[1] Anfípolis llaqtanta, hinallataq Apolonia llaqtanta pasaspankutaq, Tesalónika llaqtaman chayarqanku. Chaypitaqmi, judío runakunaq huñukunanku wasi karqan.
[2] Pablotaqmi, imaynatachus haykullaqpuni, chay hinata paykunawan huñukunanpaq haykurqan. Hinan kinsa sabadota Qelqamanta paykunawan churanakurqan.
[3] Cristoq ñak'arinanqa, hinallataq wañusqakunapuramanta kawsarimpunanqa nesesariopunin karqan. Chaytan Pabloqa entiendichirqan, hinallataq sut'incharqan. Nirqantaq: —Kay ñoqaq qankunaman willasqay Jesusqa Cristopunin, nispa.
[4] Hinan paykunamanta wakinninkuqa iñikapurqanku. Hinaspataq Pablowan, Silaswan huñuykukurqanku. Gresia suyumanta Dios manchakuq askha runakunapas, ancha reqsisqa askha warmikunapas, huñuykukullarqankutaq.
[5] Hinaqtinmi mana iñiq judío runakunaqa enbidiakuspa, mana allin, millay qharikunata kallemanta huñurqanku. Hinan askhata huñuspanku, llaqta runata ch'aqwachirqanku. Jasón sutiyoq runaq wasinman phawaykuspankutaq, llaqta runaq qayllanman horqomuyta munasharqanku.
[6] Paykunata mana tarispankutaqmi, Jasonta hinallataq wakin wawqe-panakunatawan llaqtapi umalliqkunaman aysamurqanku. Hinan chay askha runakunaqa, qaparispa nirqanku: —¡Llapan teqsimuyuntin ch'aqwachiqkunan kaymanpas hamullankutaq!
[7] Jasontaqmi paykunata chaskillan. Llapallankun kay runakunaqa huk reymi Jesús sutiyoq kan nispa, Cesarpa kamachikusqan kontra ruwanku, nispanku.
[8] Chay imaymanakunata uyarispankutaqmi, llaqta runakunapas, kamachikuqkunapas ch'aqwararqanku.
[9] Ichaqa kacharisqa kanankupaq, Jasonmantawan, wakinninkumantawan qolqeta chaskirukuspankutaq, kacharipurqanku.
[10] Hinaqtinmi, kasqan-tutapacha wawqe-panakunaqa, Pablotawan, Silastawan Berea llaqtaman kacharqanku. Chay llaqtaman chayaspankutaq, judío runakunaq huñukunanku wasiman haykurqanku.
[11] Paykunaqa, Tesalónika llaqtapi kaqkunamanta aswan sumaq sonqoyoqmi karqanku. Chaymi tukuy sonqowan Diospa siminta chaskikurqanku. Chay imaymanakuna cheqaqchus kasqanta yachanankupaqtaq, sapa p'unchay allin-allintapuni Qelqakunata t'aqwirqanku.
[12] Hinan paykunamanta askha runakuna iñikapurqanku. Hinallataq Gresia suyumanta askha ancha reqsisqa warmikunapas, qharikunapas iñikapullarqankutaq.
[13] Tesalónika llaqtapi kaq judío runakunataq ichaqa, Berea llaqtapipas Diospa siminta Pabloq willasqanta yacharullarqankutaq. Hinan chay llaqtaman riruspanku, askha runakunata ch'aqwachillarqankutaq.
[14] Hinaqtinmi wawqe-panakunaqa, mamaqochakama rinanpaq, Pablota kasqanratupacha kacharqanku. Silaswan, Timoteowantaqmi ichaqa, chaypi qhepakurqanku.
[15] Pablota pusaqkunataq, Atenas llaqtakama pusarqanku. Chaymantataq Silaspiwan, Timoteopiwan Pabloman usqhaylla rispa, huñunakunankupaq kamachikuyta chaskispa kutimpurqanku.
[16] Atenas llaqtapin Pabloqa, paykunata suyasharqan. Chaykamataqmi llaqtata idolokuna yupaychay hunt'aykushasqanta rikuspa, sonqonta nanachikurqan.
[17] Chaymi, judío runakunaq huñukunanku wasipi, judío runakunawan, hinallataq Dios sonqo runakunawan churanakurqanku. Hinan sapa p'unchay hatun plasapi kaqkunawanpas churanakullarqantaq.
[18] Jesusmantawan, kawsarimpuymantawanmi, Pabloqa allin willakuyta paykunaman willasharqan. Chayraykun Epikureo nisqa t'aqamanta, hinallataq Estoiko nisqa t'aqamantawan wakin yachayniyoqkunaqa paywan churanakurqanku. Wakinmi nirqanku: —¿Imatataq kay rimaysapari niyta munan? nispanku. Hukkunataq nirqanku: —Yaqachu hina karu llaqta dioskunamanta willakuq kanman, nispanku.
[19] Payta hap'ispankutaq, Areópago nisqa cheqasman aparqanku. Nirqankutaq: —¿Imataq chay mosoq yachachikuy rimasqaykiri? ¿Yachayta atiykumanchu?
[20] Mana reqsisqa kaq imaymanakunatan uyarichiwankiku. Chay hinaqa, imaninantachus chay nisqantan yachayta munayku, nispanku.
[21] Atenas llaqtamanta llapa runakunapas, wak suyumanta kaq chaypi tiyaqkunapas, mosoq kaqkunata rimaspallapuni, hinallataq mosoq kaqkunata uyarispallapunin kasharqanku.
[22] Hinan Pabloqa, Areopago chawpipi sayaykuspa nirqan: —Atenas llaqtamanta qharikuna, tukuy imaymanakunapi diosniykichisman hap'ipakuq kasqaykichistan qhawarini.
[23] Pasashaspaymi, yupaychanaykichis kaqkunata qhawarispay huk altartapas tarimullarqanitaq. Chay altarpin qelqasqa kasharqan: MANA REQSISQANCHIS DIOSMAN, nispa. Paytan qankunaqa mana reqsishaspaykichis yupaychankichis. Payllamantataqmi ñoqapas willaykichis.
[24] Anchay Diosmi kay teqsimuyutapas, hinallataq tukuy chaypi imaymana kaqkunatapas kamarqan. Hanaq pachaqpas, hinallataq hallp'a pachaqpas Señornintaq chayqa, manan payqa runaq ruwasqan templokunapichu tiyan.
[25] Nitaqmi payqa imatapas nesesitanman hina, runakunaq makinwan serbinachu. Aswanpas payqa, llapamanpas kawsayta, samayta, hinallataq tukuy imaymanakunata qoqmi.
[26] Payqa, ch'ulla runallamantan hallp'a pachantinpi tiyanankupaq tukuy suyupi runakunatapas kamarqan. Paymi, tiempokunatapas tupachispa wakichirqan. Hinallataq tiyasqankuq qorpankunatapas churarqan.
[27] Señorta maskhanankupaq, hinallataq llamiykachaspa icha imaynallamantapas tarinankupaqmi chaytaqa ruwarqan. Chaywanpas, cheqaqtapuni payqa manan mayqenninchismantapas karupichu kashan.
[28] Imaynan wakin harawi qelqaqniykichiskunapas nirqanku: ‘Paypa mirayninmi kanchis. Chayman hinan paypi kawsanchis, kuyunchis, hinallataq kanchis,’ nispa.
[29] Diospa mirayninmanta kashaspanchisqa, manapunin Diosqa qoriman, qolqeman, rumiman rikch'akuq kasqanta yuyaykunanchischu. Nitaqmi runaq yuyaykusqanman hina, ruwasqa kasqantapas yuyaykunanchischu.
[30] Chay mana yachay tiempokunatan Diosqa, hinallata qhawarqan. Kunantaqmi ichaqa, llapallan runakunata tukuy cheqaspi yuyayman kutirikunankupaq kamachin.
[31] Chayraykun Diosqa, kay pachapi runakunata chaninchananpaq, huk p'unchayta churanña. Akllakusqan Jesuspa chawpintataqmi, chanin kaywan chaninchanqa. Hinan wañusqakunapuramanta kawsarichimpusqanpi Diosqa, tukuyman pruebata qon, nispa.
[32] Wañusqakunaq kawsarimpuyninmanta uyarispankutaqmi, wakin asipayarqanku. Wakintaq ichaqa nirqanku: —Huk kutinpiña chaymantaqa uyarillasaykikutaq, nispanku.
[33] Chay hinapitaqmi Pabloqa, paykunaq chawpinkumanta lloqsipurqan.
[34] Wakin qharikunataqmi ichaqa, payman huñuykakamuspa iñikapurqanku. Paykuna ukhupitaqmi, Dionisio sutiyoq runa kasharqan. Payqa Areopagopi kaqkunaq hukninmi karqan. Hinallataqmi huk warmipas Dámaris sutiyoq, hinallataq hukkunapas kashallarqankutaq.