[1] Diosman parlana isqon kaq orastan, Pedroqa, Juanpiwan Dios yupaychana wasiman wicharqanku.
[2] Hinan huk such'u runaqa, ‘Hermosa’ nisqa Dios yupaychana wasi punkuman apamusqa karqan. Paytaqa, Dios yupaychana wasiman haykuqkunamanta limosnata mañakunanpaqmi, sapa p'unchay apamullaqkupuni. Payqa, nasesqanmantapacharaqmi such'u kasqa karqan.
[3] Paymi, Pedrotawan, Juantawan Dios yupaychana wasiman haykushasqankuta rikurqan. Hinan limosnata qoykunankupaq balikurqan.
[4] Hinaqtinmi Pedroqa, Juanpiwan kuska, such'u runata allinta qhawaykuspa nirqan: —Qhawarimuwayku, nispa.
[5] Hinan chay such'u runaqa, paykunamanta imallatapas chaskiykuyta suyakusharqan. Chaymi paykunata allintapuni uyarirqan.
[6] Pedrotaqmi ichaqa, payta nirqan: —Manan qolqeypas, nitaq qoriypas kapuwanchu. Ichaqa imachus kapuwan, chayllatan qoyki. Nazaret llaqtamanta Jesucristoq sutinpi, ¡sayariy, hinaspa puririy! nispa.
[7] Paña makinmanta hap'iykuspataqmi sayarichirqan. Hinan kasqan ratupacha, chakinpas, hinallataq chaki moqochunkunapas takyapurqan.
[8] Saltaspantaqmi sayarirurqan. Hinan puriyta qallarirqan. Hinallataq purispan, saltaspan, Diosta yupaychaspan ima, paykunawan Dios yupaychana wasiman haykurqan.
[9] Llapa runakunataqmi, purishaqta, hinallataq Diosta yupaychashaqta, rikurqanku.
[10] Hinan ‘Hermosa’ nisqa Dios yupaychana wasi punkupi tiyaspa, limosnata mañapakuq paypuni kasqanta reqsirurqanku. Chay imaymanakuna pasasqanwantaqmi, runakunaqa yuyayninkupi mana kabesqa, hinallataq ancha utirayasqa kasharqanku.
[11] Qhaliyachisqa such'u runataqmi, Pedromanwan, Juanmanwan qaqata hap'iparukurqan. Llapallan runakunataqmi, yuyayninkupi mana kabesqa kaspa, paykunaq kasqanku ‘Salomonpa’ nisqa portalman usqhaylla huñukamurqanku.
[12] Chayta rikuspantaqmi, Pedroqa llapa runakunaman kutichispa nirqan: —Israel llaqtamanta qharikuna, ¿imanaqtinmi chaymanta muspharisqa kashankichis? ¿Imanaqtinmi atiyniykuwanpas, otaq Dios sonqo kayniykuwanpas kay runata puririchiykuman karqan hinatari qhawaykuwankiku?
[13] Abrahampa, Isaakpa, Jokobpa, hinallataq llapa taytanchiskunaq Diosninmi, Churin Jesusta hatuncharqan. Paytan qankunaqa hap'ichirqankichis. Hinallataq, Pilatoña kacharipuyta munashaqtinpas, paypa qayllanpi manancharqankichis.
[14] Qankunataqmi ichaqa, Ch'uya, hinallataq Chanin Jesusta manancharqankichis. Runa wañuchiq runatataq kacharichisqa kapunasunkichispaq mañakurqankichis.
[15] Hinan kawsay Qallarichiqta wañuchirqankichis. Paytan Diosqa, wañusqakunamanta kawsarichimpurqan. Chaymantataqmi ñoqaykuqa, testigokuna kayku.
[16] Jesuspa sutinmi, kay rikusqaykichis, hinallataq reqsisqaykichis runata kallpanchan. Chayqa, paypa sutinpi iñiypa chawpintan karqan. Hinallataq Jesuspa chawpinta iñiymi, llapaykichispa ñawpaqeykichispi hunt'asqa qhaliyayta kay runaman qorqan.
[17] Kunantaq ichaqa wawqeykuna, qankunapas, hinallataq kamachikuqniykichispas, mana yachasqaykichisrayku chay ruwasqaykichista yachani.
[18] Diosmi ichaqa, ñawpaqmantapacha llapa Diospa rantinpi rimaqkunaq siminkuq chawpinta, Criston ñak'arinanmanta willarqan. Willasqanman hinataqmi, hunt'arqan.
[19] Chay hinaqa, huchaykichiskuna pichasqa kananpaq, hinallataq Señor Diospa qayllanmanta samariy p'unchaykuna hamunanpaq, yuyayman kutirikuychis, hinallataq yuyayniykichista t'ikraychis.
[20] Señor Diostaq, ñawpaqmantapacha qankunapaq señalasqa Cristo Jesusta kachamunqa.
[21] Paytan, tukuy imaymanakuna wakmanta sayarichinan p'unchaykunakama, hanaq pachaqa chaskinanpuni karqan. Ñawpa tiempokunamantapachataqmi, Diosqa chay imaymanakunamanta llapan ch'uya Diospa rantinpi rimaqkunaq siminkuq chawpinta rimarqan.
[22] Cheqaqtapunin Moisesqa ñawpa taytakunata nirqan: ‘Señorninchis Diosmi, wawqeykichiskunapuramanta, ñoqata hina, huk Diospa rantinpi rimaqta sayarichipusunkichis. Paypa tukuy imaymanakuna rimaykusqasunkichistan uyarinkichis.
[23] Pipas chay Diospa rantinpi rimaqta mana uyariqqa, Israel llaqtamantan wikch'usqa kapunqa,’ nispa. (Deut. 18:15, 19)
[24] Hinaqa, llapa Diospa rantinpi rimaqkunapas, Samuelmanta ñawpaqman willaqkunaqa, chay p'unchaykunamantapas willarqankupunin.
[25] Qankunaqa, Diospa rantinpi rimaqkunaq, hinallataq taytanchiskunawan, Dioswan rimanakuy ruwasqankuq wawankunan kankichis. Abrahamtataqmi, Diosqa nisqa karqan: ‘Mirayniykipin llapallan hallp'a pachapi familiakuna saminchasqa kanqa,’ nispa. (Gen. 12:3)
[26] Diosqa, Churinta kawsarichisqan qhepata, qankunamanraq ñawpaqta kachamurqan. Mana allin ruwayniykichismanta sapankaykichis yuyayman kutirikuqtiykichis saminchanasunkichispaqmi, chaytaqa ruwarqan, nispa.