[1] Pentekostés p'unchay chayamuqtintaq, llapallanku huk nisqalla huñunasqa kasharqanku.
[2] Hinan qonqayllamanta huk kunununuy tutuka wayraq phukusqan hina, hanaq pachamanta hamurqan. Hinaqtinmi maypichus tiyashasqanku wasiman hunt'aykurqan.
[3] Chay hina kaqtinmi, paykunapurapi, nina hina rakisqa nina laphsiykuna rikhurirqan. Hinan sapanka hukpa patanpi tiyaykurqan.
[4] Llapankutaqmi, Santo Espirituwan hunt'aykusqa karqanku. Hinan rimanankupaq Espírituq qosqanman hina, wak rimaykunapi rimayta qallarirqanku.
[5] Jerusalén llaqtapitaqmi, hanaq pachaq pachanpi tukuy suyukunamanta Dios manchakuq judío qharikuna tiyarqanku.
[6] Chay kunununuy kunununuqtintaq, askha runakuna huñukurqanku. Hinan sapanka hukninku, paykuna kikinkuq rimasqanku rimaypi rimaqta uyarirqanku. Chaymi paykunaqa, yuyayninkupi muspharisqa kasharqanku.
[7] Hinan yuyayninkupi utirayasqa, hinallataq muspharisqa kasharqanku. Hukkuna-hukkunawantaq ninakurqanku: —Qhawariychis. ¿Manachu kay rimaqkunaqa llapankupas Galilea probinsiamanta kanku?
[8] ¿Imaynataq sapanka hukninchisri nasesqanchis rimayninchispi rimaqta uyarinchis?
[9] Ñoqanchisqa, Parto suyumanta, Medo suyumanta, Elam suyumanta iman kanchis. Hinallataq Mesopotamia suyupi, Judea probinsiapi, Kapadosia probinsiapi, Ponto probinsiapi, hinallataq Asia probinsiapi tiyaqkunan kanchis.
[10] Hinallataqmi Frigia probinsiapi, Panfilia probinsiapi, Egipto suyupi, hinallataq Sirene llaqtaq wak ladonkunapi, Áfrika suyupi kashaq Libia probinsiapi tiyaqkunan kanchis. Judío runakunapas, judío runakunaman t'ikrakuqkunapas Roma llaqtapi tiyaqkunan kanchis.
[11] Kreta islamanta, hinallataq Arabia suyumantan kanchis. Diospa imaymana musphana ruway ruwasqankunatataqmi, rimasqanchis rimaykunapi rimasqankuta uyarinchis, nispanku.
[12] Llapankun yuyayninkupi mana kabesqa, hinallataq mana imanakuytapas atisharqankuchu. Hinaqtinmi hukkunahukkunawan ninakurqanku: —¿Imaninantataq kayri nin? nispanku.
[13] Wakintaq ichaqa, asipayaspa nirqanku: —Upi binollawanpas macharuqmá kasqaku, nispanku.
[14] Hinaqtinmi Pedroqa, chunka hukniyoq apostolkunapiwan sayarispan kunkayoqta paykunata nirqan: —Judea probinsiamanta qharikuna, hinallataq Jerusalén llaqtapi llapallan tiyaqkuna, kayta yachaychis, hinaspa rimasqayta uyariychis.
[15] Kinsa kaq orasllaraqmi kashan. Chaymi, qankunaq yuyaykusqaykichisman hinapas, paykunaqa mana machasqachu kashanku.
[16] Aswanmi Diospa rantinpi rimaq Joelqa chaymanta rimarqan.
[17] Nirqantaq: ‘Diosmi nin: “P'uchukay p'unchaykunapin tukuy runakunaman Espirituymanta hich'arimusaq. Hinan churiykichiskunapas, ususiykichiskunapas profetisanqaku. Waynaykichiskunataqmi, rikhuriykunata rikunqaku. Hinallataqmi yuyaqniykichiskunapas mosqhoykunata mosqhokunqaku.
[18] Cheqaqtapunin, qhari kamachiykunamanpas, warmi kamachiykunamanpas haqay p'unchaykunapi Espirituymanta hich'ariykamusaq. Hinaspataq profetisanqaku.
[19] Wichay hanaq pachapin musphana ruwaykunata qosaq. Uray hallp'a pachapitaqmi señalkunata, yawarta, ninata, q'oshñi phuyukunata ima qosaq.
[20] Manaraq hatun, hinallataq k'ancharishaq Señorpa p'unchaynin chayamushaqtinmi, intipas laqha-tutayaqman tukupunqa. Killapas yawarman tukupunqa.
[21] Pikunachus Señorpa sutinta waqyakuqmi, qespichisqa kanqa,” nispan,’ nispa. (Joel 2:28-32)
[22] Israel llaqtamanta qharikuna, kay simikunata uyariychis. Nazaret llaqtamanta Jesusqa, atiywan ruwaykunawan, musphana ruwaykunawan, señalkunawan ima qankunapurapi Diospa cheqaqchasqan runan karqan. Qankunaq yachasqaykichis hinapas, Diosqa paypa chawpintan chaykunata qankunapurapi ruwarqan.
[23] Qankunaman qosqa Jesustan waqllisqa runakunaman hap'ichirqankichis. Hinan chakataspa wañuchirqankichis. Chaytataqmi Diosqa, ñawpaqmantapacharaq unanchaspa yuyaycharqan, hinallataq ñawpaqmantapacharaq yacharqanpas.
[24] Wañuypa atiyninpi Jesuspa qhepananqa mananpunin atikurqanchu. Chaymi Diosqa, wañuymanta nanaykunata paskaraspan, payta kawsarichimpurqan.
[25] Davidpas Jesusmantaqa nillantaqmi: ‘Señortaqa ñawpaqeypipunin rikurqani. Mana imapas kuyurichiwananpaqtaqmi, paña ladoypi kashan.
[26] Chay hina kaqtinmi, sonqoy kusikurqan. Hinallataq qalluypas anchata kusikurqan. Aycha kuerpoypas aswantaraqmi suyakuypi samaykunqa.
[27] Manan almaytaqa Hadespichu saqenki. Nitaqmi Ch'uya kamachiykiq ismunantaqa munankichu.
[28] Kawsay ñankunataqa reqsichiwarqankin. Kaypi kasqaykiwantaqmi kusikuywan hunt'aykuwanki,’ nispa. (Sal. 16:8-11)
[29] Wawqellaykuna, kaytaqa cheqaqtan niykichis: ‘Ñawpa taytanchis Davidqa wañukapurqanmi, hinan p'ampapurqanku. Aya p'ampana t'oqonpas ñoqanchiswanmi kay p'unchaykama kashan,’ nispay.
[30] Davidqa Diospa rantinpi rimaqmi karqan. Diosqa, aychaman hina Davidpa mirayninmanta Cristota hatarichispa, kamachikuq tiyananpi tiyaykuchinanpaqmi prometirqan. Davidqa chayta yacharqanmi. Chaytaqa Diosmi huramentowan huraspan prometisqa karqan.
[31] Davidqa, ñawpaqmantañan rikushanmanpas hina, Cristoq kawsarimpunanmanta rimarqan: ‘Almanqa manan Hadespichu saqesqa karqan. Nitaqmi aycha kuerponpas ismurqanchu,’ nispan. (Sal. 16:10)
[32] ¡Chay Jesustan Diosqa kawsarichimpurqan! ¡Chaymantataqmi llapallayku testigokuna kayku!
[33] Diostaqmi, Jesustaqa paña ladonman hoqarirqan. Hinan payqa, Yayaq prometisqan Santo Espirituta chaskirqan. Chayraykun kay rikusqaykichistapas, uyarisqaykichistapas Jesusqa t'akaykamun.
[34] Davidqa, manan hanaq pachaman wicharqanchu.
[35] Ichaqa, pay kikinmi nin: ‘Señormi, Señorniyta nirqan: “Awqaykikunata chakiykiq pachanman churanaykama, paña ladoypi tiyaykuy,” nispan’, nispa. (Sal. 110:1)
[36] Chay kikin chakatasqaykichis Jesustan, Señor kananpaq, hinallataq Cristo kananpaq, Diosqa churarqan. Chaytayá cheqaqmantapuni llapan Israel llaqta miray runakuna yachachun, nispa.
[37] Chayta uyarispankutaqmi, sonqomantapuni llakikurqanku. Hinan Pedrota, wakin apostolkunatawan rimaykurqanku: —Wawqellaykuna, ¿imatataq ruwasaqkuri? nispanku.
[38] Pedrotaqmi paykunata nirqan: —Huchaykichiskuna pampachasqa kananpaq, yuyayman kutirikuychis. Hinaspa Jesucristoq sutinpi sapanka hukniykichis bautisakuychis. Hinan Santo Espírituq qokuyninta chaskinkichis.
[39] Qankunapaqwan, wawaykichiskunapaqwan, lliw karupi kashaqkunapaqwan, llapallan pikunatachus Señorninchis Diosqa waqyan, paykunapaqwanmi promesanqa kashan, nispa.
[40] Wak askha simikunawantaqmi, paykunaman willarqan, hinallataq kallpancharqan. Nirqantaq: —¡Kay waqllisqa miraymanta qespikuychis! nispan.
[41] Chaymi, kusikuywan chay simita chaskikuqkunaqa, bautisasqa karqanku. Hinan chay p'unchay, yaqapas kinsa waranqa runakuna yapakurqanku.
[42] Hinan apostolkunaq yachachikuynillanpipuni, hukkuna-hukkunawan huk sonqo kawsayllapipuni, t'antata phakmiyllapipuni, hinallataq Diosman parlayllapipuni kasharqanku.
[43] Apostolkunataqmi, askha musphana ruwaykunata, hinallataq señalkunata ruwarqanku. Hinan llapa runakunaqa mancharikurqanku.
[44] Llapan iñiqkunataqmi, kuskallapuni kasharqanku. Hinan tukuy imaymanankupas llapankuq nisqallapuni karqan.
[45] Hallp'ankutapas, kaqninkutapas bendespankun, sapankankuq pisichikusqankuman hina, llapaman rakirqanku.
[46] Sapa p'unchaymi paykunaqa, Dios yupaychana wasipi huk nisqalla kasharqanku. Sapankankuq wasinkupitaqmi t'antatapas phakmirqanku. Kusikuywan, hinallataq sumaq sonqo kaywanmi, mikhunatapas mikhurqanku.
[47] Diosta yupaychaspallapunin kasharqanku. Hinan llapa runakunaq allin rikusqan karqanku. Señortaqmi, sapa p'unchay iñiq t'aqaman qespisqakunata yapasharqan.