[1] Korinto llaqtapi Apolos kashanankamataq, Pabloqa wichay suyukunanta purimurqan. Chaymantataq, Éfeso llaqtaman uraykurqan. Hinan yachachisqakunata chaypi tarirqan.
[2] Hinaqtinmi paykunata tapurqan: —¿Iñikapushaspaykichis, Santo Espirituta chaskirqankichischu? nispa. Paykunataq kutichirqanku: —Santo Espirituqa kanchus icha manachus, chaytaqa manapunin uyarillarqaykupaschu, nispanku.
[3] Hinaqtinmi paykunata tapullarqantaq: —¿Imayna bautismopi bautisasqataq karqankichisri? nispa. Paykunataq kutichirqanku: —Juanpa bautismonpin, nispanku.
[4] Hinan Pabloqa nirqan: —Juanqa, yuyayman kutirikuy bautismowanmi runakunata bautisarqan. Paypa qhepanta hamuq, Cristo Jesuspi iñinankupaqmi bautisarqan, nispan.
[5] Chayta uyarispankutaqmi, yachachisqakunaqa Señor Jesuspa sutinpi bautisasqa karqanku.
[6] Yachachisqakunaman Pablo makinta churaykuqtintaq, Santo Espirituqa paykunaman hamurqan. Hinan wak simi rimaykunapi rimarqanku, hinallataq profetisarqanku.
[7] Llapan qharikunataq, yaqa chunka iskayniyoq hina karqanku.
[8] Kinsa killantinmi Pabloqa, judío runakunaq huñukunanku wasiman haykuspan, mana manchakuspa Diospa siminmanta willarqan. Hinan Diospa qhapaq suyunmanta churanakurqan, hinallataq uyachiyta munarqan.
[9] Wakintaq ichaqa, chuchuchakurqanku, hinan lliw runakunaq ñawpaqenpi Ñanmanta mana allinta rimaspanku, mana kreeyta munarqankuchu. Chaymi Pabloqa, paykunamanta t'aqakapurqan. Hinaspataq yachachisqakunata wak ladoman pusarqan. Hinan Tirano nisqa sutiyoq runaq yachay wasinpi sapa p'unchay churanakurqan.
[10] Iskay watantinmi chaytaqa ruwarqan. Chay hinapin, Asia probinsiapi llapallan tiyaqkunaqa, judío runakunapas, mana-judío runakunapas Señor Jesuspa siminta uyarirqanku.
[11] Diosqa, Pabloq makinpa chawpintan mana hayk'aq rikusqa kaqta, ancha atiywan ruwanakunata ruwarqan.
[12] Chay hinapin Pabloq llamisqan pañuelokunatawanraq, otaq paypa mandilninkunatawanraq onqosqakunaq patanman churaykunankupaq aparqanku. Hinan onqoyniyoqkunapas qhaliyapurqanku, hinallataq millay espiritukunapas lloqsipurqanku.
[13] Millay espirituta qarqospa, llaqtan-llaqtanta puriq wakin judío runakunataqmi ichaqa, Señor Jesuspa sutinta hoqarispanku, millay espirituyoq runakunata nirqanku: —¡Pabloq willasqan Jesuspa sutinpin lloqsinaykichispaq kamachiykiku¡ nispanku.
[14] Chayta ruwaqkunaqa, Eseba sutiyoq runaq qanchisnintin churinkunan karqanku. Payqa saserdotekunaq umalliqnin judío runan karqan.
[15] Chay millay espiritutaqmi ichaqa, kutichispan paykunata nirqan: —Jesustaqa reqsinin. Pichus Pabloq kasqantapas yachanin. ¿Qankunari, pikunataq kankichis? nispa.
[16] Hinan millay espirituyoq runaqa, phawaykuspan, patankuman wikch'uykukurqan. Hinan paykunamanta, aswan kallpayoq kaspa, paykunata atiparqan. Chaymi chay wasimanta mana p'achayoq, hinallataq k'irisqa ayqekurqanku.
[17] Llapan Éfeso llaqtapi tiyaq judío runakunapas, mana-judío runakunapas, chay hina pasasqantan yacharurqanku. Hinan paykunaqa llapanku mancharikurqanku. Señor Jesuspa sutintataq hatuncharqanku.
[18] Askha iñiqkunataqmi, ñawpa mana allin ruwayninkuta willakapuspanku, hinallataq sut'inchakapuspanku hamurqanku.
[19] Chay hinallataqmi, askha layqa runakunapas, libronkuta apamuspanku, llapa runa rikushaqtin, kanapurqanku. Chay librokunaq balorninqa, phisqa chunka waranqa qolqen karqan.
[20] Chay hinapin, Señorpa siminqa aswantaraq wiñarqan, hinallataq ancha atiywan mast'arikurqan.
[21] Chay imaymanakuna hunt'akuqtintaq, Jerusalén llaqtaman rinanpaq Pabloqa espiritunpi yuyaykurqan. Masedonia probinsianta, hinallataq Akaya probinsianta rispanña, Jerusalén llaqtaman rinanpaqmi yuyaykukurqan. Nirqantaq: —Jerusalén llaqtapi kasqay qhepaman, Roma llaqtataqa rikuykunaypunin, nispa.
[22] Hinan Masedonia probinsiaman Timoteotawan, Erastotawan kacharqan. Pablotaq ichaqa, pisi tiempollata Asia probinsiapi qhepakurqan. Timoteowan, Erastowanqa iskayninkupas, Pabloq yanapaqninkunan karqanku.
[23] Chay tiempopitaqmi Ñanmanta sinchi hatun ch'aqwaray karqan.
[24] Huk plateron Demetrio sutiyoq karqan. Paytaqmi llank'aqmasinkunata huñurqan. Paykunaqa qolqemanta Dianaq templochankunatan ruwarqanku. Hinan paykunaqa anchata qolqechakurqanku.
[25] Chaymi Demetrioqa llank'aqmasinkunatawan, chay hina llank'anallapitaq llank'aqkunatawan huñuruspa paykunata nirqan: —Qharikuna, kay llank'ananchiswan qhapaqyashasqanchis- taqa yachankichismi.
[26] Chay Pabloqa, rikusqaykichis hinapas, uyarinkichis hinapas, askha runakunatañan uyachinpas, hinallataq pantachinpas. Payqa ninmi: ‘Makiwan ruwasqa dioskunaqa, manan cheqaq dioskunachu,’ nispan. Chaytaqa, manan Éfeso llaqtallapichu, aswanpas yaqa llapan Asia probinsiantinpin ruwashan.
[27] Hinaqa, manan kay llank'anallanchischu pisichasqa kananpaqqa kashan, aswanpas Diana1 hatun diosaq templonpas pisipaq hap'isqa kananpaqmi kashan. Chaymantapas usqhayllamantaqchá Diana1 hatun diosaq hatun atiyniyoq kayninpas llapa runaq pisichasqan kapunqa. Paytaqa, Asia probinsiantinpi, hinallataq kay pachantinpi tiyaqkunapas yupaychankupunin, nispa.
[28] Chay simikunata uyarispankutaq, sinchita phiñakurqanku, hinallataq qaparirqanku: —¡Éfeso llaqtapi tiyaqkunaq Diananqa1 hatunmi! nispanku.
[29] Llapan llaqtantin runakunataqmi, pantachisqa kasharqanku. Chaymi, teatroman llapallanku phawaykuspanku, Gayotawan Aristarkotawan hap'irqanku. Paykunaqa Masedonia probinsiamanta, hinallataq Pabloq puriqmasinkunan karqanku.
[30] Pabloqa, askha runakunaq kasqanmanmi lloqsiyta munarqan. Yachachisqakunataqmi ichaqa, hark'arqanku.
[31] Asia probinsiapi wakin kamachikuqkunaqa, Pabloq amigonkunan karqanku. Paykunan, Pabloq teatroman ama haykunanpaq balikuqta kacharqanku.
[32] Chayman riqkunataqmi, ancha pantachisqa kasharqanku. Yaqa llapallankun imapaqchus huñukurqanku, chayta mana yacharqankuchu. Chaymi, hukkuna hukta qaparirqanku, wakinninkutaq wakta qaparirqanku.
[33] Hinaqtinmi askha runakunaq chawpinmanta Alejandro sutiyoq runata horqomurqanku. Paytan judío runakuna ñawpaqman tanqaspa apamusharqanku. Alejandrotaqmi ichaqa, llaqtaq ñawpaqenpi defiendikunanpaq rimariyta munaspa, makinwan señascharqan.
[34] Hinan paykunaqa, Alejandroq judío runa kasqanta yacharuspanku, llapanku huk kunkalla yaqa iskay orata hinapuni qaparirqanku. Nirqankutaq: —¡Éfeso llaqtapi tiyaqkunaq Diananqa hatunmi! nispanku.
[35] Hinan, qelqakunata qelqaqqa, askha runakunata upallachispanña nirqan: —Éfeso llaqtamanta qharikuna, Éfeso llaqtaqa hatun diosa Dianaq templon waqaychaqmi. Chay diosaqa, Zeusmanta uraykamuqmi. ¿Chaytari pitaq mana yachanchu?
[36] Mana negay atina kashaqtinqa upallanaykichispunin. Amataq imatapas hawan ukhuntaqa ruwaychischu.
[37] Mana templota suwakuq, nitaq diosaykichistapas k'arak k'amiq runakunatan apamurqankichis.
[38] Chay hinaqa, sichus Demetriopas, hinallataq llank'aqmasinkunapas mayqenpa kontranpipas huchatariyninku kan chayqa, chaninchana cheqasqa kicharayashanmi. Prefectokunapas kashanmi. ¡Hukkuna-hukkunawan huchachanakuchunku!
[39] Ichaqa sichus imatapas yachayta munankichis chayqa, hatun asambleapiñan sut'inchasqa kanqa.
[40] Kay huñunakuymanta pimanpas kutichikunanchispaqqa manan imaniytapas atisunmanchu. Chaytaq kunan p'unchay ch'aqway hatarisqanmanta huchachasqa kasunman, nispa.
[41] Hinan chayta nispan, huñukuqkunata despidipurqan.