[1] Barkopi Italia suyuman puririnaykupaqmi kamachikuy karqan. Chaymi Pablota, wakin presokunatawan ima, Julio sutiyoq senturionman hap'ichirqanku. Payqa ‘Augusta’ nispa sutichasqa tropantin soldadokunaq umalliqninmi karqan.
[2] Chay hinaqa, Adramitia llaqtamanta huk barkomanmi wicharqayku. Chay barkoqa, Asia suyupi puertokunamanmi puririshasqa karqan. Ñoqaykuwantaq Masedonia probinsiapi kashaq, Tesalónika llaqtamanta Aristarkopas kasharqan. Chay hinapin puriripurqayku.
[3] Qhepantin p'unchaytaq Sidón llaqtaman chayarqayku. Hinan Julioqa, Pablota allinpaq qhawarirqan. Chayraykun amigonkunaq wasinkuman riqtin, imallatapas haywarinankuta mana hark'arqanchu.
[4] Sidonmanta puririspaykutaq, lloq'e ladomanta wayramusqanrayku, Chipre islaq pisi wayraq kasqan ladonta pasarqayku.
[5] Silisia hinallataq Panfilia probinsiakunaq mamaqochanta pasaspaykutaq, Lisia probinsiapi kashaq Mira llaqtaman chayarqayku.
[6] Senturiontaq, Alejandría llaqtamanta Italia suyuman riq barkota chaypi tarirqan. Hinan chayman wichachiwarqanku.
[7] Wayraq hark'awasqankurayku, allillamanta barkopi rispaykutaq askha p'unchaykunapi hallp'amanta ch'ullpaykuq Nidoq chimpanman ñak'ayta chayarqayku. Salmonpa hallp'aq ch'ullpaykuyninpa chimpan, Kreta islaq pisi wayraq kasqan ladonta pasarqayku.
[8] Qochaq kantun cheqasnintakama ñak'ayta rispataq, Lasea llaqtaq qayllanpi kaq ‘Allin Puerto’ nisqa cheqasman chayarqayku.
[9] Uñay tiempoña purispa mana usachiqtiykutaq, paray tiempoqa chayamurqanña. Mama-qochanta puriytaq sinchi sasaña kapurqan. Hinallataq ayuno fiesta tiempopas pasarqanñan.
[10] Chaymi Pabloqa, puriqmasinkunata anyaykurqan: —Puriqmasiykuna, ñoqamantaqa barkopi purisqanchispin mana allin sasachakuypi rikukusunchis. Manan q'epikunallatachu, nitaq barkollatachu chinkachisunchis. Aswanpas ñoqanchispa kawsayninchispas, sinchi sasachakuypin tarikunqa, nispa.
[11] Senturiontaq ichaqa, Pabloq nisqanta mana kasurqanchu, aswanmi barko q'ewiqpa, hinallataq barkoyoqpa nisqallankuta kasurqan.
[12] Paray tiempo kaqtinmi, chay qocha kanto puertopi qhepakuyqa mana allinchu karqan. Chayraykun yaqa llapallanku chaymanta puriripuyta yuyaykurqanku. Paykunaqa, imaynanmantapas Fenisia llaqtaman, chaypi paray tiempota pasanaykupaq, chayaytan munarqanku. Fenisia llaqtaqa Creta islapi qocha kanto puerton karqan, hinallataq wichay ladomanta qallarispan, uray ladopi tukukuq, inti haykuy lado qhawashaq iman karqan.
[13] Uray wayra pisillataña wayramuqtintaq puriripunankupaq allinña kasqanta repararqanku. Chayrayku hap'inayoq barko sayachinakunata aysapuspa Creta islaq qayllanta pasarqanku.
[14] Ichaqa manaraq karuta purishaqtinkutaq barkoq wichay ladomanta ‘Euroklidón’ nisqa sinchi millay tutuka wayra waqtamurqan.
[15] Chay millay wayra barkota hap'iruqtintaq barkoq ñawpaqenta manaña wayra ladoman kutirichiyta atirqaykuchu. Chaymi hinallataña may atisqanman wayrawan apachikurqayku.
[16] Clauda nisqa huch'uy islaq pisi wayrana ladonta usqhaylla pasarqayku. Pasaspaykutaq barkoq aysasqan barkachata ñak'ayta waqaychayta atirqayku.
[17] Hinan huch'uy barkachata hatun barko pataman wichachirqanku. Waskhakunawantaq barkoq uranmanta t'eqerqanku. Ichaqa Sirte nisqa aqo cheqasman tiyarachinantataq manchakurqanku, chayraykun wayraq tanqanan telakunata paskarapuspa, hinallataña wayrawan apachikurqanku.
[18] Qhepantin p'unchaytaq sinchi wayraq apaykachasqan kaspayku kargakunata mama-qochaman wikch'uykuyta qallarirqayku.
[19] Kinsa kaq p'unchaytaq kikin barkoq imaymanankunata makiykuwanpuni wikch'uykurqayku.
[20] Askha p'unchaykunañan mana intitapas nitaq ch'askakunatapas rikurqaykuchu. Chaymi sinchi parantin, wayrantin ima mana thaniqtin, kawsayniyku qespichiy suyakuytaqa llapanta chinkachipusharqaykuña.
[21] Hinan mana mikhusqa unayña kaqtinku Pabloqa chawpinkupi sayaykuspa nirqan: —Qharikuna, Creta islapi, ‘amaraq puririsunchu,’ nisqayta mana kasuwarqankichischu. Sichus kasuwankichisman karqan chayqa, manan kay hina sasachakuypiqa rikukusunmanchu karqan. Manataqmi tukuy imaymanakunatapas chinkachisunmanchu karqan.
[22] Kunanpas ichaqa, kallpachakunaykichispaqmi kayta niykichis: ‘Manan mayqenniykichispas wañunkichischu, aswanpas barkallan chinkapunqa,’ nispa.
[23] Piqpachus kani, hinallataq pitachus yupaychani, chay Diosniypa Angelninmi ch'isi tuta rikhuriwarqan.
[24] Niwarqantaq: ‘Pablo, ama manchakuychu. Rey Cesarpa ñawpaqenmanqa chayanaykipunin. Qhawariy, llapan qanwan riqkunatan Dios makiykiman churamun,’ nispa.
[25] Diospa willachiwasqan hinapuni hunt'akunantan ñoqaqa kreeni. Chayrayku qharikuna, kallpachakuychis
[26] Chaywanpas ichaqa, huk islaman chayananchispunin, nispa.
[27] Chunka tawayoq kaq tutaman chayaspaykutaqmi, Adriatiko nisqa mama-qochapi tukuy ladoman wayraq apaykachasqan karqayku. Kuska tutata barkapi llank'aqkunaqa hallp'amanña sispaykushasqaykuta repararqanku.
[28] Unuq ukhun tupuna waskhata kachaykuspankutaq, iskay chunka brazadata yuparqanku. Aswanta rispataq huktawan unuq ukhun tupuna waskhata kachaykuspa chunka phisqayoq brazadallataña yuparqanku.
[29] Qaqa-qaqaman haykuyta manchakuspaykutaq barkoq qhepanmanta tawantin hap'inayoq sayachinankunata wikch'uykuspanku illarimunallantaña munasharqanku.
[30] Barkopi llank'aqkunataq barkomanta ayqekapuyta yuyaykurqanku. Chaymi barkoq hap'inayoq sayachinankunata yapaq tumpalla barkoq ñawpaqenmanta huch'uy barkachata urayarachisqakuña karqan.
[31] Pablotaq ichaqa, senturiontawan, soldadokunatawan nirqan: —Barkopi llank'aqkunachus barkopi mana qhepakunqakuchu chayqa, manan qankunapas qespikuyta atinkichischu, nispa.
[32] Hinan soldadokunaqa barkacha watasqa waskhakunata kuchurparispa, barkachatataq unuman hinallataña urmaykuchirqanku.
[33] Pacha rayamunankamataq, Pabloqa llapanku imallatapas mikhunankupaq kallpacharqan: —Kunanwanmi chunka tawayoq p'unchayña mana ima mikhusqa kasqaykichisqa kashan.
[34] Umaykichismantaqa manan ch'ulla chukchallapas mayqenniykichispapas chinkanqachu. Chayrayku qespikunaykichispaq imallatapas mikhunaykichispaq balikuykichis, nispan.
[35] Chayta nispantaq, llapankuq qayllankupi Diosman grasiasta qospan, t'antata hap'iykurqan. T'antata phakmispantaq, mikhuyta qallarirqan.
[36] Rimaykusqanwan kallpachasqataq paykunapas llapanku mikhullarqankutaq.
[37] Llapaykutaq barkopiqa iskay pachak qanchis chunkan soqtayoq runakuna karqayku.
[38] Mikhunawan saksaykuspankutaqmi, barkoq allinta tuyunanpaq trigota mama-qochaman wikch'uykurqanku.
[39] P'unchayaramushaqtintaq hallp'ata rikurqanku, ichaqa manataqmi reqsirqankuchu. Ichaqa qocha kantupi huk aqo-aqo k'uchu pampatan rikururqanku. Hinan atispankuqa chay aqo-aqo k'uchu pampaman barkota chayachinankupaq rimanakurqanku.
[40] Barkoq hap'inayoq sayachinankunata kuchurparispankutaq, mama-qochapi saqepurqanku. Kaqllataq timón watasqatapas paskapurqanku, hinallataq wayraq tanqanan ñawpaqpi telata wayraman hoqarispanku, aqo-aqo k'uchu pampaman rirqanku.
[41] Ichaqa, iskay ladomanta unuq tupasqanman chayaqtinkutaq, barkota aqoman sayachipurqan. Barkoq ñawpaq puntan aqoman winakuqtintaq, mana kuyuriyta atirqanñachu. Chaykamataq barkoq qhepanqa unuq sinchi phuqchiqeyninwan p'akikapusharqanña.
[42] Hinan soldadokunaqa, mana mayqenpas nadaspa ayqekunanpaq, presokunata wañurqarichinankupaq rimanakurqanku.
[43] Senturiontaq ichaqa, Pablota qespichiyta munaspa, wañuchiy munaqkunata hark'akurqan. Nadayta atiqkunatataqmi paykuna ñawpaqta unuman wikch'uykukuspa hallp'aman lloqsinankupaq kamachirqan.
[44] Wakinkunatataq tablakunapi, hukkunatataq barkoq imaymanankunapi lloqsinankupaq kamachirqan. Chay hinapin llapanku hallp'aman qespisqa lloqsirqanku.