[1] Hinaqtimi Pabloqa, Konsilio Sanedrinpi kaqkunata allinta qhawaykuspa nirqan: —Wawqellaykuna, ñoqaqa tukuy allin ch'uya konsiensiawanmi kay p'unchaykama Diospa ñawpaqenpi kawsarqani, nispa.
[2] Hatun umalliq saserdote Ananiastaq ichaqa, ladonpi kashaqkunata, Pablota siminpi ch'aqlanankupaq kamachirqan.
[3] Hinaqtinmi Pabloqa nirqan: —¿Qanqa Kamachikuy Simiman hina chaninchawanaykipaq tiyashaspaykichu, Kamachikuy Simita p'akispayki ch'aqlawanankupaq kamachinki? Chayraykun, ¡yaw yuraq pintarusqa perqa hina iskay-uya, Diosmi qantapas ch'aqlallasunkitaq! nispa.
[4] Chaypi kashaqkunataqmi Pablota nirqanku: —¿Chay hinatachu Diospa hatun umalliq saserdotenta k'aminki? nispanku.
[5] Pablotaq nirqan: —Wawqeykuna, hatun umalliq saserdote kasqantaqa manan yacharqanichu. Arí Qelqaqa ninmi: Llaqtaykipi hatun umalliqtaqa aman ñakankichu, nispan, nispa. (Exodo 22:28)
[6] Hinaqtinmi Pabloqa, wakin saduseokunamanta wakintaq fariseokunamanta kasqankuta yachaspa, Konsilio Sanedrinpi kaqkunaman qaparispa nirqan: —Wawqellaykuna, ñoqapas fariseo, hinallataq fariseo runaq churinmi kani. Chaymi wañukapuqkunaq kawsarimpuyninta suyakusqayrayku chaninchawashankichis, nispa.
[7] Chayta Pablo niqtintaq, saduseokunawan, fariseokunawan hatun churanakuyta qallarirqanku. Huñunakuqkunataq t'aqanakapurqanku.
[8] Saduseokunaqa ninkun: ‘Kawsarimpuyqa manan kanchu. Nitaqmi angelkunapas, espiritukunapas kanchu,’ nispanku. Fariseokunañataqmi ichaqa, chaykuna kasqanta sut'inchanku.
[9] Chayraykun hatun ch'aqwaray hatarirqan. Wakin fariseo t'aqamanta kamachikuy simita yachachiqkunataq hatarimuspa, churanakurqanku. Hinan nirqanku: —Manan ima mana allintapas kay runapiqa tarinchischu. Sichus huk espíritu, otaq huk ángel rimayaramun chayqa, ama Diospa kontranpi hatarisunchu, nispanku.
[10] Ancha hatun huchatariytaq karqan. Chaymi tribunoqa, Pablota ñut'uta llik'irqarinankumanta mancharikurqan. Hinan uraykuspanku, runakunaq chawpinkumanta qechumuspanku, kuartelman apaykunankupaq soldadonkunata kamachirqan.
[11] Qhepantin tutataqmi, Señorqa Pabloman rikhurirqan. Hinan nirqan: —Pablo kallpachakuy. Imaynan Jerusalén llaqtapipas ñoqamanta sut'itapuni willarqanki, chay hinallataqmi, Roma llaqtapipas sut'itapuni ñoqamanta willanayki kashan, nispan.
[12] Qhepantin p'unchay illarimuqtintaq judío runakunaqa, huñunakuspa ñakakusparaq hurarqanku. Nirqankutaq: Pablota wañuchinanchiskama ama mikhusunpaschu, nitaq ukyasunpaschu, nispanku.
[13] Chay huramentuwan rimanakuqkunaqa tawa chunka kurakmi karqanku.
[14] Paykunan umalliq saserdotekunaman, hinallataq kurak runakunamanwan rispanku nirqanku: —Ñoqaykun Pablota wañuchinaykukama mana imatapas malliykunaykupaq ñakapakuywanraq huramentuta ruwarqayku.
[15] Chay hinaqa, kunanyá qankuna Konsilio Sanedrinpiwan tribunomanta Pablota ñawpaqeykichisman paqarin apachimunanpaq mañachimuychis. Chaytaqa, Pablomanta aswan sut'itapuni yachayta munaq tukuspallaykichis ruwankichis. Ñoqaykutaq ichaqa, manaraq Pablo chayamushaqtin wañuchinaykupaq wakichisqapuni kashasaqku, nispanku.
[16] Pabloq pananpa wawanmi ichaqa, chay suyapanankupaq rimanakusqankuta uyarisharqan. Chaymi payqa, kuartelman haykuspa Pabloman willamurqan.
[17] Pablotaq senturión runamanta hukninta waqyarispan nirqan: —Kay waynan, tribunoman huk willakuyta willamunanpuni kashan. Chayrayku payman pusayarapuway, nispa.
[18] Hinan senturion runaqa, tribunoman chay waynata pusaykurqan. Nirqantaq: —Presochamusqanchis Pablon waqyariwaspan, kay waynata qanman pusamunaypaq balikuwarqan. Paymi huk willakuyta willanasunki kashan, nispa.
[19] Tribunotaq, chay waynata makinmanta hap'ispan, hinallataq wak ladoman pusaspan, pakallapi tapurqan: —¿Imataq niwanaykiri kashan? nispan.
[20] Waynataqmi nirqan: —Judío runakunan kay hinata rimanakushanku: ‘Pablomanta aswan sut'itapuni yachayta munaq tukuspallanchis, Konsilio Sanedrinman payta paqarin uraykachimunanpaq, tribunota balikusunchis,’ nispanku.
[21] Paykunamantan tawa chunka kurak runakuna Pablota wañuchinankupaq maskhashanku. Mana mikhunankupaq, nitaq ukyanankupaqmi ñakakuspankuraq huramentuta ruwarunku. Kunantaqmi ichaqa, chay hinatapuni kamachikunaykita suyakuspanku, wakichisqa kashanku. Chayrayku amapuni paykunataqa kreenkichu, nispa.
[22] Hinaqtinmi tribunoqa, chay waynata kacharparipuspan, kay hinata kamachirqan: —Amapunin pimanpas kay willawasqaykitaqa rimarinkichu, nispan.
[23] Hinan tribunoqa, senturión runakunamanta iskayta waqyaspa nirqan: —Kinsa kaq oras tutapaq, iskay pachak soldadokunata, hinallataq qanchis chunka soldadokuna kaballopi, iskay pachaktataq lansakunayoqta, Cesarea llaqtaman rinaykichispaq wakichimuychis.
[24] Hinallataq Pabloq sillakunanpaq kaballokunata wakichinankupaq kamachillarqantaq. Chay hinapin, kamachikuq Felixman allin kuidasqata apankichis, nispa.
[25] Hinan kartatapas kay hinata qelqallarqantaq.
[26] Nirqantaq: —Ñoqa Claudio Lisiasmi, qan ancha respetana kamachikuq Felixman napaykamuyki.
[27] Judío runakuna kay runata hap'imuspanku, wañuchinanku kashaqtinmi ñoqaqa, Roma llaqtayoq kasqanta yachaspay, soldadokunawan qechumurqani.
[28] Hinan imamantachus payta huchachasqankuta yachayta munaspay, paykunaq huñunakuyninku Konsilio Sanedrinman uraykachirqani.
[29] Judío runakunaq Kamachikuy Simillankumantan paykunaqa huchachasqaku karqan. Chayllatan tarirqani. Ichaqa manataqmi ima huchachaytapas wañunanpaq hinaqa, nitaq presochasqa kananpaq hinapas tarirqanichu.
[30] Judío runakuna wañuchinankupaq rimanakusqankuta yacharuspaytaqmi ichaqa, qanman kay runata apachimuyki. Imapas kay runaq kontranpi huchachayninku kaqtinqa, qanpa ñawpaqeykipi payta uyanpi ninankupaqmi, yanqanmanta huchachaqninkunatapas kamachillanitaq. Sumaqllaña, nispa.
[31] Chaymi soldadokunaqa, kamachikuyta chaskisqankuman hina, tuta Antipatris llaqtaman Pablota aparqanku.
[32] Qhepantin p'unchaytaq, kaballopi kaqkunallaña Pablowan rirqanku. Soldadokunataqmi kuartelman kutipurqanku.
[33] Cesarea llaqtaman chayaspankutaq, paykunaqa kamachikuqman kartata qorqanku. Hinallataq Pablotapas ñawpaqenman sayaykuchillarqankutaq.
[34] Kartata ñawinchaspantaqmi kamachikuqqa, mayqen probinsiamantachus kasqanta Pablota tapurqan.
[35] Silisia probinsiamanta kasqanta yachaspantaqmi Pabloman rimaykurqan: —Yanqanmanta huchachaqniykikuna hamuqtinmi allinta uyarisayki, nispa. Hinan Herodespa pretorionpi wisq'amunankupaq kamachikurqan.