[1] Chaymantataqmi Pabloqa, Derbe llaqtaman, hinallataq Listra llaqtaman chayarqan. Hinan qhawariy, chaypi Timoteo sutiyoq huk yachachisqa kasharqan. Payqa judía iñiq warmiq wawanmi karqan. Taytantaqmi ichaqa, Gresia suyumanta karqan.
[2] Listra llaqtapipas, Ikonio llaqtapipas wawqepanakunaqa, allintan Timoteomanta rimarqanku.
[3] Pablotaqmi, Timoteoq paywan rinanta munarqan. Ichaqa llapa runakunan Timoteoq taytanqa Gresia suyumanta kasqanta yacharqanku. Chaymi, chay llaqtakunapi judío runakunarayku payta pusaspan sirkunsidarqan.
[4] Llaqtakunata purispankutaq, Jerusalén llaqtapi kashaq apostolkunaq, hinallataq kurak runakunaq rimanakusqanku kamachikuy qelqakunata kasukunankupaq qorqanku.
[5] Chay hinapin, iñiq t'aqakunaqa iñiypi kallpanchakurqanku. Hinan sapa p'unchay aswanta yapakurqanku.
[6] Santo Espíritun, Asia probinsiapi Diospa siminmanta ama rimarinankupaq kamachisqa karqan. Chaymi Frigia suyunta, hinallataq Galasia suyunta purirqanku.
[7] Misia probinsiaq chimpanman chayaspankutaq, Bitinia probinsiaman haykuyta munarqanku. Santo Espiritutaqmi ichaqa, paykunata hark'arqan.
[8] Hinaqtinmi, Misia probinsianta pasaspanku, Troas llaqtaman uraykurqanku.
[9] Hinan tutapi, Pabloman huk rikhuriy rikuchisqa karqan. Chay rikhuriypin, Masedonia probinsiamanta huk qhari, sayaykuspa balikurqan. Nirqantaq: —¡Masedonia probinsiaman chimpamuy, hinaspa yanapaykuwayku! nispan.
[10] Chay rikhuriyta Pablo rikuqtin hinataq, kasqan ratupacha Masedonia probinsiaman riytapuni munarqayku. Paykunaman allin willakuyta willamunaykupaq Señorqa cheqaqtapuni waqyawasqankutan entiendirqayku.
[11] Hinan Troas llaqtamanta barkapi puririspayku, Samotrasia islallamanña rirqayku. Qhepantin p'unchaytaqmi, Neápolis llaqtaman rirqayku.
[12] Chaymantataq, Filipos llaqtaman rirqayku. Chay llaqtaqa, Masedonia probinsiapi llaqta, hinallataq Roma llaqtamanta runakunaq tiyananku llaqtan karqan. Chay llaqtapitaq, as pisi p'unchaykunallata karqayku.
[13] Sábado p'unchaypin, llaqtamanta mayu pataman lloqsirqayku. Chay cheqasqa, Diosman parlananku cheqasmi karqan. Hinan chaypi tiyaykuspa, huñunasqa warmikunaman rimaykurqayku.
[14] Hinan, Lidia sutiyoq huk warmi uyarisharqan. Pabloq nisqanta makilla uyarinanpaqtaqmi, Señorqa paypa sonqonta kicharirqan. Payqa, Tiatira llaqtamanta sani-puka tela qhatuq, hinallataq Dios manchakuqmi karqan.
[15] Paypas, familianpas bautisakapurqankun. Hinan balikuspa, niwarqanku: —Señorpi tukuy sonqo iñikuq kasqaytataq chaninchankichis ña chayqa, wasiyman haykuychis, hinaspa chaypi qhepakuychis, nispa. Hinan anchatapuni balikuspa qhepachiwarqanku.
[16] Diosman parlana cheqasman rishaqtiykutaq, watuq espirituyoq huk kamachi sipas ñoqaykuwan tupaq lloqsimurqan. Payqa watuspanmi, patronninkunata qolqecharqan.
[17] Paymi, Pablotawan, ñoqaykutawan qatikuwaspanku qaparirqan: —¡Kay runakunaqa, Ancha Hatunchasqa Diospa kamachinkunan kanku! ¡Paykunaqa qespikuy ñanmantan willawanchis! nispa.
[18] Askha p'unchaykunañan chay hinataqa ruwarqan. Pablotaqmi ichaqa, sinchitapuni phiñakurqan. Hinan kutirispan chay espirituta nirqan: —¡Kay sipasmanta lloqsinaykipaqmi, Señor Jesucristoq sutinpi kamachiyki! nispa. Hinan kasqan ratupacha chay espirituqa lloqsipurqan.
[19] Patronninkunataq ichaqa, qolqechakuyninku manaña kapusqanta qhawarirqanku. Hinaqtinmi, Pablotawan Silastawan hap'ispanku, kamachikuqkunaq qayllanman plasakama aysarqanku.
[20] Chaninchaqkunaman paykunata asuykachispankutaq nirqanku: —¡Kay runakunaqa, judío kashaspankun, llaqtanchista ch'aqwachishanku!
[21] Paykunaqa, mana chaskiy atina, nitaq ruway atina kostumbrekunatan willanku. Ñoqanchisqa, Roma llaqtayoqkunamá kanchis! nispanku.
[22] Hinan askha runakunaqa, huk nisqalla, Pabloq, hinallataq Silaspa kontranpi hatarirqanku. Chaninchaqkunataqmi, paykunaq p'achankuta llik'ispa ch'utichirqan. Barakunawan p'ananankupaqtaqmi kamachikurqan.
[23] Sinchita p'anaykuchispankutaq, karselman wisq'achirqanku. Hinan karsel qhawaqta allintapuni paykunata waqaychananpaq kamachirqanku.
[24] Hinan payqa, chay hina kamachikuyta chaskispan, karselpi aswan ukhu kaq wasiman apaykurqan. Hinan chakinkunatapas allintapuni sepopi hap'ichirqan.
[25] Kuska tutata hinataq ichaqa, Pablowan Silaswan Diosman parlasharqanku, hinallataq imnokunata Diosman takisharqanku. presokunataqmi, paykunata uyarisharqanku.
[26] Hinaqtinmi, qonqayllamanta hatun pacha chhaphchikuy karqan. Hinan karselpa teqsinkunaraq chhaphchirisqa karqan. Kasqan ratupachataqmi, karselpa llapan punkunkuna kicharikurqan. Hinallataq llapan presokunaq kadenankupas kacharparikurqan.
[27] Karsel qhawaqtaq rikch'arispan, punkukunata kicharasqata rikurqan. Presokuna ayqekunankupaqmi payqa yuyasqa karqan. Chaymi espadanta horqospan, wañuchikuyta munarqan.
[28] Pablotaq ichaqa, kunkayoqta qaparispa nirqan: —¡Ama ima mana allintapas ruwakuychu, llapaykun kaypi kashayku! nispa.
[29] Hinaqtinmi karsel qhawaqqa, k'anchayta mañakuspan ukhuman phawaykurqan. Pabloq, hinallataq Silaspa ñawpaqenkupitaqmi khatatataspa qonqoriykukurqan.
[30] Hawaman paykunata horqospantaq, nirqan: —Wiraqochaykuna ¿qespisqa kanaypaqri, imatataq ruwanay? nispa.
[31] Paykunataq nirqanku: —Señor Jesucristopi iñiy, hinan qanpas wasiykipi kaqkunapas qespichisqa kankichis, nispanku.
[32] Hinan payman, hinallataq llapa wasinpi kaqkunamanpas Señorpa siminta willaykurqanku.
[33] Chay tuta orastataq, paykunata pusaykuspan, k'irinkuta mayllirqan. Hinan paypas, llapa wasinpi kaqkunapas bautisachikurqankupacha.
[34] Hinan wasinman pusaykuspan, mikhuchirqan. Diospi iñisqankuraykutaq paypas, hinallataq wasinpi kaqkunapas anchatapuni kusikurqanku.
[35] P'unchayaramuqtintaq chaninchaqkunaqa, chay runakunata kacharipuy nispa nimunankupaq, karsel qhawaqman guardiakunata kacharqanku.
[36] Karselta qhawaqtaq chay simikunata Pabloman willarqan: —Chaninchaqkunan kacharipusqa kanaykichispaq kamachikamunku. Chay hinaqa, kunanyá lloqsipuychis, hinaspa thak kaypi ripuychis, nispa.
[37] Pablotaq ichaqa nirqan: —Roma llaqtayoq kashaqtiykun, hinallataq mana imamanta huchachasqa kashaqtiykun runakuna rikushaqtin p'anaykuchiwaspanku, karselman wisq'achiwarqanku. ¿Kunantaqchu pakallapi wikch'uchiwankuman karqan? ¡Manapunin! ¡Aswanpas paykuna kikinku horqoqniyku hamuchunku! nispa.
[38] Guardiakunataq, chay simikunata chaninchaqkunaman willarqanku. Hinan chaninchaqkunaqa, Roma llaqtayoq kasqankuta uyarispanku mancharikurqanku.
[39] Hinan paykunaq kasqankuman rispanku, pampachayta mañakurqanku. Horqopuspankutaq, llaqtamanta ripunankupaq balikurqanku.
[40] Hinaqtinmi, karselmanta lloqsipuspanku, Lidiaq wasinman haykurqanku. Chaypi wawqe-panakunata rikuspankutaq, sonqochaykurqanku. Hinaspataq puriripurqanku.