[1] Festoqa, Cesarea probinsiapi kinsa p'unchayllaraq kamachikuq haykusqan qhepatan Jerusalén llaqtaman wicharqan.
[2] Hinaqtinmi umalliq saserdotepiwan, judío runakunaq umalliqninkunapiwan paypa ñawpaqenpi rikhurirqanku.
[3] Hinan Pabloq kontranpi balikuspa, mañakurqanku: —Ama hina kaychu, Jerusalén llaqtaman Pablota apachimuy, nispanku. Chaykamataq paykunaqa, ñanpi suyapaspa Pablota wañuchinankupaq wakichikusharqanku.
[4] Festotaq ichaqa, kutichirqan: —Cesarea llaqtapin Pabloqa allin kuidasqa kashan. Chaymanmi pisi tiempollamanta ñoqa kikiypas rillasaqtaq.
[5] Qankunamanta umalliqkuna ñoqawan uraykuy atiqkuna, ñoqawan uraykuchunku, hinaspataq runaq imapas mana allin ruwasqan kan chayqa, uyanpi nimuchunku, nispa.
[6] Paykunawan chunka p'unchay kurakta kaspantaq, Cesarea llaqtaman Festoqa uraykampurqan. Qhepantin p'unchaytaq, chaninchana tiyananpi tiyaykurqan. Hinan Pablota apamunankupaq kamachikurqan.
[7] Pablota aparamuqtinkutaq, Jerusalén llaqtamanta uraykamuq judío runakunaqa, muyuykurqanku. Hinan imaymanamanta Pablota sinchitapuni huchachayta qallarirqanku. Chaywanpas ichaqa, manapunin imatapas sut'intapuni niyta atirqankuchu.
[8] Chaymi Pabloqa, defiendikuspa nirqan: —Judío runakunaq Kamachikuy Siminku kontranpipas, Dios yupaychana wasiq kontrapipas, rey Cesarpa kontranpipas manapunin hayk'aqpas huchallikurqanichu, nispa.
[9] Festotaq ichaqa, judío runakunaq allinpaq qhawarisqan kayta yuyaykuspan, Pabloman kutichispa nirqan: —¿Tukuy kay imaymanakunamanta ñawpaqeypi chaninchasqa kanaykipaq, Jerusalén llaqtaman wichayta munankichu? nispan.
[10] Pablotaq kutichirqan: —Rey Cesarpa chaninchana tiyananpa ñawpaqenpin kashani. Kaypitaqmi chaninchasqaqa kanay. Qanpa yachasqaykiman hinapas, judío runakunataqa manapunin ima mana allintapas ruwarqanichu.
[11] Sichus ima mana allintapas, otaq imatapas wañuchisqa kanaypaq hina ruwarqani chayqa, manan wañuytaqa manchakunichu. Ichaqa sichus kay runakunaq huchachawasqanku mana cheqaqchu chayqa, manan pipas judío runakunaq makinman hap'ichiwaytaqa atiwanmanchu. Chay hinaqa, rey Cesarman pasachiwaychis, nispa.
[12] Hinaqtinmi Festoqa, yuyaychaqninkunawan rimanakuspanña kutichirqan: —Rey Cesarmantaq pasachinaykuta munanki chayqa, rey Cesarmanchá rinki riki, nispan.
[13] Pisi p'unchaykuna pasaqtintaq, rey Agripaqa Berenisepiwan Festota napaykunankupaq Cesarea llaqtaman uraykurqanku.
[14] Paykuna chaypi askha p'unchaykuna qhepakuqtinkutaq, Festoqa rey Agripaman Pablomanta willarqan: —Karselpin, Felixpa wisq'asqanraq huk runa kashan.
[15] Paymantan Jerusalén llaqtamanqa wicharqani. Hinan umalliq saserdotekuna, judío runakunamanta kurak runakuna ima, chay runata huchachanaypaq mañawaspanku hamuwarqanku.
[16] Hinan paykunaman kutichirqani: ‘Roma suyupi ruwayninkuman hinaqa, manan pitapas huchachaqninkunaq ñawpaqenpi manaraq defiendikushaqtin, wañuchisqa kananpaqqa hap'ichiykumanchu.
[17] Chaymi, paykuna usqhaylla kaypi huñukuqtinku, qhepantin p'unchay chaninchana tiyanaypi tiyaykurqani. Hinaspataq chay runata apamunankupaq kamachikurqani.
[18] Hinan paypa huchachaqninkunaqa, huchachanankupaq sayarirqanku. Ichaqa, manataqmi ima huchachaytapas, ñoqaq yuyaykusqayman hinaqa, apamurqankuchu.
[19] Aswanpas, religionninmanta, hinallataq ña wañusqaña kashaq Jesús sutiyoq huk runamantan huchachasharqanku. Pablotaq ichaqa nirqan: Kawsashanmi, nispa. Chaykunallamantataqmi paytaqa huchachasharqanku.
[20] Hinan ñoqaqa, chay churanakuymanta iskayasqa kaspay Pablota tapurqani: ‘Jerusalén llaqtaman rispa kay imaymanakunamanta chaypi chaninchasqa kayta munankichu,’ nispay.
[21] Pablotaq ichaqa, chaninchasqa kananpaq, Roma suyupi rey Augustoman1 pasachisqa kayta munarqan. Chaymi rey Cesarman apachinaykama allin kuidasqa kananpaq kamachikurqani, nispa.
[22] Hinaqtinmi rey Agripaqa Festota nirqan: —Ñoqapas chay runataqa uyariykuyta munaymanmi, nispa. Festotaq nirqan: —Paqarinyá uyarinki, nispa.
[23] Chay hina kaqtinmi, qhepantin p'unchay rey Agripaqa Berenisepiwan muspharinapaq hinaraq hamurqanku. Hinan tribunopiwan, llaqta umalliqkunapiwan, chaninchana wasiman haykurqanku. Hinamantataq Pablota apamunankupaq Festoqa kamachikurqan.
[24] Hinaqtinmi Festoqa nirqan: —Rey Agripa, hinallataq llapallan kaypi ñoqaykuwan kashaqkuna, kay runata qhawariychis. Paymantan llapallan judío runakuna, Jerusalén llaqtapipas hinallataq kaypipas, qaparispanku balikuq hamuwarqanku: ‘Kay runaqa manan kawsananñachu,’ nispanku.
[25] Ñoqataqmi ichaqa, wañunanpaq hina ima mana allin ruwasqantapas manapuni tarirqanichu. Pay kikintaqmi rey Augustoman pasachisqa kayta munarqan. Chaymi payman apachiyta ñoqaqa ña yuyaykuniña.
[26] Ichaqa wiraqochayman, kay runamanta qelqanaypaqqa manan imatapas sut'itapuniqa yachanichu. Chaymi qayllaykichisman, aswantaqa rey Agripa, allintapuni tapuykapuwanaykipaq apachimuni. Chay hinapi imatapas sut'ita yachaspay qelqanaypaqmi, qanpa qayllaykimanqa payta apachimuni.
[27] Huk presochasqata, imamantachus huchachasqa kasqanta mana willaspa apachiyqa, ñoqamanqa manan allinchu rikch'akuwan, nispa.