[1] Chaykuna qhepatataq Pabloqa, Atenas llaqtamanta puririspan, Korinto llaqtaman rirqan.
[2] Chaypitaqmi, Aquila sutiyoq huk judío runata tarirqan. Payqa, Ponto suyumantan karqan. Hinallataq esposan Priscilawan chayllaraq Italia suyumanta chayamusqaku karqan. Rey Claudion llapan judío runakunata Roma llaqtamanta qarqonankupaq kamachikusqa karqan. Chaymi Pabloqa paykunaman rirqan.
[3] Karpakuna ruwaymi llank'anankuqa karqan. Chaymi, kasqan llank'anayoqkama kasqankurayku, paykunawanqa qhepakurqan. Hinan kuska llank'arqanku
[4] Sapa sábado p'unchaytaqmi, judío runakunaq huñukunanku wasipi churanakurqan. Hinan judío runakunatapas, Gresia suyumanta kaqkunatapas uyachirqan.
[5] Pabloqa, Espiritumanmi tukuy kayninta hap'iykuchikusqa karqan. Chaymi Silaswan, Timoteowan Masedonia probinsiamanta uraykamuqtinku, payqa judío runakunaman Jesusqa Cristopuni kasqanta willaspa qhepakurqan.
[6] Paykuna Pabloq kontranpi rimapakuqtinku, hinallataq k'arakta k'amiqtinkutaqmi ichaqa, p'achanta saq'akuspa paykunata nirqan: —¡Huchaykichiskunaqa qankuna patapi kachun! ¡Ñoqaqa manan huchayoqñachu kani! Kunanmantaqa mana-judío runakunamanmi risaq, nispa.
[7] Hinan chaymanta ripuspan, Justo sutiyoq runaq wasinman haykurqan. Payqa, Dios manchakuq runan karqan. Wasintaq, judío runakunaq huñukunanku wasi qayllallapi kasharqan.
[8] Judío runakunaq huñukunanku wasipi umalliq Krispotaqmi, llapa familiantin Señorpi iñikapurqanku. Hinallataqmi Korinto llaqtamanta askha runakunapas uyarispanku, iñikapurqanku, hinallataq bautisakapurqanku.
[9] Hinaqtinmi Señorqa tutapi huk rikhuriypa chawpinta Pablota nirqan: —Ama manchakuychu, aswanpas rimallaypuni, amataq upallaychu.
[10] Ñoqaqa qanwanpunin kashani. Manataqmi pipas mana allinta ruwanasunkipaqqa makinta churasunkichu. Kay llaqtapiqa hatunpunin llaqtay kashan, nispa.
[11] Hinan Pabloqa, wata soqta killan paykuna ukhupi Diospa siminta yachachispa qhepakurqan.
[12] Akaya probinsiapi Galión Prefecto kashaqtintaqmi ichaqa, judío runakuna huk nisqalla Pabloq kontranpi hatarirqanku. Hinaspataq chaninchana cheqasman aparqanku.
[13] Nirqankutaq: —¡Kay runan, Kamachikuy Simita p'akispa, huk hinanmanta Diosta hatunchanapaq runakunata uyachishan! nispanku.
[14] Pablo rimarinanña kashaqtintaq, Galionqa judío runakunata nirqan: —Yaw judío runakuna, ima mana allin ruwaymantapas, otaq runa wañuchiymantapas kallaqtinmi, uyariykichisman.
[15] Ichaqa sichus rimaykunallamanta, sutikunallamanta, hinallataq kamachikuy Simiykichiskunallamanta chayqa, qankuna kikiykichis chaytaqa qhawariychis. Ñoqaqa manan chaykunamanta chaninchaq kaytaqa munanichu, nispa.
[16] Hinan chaninchana cheqasmanta paykunata qarqorqan.
[17] Hinaqtinmi llapan Gresia suyumanta kaqkunaqa, judío runakunaq huñukunanku wasipi umalliq Sostenesta hap'irqanku. Hinan chaninchana cheqaspa qayllanpi maqarqanku. Galionmantaq ichaqa, mana imapas chaykunamanta qokurqanchu.
[18] Pablotaqmi ichaqa, askha p'unchaykunatawanraq chaypi qhepakurqan. Hinamantataqmi, chaypi kashaq wawqe-panakunamanta despidikuspan Siria suyuman barkapi rirqan. Priscilapas, Aquilapas paywanmi rillarqankutaq. Huk promesatan Pabloqa ruwasqa karqan, chaymi Senkrea llaqtapi chukchanta rutuchikurqan.
[19] Éfeso llaqtaman chayaspankutaq, chaypi Priscilatawan Aquilatawan saqeykurqan. Paytaqmi ichaqa, judío runakunaq huñukunanku wasiman haykuspan, judío runakunawan churanakurqan.
[20] Judío runakunataq ichaqa, paykunawan aswan unay tiempotawanraq qhepakunanpaq balikurqanku. Pablotaq mana munarqanchu.
[21] Aswanmi, paykunamanta despidikuspan nirqan: —Jerusalén llaqtapi fiestan qayllaykamushanña. Chaymi, chay fiestamanqa rinaypuni kashan. Ichaqa, sichus Dios munanqa chayqa, yapamantan qankunaman kutiramusaq, nispa. Hinan Éfeso llaqtamanta barkapi puririqan.
[22] Cesarea llaqtaman chayaspantaq, iñiq t'aqata napaykamunanpaq Jerusalén llaqtaman wicharqan. Chaymantataq Antiokía llaqtaman uraykurqan.
[23] Chaypi huk tiempo pasaspantaq, kantullanmanta Galasia suyunta, hinallataq Frigia suyunta purirqan. Chay hinapin, llapallan yachachisqakunata kallpancharqan.
[24] Hinan Éfeso llaqtaman Apolos sutiyoq huk judío runa chayamurqan. Payqa, Alejandría llaqtamantan karqan. Hinallataqmi payqa, allintapuni rimay yachaq, Qelqakunatapas allinta yachaq runa karqan.
[25] Apolosqa, Señorpa ñanninpi allin yachachisqan karqan. Juanpa bautismollanmantaña yacharqan chaypas, payqa espiritunpi kallpachasqan kaspanmi, Señormanta imaymanakunatapas iman kaqllatapuni rimarqan, hinallataq yachachirqan.
[26] Judío runakunaq huñukunanku wasipin, Apolosqa, mana manchakuspan Diospa siminmanta willayta qallarirqan. Priscilawan, Aquilawan uyarispankutaq, sapaqllaman waqyaspanku aswan sut'itapuni Diospa ñanninmanta willarqanku.
[27] Apolosqa, Akaya probinsiamanmi riyta munarqan. Chaymi wawqe-panakunaqa payta kallpancharqanku. Yachachisqakuna payta chaskinankupaqtaqmi, paykunaman qelqarqanku. Hinan chayman chayaqtin, allinpaq qokuypa chawpinta iñiqkunapaq ancha yanapay karqan.
[28] Jesusqa Cristopuni kasqantan Qelqakunaq chawpinta Apolosqa reqsichirqan. Hinan ancha atiywan rimaspa, judío runakunata, runa qayllapi upallachirqan.