[1] Judea probinsiantinpi kaq apostolkunapiwan, wawqepanakunapiwanmi, mana-judío runakunapas Diospa siminta chaskisqankuta uyarirqanku.
[2] Jerusalén llaqtaman Pedro wichaqtintaq, sirkunsisionmanta kaq judío runakunaqa paywan churanakurqanku.
[3] Hinan nirqanku: —¡Mana sirkunsidasqa runakunaq wasinman haykuspaykin, paykunawan mikhurqanki! nispanku.
[4] Hinan Pedroqa, kantollamanta willayta qallarirqan.
[5] Nirqantaq: —Jope llaqtapin ñoqaqa Diosman parlasharqani. Hinan huk mosqhoypi hina rikhuriyta rikurqani. Chay rikhuriypitaqmi, hanaq pachamanta huk q'epi hatun sábana hina, tawantin ch'ullpanmanta uraykachimusqa karqan. Hinan ñoqaq kasqaykama chayamurqan.
[6] Chayta allintapuni qhawaykuspaytaqmi, yuyaykurqani. Hinan hallp'a pachamanta tawa chakiyoq animalkunatawan, k'ita animalkunatawan, pampan suchuq animalkunatawan, phalaq animalkunatawan ima rikurqani.
[7] Chaymantataqmi huk kunkata uyarirqani. Nimuwarqantaq: ‘Pedro, sayariy. Wañuchispaykitaq mikhuy,’ nispa.
[8] Ñoqataqmi ichaqa nirqani: ‘¡Manapunin imaynallanmantapas Señor! Ñoqaq simiytaqa manan ima mana mikhuna kaqpas, nitaq qhelli kaqpas haykurqanchu,’ nispay.
[9] Hinaqtinmi hanaq pachamanta kunkaqa, iskay kutinpi kutichimuwarqan: ‘Diospa ch'uyanchasqantaqa ama mana mikhunapaq kaqta hinaqa qhawariychu nispa.
[10] Chayqa kinsa kutinkaman karqan. Hinan llapanpas hanaq pachaman wakmanta hoqarisqa kapurqan.
[11] Chayllamanmi kasqayku wasiman, Cesarea llaqtamanta ñoqaman kachamuwasqanku kinsa qharikunaqa chayamurqanku.
[12] Santo Espiritutaqmi ichaqa, ama iskayaspa paykunawan rinaypaq rimaykuwarqan. Ñoqawantaqmi kay soqta wawqekunapas rillarqankutaq. Hinan Kornelioq wasinman haykurqayku.
[13] Paytaqmi, imaynatachus wasinpi sayashaqta huk angelta rikurqan, hinallataq imatachus nirqan, chayta willawarqanku. Angelqa nisqan karqan: ‘Jope llaqtaman qharikunata kachay, hinaspa Pedro sutiwan sutichasqa Simonta waqyachimuy.
[14] Payllataqmi simikunata rimaykusunki. Chay simikunaq chawpintataqmi Diosqa qantapas, wasiykipi llapan kaqkunatapas qespichisunki,’ nispa.
[15] Rimayta qallariqtiytaqmi, imaynan qallariypi ñoqaykuman, chay hinallatataq paykunaq patankumanpas Santo Espíritu uraykamurqan.
[16] Hinaqtinmi Señorpa rimasqankunata yuyarirqani. Señorqa nirqanmi: “Cheqapaqmi Juanqa, unupi bautisarqan. Qankunataqmi ichaqa, Santo Espirituwan bautisasqa kankichis,” nispan.
[17] Chay hinaqa, imaynan ñoqanchis Señor Jesucristopi iñiqkunamanpas qowarqanchis, chay hinallatataqmi Diosqa, kikin qokuyllatataq paykunamanpas qollarqantaq. Hina kaqtinqa, ¿Diosta hark'akunaypaq pitaq ñoqari karqani? nispa.
[18] Chay imaymanakunata uyarispankutaq, upallakapurqanku. Hinan Diosta yupaycharqanku. Nirqankutaq: —¡Chay hinaqa, mana-judío runakunamanpas Diosqa kawsaypaq yuyayman kutirikuyta qosqamá! nispanku.
[19] Estebanpa p'unchayninkunapi qatiykachayraykun ch'eqerichisqa karqanku. Hinan Fenisia suyukama, Chipre islakama, hinallataq Antiokía llaqtakama rirqanku. Paykunaqa, manan pimanpas simita willarqankuchu. Aswanpas judío runakunallamanmi willarqanku.
[20] Paykuna ukhupitaqmi ichaqa, Chipre islamanta, hinallataq Sirene suyumanta qharikuna kasharqanku. Paykunan Antiokía llaqtaman haykurqanku. Hinan Señor Jesusmanta allin willakuykunata willaspanku, griego simita rimaq judío runakunaman rimaykurqanku.
[21] Señorpa makintaqmi, paykunawan kasharqan. Chaymi ancha askha runakuna iñikapurqanku, hinallataq Señormanpas kutirikapurqanku.
[22] Chay imaymanakunamanta willakuytataqmi, Jerusalén llaqtapi kaq iñiq t'aqaqa uyarirqan. Hinan Antiokía llaqtakama rinanpaq Bernabeta kacharqanku.
[23] Bernabeqa, Antiokía llaqtaman chayaspanmi, Diospa allinpaq qokuyninta rikuspa, anchatapuni kusikurqan. Hinan sonqowan Señorpi qaqata takyanankupaq llapallankuta kallpanchaykurqan.
[24] Payqa, allin runan karqan. Santo Espirituwanpas, iñiywanpas hunt'aykusqan karqan. Ancha askha runakunataqmi Señorman yapakurqanku.
[25] Chaymantataq Bernabeqa, Saulota maskhamunanpaq Tarso llaqtaman rirqan. Hinan payta tarispan, Antiokía llaqtaman pusarqan.
[26] Chaypitaqmi, iñiq t'aqawan watantin huñukurqanku. Hinallataq askha runakunaman yachachirqanku. Antiokía llaqtapitaqmi, yachachisqakunata chay p'unchaymantapacha ‘Cristianokuna’ nispa suticharqanku.
[27] Chay p'unchaykunapitaqmi, Diospa rantinpi rimaqkunamanta wakinninkuqa Jerusalén llaqtamanta Antiokía llaqtaman uraykurqanku.
[28] Chay uraykuqkunamanta hukninkutaqmi, Agabo sutiyoq karqan. Paymi sayarispan, Santo Espírituq chawpinta hallp'a pachantinpi hatun yarqay kananmanta sut'itapuni willakurqan. Chay yarqayqa Claudio Cesarpa p'unchayninkunapin karqan.
[29] Hinan yachachisqakunaqa, sapankankuq imankuchus kapusqanman hina, Judea suyupi tiyaq wawqe-panakunaman yanapakuyta apachinankupaq rimanakurqanku.
[30] Chay hinatapunitaqmi, kurak runakunaman Bernabepa, hinallataq Sauloq chawpinta apachispa ruwarqanku.