[1] Saulotaqmi, Estebanpa wañuyninta allin ruwayta hina qhawarirqan.
[2] Dios manchakuq qharikunataqmi, Estebanta p'ampampurqanku. Hinan paymanta khuyayta waqarqanku.
[3] Saulotaqmi ichaqa, iñiq t'aqata ch'innichisharqan. Wasin-wasinta haykuspantaq, qharikunatapas, warmikunatapas aysamuspan, karselman wisq'achirqan.
[4] Hinan, ch'eqechisqa kaqkunaqa, allin willakuy simita willaspanku purirqanku.
[5] Felipetaq ichaqa, Samaria llaqtaman uraykurqan. Hinan chaypi Cristomanta willarqan.
[6] Señalkuna ruwasqantataqmi runakunaqa uyarirqanku, hinallataq rikurqanku. Chayraykun Felipeq nisqantaqa yuyaywan huk nisqalla uyarirqanku.
[7] Askha runakunamantan qhelli supaykuna, kunkayoqta qaparispa lloqsirqanku. Hinallataq askha mana kuyuriq such'ukunapas, wist'ukunapas qhaliyachisqa karqanku.
[8] Chayraykun chay llaqtapiqa, ancha hatun kusikuy karqan.
[9] Unay tiempoñan, chay llaqtapi Simón sutiyoq huk layqa runa karqan. Hinan payqa, ‘Atiyniyoqmi kani,’ nispan, layqakuykunata ruwarqan. Chay layqakuyninwantaqmi, Samaria llaqta runakunata muspharichirqan.
[10] Llapa runakunataqmi, huch'uyraq, hatunraq payta makilla uyarisharqanku. Hinan nirqanku: —¡Kayqa, Diospa hatun atiyninmá! nispanku.
[11] Unay tiempoñan layqakuyninkunawan muspharichisqa karqan. Chayraykun paytaqa makilla uyarirqanku.
[12] Ichaqa Diospa qhapaq suyunmanta, hinallataq Jesucristoq sutinmanta allin willakuyta willaqtintaqmi, Felipetaqa kreerqanku. Kreespankutaqmi, qharikunapas, warmikunapas bautisakurqanku.
[13] Kikin Simonraqmi kreerqan. Hinan bautisakusqan qhepaman, payqa Felipewanpuni kasharqan. Ancha atiywan ruwaykunata, hinallataq señalkunata ruwasqanta rikuspantaqmi utirayarqan.
[14] Samaria llaqtayoq runakunan, Diospa siminta chaskisqaku karqan. Chayta uyarispankutaqmi, Jerusalén llaqtapi kashaq apostolkunaqa, Pedrotawan, Juantawan kacharqanku.
[15] Hinan paykunaqa uraykurqanku. Uraykuspankutaqmi, Samaria llaqta runakuna Santo Espirituta chaskinankupaq Diosman parlarqanku.
[16] Manaraqmi mayqenninkumanpas Santo Espirituqa uraykamusqachu karqan. Aswanpas Cristo Jesuspa sutillanpin paykunaqa bautisasqa karqanku.
[17] Hinaqtinmi paykuna pataman makinkuta churaykuqtinku, Santo Espirituta chaskikurqanku.
[18] Simontaq ichaqa, apostolkuna makinkuta churaykusqankuq chawpinta Santo Espíritu qosqa kasqanta rikurqan. Hinan chayta rikuspan, paykunaman qolqeta qoyta munarqan.
[19] Hinan nirqan: —Pimanpas makiyta churaykuqtiy Santo Espirituta chaskinanpaq, ñoqamanpas chay atiyta qowaychis, nispa.
[20] Hinan Pedroqa, payta nirqan: —Diospa qokuyninta qolqewan rantiyta munasqaykirayku, ¡qolqeykiqa qanwan kuska chinkapuchun!
[21] Diospa ñawpaqenpin sonqoykiqa mana allinchu kashan. Chayraykun kay ruwaypiqa mana imapas ruwanayki kanchu, nitaq tupaqniykipas kanchu.
[22] Kay mana allin kayniykimanta yuyayman kutirikuy, hinaspa Diosta balekuy. Ichapaschá sonqoykiq yuyaykusqanta pampachasunkiman.
[23] Haya-hayaqepi, hinallataq mana chanin kadenapi kasqaykitan rikushayki, nispa.
[24] Hinaqtinmi Simonqa, kutichispan nirqan: —Nisqaykichismanta ama imapas ñoqaman hamunanpaq, Señormanta mañapuwaychis, nispa.
[25] Paykunataq ichaqa, Señorpa siminta willasqanku, hinallataq rimasqanku qhepaman, Jerusalén llaqtaman kutipurqanku. Hinan Samaria llaqtaq askha ayllunkunapi runakunaman allin willakuyta willarqanku.
[26] Señorpa huk angelninmi, Felipeman rimaykurqan: —Sayariy, hinaspa Jerusalén llaqtamanta Gasa llaqtaman uraykuq ñanninta uray ladoman riy. Chay cheqasqa ch'inniqmi, nispa.
[27] Sayarispantaqmi, payqa rirqan. Hinan chayllaman, Etiopia suyupi reynaq huknin eunuko runawan ñanpi tuparqan. Payqa, Etiopía llaqtayoqkunaq reynanku Kandaseqpa ancha chaniyoq tukuy imaymanankuna waqaychaqmi karqan. Paymi, Jerusalén llaqtata Dios yupaychaq risqa karqan.
[28] Karretanpi tiyaykuspantaqmi, Diospa rantinpi rimaq Isaiaspa qelqasqanta ñawinchaspa, llaqtanman kutipusharqan.
[29] Santo Espiritutaq Felipeta nirqan: —Qayllaykuy, hinaspa chay karretaman asuykuy, nispa.
[30] Felipetaqmi phawaylla ayparurqan. Hinan Diospa rantinpi rimaq Isaiaspa qelqasqan qelqata ñawinchashaqta uyarirqan. Hinaqtinmi payta nirqan: —¿Ñawinchasqaykita entiendinkichu? nispa.
[31] Eunukutaqmi nirqan: —¿Manataq pipas yanapaykuwanchu chayri, imaynatataq entiendiyta atiyman? nispa. Hinan wichaspa paywan kuska tiyaykunanpaq Felipeta balikurqan.
[32] Ñawinchasqan Qelqa phakmiqa kaymi karqan: ‘Obehata hinan nak'anaman aparqanku. Hinallataq millman rutuqninpa qayllanpi upallakuq kordero hinan, mana simintapas kicharirqanchu.
[33] K'umuykachachishaqtinkun, chaninchayta mana ruwapurqankuchu. Hallp'a pachamantan kawsayninta qechurqanku. Chayrayku, ¿pitaq mirayninmantari willakunqa?’ nispa. (Isa. 53:7-8)
[34] Eunukutaq kutichispan, Felipeta nirqan: —Balikuyki, ¿Diospa rantinpi rimaqri pimantataq kayta nin? ¿Kikinmantachu nin, ichari hukmantachu nin? nispa.
[35] Hinan Felipeqa rimarispan, kay Qelqamantapacha qallarispan, Jesusmanta allin willakuyta willarqan.
[36] Ñanta rishaspankutaq, unuq kasqanman chayarqanku. Hinan eunukuqa nirqan: —Qhawariy, kaypi unu kashan. ¿Bautisasqa kanaypaqri, imataq hark'awan? nispa.
[37] Felipetaq nirqan: —Sichus tukuy sonqoykiwan iñinki chayqa, atikunmi, nispa. Kutichispantaqmi eunukuqa nirqan: —Jesuscristo, Diospa Churin kasqantaqa iñinin, nispa.
[38] Hinan karretata sayachinankupaq kamachirqan. Hinan Felipewan, eunukuwan iskayninku unuman haykurqanku. Felipetaq payta bautisarqan.
[39] Unumanta lloqsiramuqtinkutaq, Señorpa Espíritun Felipeta apapurqan. Hinan eunukuqa, manaña aswantapas payta rikurqanñachu. Hinaqtinmi ancha kusisqallaña ñanninta ripurqan.
[40] Felipetaqmi ichaqa, Azoto llaqtapi rikhurirqan. Hinan chayninta pasashaspa, tukuy llaqtakunapi Cesarea llaqtaman chayanankama allin willakuyta willarqan.