[1] Hinaqtinmi Sauloqa, Señorpa yachachisqankuna kontra wañuchiywanraq sinchita amenasaspa, hatun umalliq saserdoteman rirqan.
[2] Hinan Damasko llaqtapi judío runakunaq huñukunanku wasikunapaq kartakunata paymanta mañakurqan. Qharikunatapas, warmikunatapas kay Ñanpi kashaqta pitapas tarispanqa Jerusalén llaqtaman presota apananpaqmi mañakurqan.
[3] Ñanta rishaspantaqmi, Damasko llaqtaman qayllaykushaqtinña, hanaq pachamanta huk k'anchay qonqaylla paypa muyuriqninman lliphllikispa k'anchaykamurqan.
[4] Paytaqmi pampaman urmarqan. Hinan huk kunka payman nimuqta uyarirqan: —Saulo, Saulo, ¿imanaqtinmi qatiykachawanki? nispa.
[5] Hinan Sauloqa nirqan: —Señor, ¿pitaq kankiri? nispa. Señortaq kutichirqan: —Ñoqaqa, qatiykachasqayki Jesusmi kani. T'urpunata hayt'aykachayniykiqa ancha sasapunin kasunki, nispa.
[6] Paytaq khatatataspan, hinallataq mancharisqa nirqan: —Señor, ¿imatan ruwanayta munanki? nispa. Señortaq payta nirqan: —Sayariy, llaqtaman haykuy, hinaspan imachus ruwanayki chayta nisqa kasunki, nispa.
[7] Saulowan rishaq qharikunataq, sayaspalla mana rimariyta atispa kasharqanku. Chay kunkataqa cheqaqtan uyarirqanku, ichaqa manataqmi pitapas rikurqankuchu.
[8] Hinaqtinmi Sauloqa, pampamanta sayarirqan. Ñawinta kicharispantaq, mana pitapas rikurqanchu. Chay hina kaqtinmi, makinmanta hap'iykuspanku Damasko llaqtaman pusaykurqanku.
[9] Kinsa p'unchaymi mana rikuspa karqan. Manallataqmi mikhurqanchu, nillataq ukyarqanpaschu.
[10] Damasko llaqtapitaqmi, Ananías sutiyoq huk yachachisqa kasharqan. Hinan Señorqa, rikhuriypi payta nirqan: —Ananías, nispa. Paytaq kutichirqan: —Señor, kaypin kashani, nispa.
[11] Señortaq nirqan: —Sayariy, hinaspa Rekto Kalle nispa sutiyasqa kalleman riy. Hinaspataq Judaspa wasinpi, Tarsomanta Saulo sutiwan sutichasqanku runata maskhamuy. Qhawariy, payqa Diosmanmi parlashan.
[12] Huk rikhuriypitaqmi Ananías sutiyoq runata rikurqan. Ananiastaqmi haykuspan, wakmanta qhawaripunanpaq pay pataman makinta churaykurqan. Chaytataqmi Sauloqa rikurqan, nispa.
[13] Hinan Ananiasqa kutichirqan: —Señor, chay runamantaqa askha runakunaq rimasqankutan uyarirqani. Jerusalén llaqtapi t'aqasqayki runakunata imaymana mana allinkuna ruwasqantan rimanku.
[14] Hayk'an sutiykimanta rimariqta hap'inanpaqmi umalliq saserdotekuna kamachikuyta qorqanku. Kaypipas chay kamachikuynillayoqtaqmi kashan, nispa.
[15] Hinan Señorqa payta nirqan: —Chay runaqa, mana-judío runakunaman, reykunaman, hinallataq Israel suyumanta runakunamanwan sutiyta apananpaq akllakusqay kamachiymi. Chayrayku, rillaypuni.
[16] Sutiyrayku imaymanakunapi ñak'arinanpuni kasqantan rikuchisaq, nispa.
[17] Rispantaqmi, Ananiasqa, wasiman haykurqan. Hinan makinta Sauloq patanman churaykuspa nirqan: —Wawqey Saulo, may ñantachus hamushaqtiykin Señor Jesusqa rikhurirqasunki. Paymi qhawaripunaykipaq, hinallataq Santo Espíritu hunt'aykunasunkipaq kachamushawan, nispa.
[18] Kasqan ratutaqmi, ñawinkunamanta challwa chhaspa hina urmarqan. Hinan wakmanta qhawaripurqan. Sayaripuqtintaqmi Ananiasqa payta bautisarqan.
[19] Mikhunata mikhuykuspantaqmi, kallpachakurqan. Hinan Sauloqa, Damasko llaqtapi yachachisqakunawan pisi p'unchaykunalla qhepakurqan.
[20] Kasqan ratutaqmi, judío runakunaq huñukunanku wasikunapi Cristomanta willarqan: — Payqa Diospa Churinmi, nispa.
[21] Llapan payta uyariqkunataqmi utirayarqanku. Hinaspan nirqanku: —¿Jerusalén llaqtapi chay sutimanta rimariqkunata ch'inyachiqqa manachu pay kashan? Payqa chay kasqallantataq ruwananpaq, hinallataq paykunata hap'ispa, umalliq saserdotekunaman apananpaqmi hamusqa karqan, nispanku.
[22] Saulotaq ichaqa, aswantaraq kallpachakuspan, Jesusqa Cristo kasqanta rikuchirqan. Hinan Damasko llaqtapi tiyaq judío runakunata muspharichirqan.
[23] Askha p'unchaykuna pasaqtintaq, judío runakunaqa paykunapura Saulota wañuchinankupaq rimanakurqanku.
[24] Hinan paykunaqa, Saulota wañuchinankupaq punkukunatapas tutap'unchay makilla qhawasharqanku. Saulotaq ichaqa, chay rimanakusqankuta yacharurqan.
[25] Hinaqtinmi yachachisqankunaqa, Saulota huk kanastapi warkuspa, tutalla perqanta uraykachirqanku.
[26] Jerusalén llaqtata rispantaq, yachachisqakunawan kuska kayta munarqan. Yachachisqa kasqantan mana kreerqankuchu. Chayraykun llapanku payta manchakurqanku.
[27] Bernabetaqmi ichaqa, payta chaskirqan. Hinaspa apostolkunaq kasqanman pusarqan. Hinan imaynatachus ñanpi Señorta rikusqa karqan, hinallataq imatachus rimaykusqantawan paykunaman willarqan. Imaynatachus Jesuspa sutinpi mana manchakuspa Damasko llaqtapi willasqa karqan, chaytawan willarqan.
[28] Chay hinapin Sauloqa, Jerusalén llatapi paykunawan kashaspa, haykuqpas, lloqsiqpas.
[29] Señor Jesuspa sutinpitaqmi, mana manchakuspa willarqan. Griego simi rimaq judío runakunawantaq rimarqan, hinallataq churanakurqan. Paykunataqmi ichaqa, wañuchiytapuni munasharqanku.
[30] Wawqe-panakunataqmi chayta yacharuspanku, Cesarea llaqtakama paywan kuska rispanku, Tarso llaqtaman kachapurqanku.
[31] Hinaqtinmi llapan Judea probinsiapi, Galilea probinsiapi, hinallataq Samaria probinsiapi iñiq t'aqakuna thak kaypi karqanku. Hinan kallpachakuspanku, hinallataq Señorta manchakuspanku kawsarqanku. Santo Espírituq sonqochaykusqan kaspankutaqmi, askhayarqanku.
[32] Pedrotaqmi, tukuy cheqasninta purimushaspan, Lida llaqtapi tiyaq t'aqasqakunaman watukuq rillarqantaq.
[33] Chaypitaqmi, Eneas sutiyoq huk runata tarirqan. Payqa, mana kuyuriq such'u kasqanraykun, pusaq wataña puñunapi kapusqa karqan.
[34] Pedrotaq payta nirqan: —Eneas, ¡Jesucriston qhaliyachisunki! Sayariy hinaspa puñunaykita allichakuy, nispa. Hinan kasqan ratupacha sayaripurqan.
[35] Lida llaqtapiwan, Sarón pampapiwan tiyaq llapa runakunataqmi, Eneasta rikurqanku. Chaymi paykunaqa Señorman kutirikapurqanku.
[36] Hinaqtinmi Jope llaqtapi huk yachachisqa, Tabita sutiyoq warmi karqan. Chay sutiqa Dorkas ninantan nin. Payqa, askha allin ruwaykunatan ruwasqa karqan, hinallataq limosnatapas qosqa karqan.
[37] Chay p'unchaykunapitaqmi, payqa onqoykapuspan wañukapurqan. Bañaspankutaq, altos pata wasiman churarqanku.
[38] Lida llaqtaqa, Jope llaqtaq qayllallanpin karqan. Chaymi yachachisqakunaqa chaypi Pedroq kasqanta uyarirqanku. Hinan, ‘kasqaykuman usqhaylla hamuy,’ nispa balikamunankupaq kacharqanku.
[39] Hinan Pedroqa, sayarispan paykunawan rirqan. Chayaqtintaq, altos pata wasi ukhuman pusaykurqanku. Llapan biudakunataqmi waqaspa payman asuykurqanku. Hinan Dorkas, paykunawan kashaspanraq ruwasqa karqan chay kapakunata, hinallataq p'achakunata qhawachirqanku.
[40] Llapallankuta hawaman lloqsichispantaq, Pedroqa qonqoriykukuspa Diosman parlarqan. Hinan ayaman kutirispa nirqan: —¡Tabita, sayariy! nispa. Paytaqmi ñawinta kicharirqan. Hinan Pedrota rikuspan tiyarimurqan.
[41] Pedrotaq makinta haywarispan, Dorkasta sayarichirqan. Hinaqtinmi t'aqasqakunatawan, biudakunatawan waqyachispa, kawsashaqta paykunaman qopurqan.
[42] Chaytataqmi, hinantin Jope llaqtapi yacharqanku. Chayraykun, askha runakunaqa, Señorpi iñikapurqanku.
[43] Hinaqtinmi Pedroqa, askha p'unchaykunata Jope llaqtapi, suela ruwaq Simón sutiyoq runaq wasinpi qhepakurqan.