[1] Ch'aqwaray thanipusqan qhepatataq, Pabloqa, yachachisqakunata waqyachimurqan. Hinan paykunata kallpanchaykuspa, oqllaykukuspa ima, Masedonia probinsiaman puriripunanpaq paykunamanta despidiykukurqan.
[2] Chay suyukunanta purispantaq, askha simikunawan wawqe-panakunata kallpanchaykurqan. Hinamantataq Grecia probinsiaman chayarqan.
[3] Kinsa killaña chaypi kaspantaqmi, barkapi Siria probinsiaman rinan kasharqan. Ichaqa judío runakunaq paypa kontranpi mana allin yuyaykusqankutan yacharukurqan. Chaymi Masedonia probinsianta kutipuyta yuyaykurqan.
[4] Berea llaqtamanta Sopaterpiwan, Tesalónika llaqtamanta Aristarkopiwan, Segundopiwan, Derbe llaqtamanta Gayopiwan, Timoteopiwan, Asia probinsiamanta Tíkikopiwan Trofimopiwan iman, Pablotaqa Asia probinsiakama riysirqanku.
[5] Hinan paykunaqa, ñawparuspanku, Troas llaqtapi suyamuwarqanku.
[6] Ñoqaykutaqmi ichaqa, mana lebadurayoq t'anta mikhuna fiesta pasaytaña, Filipos llaqtamanta barkapi puririrqayku. Hinan phisqa p'unchaymantaña paykunawan Troas llaqtapi tuparqayku. Chaypitaq paykunawan qanchis p'unchayta qhepakurqayku.
[7] Semana qallariy p'unchaytataq, yachachisqakunaqa t'antata phakminankupaq huñunasqa kasharqanku. Pablotaq ichaqa, qhepantin p'unchayta puriripunan kasqanrayku, kuska-tuta oraskamaraq rimaykurqan.
[8] Chay huñunasqa kashasqanku altos wasipitaq, askha lamparakuna kasharqan.
[9] Bentanapitaq, Eutiko sutiyoq huk wayna tiyasharqan. Hinan Pablo unayta rimasqanrayku, chay waynataqa puñuy sinchita atiparqan. Puñuy atipaqtintaq, kinsa pata altosmanta pampaman urmaykurqan. Hinan waynataqa wañusqata hoqarimpurqanku.
[10] Uraykuspantaqmi, Pabloqa, wayna pataman wikch'uykukurqan. Oqllaykukuspantaqmi nirqan: —Waynaqa kawsashanmi. Chayrayku ama qaparkachaychisñachu, nispa.
[11] Pablo wichampuspantaq, t'antata phakmispa mikhurqan. Hinan pachaq illarimunankamaraq unaytapuni rimarqan. Chaymantataq puriripurqan.
[12] Waynata kawsashaqta pusampuqtinkutaq, ancha sonqochasqapuni karqanku.
[13] Asón llaqtakama chakillapi rinanpaqmi Pabloqa yuyaykurqan. Chay llaqtamanta payta hoqarinaykupaqmi Pabloqa niwarqanku. Chaymi ñoqaykuqa, barkapi ñawpaspayku, chay llaqtakama qochanta chayarqayku.
[14] Asón llaqtapi tupaspaykutaqmi, barkapi hoqaripurqayku. Hinamantataqmi, Mitilene llaqtaman chayarqayku.
[15] Chaymantataq barkapi rispayku, qhepantin p'unchayta, Quio islaq chimpanman chayarqayku. Kinsa kaq p'unchaytaq, Samos islaman chimpaspayku, Trogilio llaqtapi samarqayku. Hinan tawa kaq p'unchaytaña Mileto llaqtamanqa chayarqayku.
[16] Atikuqtinqa Pentekostés p'unchaypaqmi, Pabloqa Jerusalén llaqtaman chayayta munasharqan. Chayraykun Asia probinsiapi amaña aswanta qhepakunanpaq, Pabloqa Éfeso llaqtaman manaña chayayta munarqanchu.
[17] Éfeso llaqtapi kashaq iñiq t'aqamanta kurak wawqekunata waqyamunankupaqmi, Mileto llaqtamantapacha kacharqan.
[18] Chay kurak wawqekuna chayamuqtinkutaq, paykunata nirqan: —Asia probinsiaman chayamusqay p'unchaymantapacha, qankuna ukhupi tukuy tiempo imaynatachus purisqaytaqa allintapunin yachankichis.
[19] Judío runakuna urmachiwayta yuyaykuwasqankuraykun sasachakuykuna hamuwarqan. Chaywanpas ichaqa, tukuy huch'uyaykukuywan, hinallataq may askha weqeywanmi Señortaqa serbikurqani.
[20] Allinniykichispaq kaq kunataqa, mana pakaspaymi sut'incharqaykichis. Chaykunataqa runa qayllapipas, wasin-wasintapas yachachirqaykichispunin.
[21] Judío runakunamanpas, mana-judío runakunamanpas ñoqaqa Diospa siminta willarqanipunin. Diospa qayllanpi yuyayman kutirikunankupaq, hinallataq Señorninchis Jesucristopi iñikapunankupaqmi ñoqaqa willarqanipuni.
[22] Kunantaq qhawariychis, ñoqaqa espiritupi presochasqan, imakunachus suyawasqanta mana yachaspay, Jerusalén llaqtaman rishani.
[23] Santo Espiritullan, sapanka llaqtapi presochasqa kanaytapas, ñak'ariykuna suyamuwasqantapas willashawan.
[24] Ichaqa kikin kawsayniytapas manan balorniyoqpaqchu hap'ikuni. Nitaqmi ancha chaniyoqpaqpaschu qhawakuni. Aswanmi ruwasqaykunata kusikuywanpuni tukuruyta munashani. Hinallataq Señor Jesucristomanta llank'ana chaskisqaytapas, Diospa allinpaq qokuynin allin willakuymanta llapanta willaspay, tukuruytapuni munashani.
[25] Ñoqaqa, llapallaykichismanmi Diospa qhapaq suyunmanta willarqaykichis. Kunantaq ichaqa, qhawariychis, manañan mayqenniykichispas uyayta rikuwankichisñachu. Chaytaqa yachanin.
[26] Chay hinaqa, llapallaykichispa wañunaykichismantaqa manañan huchayoqñachu kani. Chaytan kunan p'unchay sut'inchaykichis.
[27] Hinallataq mana imatapas pakaspaymi, Diospa tukuy yuyaykusqankunataqa willarqaykichis.
[28] Chayrayku, qankuna kikiykichista kuidakuychis. Hinallataq llapan tropantin obehakunatapas kuidaychis. Chay qhawaq kanaykichispaq, hinallataq Señorpa iñiq t'aqanta michinaykichispaqmi, Santo Espirituqa churarqasunkichis. Chay iñiq t'aqataqa pay kikinpa yawarninwanmi rantirqan.
[29] Ripusqay qhepatan, yarqasqa phiña lobokuna qankuna ukhuman haykumunqaku. Hinaspan tropantin obehakunata ch'usaqyachinqaku. Chaytaqa yachanin.
[30] Hinallataq qankuna kikiykichis ukhumantan mana allin runakuna hatarimunqaku. Q'otukuq simikunata rimaspanku, yachachisqakunata paykunaq qhepankuman aysanankupaqmi hatarimunqaku. Chaykunata yachasqayraykun kaykunataqa rimapayarqaykichis.
[31] Chay hinaqa, kinsa watantin hunt'a, tuta-p'unchay sapankaykichista weqeywan mana thanispa anyaykusqayta yuyarispa qhawakushallaychispuni.
[32] Kunataq ichaqa, wawqe-panaykuna, Diosman, hinallataq paypa allinpaq qokuy siminkunaman hap'iykuchiykichis. Hatarichinasunkichispaqpas, llapan paypaq t'aqasqakuna ukhupi erensiata qonasunkichispaqpas chay siminkunaqa atiyniqoqmi.
[33] Manan piqpa qolqentapas, qorintapas, nitaq p'achantapas munapayarqanichu.
[34] Aswanmi kay makiykunawan llank'aspay, imakunachus pisiwasqanpaq, hinallataq ñoqawan kashaqkunaq pisichikusqankupaqpas tarirqani. Chaytaqa qankuna kikiykichismi yachankichis.
[35] Tukuypin ñoqaqa chay hinata llank'aspay, pisi-kallpayoqkunaman yanapaykuna kasqanta yachachirqaykichis. Hinallataq Señor Jesuspa siminkunatapas yuyarinaykichispuni. Pay kikinmi nirqan: ‘Chaskiqmantaqa, qoqmi aswan kusisamiyoqqa,’ nispan, nispa.
[36] Chay rimayta tukuruspantaqmi Pabloqa, llapankuwan qonqoriykukuspan Diosman parlarqan.
[37] Llapankutaqmi khuyayta waqarqanku. Hinan Pabloq kunkanman wikch'uykukuspanku anchatapuni much'aykurqanku.
[38] Payqa, nisqan karqan: ‘Manañan uyaytaqa rikuwankichisñachu,’ nispa. Chayta nisqanraykutaqmi, anchatapuni llakikurqanku. Chaymantataq barkoman riysirqanku.