[1] Antiokía llaqtapi kaq iñiq t'aqapin, Diospa rantinpi rimaqkuna, hinallataq yachachiqkuna karqanku. Paykunaqa, Bernabé, Níger nispa sutichasqa Simón, Sirene suyumanta Lucio, Tetrarka Herodeswan kuska uywasqa Manaén, Saulo iman karqanku.
[2] Paykuna Señorta serbishaqtinku, hinallataq ayunashaqtinkun, Santo Espirituqa nirqan: —Ima llank'anapaqchus waqyakusqay Bernabetawan Saulotawan t'aqapuwaychis, nispa.
[3] Hinaqtinmi, ayunaspanku, hinallataq Diosman parlaspanku, paykuna pataman makinkuta churaykurqanku. Hinan kacharparirqanku.
[4] Paykunatan Santo Espíritu kacharqan. Hinan Seleusia llaqtaman uraykurqanku. Chaymantataqmi Chipre islaman qochanta rirqanku.
[5] Hinan Salamina llaqtaman chayaspanku, judío runakunaq huñukunanku wasikunapi Diospa siminta willarqanku. Juantataqmi yanapaqninkupaq pusakurqanku.
[6] Chay islanta Pafos llaqtakama rispankutaq, huk layqa runata tarirqanku. Payqa Barjesús sutiwan sutichasqa, falso profeta judío runan karqan.
[7] Barjesusqa, Sub-prefecto Sergio Paulowanmi kasharqan. Payqa, yuyaysapa qharin karqan. Paymi, Diospa siminta uyariyta munaspan, Bernabetawan, Saulotawan waqyachimurqan.
[8] Bernabetawan, Saulotawantaqmi ichaqa, Barjesús sutiwan sutichasqa layqa hark'akurqan. Chayraykun paypa sutinqa Elimas ninanta nin. Paymi, Sub-prefectota iñiymanta waqllichiyta munarqan.
[9] Pablo sutiwan sutichasqa Saulotaqmi, Santo Espirituwan hunt'aykusqa karqan. Paymi, Elimasta allintapuni qhawaykurqan.
[10] Hinan nirqan: —¡Yaw saqraq churin! ¡Qanqa tukuy q'otukuywan, hinallataq lliw mana allinwan hunt'aykusqan kashanki! ¡Qanqa tukuy chanin kaypa awqanmi kanki! ¿Señorpa siwk hina ñanninta waqllichispa, manachu sayk'unki?
[11] Kunantaq ichaqa, ¡qhawariy, Señorpa makinmi qanpa kontraykipi kashan! Huk tiempon ñawsayapunki. Manataqmi intitapas rikunkichu, nispa. Hinan qonqayllamanta tutayaykuy, hinallataq laqha-tutayaykuy payman tutayaykamurqan. Thanpiykachaspantaq, makinmanta aysachikunanpaq pillatapas maskharqan.
[12] Hinaqtinmi, Subprefectoqa, imachus pasasqanta rikuspa, iñirqan. Hinallataq Señorpa yachachikuyninmantapas muspharirqan.
[13] Hinan Pabloqa, riqmasinkunawan Pafos llaqtamanta barkapi rispanku, Panfilia suyupi kashaq Perge llaqtaman chayarqanku. Juantaqmi ichaqa, paykunamanta t'aqakuspan Jerusalén llaqtaman kutipurqan.
[14] Perge llaqtamanta pasaspankutaq, Pisidia suyupi kaq Antiokía llaqtaman chayarqanku. Hinan sábado p'unchaypi, judío runakunaq huñukunanku wasiman haykuspanku, chaypi tiyaykurqanku.
[15] Judío runakunaq huñukunanku wasipi umalliqkunaqa, Kamachikuy Simi qelqatawan, Diospa rantinpi rimaqkunaq qelqasqankutawanmi ñawincharqanku. Chaymantataqmi, Pablota riqmasinkunatawan waqyachirqanku. Hinan nirqanku: —Wawqellaykuna, sichus llaqta runakunata kallpanchaykunaykichispaq ima simikunallapas kashan chayqa, rimaykuychis, nispanku.
[16] Pablotaqmi sayarirqan. Hinan upallanankupaq makinwan señaschaspa nirqan: —Israel llaqtamanta qharikuna, hinallataq Diosta manchakuqkuna, uyariychis.
[17] Kay Israel llaqtaq Diosninmi, taytamamanchiskunata akllakurqan. Paykuna Egipto suyupi mana llaqtayoqña kashaqtinkupas, Diosqa altomanpunin hoqarirqan. Makinta haywarispantaq, chay suyumanta paykunata horqomurqan.
[18] Hinan huk tiempo, yaqa tawa chunka watata hina, ch'inniqpi imaynatachus kawsasqankuta Diosqa pasiensiarqan.
[19] Kanaán hallp'api qanchis suyukunata ch'usaqmanraq tukuchispantaqmi, chay hallp'ankuta erensiata qorqan.
[20] Chaymantataqmi, yaqa tawa pachak phisqa chunkan watantin, Diospa rantinpi rimaq Samuelkama chaninchaqkunata qorqan.
[21] Chaymantapachataqmi, reyta mañakurqanku. Hinan Diosqa, Kispa churin Saulta paykunaman qorqan. Payqa, Benjamín ayllumanta qharin karqan. Tawa chunka watatataqmi kamachikurqan.
[22] Saulta wikch'upuspantaqmi, Davidta rey kananpaq churarqan. Hinan paymanta sut'incharqan: ‘Sonqoyman hina runatan Isaípa churin Davidta tarini. Payqa tukuy munayniytan ruwanqa,’ nispa. (1 Sam. 13:14)
[23] Promesaman hinataqmi, Diosqa Davidpa mirayninmanta Israel llaqtapaq Qespichiq Jesusta apamurqan.
[24] Manaraq pay hamushaqtinmi, Juanqa, Israel llaqtantin runakunaman yuyayman kutirikuy bautismomanta willarqan.
[25] Hinaqtinmi, ña ruwananta tukushaspaña, Juanqa nirqan: ‘¿Pi kasqaytataq qankunari yuyaykunkichis? Manan paychu ñoqaqa kani. Aswanpas qhawariychis, qhepaytan huk hamushan, ñoqaqa manan husut'anpa watullantapas paskanaypaq hinachu kani,’ nispa.
[26] Wawqellaykuna, Abrahampa miraynin wawakuna, hinallataq qankuna ukhupi Dios manchakuqkuna, uyariychis. Diosmi, qankunaman kay qespikuymanta willakuyta apachimun.
[27] Jerusalén llaqtapi tiyaqkunapas, kamachikuqninkunapas manan Jesustaqa reqsirqankuchu. Manataqmi sapa sábado p'unchay Diospa rantinpi rimaqkunaq nisqan simikuna ñawinchasqankutapas yuyayninkuman churarqankuchu. Ichaqa Jesusta huchachaspankutaqmi, chaykunata hunt'arqanku.
[28] Wañuchinapaq hina, ima huchachaytapas mana tarishaspankun, Jesús wañuchisqa kananpaq Pilatota mañakurqanku.
[29] Paymanta llapan imaymana qelqasqakunaqa hunt'akusqañan karqan. Hinamantataqmi chakatana k'aspimanta uraykachispanku aya p'ampana t'oqoman churarqanku.
[30] Diostaqmi ichaqa, wañusqakunapuramanta kawsarichimpurqan.
[31] Hinan Jesusqa, Galilea probinsiamanta Jerusalén llaqtaman paywan wichaqkunaman askha p'unchaykunapi rikhurirqan. Paykunan kunanqa llaqta runa qayllapi paymanta willakuqkuna kanku.
[32] Chay hinallataqmi ñoqaykupas, taytakunaman Diospa promesa qosqanmanta allin willakuykunata willaykiku.
[33] Diosqa, Jesusta kawsarichimpusqanpin, ñoqanchis wawankunapaq chay promesataqa hunt'arqan. Iskay kaq salmopipas qelqasqan kashan: ‘Qanqa Churiymi kanki. Ñoqan kunan p'unchay churiyarqayki,’ nispa. (Sal. 2:7)
[34] Chay hinaqa, manapuni hayk'aqpas ismunanpaqmi, wañusqakunapuramanta Jesusta kawsarichimpurqan. Chaymantan kay hinataqa nirqan: ‘Davidman prometesqay ch'uya, hinallataq huntaq saminchaykunatan qosaykichis,’ nispa. (Isa. 55:3)
[35] Chayraykun huk cheqas qelqapipas nillantaq: ‘Ch'uya kamachiykiq ismunantaqa manan munawaqchu,’ nispa. (Sal. 16: 10)
[36] Cheqapaqpunin Davidqa, kikinpa mirayninpi Diospa munayninman hina serbisqan qhepaman, wañukapurqan. Taytamamankunaman huñuykusqataq karqan. Hinan ismupurqan.
[37] Pitachus Dios kawsarichimpurqan, paymi ichaqa, mana ismurqanchu.
[38] Chay hina kaqtinqa, wawqellaykuna, Jesuspa chawpinta huchakunata Dios pampachasqantan willasunkichis, chaytan yachanaykichis.
[39] Moisespa Kamachikuy Siminqa, manan pitapas chaninman tukuchiyta atirqanchu. Jesuspi hayk'an iñiqmi ichaqa, chaninman tukuchisqaña kapun.
[40] Chay hinaqa, paqtataq, Diospa rantinpi rimaqkunaq qelqasqankupi nisqan qankunaman chayamusunkichisman.
[41] Chay qelqasqankupin Diosqa nirqan: ‘P'unchayniykichiskunapin hatun ruwayta ruwani. Chay ruwayqa, piña willasuqtiykichispas, mana hayk'aq kreenaykichispaq ruwaymi. Chayrayku asipayakuqkuna, qhawariychis, yuyayniykichisman ama kabechunchu, hinaspa ch'usaqman tukupuychis,’ nispan, nispa. (Hab. 1:5)
[42] Judío runakunaq huñukunanku wasimanta Pablo, riqmasinkunantin lloqsipushaqtinkutaq, mana-judío runakunaqa kay kikin willakuyllamantataq hamuq sábado p'unchaypipas willananpaq balikurqanku.
[43] Huñunakuqkuna ch'eqeripuqtinkutaq, askha judío runakuna, hinallataq judioman t'ikrakuq Dios manchakuqkunapas, Pablota, Bernabetawan qatikurqanku. Hinan paykunaqa, rimaykuspanku Diospa allinpaq qokuynillanpipuni takyanankupaq kallpachaykurqanku.
[44] Qatiqnin sábado p'unchaypitaq, Diospa siminta uyarinankupaq yaqapas llaqtallantin runakuna huñunaykakamurqanku.
[45] Judío runakunataq, chay ancha askha runakunata rikuspanku, sinchitapuni enbidiakurqanku. Hinan Pabloq nisqan kontrapi rimaspanku, k'arakta k'amirqanku.
[46] Hinaqtinmi Pablowan, Bernabewanqa, mana manchakuspapuni nirqanku: —Qankunaman ñawpaqta Diospa siminta rimaykunaykuqa, nesesariopunin karqan. Ichaqa manan chaskiyta munankichischu, nitaqmi wiñay kawsaypaq hinachu qhawarichikunkichispas. Chayrayku qhawariychis, mana-judío runakunamanmi kutipushayku.
[47] Kay hinatapunin Señorqa kamachiwarqanku: ‘Mana-judío runakunata k'anchaqpaq, hinallataq kay pachaq k'uchunkamaraq qespikuypaq kanaykipaqmi, churayki,’ nispan, nispanku. (Isa. 49:6)
[48] Chayta uyarispataq, mana-judío runakunaqa anchata kusikurqanku, hinallataq Señorpa simintapas hatuncharqanku. Hinan hayk'an wiñay kawsaypaq Diospa akllakusqan kaqkunaqa, iñikapurqanku.
[49] Señorpa simintaq, chay suyuntinpi willasqa karqan.
[50] Judío runakunataq ichaqa, Dios manchakuq respetana warmikunata, hinallataq llaqtapi umalliqkunata umacharqanku. Hinan Pablota, Bernabetawan qatiykachanankupaq hatarichirqanku. Hinaspataq chay suyunkumanta paykunata wikch'urqanku.
[51] Chaymi paykuna kontra chaki pachankupi hallp'ata chhaphchikurqanku. Hinaspa Ikonio llaqtaman ripurqanku.
[52] Hinan yachachisqakunaqa, ancha kusikuywan, hinallataq Santo Espirituwan hunt'aykusqa karqanku.