[1] Phisqa p'unchay qhepatataq, hatun umalliq saserdote Ananiasqa, wakin kurak runakunapiwan, judío runakunaq sayapakuqninku Tértulo sutiyoqpiwan rikhurirqanku. Paykunan Pabloq kontranpi hatun kamachikuqman willarqanku.
[2] Pablota waqyachimuqtintaqmi, Tertuloqa huchachayta qallarirqan. Hinan kamachikuqta nirqan: —Qan kaqtiykin kunan thak kayta tariyku. Hinallataq yuyaysapa kasqaykiraykun, imaymanakuna kay suyoq allinninpaq ruwakushan.
[3] Ancha respetana Felix, llapanmantan tukuy cheqaspi grasias niykiku.
[4] Ichaqa ama umayki nanachinaypaq, chanin sumaq sonqo kayniykiwan pisillapi uyariykuwanaykikupaqmi balikuyki.
[5] Kay runataqa, millay ñak'arichiq onqoy hina kasqantan tarimurqayku. Payqa teqsi muyuntinpi judío runakunata kamachikuqpa kontranpi hatarichiqmi. Hinallataq Nazaret llaqtamanta pantasqa t'aqaq umalliqnintaqmi kanpas.
[6] Hinallataqmi Dios yupaychana wasitapas qhellichayta yuyaykurqan. Ichaqa hap'imurqaykun. Kamachikuy Simiykuman hinataqmi, chaninchayta munarqayku
[7] Ichaqa, tribuno Lisiastaqmi hamuspa, makiykumantaña qechumuwarqanku.
[8] Hinan huchachaqninkunata qanpa ñawpaqeykipi rikhurinankupaq kamachimurqan. Qan kikiykitaqmi imamantachus huchachasqaykuta tapuspaykiña llapan chay imaymanakunataqa allinta yachayta atinki, nispa.
[9] Hinan judío runakunapas Tértuloq nisqanta nillarqankutaq: —Tértuloq nisqanqa chay hinapunin karqan, nispanku.
[10] Hinan kamachikuqqa, Pabloq rimarinanpaq señasta qorqan. Kutichispantaq Pabloqa nirqan: —Unay watakunaña kay suyupi chaninchaq kasqaykita yachaspaymi, ancha kusikuywan kaykunamanta rimariykuspay defiendiykukusaq.
[11] Jerusalén llaqtaman Dios yupaychaq risqayqa chunka iskayniyoq p'unchayllaraqmi kashan. Cheqaqchus icha manachus chayta yachanaykipaq, qan kikiykipuni allinta tapupakuy.
[12] Manataqmi Dios yupaychana wasipi piwanpas churanakushaqtachu tarimuwarqanku. Hinallataq manan judío runakunaq huñukunanku wasikunapipas, nitaq kikin llaqtapipas kamachikuqpa kontranpi runakunata hatarichishaqtapaschu tarimuwarqanku.
[13] Manallataqmi imakunamantachus kunan yanqa huchachashawanku, chaytaqa ñawpaqeykipi niyta atiwankumanchu.
[14] Chaywanpas kayta willakusqayki: ‘Machulaykunaq Diosnintan ñoqaqa serbikuni. Hinallataq tukuy Kamachikuy Simipi imaymana qelqasqa kaqkunata, hinallataq Diospa rantinpi rimaqkunaq qelqasqankutapas kreellanitaqmi. Chay Ñantataqmi, judío runakunaqa pantasqa t'aqan nispa sutiyanku.
[15] Diospin suyakuyniyqa kashan. Chay hinallataqmi, paykuna kikinkupas Diospi suyakuyniyoq kashallankutaq. Chanin runakunaq, hinallataq mana chanin runakunaq wañusqakunapuramanta kawsarimpunankutaqa kreenin. Paykunapas chay hinallatataqmi kreenku,’ nispay.
[16] Chaymi, Diospa ñawpaqenpi, hinallataq runakunaq ñawpaqenpipas mana imamanta huchachana, ch'uya konsiensiayoq kanaypaq kallpachakushanipuni.
[17] Askha watakunamantañataqmi limosnaytapas, ofrendaytapas suyuyman qonaypaq chayamurqani.
[18] Chayta ruwashaqtiytaqmi Asia probinsiamanta wakin judío runakunaqa, Dios yupaychana wasipi ch'uyanchasqata tarimuwarqanku. Ichaqa manataqmi askha runatawanchu, nitaq ch'aqwashaqtapaschu tarimuwarqanku.
[19] Sichus imapas ñoqaq kontraypi huchachawayninku kan chayqa, paykuna kikinkun ñawpaqeykipi rikhurinanku, hinaspa niwananku.
[20] Otaq sichus ñoqaq ima mana chanin ruwasqaytapas Konsilio Sanedrinpa ñawpaqenpi kashaqtiy tarirqanku chayqa, paykuna kikinku chay runakuna niwachunku.
[21] Aswanmi paykunaq qayllankupi kashaspayqa, kayllata kunkayoqta nirqani: ¡Wañukapuqkunaq kawsarimpuyninta suyakusqallaymantan qankunaqa chaninchashawankichis! nispay.
[22] Hinaqtinmi Felixqa, chay Ñanmanta sut'itapuni willasqa kaspan, chay huchachasqankuta qolluchirqan. Nirqantaq: —Tribuno Lisias uraykamuqtinñan chay huchachasqaykichistaqa allinta qhawarisaq, nispan.
[23] Hinan senturionta, allintapuni Pablota kuidananpaq kamachirqan. Ichaqa karselpi kacharisqalla kananpaq, hinallataq reqsisqankunapas payta watukuq hamuqtinku serbinankuta ama hark'ananpaqwan kamachirqan.
[24] Pisi p'unchaykunamantataq Felixqa, judía warmin Drusilapiwan hamurqanku. Hinan Felixqa, Pablota apamunankupaq kamachikurqan. Chaymi payqa, Jesucristopi iñiymanta uyarirqan.
[25] Chanin kawsaymantawan, kuerpota kamachiymantawan, hamuq taripay p'unchaymantawan, Pablo rimariqtintaq Felixqa, ancha mancharisqa kutichirqan: —Kunanqa ripullayraq. Hayk'aqchá munasaq, chayña waqyachimusayki, nispan.
[26] Chaywanpas Felixqa, kacharipuyta munaspanmi, Pabloq askha qolqe lluk'iykunanta suyakusharqan. Chaymi paywan rimananpaq sapa ratu waqyachimuq.
[27] Iskay wata hunt'akuqtintaqmi, Felixqa, tiyananpi Porsio Festota saqerqan. Payqa, judío runakunamanta imallatapas chaskiykukuyta munaspanmi, Pablota karselpi wisq'asqallatapuni saqerqan.