[1] Hinaqtinmi hatun umalliq saserdoteqa nirqan: —¿Chaykunari, cheqaqpunichu? nispa.
[2] Estebantaq kutichispa nirqan: —Wawqellaykuna, hinallataq taytakuna, uyariykuwaychis. K'ancharishaq Diosninchismi, taytanchis Abrahamman Mesopotamia suyupi kashaqtinraq rikhurirqan. Chayqa, manaraq Harán llaqtapi tiyashaqtinmi karqan.
[3] Hinan Abrahamta nirqan: ‘Hallp'aykimanta, hinallataq familiaykikunamanta lloqsiy. Hinaspa chayraq rikuchinay hallp'aman ripuy,’ nispa. (Gen. 12:1)
[4] Hinaqtinmi Kaldea suyu runakunaq hallp'anmanta lloqsimpurqan. Hinaspan Harán llaqtapi tiyarqan. Taytan wañukapusqan qhepanmantaq, Diosqa chay llaqtamanta, kay kunan tiyasqaykichis hallp'aman apamurqan.
[5] Manataqmi chaypiqa chakinta saruykunallanpaqpas, Diosqa erensiata qorqanraqchu. Ichaqa paypas, hinallataq qhepa mirayninkunapas hallp'ata hap'ikunankupaqmi prometirqan. Chay tiempopin Abrahamqa, manaraq wawayoqchu karqan.
[6] Kay hinatataqmi Diosqa payta nirqan: ‘Mirayniykin wak suyupi mana llaqtayoq kanqa. Chaypitaqmi tawa pachak watata kamachi kaypi ñak'arichisqa kanqaku,’ nispa.
[7] Diosqa nillarqantaqmi: ‘Ñoqataqmi mayqen suyutachus serbinankutaqa chaninchasaq. Chay qhepatataqmi lloqsipunqaku. Hinan kay cheqaspi serbiwanqaku,’ nispa.
[8] Diosmi, sirkunsisión rimanakuyta Abrahamman qorqan. Chay hinapin Abrahamqa, Isaakta churiyarqan. Hinan pusaq kaq p'unchaypi sirkunsidarqan. Kikillantataqmi Isaakpas Jakobta ruwarqan. Jakobpas kasqallantataq chunka iskayniyoq ñawpa taytanchiskunata ruwallarqantaq.
[9] Ñawpa taytanchiskunan, enbidiamanta, Joseta Egipto suyuman benderqanku. Diostaqmi ichaqa, paywan kasharqan.
[10] Tukuy ñak'ariyninkunamanta kacharichispanmi, Diosqa allinpaq qokuyta, hinallataq yachay- tapas Egipto suyupi rey Faraonpa qayllanpi qorqan. Reytaqmi Egipto suyupi, hinallataq llapan wasinpi kamachikuq kananpaq Joseta churarqan.
[11] Hinaqtinmi, tukuy Egipto suyuman, hinallataq Kanaán suyumanpas yarqaypiwan, hatun ñak'ariypiwan chayamurqan. Taytanchiskunataqmi, mana mikhunata tarirqankuchu.
[12] Jakobtaqmi ichaqa, Egipto suyupi trigoq kasqanta uyarispan, ñawpaq kutinpi taytanchiskunata kacharqan.
[13] Wawqenkuna, iskay kutipi riqtinkutaqmi, Joseqa paykunaman reqsichikurqan. Hinan Faraonqa, Josepa familiankunata reqsirqan.
[14] Josetaqmi, taytan Jakobta, hinallataq llapan familiankunata waqyachimurqan. Paykunaqa, qanchis chunka phisqayoq runakunan karqanku.
[15] Jakobtaqmi Egipto suyuman uraykurqan. Chaypin paypas, taytanchiskunapas wañukapurqanku.
[16] Wañukapuqtinkutaq, Sikem llaqtaman apasqa karqanku. Hinan Abrahampa qolqenwan rantisqa aya p'ampana t'oqoman churamurqanku. Chay Sikem llaqtatan Abrahamqa, Hamorpa wawankunamanta rantirqan. Hamortaq, Sikempa taytan karqan.
[17] Abrahammanmi, Diosqa promesata cheqaqchasqa karqan. Hinan chay tiempoq sispaykamushasqanman hina, Egipto suyupi judío runakunaqa yapakurqan, hinallataq askhayarqan.
[18] Egipto suyupi, Joseta mana reqsiq huk rey sayarinankaman askhayarqan.
[19] Chay reyqa, yachaysapa kayninwanmi, mirayninchispa kontranpi mana allinkunata ruwarqan. Hinallataq taytanchiskunatapas saruncharqan. Hinan manaña aswanta kawsanankupaq, ñuñuq wawankutapas wañunanpaq wikch'uchirqan.
[20] Chay tiempopin Moisesqa naserqan. Hinan Diospa sonqonpaq hina karqan. Kinsa killataqmi, taytanpa wasinpi uywasqa karqan.
[21] Wañunanpaq wikch'usqa kashaqtintaqmi ichaqa, Faraonpa ususin tarispan, wawanta hina uywakapurqan.
[22] Egipto suyu runakunaq tukuy yachayninkuman hinataqmi yachachisqa karqan. Hinan rimayninpipas, ruwayninpipas ancha atiyniyoq karqan.
[23] Tawa chunka watayoq kashaqtintaq ichaqa, Israelpa wawankuna wawqe-panankunata watukuq rinanpaq sonqonpi yuyaykurqan.
[24] Hinan Moisesqa, Egipto llaqtayoq huk runa, hebreo runata maqashaqta rikuruspan hark'akurqan. Egipto llaqtayoq maqaq runatataqmi, bengakuspan wañuchirqan.
[25] Moisesqa, Dios makinwan kacharichinanpaq, wawqenkunaq yuyayninkuman churanankuta yuyaykurqan. Wawqenkunataqmi ichaqa, paypa yuyaykusqanta mana entiendirqankuchu.
[26] Qhepantin p'unchaytaqmi, payqa Israel llaqtayoq iskay qharikunata maqanakushaqta rikurqan. Hinan thak kaypi allipunachiyta munaspa nirqan: ‘¡Wawqeykuna, qankunaqa wawqentinmi kankichis! ¿Imanaqtintaq qankunapura mana allintari ruwanakunkichis?’ nispa.
[27] Runamasinta maqashaqtaqmi ichaqa, Moisesta tanqarparispa nirqan: ‘¿Pitaq qantari, ñoqayku ukhupi kamachikuqta, hinallataq chaninchaqta churarqasunki?
[28] ¿Imaynan qayna p'unchay Egipto llaqtayoq runata wañuchirqanki, chay hinatachu wañuchiwayta munashanki?’ nispa. (Exo. 2:13-14)
[29] Chay simita uyarispataq, Moisesqa Madián suyuman ayqekurqan. Hinan chay suyupi mana llaqtayoq hina kawsarqan. Chaypitaqmi iskay churiyoq kapurqan.
[30] Tawa chunka wata qhepatataq, Sinaí orqo ch'inniqpi Señorpa huk angelnin payman rikhurirqan. Chay angelqa, nina yawrashaq t'ankarpin kasharqan.
[31] Chayta rikuruspantaqmi, Moisesqa chay rikhuriymanta yuyayninpi mana kabesqa karqan. Qhawaykunanpaq asuykushaqtintaqmi ichaqa, Señorpa kunkanta uyarirqan.
[32] Chay kunkataq nimurqan: ‘Taytaykikunaq Diosninpas, Abrahampa Diosninpas, Isaakpa Diosninpas, hinallataq Jakobpa Diosninpas ñoqan kani,’nispa. (Exodo 3:6) Moisestaqmi ichaqa, khatatataspan Señorta mana qhawariyllatapas atirqanchu.
[33] Señortaqmi payta nirqan: ‘Kashasqayki cheqasqa t'aqasqa hallp'an. Chayrayku chakiykimanta husut'aykita ch'utikuy.
[34] Llaqtayta imaynatachus Egipto suyupi ñak'arichishanku, chaytan makilla qhawarqani. Hinan llakipakuspa waqasqankutapas uyarispay, paykunata kacharichimpunaypaq uraykamurqani. Kunanyá hamuy, hinaspa Egipto suyuman kachasayki,’ nispa. (Exodo 3:7)
[35] Pitachus mana munarqankuchu, chay kikin Moisestataqmi nirqanku: ‘¿Pitaq qantari, ñoqayku ukhupi kamachikuqta, hinallataq chaninchaqta churarqasunki?’ nispanku. (Exodo 2:14) Paytapunin Diosqa, kamachikuqta hina, hinallataq rantipapuqta hina, angelpa chawpinta t'ankarpi rikhurispan kacharqan.
[36] Paymi Egipto suyupi, Puka Mama-qochapi, hinallataq ch'inniqpi musphana ruwaykunata, hinallataq señalkunata tawa chunka watantin ruwaspan horqomurqan.
[37] Kikin Moisesmi Israelpa wawankunata nirqan: ‘Señorninchis Diosmi ñoqata hina Diospa rantinpi rimaqta, wawqe-panaykichiskuna ukhumanta sayarichipusunkichis. Paytan uyarinkichis,’ nispa. (Deut. 18:15)
[38] Moisestan, Sinaí orqopi angelqa rimapayarqan. Chayqa ch'inniq huñunakuypin karqan. Paymi taytanchiskunawanpas kasharqan. Payllataqmi qowananchispaq kawsay simikunatapas chaskirqan.
[39] Paytan, taytanchiskunaqa, mana kasukuyta munarqankuchu. Aswanpas wikch'uyukurqankun, hinan sonqonkupi, Egipto suyuman kutipuyta yuyaykurqanku.
[40] Aarontataqmi nirqanku: ‘Egipto suyumanta horqomuwaqniyku chay Moisesta imachus pasasqantan mana yachaykuchu. Chayrayku, ñoqaykuq ñawpaqeykuta rinanpaq dioskunata ruwapuwayku,’ nispanku. (Exo. 32:1, 23)
[41] Hinaqtinmi, haqay p'unchaykunapi huk torilluman rikch'akuq idolota ruwakurqanku. Hinan chay idoloman sakrifisiokunata haywarqanku. Makinkuwan ruwasqankupitaqmi, anchata q'ochukurqanku.
[42] Diostaqmi ichaqa, paykunamanta karunchakurqan, hinaspan hanaq pachapi ejersituta yupaychanankupaq qorqan. Chayqa, Diospa rantinpi rimaqkunaq qelqasqanku qelqapi nisqanman hinan karqan. Paykunaqa nirqankun: ¿Israel llaqtamanta runakuna, ch'inniqpi tawa chunka watapacha ñoqamanchu nak'asqa animalkunatapas, hinallataq sakrifisiokunatapas haywawarqankichis?
[43] Aswanmi, Molokpa karpanta, hinallataq Renfán diosniykichispa ch'askanta altoman hoqarirqankichis. Chaykunaqa hatunchanaykichispaq ruwakusqaykichis rikch'akuykunan kanku. Chayraykun ñoqaqa Babilonia suyuq haqay ladonmanraq apasaykichis, nispa. (Amós 5:25-27)
[44] Ch'inniqpin, taytanchiskunaqa Diospa kamachikusqanman hina, Dios chaypi kashasqanta yachanankupaq Diospaq ruwasqa karpayoq karqanku. Diosmi, Moisesta rikusqanman hina ruwananpaq kamachiqqa karqan.
[45] Diospaq ruwasqa karpatan taytanchiskunaqa chaskispanku hina, Josuewan mana-judío runakunaq tiyasqanku hallp'aman apaykurqanku. Chay runakunatataqmi, Diosqa taytanchiskunaq ñawpaqenkumanta Davidpa p'unchayninkunakama wikch'urqan.
[46] Davidmi, Diospa qayllanpi allinpaq qokuyta tarirqan. Hinan Jakobpa Diosninpaq, huk Diospaq ruwasqa karpata ruwapunanpaq mañakurqan.
[47] Salomontaqmi ichaqa, wasita ruwapurqan.
[48] Imaynatachus Diospa rantinpi rimaq nirqan, chayman hinapunin ancha Hatunchasqa Diosqa, mana makiq ruwasqan ch'uya cheqaskunapichu tiyan.
[49] Señor Diosqa ninmi: ‘Hanaq pachan kamachikuspa tiyanayqa, kay pachataqmi chakiypa samananqa. ¿Imayna wasitataq ruwapuwankichisri? ¿May cheqastaq samanayri kanqa?
[50] ¿Manachu tukuy kay imaymanakunataqa makiy ruwarqan? ’ nispan. (Isa. 66:1-2)
[51] ¡Qankunaqa, mana kasukuq k'ullukuna, hinallataq mana Diosta reqsiq sonqoyoqkuna, mana ninriyoqkuna iman kankichis! Qankunaqa, Santo Espiritutapas hark'apakunkichispunin. Imaynachus taytaykichiskuna karqanku, chay hinan qankunapas kankichis.
[52] Taytaykichiskunaqa, llapa Diospa rantinpi rimaqkunatan qatiykacharqanku. Manan hukllatapas manaqa qatiykacharqankuchu. Hinallataqmi ñawpaqmantapacha Chaninpa hamunanmanta willakuqkunatapas wañuchirqanku. Kunantaq ichaqa, payta hap'ichiqkuna, hinallataq payta wañuchiqkuna kapunkichis.
[53] Qankunaqa, angelkunaq apamusqankuman hinan Kamachikuy Simitaqa chaskirqankichis. ¡Manataqmi kasukurqankichischu! nispa.
[54] Chay imaymanakunata uyarispankutaq sonqonkupi sinchita phiñakurqanku. Hinan Estebanpa kontranpi phiñakuspanku, kirunkutapas k'utupakurqankuraq.
[55] Estebantaq ichaqa, Santo Espirituwan hunt'a karqan. Hinan hanaq pachata qhawarispan, Diospa k'anchariyninta rikurqan. Hinallataq Jesustapas, Diospa paña ladonpi sayashaqta rikurqan.
[56] Hinan nirqan: —¡Qhawariychis, hanaq pachatan kicharayashaqta, hinallataq Runaq Churintapas Diospa paña ladonpi sayashaqta rikushani! nispa.
[57] Hinaqtinmi runakunaqa, kunkayoqta qaparirqanku. Ninrinkuta tapakuspataq, huk nisqalla payman phawaykurqanku.
[58] Hinan llaqtamanta hawaman horqospanku, rumiwan ch'aqerqanku. Testigokunataq, Saulo sutiyoq waynaq ñawpaqenman p'achankuta saqerqanku.
[59] Rumiwan ch'aqeshaqtinkutaqmi, Estebanqa Diosta waqyakuspan, nisharqan: —¡Señor Jesús, espirituyta chaskiykuy! nispa.
[60] Qonqoriykukuspataq, kunkayoqta qaparirqan: —¡Señor, ama kay huchata paykunaman huchachaychu! nispa. Chayta nispantaq, wañukapurqan.