[1] Paykunamanta despidiykukuspaykutaq, barkopi rispa Kos nisqa islaman, mana sayaykuspallaña chayarqayku. Qhepantin p'unchaytaq Rodas nisqa islaman chayarqayku, chaymantataq Pátara llaqtaman chayarqayku.
[2] Fenisia llaqtaman rishaq barkota tarispaykutaq, chay barkopi puriripurqayku.
[3] Hinan Chipre islata lloq'e ladopi qhawarispallaña Siria probinsiaman rirqayku. Tiro llaqtapitaqmi barkoqa q'epikunata saqenan karqan. Chaymi chay llaqtaman chayarqayku.
[4] Chay Tiro llaqtapi yachachisqakunata tarispaykutaq, paykunawan qanchis p'unchayta qhepakurqayku. Hinan paykunaqa, Santo Espírituq kallpachasqan Pablota nirqanku: —Amaña Jerusalén llatamanqa wichayñachu, nispanku.
[5] Chay qanchis p'unchaykuna pasaruytataq puriripurqayku. Hinan llapallanku warmikunantin, wawakunantin ima, llaqta kantukama riysiwarqanku. Hinamantataq mama-qochaq kantunpi qonqoriykukuspayku, Diosman parlarqayku.
[6] Hukkunahukkunawan despidiykunakusqaykumantataq, barkoman wichapurqayku. Paykunataq wasinkuman kutipurqanku.
[7] Hinan ñoqaykuqa, Tiro llaqtamanta Tolemaida llaqtaman purisqaykuta tukuparqayku. Wawqe-panakunata napaykuspaykutaq, huk p'unchayta paykunawan qhepakurqayku.
[8] Qhepantin p'unchaytaq, Pablopiwan, paywan kashaqkunapiwan, Cesarea llaqtaman chayarqayku. Hinan allin willakuyta willaq Felipeq wasinpi qorpachakurqayku. Payqa, qanchis akllasqakunamanta hukninmi karqan.
[9] Paypan tawa donsella ususinkuna karqan. Paykunaqa, Diospa rantinpi rimaqkuna hinan rimarqanku.
[10] Pisi p'unchaykunallata chaypi kashaqtiykutaqmi, huk Agabo sutiyoq Diospa rantinpi rimaq Judea probinsiamanta uraykamurqan.
[11] Hinan ñoqaykuq kasqaykuman hamuspan, Pabloq chumpinwan chakinkunata makinkunatawan t'eqekuspan, Agaboqa nirqan: —Kaytan Santo Espirituqa nin: ‘Jerusalén llaqtapi judío runakunan kay chumpiyoq qharita kay hinata t'eqenqaku. Hinallataqmi mana-judío runakunaq makinman hap'ichinqaku,’ nispan, nispa.
[12] Chaykunata uyarispaykutaq, ñoqaykupas, chaypi tiyaqkunapas amaña Jerusalén llaqtaman wichananpaq Pablota balikurqayku.
[13] Hinaqtinmi Pabloqa kutichiwarqanku: —¿Imatan anchata waqaspaykichis, sonqoyta phoq nichiwankichis? Ñoqaqa manan t'eqesqa kanallaypaqchu wakichisqa kashani. Aswanpas Señor Jesuspa sutinrayku Jerusalén llaqtapi wañunaypaqwanmi wakichisqaqa kashani, nispan.
[14] Manapuniña uyachiyta atispaykutaqmi upallakapurqayku. Nirqaykutaq: —Señorpa munaynin ruwasqa kachun, nispayku.
[15] Chay p'unchaykuna qhepatataqmi, wakichikuspaykuña Jerusalén llaqtaman wicharqayku.
[16] Cesarea llaqtamanta wakin yachachisqakunataqmi ñoqaykuwan hamurqanku. Chay yachachisqakunataqmi, Chipre islamanta Nasón sutiyoq ñawpaq yachachisqata pusamurqanku. Paypa wasinpitaqmi qorpachakunaykuqa karqan.
[17] Jerusalén llaqtaman chayaqtiykutaq, wawqe-panakunaqa kusisqa chaskiwarqanku.
[18] Qhepantin p'unchaytaqmi Pabloqa, ñoqaykuta Jakoboq kasqanman pusawarqanku. Chaypin llapan kurak runakuna huñunasqa kasharqanku.
[19] Paykunata napaykuspantaqmi, Pabloqa, mana-judío runakuna ukhupi llank'ayninpa chawpinta imakunatachus Diospa ruwasqanta ch'ulla ch'ullamanta willarqan.
[20] Hinan paykunaqa, chayta uyarispanku, Señorta hatuncharqanku. Pablotataq nirqanku: —Wawqey, askha waranqanpi judío runakunaq iñikapusqankutaqa rikurqankin. Paykunaqa llapallankun Kamachikuy Siminman hap'ipakuq kanku.
[21] Ichaqa qanmanta rimaqtataqsi uyarinku. Paykunan ninku: ‘Qansi mana-judío runakuna ukhupi tiyaq llapa judío runakunata, Moisespa Kamachikuy Siminta mana kasunankupaq, wawankutapas mana sirkunsidachinankupaq, ruwayninkuman hina mana purinankupaq ima yachachishanki,’ nispanku.
[22] Chay hinaqa, ¿imatataq ruwasunri? Askha runakunaqa, chayamusqaykita ñachá yacharunkuña. Chayqa huñukunqakupaschá.
[23] Chay hinaqa, kay nisqaykuta ruway: Ñoqayku ukhupin huramentowan Diosman promesa ruwaq tawa qharikuna kashanku.
[24] Chay qharikunata pusay, hinaspa paykunapiwan ch'uyanchakamuy. Hinallataq chukchankuta rutuchikamunankupaq gastonkuta pagay. Chay hinapin chay qanmanta rimasqankuqa, mana cheqaqchu kasqanta llapanku yachanqaku. Aswanqa qanpas Kamachikuy Simita waqaychaspapuni kawsasqaykita yachanqaku.
[25] Ichaqa mana-judío iñiqkunamanta rimanakusqanchisman hina kaykunataqa qelqarqaykuñan: Idolokunaman haywasqa mikhunakunamanta, yawarmantapas, seq'osqamantapas, hinallataq qhellipi puriymantapas waqaychakunankupaqmi qelqarqayku, nispanku.
[26] Hinaqtinmi Pabloqa, chay qharikunata pusarikurqan. Qhepantin p'unchay ch'uyanchakuspankutaq, Dios yupaychana wasiman haykurqanku. Sapankankumanta ofrendata haywaqtinku, ch'uyanchakuna p'unchaykuna hunt'akunanta willanankupaqmi haykurqanku.
[27] Qanchisnintin p'unchay hunt'akunan kashaqtintaq ichaqa, Asia probinsiamanta wakin judío runakuna Dios yupaychana wasipi Pablota rikururqanku. Hinaspan llapan runakunata ch'aqwachispanku Pablota hap'irqanku.
[28] Qaparirqankutaqmi: —¡Israel llaqta qharikuna yanapakuychis! Llaqtanchispa kontranpi, Kamachikuy Simiq kontranpi, hinallataq Dios yupaychana wasiq kontranpi yachachimuq runaqa kaymi. Payqa tukuy cheqaspin llapan runakunata chay hinata yachachimushan. Chaymantapas payqa, mana-judío runakunatan Dios yupaychana wasiman pusaykun. Hinaspan kay ch'uya cheqasta qhellichan, nispanku.
[29] Pablotaqa Éfeso llaqtamanta Trofimotawan kuskatan llaqtapi rikurusqaku karqan. Chaymi yuyayninkupi nirqanku: —Pabloqa chay mana-judío runata kay Dios yupaychana wasiman pusayururqanpaschá, nispanku.
[30] Chay hina kaqtinmi, llaqtantin runakuna sinchita ch'aqwaraspanku, huñukamurqanku. Hinan Pablota hap'irqospanku Dios yupaychana wasimanta hawaman aysarqanku. Hinamantataq, kasqan ratupacha punkuta wisq'arqanku.
[31] Llaqtantin runakunan Pablota imaynanmantapas wañuchiytapuni munasharqanku. Chay hina kashaqtinmi, tropantin soldadokunata kamachiq tribunoman, Jerusalén llaqtantin ch'aqwaraypi kashasqan, willakuy chayarqan.
[32] Chaymi chay tribunoqa, soldadonkunatawan, senturionkunatawan pusarikuspan, phawaylla ch'aqwaray kashasqanman uraykamurqanku. Hinan chay tribunotawan, soldadokunatawan rikuruspanku, runakunaqa Pablo maqayta tatipurqanku.
[33] Hinan tribunoqa chayamuspan, Pablota hap'ichirqan. Iskay kadenawan t'eqenankupaqtaq kamachikurqan. Hinan pichus kasqantawan, imatachus ruwasqantawan tapurqan.
[34] Chay askha runakuna ukhupitaqmi ichaqa, wakin hukta, wakintaq wakta qaparirqanku. Hinan chaypi askha runakuna kasqanrayku, chay tribunoqa mana imatapas entiendiyta atirqanchu. Chaymi kuartelman apachirqan.
[35] Chay ancha askha runakunaq waq'ayasqa hinaraq qatimusqankuhawan, soldadokunaqa patapata seqanaman chayaspanku, Pablota wantullapiña aparqanku.
[36] Hinan llaqtamanta askha runakunaqa, qhepanta hamuspa, qaparirqanku: —¡Wañuchunpuni! nispanku.
[37] Kuartelman apaykunankuña kashaqtintaq, Pabloqa, tribunota nirqan: —¿Rimaykuyta atiykimanchu? nispa. Paytaq nirqan: —¿Griego simi rimayta yachankichu?
[38] Egipto suyumanta huk runan, kay pasaq p'unchaykunallapi kamachikuqpa kontranpi runakunata hatarichirqan. Hinaspataq tawa waranqa runa wañuchiqkunata ch'inniqman horqorqan. Chay runaqa, ¿manachu qan kashanki? nispan.
[39] Hinan Pabloqa nirqan: —Ñoqaqa cheqaqmanta Silisia probinsiapi Tarso llaqtayoq judío runapunin kani. Tarso llaqtaqa, manan imakasqan llaqtachachu. Chaymi runakunaman rimaykachiwanaykipaq balikuyki, nispa.
[40] Chay tribuno uyakuqtintaq Pabloqa, pata-pata seqanapi sayaykuspan, makinwan señaschaspa runakunata upallachirqan. Hinan allinta upallaqtinkuña, hebreo simipi rimaykuyta qallarirqan.