[1] Ñoqa Pabloqa, Jesucristoq kamachinmi kani. Diosmi apóstol kanaypaq waqyawarqan, hinallataq allin willakuyninta willanaypaq akllakuwarqan.
[2] Chay allin willakuytaqa, ñawpaqmantapacharaqmi Diospa rantinpi rimaqkunaq chawpinta ch'uya Qelqankunapi prometirqan.
[3] Chay allin willakuyqa, Churinmanta kaqmi. Paymi, aycha mirayman hinaqa, Davidpa mirayninmanta karqan.
[4] Ch'uya Espírituq chawpintan, Señorninchis Jesucristoqa, Diospa atiyniyoq Churin kasqanta sut'inchasqa karqan. Chaytaqa wañusqakunapuramanta kawsarimpusqan chawpintan sut'incharqan.
[5] Jesucristoq chawpintataqmi, allinpaq qokuyta, hinallataq apóstol llank'anatapas, chaskirqayku. Paypa sutinrayku llapan mana-judío suyukunapi kasukuywan iñikapunankupaqmi chaskikurqayku.
[6] Paykuna ukhullapitaqmi, qankuna Jesucristoq waqyasqankunapas kashallankichistaq.
[7] Roma llaqtapi kashaqkunamanmi llapallaykichisman qelqamuykichis. Qankunaqa, Diospa munakusqankuna, hinallataq t'aqasqankuna kanaykichispaq waqyasqakunan kankichis. Dios Yayanchispa, hinallataq Señor Jesucristoq thak kayninpas, allinpaq qokuyninpas qankunawanpuni kachun.
[8] Iñiyniykichismantan lliw teqsi muyuntinpi willakushanku. Chayraykun ñawpaqtaraqqa llapallaykichismanta Jesucristoq chawpinta Diosniyman grasiasta qoni.
[9] Churinpa allin willakuyninta willaspay, espirituypi serbikusqay testiguyqa Diosmi. Chaymi mana sayk'uspa Diosman parlayniypiqa qankunamanta yuyarishallaykichispuni.
[10] Dios munaqtinqa, imaynallanmantapas qankunaman hamunaypaqmi Diosman parlayniypiqa mañakushani.
[11] Allin takyasqa kanaykichispaqmi, espiritual kaqpi, Diospa ima qowasqallantapas, qankunaman phakmiykunaypaq qankunata rikuykuytapuni munashaykichis.
[12] Qankunataqa, rikuykuytapunin munashaykichis. Chayqa, qankunapas, ñoqapas iñiyninchispi kallpachasqa kananchispaqmi.
[13] Wawqepanaykuna, wakin mana-judío runakunapurapipas, chay hinallataq qankunapurapipas, ruruyniyoq kanaykichispaqmi hamunaypuni karqan. Qankunamanqa, askha kutitan hamuyta munarqani, ichaqa kunankaman imaymanakuna hark'ashawan. Chaykunatan yachanaykichista munani.
[14] Grecia suyumanta runakunamanpas, wak simi rimaqkunamanpas, yachayniyoqkunamanpas, mana yachayniyoqkunamanpas manunkupunin kani.
[15] Chaymi ñoqapas, qankuna Roma llaqtapi tiyaqkunaman hamuspay, allin willakuy willaykuytaqa maytapuni munashani.
[16] Cristoq allin willakuyninqa, Diospa atiyninmi. Llapallan pikunachus iñiqkunaq, ñawpaqta judío runakunaq, chaymantataq mana-judío runakunaq qespikunankupaqmi. Chayraykun Cristoq allin willakuyninmantaqa manapuni p'enqakunichu.
[17] Qelqaqa ninmi: ‘Chanin runan ichaqa, iñiyllawanpuni kawsanqa,’ nispa. (Hab. 2:4) Chaymi Jesucristopi iñikusqanchisrayku, hinallataq paypi iñikunanchispaq, Diospa chanin kayninqa allin willakuypi rikuchikun.
[18] Runakunaqa, cheqaq kaqtan mana chanin kaqwan hark'achishanku. Chayraykun llapan mana iñiqkunaq, hinallataq mana chanin ruwaq runakunaq kontranpi Diospa k'arak phiñakuyninqa, hanaq pachamantapacha rikuchikamun.
[19] Diospuni paykunaman sut'inchasqanraykun, Diosqa imaynachus kasqanta yachanku.
[20] Kay pacha kamasqa kasqanmantapachan, Diospa kaq imaymana mana rikuna kaqkunapas, wiñay atiyninpas, hinallataq Dios kayninpas kamasqankuna chawpinta sut'i reqsichisqa kanku. Chaymi pipas: ‘Manan yacharqanichu,’ nispa niytaqa manaña atinmanñachu.
[21] Diosta reqsishaspankun, mana grasiasta qorqankuchu, nitaq Diosta hinapaschu hatuncharqanku. Aswanpas yuyayninkupin yanqayapurqanku. Mana yuyaykukuq sonqonkutaqmi tutayasqa kapurqan.
[22] Yachaysapaman tukuspankutaqmi, mana yuyayniyoqman tukupurqanku.
[23] Hinan k'anchayninpi, mana hayk'aqpas wañuspa ismuq Diosta yupaychanankumantaqa, wañuq runaq rikch'ayninta yupaycharqanku. Hinallataq phalaq animalkunaq rikch'aynintapas, tawa chakiyoq animalkunaq rikch'aynintapas, pampan suchuq animalkunaq rikch'aynintapas yupaychallarqankutaq.
[24] Chaymi Diosqa, sonqonkuq mana allin munapayasqanman paykunapurapi kuerponkuta qhellichanakuyman hap'iykuchirqan.
[25] Paykunaqa, Diospa cheqaq kaynintan llullaman t'ikrarunku. Hinan Kamaqninkuta ñawpaqta yupaychanankumantaqa, Diospa kamasqan kaqkunata aswantaraq yupaycharqanku, hinallataq kultutapas ruwarqanku. Diosqa, wiñay-wiñaypaq saminchasqapuni kachun. Ahinapuni kachun.
[26] Chaykunaraykutaqmi, Diosqa p'enqay ruwaykunaman hap'iykuchirqan. Warminkupas qharita manaña munaspankun, warmipura t'inkinakapurqanku.
[27] Chay hinallataqmi, qharikunapas warmikunawan kanankuta saqepuspanku, qharipura munapayanakuyninkupi yawrarirqanku. Hinan qharipura p'enqay ruwaykunapi kaspanku, kikin kuerponkupi huchankumanta chay kutichipuyta chaskirqanku.
[28] Dios reqsiyta mana allinpaqchu hap'isqankuraykun, mana allinpaq hap'iq yuyayninkuta Diosqa mana ruwanakunata ruwanankupaq hap'iykuchipurqan.
[29] Chaymi llapan mana chanin kaywan, qhellipi puriywan, mana allin ruwaywan, qolqe sonqo kaywan, millay kaywan ima hunt'aykusqa kashanku. Hinallataq enbidiakuywan, runa wañuchiywan, huchatariywan, q'otukuywan, mana allin yuyaykuykunawan, simi apa kaywan ima hunt'aykusqa kashanku.
[30] Paykunaqa, yanqa tumpakuqkuna, Diosta cheqnikuqkuna, millay k'amikuqkuna, anchaykachaqkuna, imayoqchus kasqankumanta rimaykachaqkuna, mana allinkunata paqarichiqkuna, hinallataq taytamamankuta mana kasukuqkunan kanku.
[31] Hinallataq mana yuyayniyoqkuna, ch'achukuna, mana munakuyniyoqkuna, mana pampachay munaqkuna, mana yanapaykukuqkuna iman kanku.
[32] Chay hina ruwaqkunaqa, Diospa chaninninpi chaninchaq kasqantaqa yachankupunin. Chay hina ruwaqkunaqa, wañunankupunin. Paykunaq ruwasqankuta allinmi niqkunapas wañunallankutaqmi. Chaykunatapas paykunaqa yachallankutaqmi.