[1] Hinan Pabloqa nirqan: —Wawqellaykuna, hinallataq taytakuna defiendikuyniyta kunan uyariykuwaychis, nispa.
[2] Pabloq hebreo simi rimaypi rimaykusqanta uyarispankutaq, aswantaraq upallarqanku.
[3] Hinan Pabloqa paykunata nirqan: —Silisia probinsiapi kashaq Tarso llaqtapi nasesqa judío runapunin kani. Ichaqa kay Jerusalén llaqtapi Gamalielpa ñawpaqenpi uywasqan kani. Chaymi machulanchiskunaq Kamachikuy Simiman hina, k'apak allin hap'ipakuq kanaypaq Gamalielpa yachachisqan karqani. Imaynan kunan llapaykichis Diosman allin hap'ipakuq kashankichis, chay hinan ñoqapas karqani.
[4] Kay Ñanmanta kaqkunatan qharikunatapas, warmikunatapas, hap'ispay karselkunaman wisq'achirqani. Hinan wañuchinaykama qatiykacharqani.
[5] Hatun umalliq saserdotepas, hinallataq llapan umalliq kurak runakunapas chaykunataqa yachankun. Paykunamantan ñoqaqa wawqe-panakunata kadenakunawan t'eqesqata apamunaypaq kartakunata chaskirqani. Hinan Damasko llaqtata rispay, kay Ñanmanta kaqkunata hasut'ichinaypaq, Jerusalén llaqtaman presochaspa apamunaypaq rirqani.
[6] Damasko llaqtaman rishaqtiytaq ichaqa, yaqa qayllaykushaqtiyña, kuskan p'unchayta hina, ancha hatun k'anchay hanaq pachamanta muyuriqniyta qonqaylla k'anchaykamuwarqan.
[7] Hinan pampaman wikch'ukuspay, huk kunkata uyarirqani. Chay kunkataqmi nimuwarqan: ‘Saulo, Saulo, ¿imanaqtinmi qatiykachawanki?’ nispa.
[8] Ñoqataqmi ichaqa kutichirqani: ‘Señor, ¿pitaq kankiri?’ nispay. Hinan kutichispa nimuwarqan: ‘Pitachus qan qatiykachashanki, chay Nazaret llaqtayoq Jesusmi ñoqaqa kani,’ nispan.
[9] Ñoqawan kashaqkunaqa, cheqaqtapunin k'anchaytaqa rikurqanku, hinaspataq mancharikurqanku. Ñoqawan rimaqpa kunkantataqmi ichaqa, mana entiendirqankuchu.
[10] Ñoqataq nirqani: ‘Señor, ¿imatataq ruwasaqri?’ nispay. Señortaq ichaqa nimuwarqan: ‘Sayariy, hinaspa Damasko llaqtaman haykuy, chaypin tukuy imakunachus ruwanaykipaq kasqanta nisqa kasunki,’ nispan.
[11] Chay k'anchay ñawsayachiwasqanraykun, mana rikuyta atirqanichu. Chaymi ñoqawan riqkuna makiymanta pusawaqtinku, Damasko llaqtaman haykurqani.
[12] Hinan huk runa Ananías sutiyoq Damasko llaqtapi kasharqan. Payqa, Kamachikuy Simiman hinapas Dios sonqo runan karqan. Hinallataq llapan chay llaqtapi tiyaq judío runakunamantapas, aswan allin kawsayniyoqmi karqan.
[13] Hinan Ananiasqa ñoqaman hamurqan. Sayaykuspantaq nimuwarqan: ‘Wawqey Saulo, ñawiyki qhawaripuchun,’ nispan. Hinan kasqan ratupacha ñoqaqa payta rikurqani.
[14] Hinaqtinmi payqa niwarqan: ‘Machulanchiskunaq Diosninmi, paypa munayninta reqsinaykipaqwan, chanin Jesusta rikunaykipaqwan, hinallataq siminwanpuni rimasqankunata uyarinaykipaqwan, ñawpaqmantapacharaq akllakurqasunki.
[15] Qanmi rikusqaykimantapas, hinallataq uyarisqaykimantapas tukuy runakunaman chanin Jesuspa testigonqa kanki.
[16] ¿Kunanrí, imatataq suyanki? Sayariyyá hinaspa bautisakuy. Huchaykikunata mayllinasunkipaqtaq Jesuspa sutinta waqyakuy,’ nispa.
[17] Hinan Jerusalén llaqtaman kutipuspay, Dios yupaychana wasipi Diosman parlasharqani. Hinallamanmi mosqhoypi hina huk rikhuriyta rikurqani.
[18] Chay rikhuriypitaq Señorta rikurqani. Paymi nimuwarqan: ‘Ñoqamanta willakusqaykitan Jerusalén llaqtapi mana chaskinqakuchu. Chayrayku usqhaylla kunanpacha Jerusalén llaqtamanta lloqsipuy,’ nispa.
[19] Ñoqataqmi nirqani: ‘Señor, judío runakunaq llapan huñukunanku wasikunamanta qanpi iñiqkunata karselman wisq'achisqaytapas, hasut'ichisqaytapas allintan yachanku.
[20] Qanmanta willakuq Estebanpa yawarnin hich'akushaqtinqa ñoqapas chaypin kasharqani. Wañuchinankupaqpas ‘allinmi,’ nirqanin. Hinallataq wañuchiqkunaq p'achankutapas waqaycharqani. Tukuy chaykuna ruwasqaytan paykunaqa, allintapuni yachanku,’ nispa.
[21] Señortaq ichaqa, nimuwarqan: ‘Riy. Ñoqaqa karupi kashaq mana-judío runakunamanmi kachasqayki,’ nispan, nispa.
[22] Chay simita rimanankamallan uyarirqanku. Hinamantataq ichaqa qaparirqanku: —Kay runaq kay pachapi kawsananqa manan allinchu. Chayrayku kay runata wañuchipuychis, nispanku.
[23] Hinan runakunaqa, qaparirqanku, p'achankutapas chanqarqanku, hinallataq hallp'ata altoman hach'ispa q'oshñitaraq hatarichirqanku.
[24] Chaymi tribunoqa, Pablota kuartelman apaykunankupaq kamachikurqan. Hinallataq runakuna Pabloq kontranpi qaparisqankuta yachayta munasqanrayku soq'ashaspalla rimarichinankupaq kamachikurqan.
[25] Ichaqa lasokunawan chutaspa wataruqtinku hinataq Pabloqa, chaypi kashaq senturion runata nirqan: —¿Mana huchachasqa kashaqtin, Roma llaqtayoq runata soq'achiy atikullanchu? nispa.
[26] Senturión runa, chayta uyarispantaq, tribunoman usqhaylla rispa, willamurqan: —¿Kunanri imanankitaq? chay runaqa Roma llaqtayoqmi kasqa, nispan.
[27] Tribuno hamuspantaq, Pablota nirqan: —Niway, ¿Roma llaqtayoqchu kanki? nispan. Pablotaq nirqan: —Arí, nispa.
[28] Tribunotaq kutichispa nirqan: —Ñoqaqa askha qolqewanmi kay Roma llaqtayoq kaytaqa tarirqani, nispan. Hinaqtinmi Pabloqa nirqan: —Ñoqan ichaqa, Roma llaqtapi naseqpuni kani, nispa.
[29] Chaymi Pablota soq'ashaspalla tapunankupaq kashaqkunaqa, kasqan ratupacha paymanta achhuripurqanku. Hinallataq tribunopas, Pabloqa Roma llaqtayoq kasqanta yacharuspan, t'eqechisqanmanta mancharikurqan.
[30] Qhepantin p'unchaytaq, tribunoqa, imanaqtinchus judío runakuna Pablota huchachasqankuta cheqaqtapuni yachayta munarqan. Chaymi Pablota kadenakunawan t'eqesqankuta paskararqan. Hinan umalliq saserdotekunatawan, hinallataq Konsilio Sanedrinpi llapan kaqkunatawan, huñumunankupaq kamachikurqan. Tribunotaq, Pablota uraykachimuspa, paykunaq ñawpaqenkuman tiyaykuchirqan.