[1] Yaw Teófilo, ñawpaq kaq qelqa qelqasqaypin, Jesusqa tukuy imakunatachus ruwayta qallarirqan, hinallataq yachachirqanpas, chaykunamanta qelqarqani.
[2] Payqa hanaqpi chaskisqa kanan p'unchaykaman chaykunata ruwarqan, hinallataq yachachirqan. Akllakusqan apostolkunaman Santo Espírituq chawpinta kamachikuykunata qosqan qhepamanmi chayqa karqan.
[3] Apostolkunallamantaqmi ñak'arisqan qhepatapas, askha cheqaq sut'i pruebakunawan kawsashaq rikhurirqan. Tawa chunka p'unchaynintintaqmi paykunamanqa rikuchikurqan. Hinan Diospa qhapaq suyunmanta paykunaman yachachirqan.
[4] Paykunawan kuska kashaspantaq, Jerusalén llaqtamanta ama maymanpas ripunankupaq, aswanpas Yayaq promesan hunt'ananta suyakunankupaq kamachirqan. Nirqantaq: —Qankunaqa, chay promesamanta rimaqta uyariwarqankichismi.
[5] Cheqaqtapunin Juanqa unupi bautisarqan. Qankunan ichaqa, pisi p'unchaykunallamanta Santo Espirituwan bautisasqa kankichis, nispa.
[6] Hinaqtinmi, chaypi huñunasqa kashaqkunaqa, Jesusta tapurqanku: —Señor, ¿kay tiempopichu Israel suyupaq qhapaq suyuta wakmanta sayarichinki? nispanku.
[7] Paytaqmi kutichispa nirqan: —Tiempokunapas, p'unchaykunapas Yayaq kikinpa kamachikuyniyoq kayninman hina churasqan kanku. Chayta yachayqa, manan qankunamanchu tupasunkichis.
[8] Ichaqa, maypachachus Santo Espíritu qankunaman hamunqa, chaymi atiyta chaskinkichis. Hinan Jerusalén llaqtapi, llapan Judea probinsiapi, Samaria probinsiapi, hinallataq kay pachaq k'uchunkamaraq, ñoqamanta sut'inchaqkuna kankichis, nispa.
[9] Chay imaymanakunata nisqan qhepatataq, paykuna rikushaqtinku, Jesusqa hoqarisqa karqan. Hinan ñawinkumanta pakaykuspan, huk phuyu payta chaskirqan.
[10] Jesús ripushaqtinmi, yachachisqankunaqa hanaq pachata allintapuni qhawasharqanku. Hinan chayllaman, paykunaq kasqankupi yuraq p'achayoq iskay qharikuna rikhurirqanku.
[11] Hinan iskaynin qharikunaqa, yachachisqakunata nirqanku: —Galilea probinsiamanta qharikuna, ¿imanaqtinmi hanaq pachata qhawaspa kashankichis? Qankunapuramanta hanaq pachaman hoqarisqa karqan chay kikin Jesusmi, wakmanta kutimunqa. Imaynatachus hanaq pachaman ripusqanta rikurqankichis, chay hinallatataqmi kutimunqapas, nispanku.
[12] Hinaqtinmi, Olibos nisqa orqomanta Jerusalén llaqtaman kutimpurqanku. Chay orqoqa, Jerusalén llaqta qayllapin, huk sábado p'unchay puriyllapi tarikun.
[13] Hinan yachachisqankunaqa, Pedropas, Jakobopas, Juanpas, Andrespas, Felipepas, Tomaspas, Bartolomepas, Mateopas, Alfeoq churin Jakobopas, Selote nisqa t'aqamanta Simonpas, Jakoboq wawqen Judaspas, llaqtaman haykuspanku, altos wasiman wicharqanku. Chaypitaqmi qorpachasqa kasharqanku.
[14] Llapallankun paykunaqa, Diosman parlaspallapuni, hinallataq mañakuspallapuni huk yuyaylla kasharqanku. Paykunawan kuskataqmi, warmikunapas, Jesuspa mamitan Mariapas, wawqenkunapas kasharqanku.
[15] Chay p'unchaykunapitaqmi, yaqapas pachak iskay chunkan runakuna huñunakurqanku. Hinan Pedroqa, wawqekunaq chawpinkupi sayariykuspa rimarqan.
[16] Nirqantaq: —Wawqellaykuna, Qelqakunaqa hunt'akunanpunin karqan. Chay Qelqakunapitaqmi, Santo Espirituqa, Davidpa siminpa chawpinta ñawpaqmantaña Jesusta hap'iqkunaq pusamuqninku Judasmanta rimarqan.
[17] Judasqa, ñoqanchiswan kuska yupasqan karqan. Hinallataq ñoqanchispa llank'aqmasinchismi karqan.
[18] Payqa, mana chanin ruwasqanmanta qolqe chaskisqanwanmi, huk chakrata rantirqan. Umanpanmanta urmayuspantaqmi, kuskanmanta phatarqan. Hinan tukuy ch'unchulninkunaraq wakwarqan.
[19] Tukuy Jerusalén llaqtapi tiyaqkunataqmi, chaytaqa yacharqanku. Chay hina kaqtinmi, chay chakrataqa, rimayninkupi ‘Akéldama’ nispa sutiyarqanku. ‘Akéldama’ ninantaqa ‘Yawar chakra’ ninantan nin.
[20] Chay hinaqa, Salmos qelqapipas qelqasqan kashan: Tiyasqan cheqas purunman tukupuchun, Amataq pipas chaypi tiyaq kachunchu, nispa. (Sal. 69:25) Nillantaqmi: Huk runataq ruwanantapas ruwachun, nispan. (Sal. 109:8)
[21] Chay hina kaqtinqa, ñoqanchispurapin Señor Jesusqa haykurqan, hinallataq lloqsirqan. Tukuy chay tiempokunapi ñoqanchiswan kuska kaqkunamanta huk akllasqa kachun.
[22] Pikunachus Juanpa bautisasqanmantapacha qallarirqanku, hinaspataq ñoqanchispuramanta Jesús hoqaripusqa kaspa, hanaqpi chaskiykusqa kasqan p'unchaykama kaqkunamanta kachun. Jesuspa, kawsarimpusqanmanta ñoqanchiswan huk testigoqa kananpunin, nispa.
[23] Hinan iskay runakunata akllarqanku. Barsabás sutiyoq Joseta akllarqanku. Paymi Justo sutiwan sutichasqa karqan. Hinallataqmi Matiastapas akllallarqankutaq.
[24] Hinan Diosman parlaspanku nirqanku: —Señor, qanqa llapallaq sonqontan reqsinki. Kay iskayninkumanta mayqenninku akllasqaykita rikuchiwayku.
[25] Paymi kay llank'ayman haykunqa. Hinallataqmi apóstol hina llank'ananpaq haykunqa. Chay llank'anamantan Judasqa, kamachikuyta p'akispa, pay kikinpa ripunan cheqasman ripunanpaq chinkapurqan, nispa.
[26] Hinan paykunapaq sortiarqanku. Suertetaqmi Matiasman tuparqan. Hinan payqa, chunka hukniyoqnintin apostolkunawan yupasqa karqan.