[1] Hinaqtinmi Judea suyumanta Antiokía llaqtaman wakin hamuqkunaqa wawqe-panakunaman yachachirqanku. Nirqankutaq: —Sichus mana Moisespa ruwayninman hina sirkunsidachikunkichischu chayqa, manan qespichisqa kayta atiwaqchischu, nispanku.
[2] Hinan Pablowan, Bernabewan paykunaq kontranpi hatariqtinku, huchatariy hinallataq sinchi churanakuy sayarirqan. Chaymi wawqe-panakunaqa, Pablowan, Bernabewan, hinallataq wakinkunapiwan Jerusalén llaqtaman wichaspa apostolkunawan, kurak runakunawan ima, chaymanta rimamunankupaq rimanakurqanku.
[3] Hinaqtinmi iñiq t'aqaq kachasqankunaqa, Fenisia llaqtanta, hinallataq Samaria probinsianta mana-judío runakunapas Diosman kutirikusqankumanta willaspanku, pasarqanku. Hinan llapallan wawqe-panakunaqa, ancha kusisqapuni karqanku.
[4] Pablowan, Bernabewan Jerusalén llaqtaman chayaqtinku hinataq, iñiq t'aqapiwan, apostolkunapiwan, umalliq runakunapiwan, paykunata chaskiykurqanku. Hinan paykunaqa, paykunaq chawpinta Dios tukuy imaymanakuna ruwasqanta paykunaman willarqanku.
[5] Pantasqa t'aqa fariseokunamanta wakin iñiqkunataqmi ichaqa, sayarispa nirqanku: —Sirkunsidanayku, hinallataq Moisespa Kamachikuy Siminta waqaychanaykichispaq kamachinaykuqa nesesariopunin, nispanku.
[6] Hinaqtinmi apostolkunaqa, kurak runakunawan chaymanta rimanankupaq huñunakurqanku.
[7] Sinchi hatun churanakuy hatariqtintaqmi, Pedroqa sayarispa nirqan: —Wawqellaykuna, ñawpa p'unchaykunamantapacharaq manajudío runakunaman allin willakuy simita rimarisqaypa chawpinta uyarispa iñikapunankupaqmi, ñoqanchis ukhumanta, Diosqa akllakuwarqan. Chaytaqa yachankichismi.
[8] Sonqokunata reqsiq Diostaqmi, ñoqanchisman hina paykunamanpas Santo Espirituta qospa sut'incharqan.
[9] Iñiypa chawpinta sonqonkutapas ch'uyanchasqanraykun, Diosqa paykunatawan, ñoqanchistawan manapuni wakinta allinpaq, wakintataq pisipaq qhawarinchu.
[10] Kunantaq ichaqa, ¿imanaqtinmi taytanchiskunaqpas, ñoqanchispapas mana apay atisqanchis yuguta yachachisqakunaq much'un pataman churaspaykichis, Diosta wateqankichis?
[11] Aswanmi, Señor Jesuspa allinpaq qokuyninpa chawpillantataq, paykuna hina ñoqanchispas qespichisqa kasqanchista iñinchis, nispa.
[12] Hinaqtinmi chay llapan askha runakunaqa, ch'in kapurqanku. Hinamantataq Bernabetawan, Pablotawan uyarirqanku. Paykunaq chawpintan Diosqa, mana-judío runakuna ukhupi may hinaniraq señalkunata, hinallataq musphana ruwaykunata ruwasqa karqan. Chaytan paykunaqa willakurqanku.
[13] Paykuna rimayta tukuqtinkutaq, Jakoboqa kutichispan nirqan: —Wawqellaykuna, uyariwaychis.
[14] Diosqa paypa sutinpaq paykunapuramanta huk llaqtata akllakunanpaqmi, ñawpaq kutinpi mana-judío runakunaman watukamurqan. Chaytan Simonqa willaruwanchisña.
[15] Chaywantaqmi, Diospa rantinpi rimaqkunaq imaynatachus qelqasqankuqa tupan.
[16] Chay qelqasqankupitaqmi Diosqa nirqan: ‘Chay imaymanakuna qhepatataqmi kutimusaq, hinaspa Davidpa urmasqa Diospaq ruwasqa karpanta wakmanta hatarichisaq. Thunisqa kaqkunatataqmi wakmanta ruwasaq, hinallataq hatarichisaq.
[17] Wak runakunapas, llapa mana-judío runakunapas, paykunapi sutiy willasqa kaqtin, Señorta maskhanankupaqmi hatarichisaq. Chaytan tukuy imaymana kamaq Señorqa nin,’ nispa. (Amós 9:11-12)
[18] Diosqa, tukuy ruwasqankunatapas wiñay wiñaymantapacharaqmi yachan.
[19] Chayraykun ñoqaqa, Diosman kutirikuq manajudío runakunata ama sasachachishananchispaq chaninchani.
[20] Aswanpas, idolota yupaychaywan qhellichakuymanta, qhellipi puriymanta, seq'osqamanta, yawarmantawan ima t'aqakunallankupaq qelqakuchun.
[21] Ñawpa tiempokunamantapacharaqmi, sapanka llaqtapi judío runakunaq huñukunanku wasipi Moisespa willaqninkunaqa karqan. Chaymi, sapa sábado p'unchay qelqata ñawincharqanku, nispa.
[22] Hinaqtinmi apostolkunamanpas, kurak runakunamanpas, hinallataq llapan iñiq t'aqamanpas paykunapuramanta wakin qharikunata akllayninkuqa allin rikch'akurqan. Hinan Pablotawan, Bernabetawan kuskata, Antiokía llaqtaman kachanankupaq, Barsabás sutiwan sutichasqa Judastawan, Silastawan akllarqanku. Paykunaqa, wawqe-panakunapurapi umalliq qharikunan karqanku.
[23] Paykunaq chawpillantataqmi, kay hinata qelqarqanku: —Apostolkuna, kurak runakuna, wawqe-panakuna iman Antiokía llaqtapi, Siria suyupi, hinallataq Silisia probinsiapiwan kashaq mana-judío wawqe-panakunaman napaykamuykiku.
[24] Mana ñoqayku kamachishaqtiyku, ñoqayku ukhumanta wakinkuna lloqsimuspa, simikunawan yuyayniykichista muspharichisqantan uyariyku. Paykunaqa, sirkunsisiontapas, Kamachikuy Simitapas hunt'anaykichispunin nisunkichismi. Ñoqaykuqa manapunin chay hinatachu yachachirqayku.
[25] Llapallayku, rimanakusqaykuman hina, qharikunata akllaspayku qankunaman munakusqanchis Bernabetawan, Pablotawan kachamunaykuqa allinmi rikch'akuwarqanku.
[26] Paykunan, Señorninchis Jesucristoq sutinrayku kawsayninkuta churaqkunaqa kanku.
[27] Chay hinaqa, Judastawan, Silastawanmi kachamushaykiku. Paykunan siminkuwanpuni kaqllatataq willasunkichis.
[28] Mana aswanta qankunaman ima sasa kaqtapas churayniykun Santo Espiritumanpas, ñoqaykumanpas allin rikch'akuwarqanku.
[29] Kaykunallatan ichaqa, ama ruwankichischu. Idolokunaman sakrifikasqa kaqkunatapas, yawartapas, seq'osqa kaqkunatapas aman mikhunkichischu, nitaq qhelli puriykunapipas purinkichischu. Sichus chaykunamanta waqaychakunkichis chayqa, allintan ruwankichis. Allillanpuni kashaychis, nispanku.
[30] Hinaqtinmi, kacharparisqa kaspanku, paykunaqa Antiokía llaqtaman uraykurqanku. Hinan llapa iñiqkunata huñuspanku, chay kartata qorqanku.
[31] Chay kartata ñawinchaspankutaqmi, chay kallpanchaq simikunarayku, anchatapuni kusikurqanku.
[32] Judaswan, Silaswantaqmi, Diospa rantinpi rimaqkuna kaspanku, askha simikunawan wawqe-panakunata sonqochaykurqanku, hinallataq kallpanchaykurqanku.
[33] Chaypi huk tiempo pasaspankutaq, apostolkunaman kutipunankupaq wawqepanakunaqa thak kaywan kacharparipurqanku.
[34] Silasmantaqmi ichaqa, chaypi qhepakuynin allin rikch'akurqan.
[35] Pablowan, Bernabewantaq ichaqa, Señorpa siminta yachachispanku, hinallataq askha hukkunapiwan allin willakuyta willaspanku, Antiokía llaqtapi qhepakurqanku.
[36] As pisi p'unchaykuna qhepatataqmi, Pabloqa Bernabeta nirqan: —Llapan llaqtakunapi, maykunapichus Señorpa siminta willamurqanchis, paykuna, imaynachus kashasqankuta rikumunanchispaq, wawqe-panakunaman wakmanta watukuq kutisun, nispa.
[37] Hinan Bernabeqa, Markos sutiwan sutichasqa Juanta pusayta munarqan.
[38] Pablopaqtaqmi ichaqa, Juan Markos pusayninku mana allinchu rikch'akurqan. Payqa Diospaq llank'ananman mana riyta munaspanmi, Panfilia suyupi paykunamanta t'aqakusqa karqan.
[39] Hinan paykunapurapi mana yuyay tuparqanchu. Chaymi t'aqanakapurqanku. Hinan Bernabeqa, Markosta pusarikuspan, Chipre islaman mama-qochanta rirqan.
[40] Pablotaq ichaqa, Silasta akllakuspan, Diospa allinpaq qokuyninman wawqe-panakunaq hap'iykuchisqan qhepata puririrqan.
[41] Chaymantataqmi Siria suyunta, hinallataq Silisia suyunta iñiq t'aqakunata kallpanchaspan purirqan.