[1] Cesarea llaqtapin Kornelio sutiyoq huk runa karqan. Payqa, Italiana nisqa tropapi senturionmi karqan.
[2] Kornelioqa, lliw wasinpi kaqkunapiwanmi Dios sonqo runa, hinallataq Dios manchakuq runa karqan. Payqa, llaqtapi runakunamanmi askha limosnata qosqa karqan. Diosmanpas parlallaqpunitaqmi kanpas.
[3] Yaqapas isqon kaq orastan Kornelioqa, rikhuriypi Diospa huk angelninta paypa kasqanman haykumuqta rikurqan. Hinan angelqa payta nirqan: —Kornelio, nispa.
[4] Korneliotaqmi, angelta mancharisqa qhawarirqan. Hinan nirqan: —¿Imata Señor? nispa. Hinan angelqa, payta nirqan: —Diosman parlayniykikuna, hinallataq runakunaman limosna qosqaykikunan yuyarinapaq hina Diospa qayllanman wicharin.
[5] Kunanyá, qharikunata Jope llaqtaman kachay, hinaspa Pedro sutiwan sutichasqa Simonta waqyachimuy.
[6] Payqa, suela ruwaq Simonpa wasinpin qorpachasqa kashan. Chay wasinqa, mamaqochaq kantunpin kashan. Paymi imachus ruwanaykita nisunki, nispa.
[7] Korneliowan rimaq ángel ripuqtin hinataq, payqa iskay kamachinta, hinallataq yanapaqninkunamanta Dios sonqo soldadontawan waqyarqan.
[8] Hinan llapan chay imaymanakunata paykunaman willaspan, Jope llaqtaman kacharqan.
[9] Qhepantin p'unchaytaq, paykunaqa ñanninta risharqanku. Hinan llaqta qayllaman chayarqanku. Soqta orasta hinataqmi, Pedroqa Diosman parlananpaq wasi pataman wicharqan.
[10] Hinan anchata yarqachikurqan, mikhuykuytataq munarqan. Ichaqa mikhunata wayk'ushanankukamataq, mosqhoypi hina huk rikhuriyta rikurqan.
[11] Hanaq pachatataqmi kicharisqata rikurqan. Hinan, huk q'epi hatun sábana hina, tawantin ch'ullpanmanta watasqa hallp'a pachaman uraykamusharqan.
[12] Chay q'epipitaqmi, tawa chakiyoq tukuy imaymana hallp'a pachapi animalkuna, k'ita animalkuna, pampan suchuq animalkuna, hinallataq phalaq animalkunapas kasharqan.
[13] Hinaqtinmi payqa, huk kunkata uyarirqan. Nimurqantaq: —Pedro, sayariy. Wañuchispaykitaq mikhuy, nispa.
[14] Hinaqtinmi Pedroqa nirqan: —¡Manapunin imaynallanmatapas Señor! Ñoqaqa manan hayk'aqpas ima mana mikhunapaq kaqtapas, nitaq qhelli kaqkunatapas mikhurqanichu, nispa.
[15] Hinan chay kunkata iskay kutinpi uyarillarqantaq: —Diospa ch'uyanchasqantaqa, ama mana mikhunapaq kaqta hinaqa qhawariychu, nispa.
[16] Chayqa, kinsa kutikaman rikhurirqan. Hinan qonqayllamanta chay q'epiqa, wakmanta hanaq pachaman hoqarisqa kapurqan.
[17] Pedroqa, chay rikhuriypi rikusqan imachus kasqanmantan kikinpi iskayrayaspa kasharqan. Chayllamanmi, Kornelioq kachamusqan qharikunaqa, tapukuspa, Simonpa wasin punkupiña kasharqanku.
[18] Waqyaspankutaq, chaypichus Simón sutiwan sutichasqa Pedro qorpachasqa kashasqanmanta tapukurqanku.
[19] Imachus chay rikhuriy kasqanmanta Pedro yuyaykushaqtintaq, Santo Espirituqa payta nirqan: —Qhawariy, kinsa qharikunan maskhashasunkiku.
[20] Ñoqan paykunataqa kachamuni. Chayrayku, paykunawan riytaqa ama iskayaychu. Sayariy, hinaspa uraykuy, nispa.
[21] Hinaqtinmi Pedroqa, chay qharikunata chaskiq uraykurqan. Hinan nirqan: —Kaypin kashani. Pitachus maskhashankichis paymi kani. ¿Imamanmi hamushankichis? nispa.
[22] Paykunataq nirqanku: —Senturión Kornelion, ch'uya angelpa nisqankunata chaskirqan. Payqa, chanin runan, Dios manchakuq, hinallataq allin kawsayniyoqmi. Wasinta rispayki, simiykikunata pay uyarinanpaq, waqyanaykupaqmi nimuwanku, nispanku.
[23] Hinan paykunata wasiman pusaykuspan, qorpacharqan. Qhepantin p'unchaytaq, Pedroqa paykunawan rirqan. Jope llaqtamanta wakin wawqekunataqmi payta riysirqanku.
[24] Qhepantin p'unchaytaq, Cesarea llaqtaman haykurqanku. Korneliotaqmi familiankunata, hinallataq aswan munasqan amigonkunatawan waqyachispa, paykunata suyasharqan.
[25] Pedro haykuykunan kashaqtintaq, Kornelioqa payta chaskinanpaq lloqsimurqan. Hinan ñawpaqenpi qonqoriykukuspa hatuncharqan.
[26] Pedrotaqmi ichaqa, sayarichispan nirqan: —¡Sayariy! Ñoqapas qan hina runallan kani, nispa.
[27] Paywan rimasqan qhepamantaq haykurqan. Hinan askha huñusqa kashaqkunata tarirqan.
[28] Hinan paykunata nirqan: —Judío runawan, wak suyu runakunawan tantanakunanku, otaq asuykunakunanku mana allin kasqantaqa yachankichismi. Ichaqa amapuni mayqen runatapas mana ch'uya, otaq qhelli kaq nispa sutiyanaypaqmi Diosqa rikuchiwarqan.
[29] Chayraykun, waqyachimuwaqtiykiqa mana imata rimarispallay hamurqani. Chay hinaqa, tapukunin: ¿Imapaqmi waqyachimuwankichis? nispay, nispa.
[30] Hinan Kornelioqa nirqan: —Tawa p'unchay qhepatan, wasiypi ñoqaqa ayunasharqani. Kay orasta hinataqmi, isqon orasta Diosman parlasharqani. Hinan chayllaman huk runa k'ancharishaq p'achayoq ñawpaqeypi sayaykurqan.
[31] Niwarqantaq: ‘Kornelio, mañakusqaykitan Dios uyarisunki. Hinallataq paypa ñawpaqenpi limosna qosqaykikunatapas yuyarin.
[32] Chayrayku, Jope llaqtaman kachay, hinaspa Pedro sutiwan sutichasqa Simonta pusachimuy. Payqa, mama-qochaq kantunpi suela ruwaq Simonpa wasinpin qorpachasqa kashan. Pay chayamuspantaqmi, qanwan parlanqa,’ nispa.
[33] Chaymi, kasqan ratupacha qanman kachamurqani. Hamuyniykiqa allinpunitaqmi. Kunantaq, Diospa tukuy kamachimusqasunkita uyarinaykupaq llapayku Diospa qayllanpi kashayku, nispa.
[34] Hinaqtinmi Pedroqa, rimarispan nirqan: —Cheqaqtapunin Diosqa mana runakunaq rikch'aynintachu qhawan. Chaytan kuentata qokuni.
[35] Aswanmi, payqa tukuy suyukunapi payta manchakuqta, hinallataq chanin kaq ruwaqta chaskin.
[36] Diosmi, Jesucristoq chawpinta thak kay allin willakuykunata willaspan, Israel llaqta runakunaman huk willakuyta apachimurqan. Paymi, tukuy runakunaq Señorninqa.
[37] Qankunaqa, Galilea probinsiamanta qallarispa, tukuy Judea probinsiantinpi willasqan willakuytaqa yachankichismi. Chayqa, Juanpa willasqan bautismowanmi qallarirqan.
[38] Kaytaqa Nazaret llaqtayoq Jesusta, imaynatachus Santo Espirituwan, atiywan ima hawiykusqanmantan nishani. Diosmi paywan kasharqan. Chayraykun payqa, allin kaqta ruwaspan, hinallataq saqraq tukuy ñak'arichisqanta qhaliyachispan purirqan.
[39] Ñoqaykutaqmi, Judea suyupipas, Jerusalén llaqtapipas, tukuy imaymanakuna ruwasqanmanta testigokunaqa kayku. Paytan k'aspipi warkuspanku, wañuchirqanku.
[40] Diostaqmi ichaqa, kinsa p'unchaymanta sayarichimpurqan. Hinan ñoqaykuman rikhurichiwarqanku.
[41] Manan llapan llaqta runamanchu rikhurirqan. Aswanpas ñoqayku ñawpaqmantapacha Diospa akllasqankunamanmi rikhuriwarqanku. Wañusqakunamanta kawsarimpusqan qhepaman paywan mikhuqkunapas, ukyaqkunapas ñoqaykun kayku.
[42] Paymi llaqta runakunaman willamunaykupaq kachamuwanku. Kawsaqkunaq, hinallataq wañuqkunaq Chaninchaqninku Diospa churasqan kasqanta sut'inchanaykupaqmi kachamuwanku.
[43] Llapallan Diospa rantinpi rimaqkunan paymanta willakunku. Llapa pikunachus paypi iñiqqa, sutinpi hucha pampachayta chaskinanpaqmi willakunku, nispa.
[44] Chay simikunata Pedro rimashanankamataq, simikunata llapallan uyariqkuna pataman Santo Espíritu uraykamurqan.
[45] Diosmi mana-judío runakunamanpas Santo Espírituq qokuyninta hich'aykamurqan. Chayraykun, Pedrowan hamuq sirkunsisionmanta iñiq judío runakunaqa utirayarqanku.
[46] Paykunataqa wak simi rimaykunapi rimaqta, hinallataq Diostapas hatunchaqtan uyarirqanku.
[47] Hinaqtinmi Pedroqa, kutichispa nirqan: —¿Paykuna mana bautisasqa kanankupaqri, pitaq unuta hark'akuyta atinman? Paykunapas, ñoqanchis hinan, Santo Espirituta chaskirqanku, nispa.
[48] Hinan paykunaqa, Señorpa sutinpi bautisasqa kanankupaq kamachirqan. Hinaqtinmi pisi p'unchaykunallapas qhepakunanpaq Pedrota balikurqanku.