[1] Chaymantataq rey Agripaqa, Pablota nirqan: —Qan kikiyki rimariykuyta atinkin, nispa. Hinaqtinmi Pabloqa, makinta hoqariykuspa defiendikuyta qallarirqan.
[2] Nirqantaq: —Ancha respetana rey Agripa, tukuy imaymanakunamanta judío runakunaq huchachasqan kasqaymanta kunan qayllaykipi defiendiykukuyniy ñoqapaqqa ancha kusikuymi.
[3] Judío runakuna ukhupi lliw ruwayninkutapas, churanakuyninkunatapas qanqa allintapunin yachanki. Chayraykun llamp'u sonqo kayniykiwan uyariykuwanaykipaq balikuyki.
[4] Wayna kawsayniy qallarisqanmantapacha, imaynatachus Jerusalén llaqtapi llaqtamasiykunawan kawsasqaytaqa, llapa judío runakunan yachanku.
[5] Sichus willakuyta munanku chayqa, paykunaqa ñawpaqmantaraqmi reqsiwanku. Hinallataq qallariymantapachan fariseo karqani. Chaymi Diosta yupaychayniykupi, fariseo pantasqa t'aqaman hinapuni, aswan hunt'aq kawsasqaytapas yachallankutaq.
[6] Kunantaq machulanchiskunaman Diospa prometesqanta suyakusqayrayku, chaninchasqa kashani.
[7] Chunka iskayniyoq Israel ayllukunapas tuta-p'unchaymi, tukuy sonqowan Diosta serbikuspanku, Diospa prometesqanqa hunt'akunanta suyakushallankutaq. Rey Agripa, chay suyakuyniyoq kasqallaymantataqmi judío runakunaq huchachasqan kashani.
[8] Diosqa wañusqakunata kawsarichimpunmi. ¿Imanaqtintaq qankunari mana chayta kreenkichischu?
[9] Cheqaqtapunin Nazaret llaqtamanta Jesuspa sutinpa kontranpi imaymana mana allin ruwaykunataqa ñoqapas yuyaykurqani.
[10] Umalliq saserdotekunamanta kamachikuyta mañaspaymi ñoqaqa, askha t'aqasqakunata karselman wisq'arqani. Hinallataq wañuchiqtinkupas ñoqaqa, ‘allinmi’ nispan niq kani.
[11] May askha kutitaqmi judío runakunaq llapan huñukunanku wasikunapi ‘Diosta k'arakta k'amiychis,’ nispay kastigarqani. Paykunaq kontranpi sinchita phiñakuspaytaq, karu llaqtakunantinpiraq qatiykacharqani.
[12] Kay ruwanayoq kaspaymi, ordenta qochikuspay, umalliq saserdotekunaq kamachisqan, Damasko llaqtaman risharqani.
[13] Reyniy, ñanta rishaqtiymi, kuskan p'unchayta hina, hanaq pachamanta huk k'anchayta rikurqani. Chay k'anchayqa ñoqata hinallataq riqmasiykunatawanmi muyuriqniykuman k'anchaykamuwarqanku. Chay k'anchayqa intimantapas aswan k'ancharishaqraqmi karqan.
[14] Llapayku pampaman urmaspaykutaq, huk kunkata hebreo rimaypi uyarirqani: ‘Saulo, Saulo, ¿imanaqtinmi qatiykachawanki? T'urpunata hayt'aykachayniykiqa ancha sasapunin kasunki,’ nispa, nimuwaqta uyarirqani.
[15] Hinan ñoqaqa nirqani: ‘Señor, ¿pitaq kankiri?’ nispay. Señortaq nimuwarqan: ‘Ñoqaqa pitachus qatiykachasqayki Jesusmi kani.
[16] Ichaqa sayariy, chakimanta churakuy. Kamachiy kanaykipaq, hinallataq testigoy kanaykipaqmi ñoqaqa rikhuriyki. Kunan ña rikusqaykitaña, hamuq p'unchaypi rikuchillasaykitaq, chaykunata willanaykipaqmi rikhuriyki.
[17] Kunantaqmi ñoqaqa, judío runakunamanpas, mana-judío runakunamanpas kachasayki. Paykunamantapas waqaychasayki.
[18] Ñawinku kicharinaykipaq, tutayaqman rishaspa k'anchayman kutirimunankupaq, hinallataq Satanaspa kamachikuyninmantapas Diosman kutirikunankupaqmi kachasayki. Ñoqapi iñispanku huchanku pampachaytapas, hinallataq t'aqasqa kaqkunawan kuska erensiatapas, chaskinankupaqmi ñoqaqa kachasayki,’ nispa.
[19] Chaymi rey Agripa, hanaq pachamanta rikhuriyta kasukurqani.
[20] Chaymi ñawpaqtaqa, Damasko llaqtapi kaqkunaman, Jerusalén llaqtapi kaqkunamanpas, llapan Judea suyuntinpi mana-judío runakunamanpas kaykunata sut'inta willamurqani: ‘Yuyayman kutirikuychis, Diosmanpas kutirikuychis, hinallataq yuyayman kutirikuy ruwaykunata ruwaychis, nispay.
[21] Chayhawan judío runakunaqa, Dios yupaychana wasipi hap'imuwaspanku wañuchiyta munawarqanku.
[22] Ichaqa Diospa yanapayninwanmi kay p'unchaykama qaqata sayashani. Moisespas, Diospa rantinpi rimaqkunapas, imakunachus kananta willakurqankun. Chay hinallatataqmi ñoqapas, huch'uymanpas, hatunmanpas, Moisespa, hinallataq Diospa rantinpi rimaqkunaq, imakunachus pasananmanta qelqasqankuta, willashani.
[23] Paykunaqa nirqankun: ‘Cristoqa, ñak'arinqapunin. Wañusqakunamantataqmi ñawpaq kaq kawsarimpuqpuni kanqa. Chayraykun judío runakunamanpas, mana-judío runakunamanpas k'anchaymanta willanqa,’ nispanku, nispa.
[24] Pablo tupapakuspa kaykunata nishanankamataqmi Festoqa kunkayoqta payta nirqan: —Pablo, waq'ayasqan kashanki. Ancha askha qelqakuna yachasqaykichá waq'ayachisunki, nispa.
[25] Pablotaq ichaqa nirqan: —Ancha respetana Festo, manan waq'ayasqachu kashani, aswanpas cheqaq simikunatan yuyaywan sut'itapuni rimashani.
[26] Rey Agripa, qanqa kay imaymanakunataqa yachankin. Chayraykun qanpa ñawpaqeykipiqa konfiansawan rimashani. Manataqmi pakasqa k'uchukunapichu kaykunataqa ruwarqanku. Chayrayku qanpa ñawpaqeykipi tukuy kaykunaqa mana pakasqachu. Chaytaqa yachanipunin.
[27] Reyniy Agripa, ¿Diospa rantinpi rimaqkunaq nisqanta kreenkichu? Kreesqaykitaqa ñoqaqa yachanin, nispa.
[28] Hinaqtinmi rey Agripaqa, Pablota nirqan: —Yaqachallamanta Cristiano kanaypaq uyarachiwanki, nispan.
[29] Pablotaq nirqan: —Pisillawanpas, askhawanpas, amataq qanllachu, aswanpas llapan kunan uyariwaqniykuna, ñoqa hina t'ikrakapunaykichista Diosqa munachunpuni. Ichaqa kay hina kadenakunawan watasqalla amaqa, nispa.
[30] Hinan reypas, kamachikuqpas, Berenisepas, hinallataq paykunawan tiyaqkunapas sayarirqanku.
[31] Chaymantataq wak ladoman rispanku, paykunapurapi ninakurqanku: Kay runaqa, manamá imatapas wañuchisqa kananpaq hinaqa, nitaq presochasqa kananpaq hinapas ruwasqachu karqan, nispanku.
[32] Rey Agripataq Festota nirqan: —Kay runa, manachus: ‘Rey Cesarman pasachiwaychis’ ninman karqan chayqa, kacharipusqa kayta atikunmanmi karqan, nispa.