[1] Pedrowan, Juanpiwan runakunaman rimaykushanankukamataq, saserdotekuna, Dios yupaychana wasipi guardiakunaq kapitannin, saduseokuna ima chayamurqanku.
[2] Paykunaqa, Pedrowan, Juanpiwan runakunaman yachachisqankuraykun phiñakurqanku. Hinallataq Jesuspa chawpinta wañusqakunapuramanta kawsarimpuy kasqanmanta willakusqankuraykun, phiñakurqanku.
[3] Hinan paykunata hap'irqanku. Tardeña kasqanraykutaqmi, qhepantin p'unchaykama karselman wisq'arqanku.
[4] Simita uyariqkunataqmi ichaqa, askha iñirqanku. Hinan qharikuna yupasqa, yaqa phisqa waranqa hina karqanku.
[5] Hinaqtinmi, qhepantin p'unchayta, paykunaq kamachikuqninkuna, kurak runakuna, kamachikuy simita yachachiqkuna ima, Jerusalén llaqtapi huñunakurqanku.
[6] Chaypitaqmi, hatun umalliq saserdote Anaspas, Kaifaspas, Juanpas, Alejandropas, hatun umalliq saserdoteq llapan mirayninkunapas kasharqanku.
[7] Hinan chawpinkuman sayaykuchispanku, tapurqanku: —¿Ima atiywanmi, otaq piqpa sutinpin qankuna chayta ruwarqankichis? nispanku.
[8] Hinaqtinmi Pedroqa, Santo Espírituq hunt'aykusqan kaspa, paykunata nirqan: —Llaqtata kamachiqkuna, hinallataq Israel llaqtapi kurak runakuna, uyariychis.
[9] Huk onqosqa runaq allin kaqta chaskisqanmanta, hinallataq imaynatachus qhaliyachisqa kasqanmantawanmi kunan tapuwankiku.
[10] Chaykunaqa, Nazaret llaqtamanta Jesucristoq sutinpin ruwasqa karqan. Paytan qankuna chakatarqankichis. Diostaqmi ichaqa, wañusqakunamanta kawsarichimpurqan. Payraykutaqmi kay runaqa, qankunaq qayllaykichispi qhali kashan. Qankuna llapaykichis, hinallataq llapan Israel llaqta runakuna chaytaqa yachachunku.
[11] Qelqaqa ninmi: ‘Qankuna wasi ruwaqkunaq wikch'upusqaykichis rumiqa paymi. Payllataqmi eskina hap'iq rumipas kapun,’ nispa. (Sal. 118:22)
[12] Hanaq pachaq pachanpi, qespichiwananchispaq runakunaman qosqa wak sutiqa manan kanchu. Chayraykun, manapuni mayqenpipas qespikuyqa kanchu, nispa.
[13] Hinan Pedroq, hinallataq Juanpa mana manchakuq kasqankuta rikurqanku. Hinallataq yachay wasiman mana haykusqankutapas, mana ima yachachikuyta chaskiq runakuna kasqankutapas reqsirqanku. Chayraykun, muspharisqa kasharqanku. Hinallataqmi Jesuswan kasqankutapas yacharqanku.
[14] Ichaqa, qhaliyachisqa runatataqmi paykunawan sayashaqta rikurqanku. Hinaqtinmi paykunaq kontranpi mana imatapas niyta atirqankuchu.
[15] Hinan paykunata, Konsilio Sanedrinmanta lloqsinankupaq kamachirqanku. Huñunakuqkunataqmi paykunapura rimanakurqanku.
[16] Nirqankutaq: —¿Imatataq kay runakunawanri ruwasunchis? Paykunaq señal ruwasqankuqa sut'ipunin. Hinallataq, llapallan Jerusalén llaqtapi tiyaqkunapas chaytaqa allintan yachanku. Manataqmi chaytaqa mananchayta atisunmanchu.
[17] Ichaqa, runakunapurapi amaña sapa kutin chaymanta rimaray aswanta kashananpaq, kunanmantaqa amaña pi runamanpas chay sutipi rimashanankupaq allin-allintapuni amenasasunchis, nispanku.
[18] Paykunata waqyaykuspankutaqmi, Jesuspa sutinpi amapuniña rimarinankupaq, hinallataq amapuniña yachachinankupaqwan kamachirqanku.
[19] Pedrowan, Juanpiwantaqmi ichaqa, kutichispanku paykunata nirqanku: —Diospa ñawpaqenpi, Diosmanta ñawpaqta qankunataraq kasunayku, chaninchus icha manachus kasqanta chaninchaychis.
[20] Imachus rikusqaykumantawan, uyarisqaykumantawan upallalla kaytaqa manapunin atiykumanchu, nispanku.
[21] Llapallan runakunataqmi, chay pasasqanmantaqa, Diosta hatunchasharqanku. Chaymi, llaqta runakunarayku mana imaynanmanta kastigayta atirqankuchu. Aswanpas allinta amenasaykuspankun, paykunataqa kacharipurqanku.
[22] Chay qhaliyachiy señalwan qhaliyachisqa runaqa, tawa chunka kurak watayoqmi karqan.
[23] Pedrowan, Juanpiwan kacharipusqa kaspankutaqmi, kasqan ratupacha iñiqmasinkunaman ripurqanku. Hinan umalliq saserdotekunaq, hinallataq kurak runakunaq tukuy nimusqankuta paykunaman willarqanku.
[24] Paykunataq uyarispanku, huk nisqalla kunkayoqtapuni Diosta nirqanku: —Tukuy munayniyoq Señor, qanmi hanaq pachatapas, hallp'a pachatapas, mama-qochatapas, hinallataq llapallan chaykunapi kaqkunatapas kamaq Diosqa kanki.
[25] Hinallataqmi, kamachiyki Davidpa siminpa chawpinta nirqanki: ‘¿Imanaqtinmi mana-judío runakuna umata hoqarinku, hinallataq llaqtakunapas imaymana yanqa kaqkunata yuyaykunku?
[26] Hallp'a pachapi reykunapas sayarirqankun. Kamachikuqkunapas Señorpa kontranpi, hinallataq Cristonpa kontranpi huk nisqalla huñunakurqanku,’ nispa. (Sal. 2:1, 2)
[27] Cheqaqtapunin Herodespas, Ponsio Pilatopas, mana-judío runakunapiwan, Israel llaqta runakunapiwan, hawisqayki ch'uya Churiyki Jesuspa kontranpi kay llaqtapi huñunakurqanku.
[28] Makiykiq, hinallataq ñawpaqmantaraq yuyaychakusqaykiq ruwakunanpaq ña unanchasqaykitaña ruwanankupaqmi huñunakurqanku.
[29] Kunantaq Señor, imaynatachus amenasawasqankuta qhawariy. Kamachiykikunamantaq, simiykimanta ama manchakuywanpuni rimariyta qoy.
[30] Ch'uya Churiyki Jesuspa sutinpi qhaliyachiykunata, señalkunata, hinallataq musphana ruwaykunata ruwakunanpaq makiykita haywariy, nispanku.
[31] Diosman mañakuyta tukuruqtinku hinataq, maypichus huñunakurqanku, chay cheqasqa kuyurirqan. Hinan Santo Espíritu llapallankuman hunt'aykurqan. Chaymi mana manchakuywan Diospa siminmanta rimarirqanku.
[32] Ancha askha runakunan iñisqaku karqan. Paykunataqmi huk sonqolla, hinallataq huk runa hinalla karqanku. Manan pipas ima kaqnintapas ‘ñoqaqmi’ nispaqa nirqankuchu. Aswanmi llapan imaymanakunapas hukpa nisqallapuni karqan.
[33] Ancha atiywanmi apostolkunaqa, Señor Jesuspa kawsarimpusqanmanta willarqanku. Hinallataqmi, ancha askha saminchaykuna llapankupaq karqan.
[34] Chakrayoqkunapas, wasiyoqkunapas llapallankun, kaqninkuta bendepurqanku. Hinan chay bendesqanku qolqeta apamurqanku. Chaymi mana pipas paykunapurapi pisichikuqqa karqanchu.
[35] Chay qolqetataqmi, apostolkunaq ñawpaqenman churaykurqanku. Hinan paykunaqa, sapankankuq pisichikusqankuman hina rakirqanku.
[36] Chaypitaqmi, Chipre islapi naseq Leví t'aqamanta José sutiyoq runa kasharqan. Paytan apostolkunaqa, ‘Bernabé’ sutiwan suticharqanku. ‘Bernabé’ sutiqa, ‘sonqochaq churi’ ninantan nin.
[37] Payqa hallp'ayoqmi karqan. Hallp'anta bendepuspantaqmi, chay qolqeta apamuspan, apostolkunaq ñawpaqenman churaykurqan.