[1] Pablowan, Bernabewantaq, Ikonio llaqtapi judío runakunaq huñukunanku wasiman kuska haykurqanku. Hinan paykuna chaypi rimariqtinku, ancha askha judío runakuna, hinallataq Gresia suyumanta runakunaraq iñikapurqanku.
[2] Mana iñiyta munaq judío runakunataqmi ichaqa, wawqe-panakunaq kontrankupi mana-judío runakunata hatarichirqanku, hinallataq yuyayninkuta waqllichirqanku.
[3] Chaymi, mana manchakuywan willaspanku, chaypi unay tiempota qhepakurqanku. Señorpitaqmi sonqo churayninkuqa karqan. Paymi, allinpaq qokuy simikunata sut'incharqan. Hinan paykunaq chawpinta, señalkunatapas, musphana ruway ruwanakunatapas ruwachirqan.
[4] Hinaqtinmi llaqta runakunaqa t'aqanasqa kasharqanku. Wakinmi judío runakunawan kasharqanku, wakinninkutaq apostolkunawan kasharqanku.
[5] Chay mana-judío runakunapiwan, judío runakunapiwan, kamachikuqninkunapiwan kuskataqmi, paykunata k'aminankupaq, hinallataq rumiwan ch'aqenankupaq hatarirqanku.
[6] Chayta yacharuspankutaqmi paykunaqa, Likaonia probinsiapi kashaq Listra llaqtaman, Derbe llaqtaman, hinallataq tukuy chay suyuq muyuriqninkunaman ayqekurqanku.
[7] Chaypitaqmi allin willakuyta willaspa kasharqanku.
[8] Listra llaqtapitaqmi mana puriy atiq runa tiyasharqan. Payqa, nasesqanmantapachan such'u kasqa karqan. Manataqmi hayk'aqpas puririsqachu karqan.
[9] Paymi, Pabloq rimasqanta uyarisharqan. Hinan Pabloqa, allinta payta qhawaykuspan qhaliyachisqa kananpaq iñiynin kasqanta qhawarirqan.
[10] Hinan Pabloqa, kunkayoqta payta nirqan: —¡Chakiykiwan allinta sayariy! nispa. Hinan chay runaqa, saltaspan puririrqan.
[11] Hinaqtinmi, runakunaqa, Pabloq ruwasqanta rikuspanku, Likaonia rimaypi kunkayoqta qaparirqanku. Nirqankutaq: —¡Runa rikch'aypin dioskuna ñoqanchisman uraykamuwanchis! nispanku.
[12] Bernabetan Zeus sutiwan suticharqanku. Pablotataqmi Diospa siminta apasqanrayku Hermes sutiwan suticharqanku.
[13] Hinaqtinmi llaqtaman haykunapi Zeusta yupaychana wasipi kaq saserdoteqa, torokunata, hinallataq t'ika mayt'ukunata paykunaq llaqta punkunkuq qayllanman aparqan. Hinan llaqta runakunawan kuska sakrifisiokunata haywayta munarqanku.
[14] Chayta uyarispankutaq, apóstol Bernabepiwan, apóstol Pablopiwan p'achankutaraq llik'ikurqanku. Hinan chay askha runakunaq chawpinkuman qaparispa phawaykurqanku.
[15] Hinan nirqanku: —Qharikuna, ¿imanaqtinmi chaykunata ruwashankichis? Ñoqaykupas qankuna hina runakunallan kayku. Kay imaymana yanqa mana baleq kaqkunamanta, kawsashaq Diosman yuyayniykichista t'ikranaykichispaqmi allin willakuytaqa willaykiku. Paymi hanaq pachatapas, hallp'a pachatapas, mamaqochatapas, hinallataq tukuy chaykunapi kaqkunatapas kamarqan.
[16] Ñawpa runa-miraykunapipas Diosqa, llapa suyukunata kikinkuq munasqanku ñanpi purisqankutan hinallata qhawarqan.
[17] Chay hinaña kaqtinpas, payqa allinta ruwayninkunawanpunin pay kikinmantaqa sut'inchakurqan. Paymi, hanaq pachamanta parata qospasunkichis, tiemponpi ruruy tiempotapas qosunkichis. Sonqoykichistataqmi mikhunawan, hinallataq may kusikuywan hunt'aykuchirqasunkichis, nispanku.
[18] Chay imaymanakunata nispankun, askha runakunaq paykunaman sakrifisio haywanankuta sasatapuni hark'arqanku.
[19] Hinaqtinmi Antiokía llaqtamantawan, Ikonio llaqtamantawan wakin judío runakuna hamurqanku. Hinan chay askha runakuna Pablota rumiwan ch'aqenankupaq q'otullawan uyachirqanku. Ch'aqespankutaq wañusqa kananpaq yuyaspanku llaqta hawaman aysarparirqanku.
[20] Yachachisqakunataq ichaqa, payman muyurukurqanku. Hinan payqa, sayaripuspan llaqtaman haykurqan. Qhepantin p'unchaytaq Bernabepiwan Derbe llaqtaman puriripurqanku.
[21] Chay llaqtapitaqmi, allin willakuyta willarqanku. Hinallataq askha yachaqakuqkunamanpas yachachirqanku. Chay qhepatataq Listra llaqtaman, Ikonio llaqtaman, hinallataq Antiokía llaqtaman kutipurqanku.
[22] Yachachisqakunatataqmi sonqochaykurqanku, hinallataq iñiypi takyanankupaq kallpancharqanku. Nirqankutaq: —Diospa qhapaq suyunmanqa, anchata muchuspapunin haykunanchis, nispanku.
[23] Hinan sapanka iñiq t'aqapi kurak runakunata churarqanku. Ayunukunawan Diosman parlaspankutaqmi, iñisqanku Señorman paykunata hap'iykuchirqanku.
[24] Pisidia suyunta pasaspankutaq, Panfilia suyuman chayarqanku.
[25] Perge llaqtapi Diospa siminta willaspankutaq, Atalia llaqtaman uraykurqanku.
[26] Chaymantataq, Antiokía llaqtaman qochanta rirqanku. Chaypin Diospa ruwananta hunt'anankupaq, Diospa allinpaq qokuyninman hap'iykachisqa karqanku.
[27] Chayaspankutaq, iñiq t'aqata huñurqanku. Hinan Diospa tukuy imaymanakunata paykunaq chawpinta ruwasqanta willarqanku. Hinallataq imaynatachus Diosqa, iñiypa punkunta mana-judío runakunaman kicharisqantapas willallarqankutaq.
[28] Chaypitaqmi, yachachisqakunawan unayta qhepakurqanku.