[1] Chay p'unchaykunapin, yachachisqakunaqa anchatapuni yapakusharqanku. Chayraykun, griego simi rimaq judío runakunaqa, hebreo simi rimaq judío runakunaq kontranpi chhuchupakurqanku. Paykunapurapi kashaq biudakuna sapa p'unchay rakiypi pisinchasqa kashasqankumantan chhuchupakurqanku.
[2] Hinaqtinmi, chunka iskayniyoqnintin apostolkunaqa, chay askha yachachisqakunata waqyachirqanku. Hinan nirqanku: —Ñoqayku Diospa siminta saqespa, mesaman serbiyniykuqa manan allinchu.
[3] Chay hinaqa, wawqe-panallaykuna, qankuna ukhumanta allin kawsayniyoq, Santo Espirituqpas, yachaypapas hunt'aykusqan qanchis qharikunata akllaychis. Paykunata chay ruwayman churasunchis.
[4] Ñoqaykutaq Diosman parlayllapipuni, hinallataq Diospa siminta willayllapipuni kashasaqku, nispanku.
[5] Chay nisqanmi, llapallan chay askha runakunaq allin qhawarisqan karqan. Hinan Estebanta akllarqanku. Paymi iñiypa, hinallataq Santo Espírituq hunt'aykusqan qhari karqan. Hinallataq Felipeta, Prokorota, Nikanorta, Timonta, Parmenasta, Nikolasta ima akllarqanku. Nikolasqa, judío runakunaq religionninman t'ikrakampuq, Antiokía llaqtamantan karqan.
[6] Paykunatan, apostolkunaq ñawpaqenman pusamurqanku. Hinan Diosman parlaspanku, paykuna pataman makinkuta churaykurqanku.
[7] Hinan Jerusalén llaqtapi Diospa simin wiñarqan. Yachachisqakunapas aswan-aswantaraqmi anchatapuni askhayarqan. Hinallataq ancha askha saserdotekunapas iñikapurqanku.
[8] Estebanqa, iñiywan, hinallataq atiywan hunt'aykusqan karqan. Chaymi hatun musphana ruwaykunatapas, hatun señalkunatapas runakunapurapi ruwarqan.
[9] Hinan ‘Kacharichisqa’ nispa sutichasqa judío runakunaq huñukunanku wasipi, Sirene suyumanta kaqkunaq, Alejandría llaqtamanta kaqkunaq, Silisia probinsiamanta kaqkunaq, hinallataq Asia probinsiamanta kaqkunaq wakinninku sayarirqanku. Paykunan Estebanwan churanakurqanku.
[10] Ichaqa manataqmi Estebanpa yachaynintapas, rimasqan espiritutapas atipayta atirqankuchu.
[11] Hinaqtinmi: ‘Moisespa kontranpi, hinallataq Diospa kontranpi k'arak k'amiy simikunata rimaqtan uyariyku,’ nispa ninankupaq, huk runakunaman qolqeta lluk'irurqanku.
[12] Paykunan, llaqta runakunatapas, kurak runakunatapas, kamachikuy simita yachachiqkunatapas hatarichirqanku. Hinan Estebanpa kontranpi hatarirqanku. Hap'ispankutaq, Konsilio Sanedrinman aparqanku.
[13] Chaymantataq, falso testigokunata Konsilio Sanedrinpa ñawpaqenman sayaykuchirqanku. Hinan chay falso testigokunaqa nirqanku: —Kay runan, ch'uya cheqaspa kontranpi, hinallataq Kamachikuy Simiq kontranpi k'arak k'amiy simikunata rimayta manapuni sayk'unchu.
[14] Nintaqmi: ‘Nazaret llaqtamanta Jesusmi kay cheqasta thuninqa, hinallataq Moisespa ruwaykunata saqewasqanchiskunatapas t'ikranqa,’ nispan. Chay hina rimaqtan uyariyku, nispanku.
[15] Hinaqtinmi, llapallan Konsilio Sanedrinpi tiyashaqkunaqa, Estebanta allintapuni qhawaykurqanku. Hinan uyanta, huk angelpa uyanta hina rikurqanku.