan, kayta paykunaman willarqan: —Qhawariychis, karselman wisq'asqaykichis runakunan, Dios yupaychana wasipi kashanku. Paykunan llaqta runakunaman yachachishanku, nispa.
[26] Hinaqtinmi Dios yupaychana wasipi guardiaq kapitanninqa, soldadokunawan rirqan. Llaqta runakunaq rumiwan ch'aqenankuta manchakusqankuraykutaqmi ichaqa, thak kayllapi paykunata apamurqanku.
[27] Apamuspankutaqmi, Konsilio Sanedrinpa ñawpaqenman apostolkunata sayaykuchirqanku. Hinan hatun umalliq saserdoteqa, paykunata tapurqan.
[28] Nirqantaq: —¿Manachu amaña chay sutipi yachachinaykichispaq allinallintapuni kamachirqaykiku? ¡Qhawariychis, qankunaqa Jerusalén llaqtamanmi yachachikuyniykichiswan hunt'aykuchishankichis! ¡Hinallataqmi chay runaq yawarninmantapas ñoqaykuman wikch'uykuyta munashankichis! nispa.
[29] Hinan Pedroqa, apostolkunapiwan kutichispa nirqanku: —Runakunamanta ñawpaqtaqa, Diosta kasukuymi aswan allinqa.
[30] Qankunaqa, k'aspipi warkuspaykichismi, Jesusta wañuchirqankichis. Ichaqa taytanchiskunaq Diosninmi, paytaqa kawsarichimpurqan.
[31] Payllatataqmi Diosqa, paña ladonman Kamachikuqta, hinallataq Qespichiqta hinapuni altoman hoqarirqan. Israel llaqtaq yuyayninta t'ikrananpaq, hinallataq huchankunata pampachananpaqmi altomanqa hoqarirqan.
[32] Ñoqaykutaqmi, chay imaymanakunamanta paypa testigonkuna kayku. Hinallataqmi kasukuqninkunaman Diospa qosqan Santo Espiritunpas testigo kallantaq, nispanku.
[33] Paykunataqmi ichaqa, chayta uyarispanku, sinchita phiñakurqanku. Hinan wañuchiytapuni munarqanku.
[34] Hinaqtinmi Konsilio Sanedrinpi Gamaliel sutiyoq huk fariseo runa sayarirqan. Payqa, kamachikuy simita yachachiq, hinallataq llapa runakunaq allinpaq hap'inanmi karqan. Paymi apostolkunata hawaman huk ratulla lloqsichinankupaq kamachikurqan.
[35] Hinaqtinmi chaypi kashaqkunata nirqan: —Israel llaqtamanta qharikuna, kay runakunata imatapas ruwankichis chayqa, kuidakuychis.
[36] Kay p'unchaykuna ñawpaqtan Teudasqa, ‘Ancha reqsisqa runan kani,’ nispa, sayarirqan. Paywantaqmi yaqa tawa pachak qharikuna tantanakurqanku. Paytaqmi ichaqa, wañuchisqa karqan. Llapan payta qatikuqkunataqmi, ch'eqeripuspa tukukapurqanku.
[37] Teudaspa qhepantataqmi, runa yupay p'unchaykunapi, Galilea probinsiamanta Judaspas sayarillarqantaq. Paymi, qhepanta askha runakunata pusarqan. Hinan paypas wañuchisqa kallarqantaq. Llapan payta qatikuqkunataqmi ch'eqechisqa karqanku.
[38] Kunantaqmi ichaqa niykichis: ‘Chay runakunamanta t'aqakuychis, hinaspa kacharipuychis. Sichus chay yuyaykuy, otaq chay ruway runakunallamanta hamun chayqa, chinkaripullanqan.
[39] Ichaqa, sitaqchus Diosmanta hamun chayqa, manan atipayta atiwaqchischu. ¡Paqtataq, Dioswan maqanakushawaqchis!’ nispay, nispa.
[40] Chay hinapin, Gamalielpa nisqanta chaskirqanku. Chaymantataq apostolkunata waqyaykurqanku. Hinan soq'aykusqanku qhepata, Jesuspa sutinpi amaña rimarinankupaq kamachirqanku. Hinaspataqmi paykunata kacharipurqanku.
[41] Hinan apostolkunaqa, Konsilio Sanedrinpa kasqanmanta ripurqanku. Jesuspa sutinraykun paykunaqa p'enqayta muchunankupaq hina kasqaku karqan. Chayraykun ancha kusisqa lloqsipurqanku.
[42] Sapa p'unchaytaqmi, mana thanispa, Dios yupaychana wasipi, hinallataq wasin-wasinpi yachachispanku, Jesucristomanta allin willakuyta willarqanku.