[1] Chay tiempopitaqmi, rey Herodesqa iñiq t'aqamanta wakinninkuta hap'ichispa ñak'arichirqan.
[2] Juanpa wawqen Jakobotataq, espadawan sipichirqan.
[3] Judío runakunapaq chaykuna allin kasqanta qhawarispantaq, Pedrotapas hap'ichillarqantaq. Chay p'unchaykunaqa, mana lebadurayoq t'antakunaq p'unchayninkunan karqan.
[4] Pedrota hap'ichispantaq, karselman wisq'achirqan. Hinan tawa-tawamanta, tawa t'aqa soldadokunaman, makilla qhawanankupaq hap'ichirqan. Paskua fiesta pasaytan, runakunaq rikunanpaq horqomuyta Herodesqa yuyaykusharqan.
[5] Chay hinan Pedroqa, karselpi allin waqaychasqa kasharqan. Iñiq t'aqataqmi ichaqa, mana thanispa Pedropaq Diosman parlasharqanku.
[6] Herodes horqochimunan kashaqtintaq, chay kikin tuta Pedroqa iskay soldadokuna chawpipi, hinallataq iskay kadenakunawan watasqa puñusharqan. Guardiakunataqmi punkuq ñawpaqenpi karselta makilla kuidasharqanku.
[7] Hinan chayllaman, Señorpa huk angelnin rikhurirqan. Hinallataq huk k'anchay karsel ukhupi k'ancharirqan. Angeltaq Pedrota waqtanninpi takaykuspan rikch'arichirqan. Nirqantaq: —Usqhaylla sayariy, nispa. Hinan makinkunamanta kadenakunaqa urmarqaripurqan.
[8] Hinaqtinmi angelqa, Pedrota nirqan: —Chumpikuy, hinaspa husut'aykiwanpas churakuy, nispa. Hinan Pedroqa chay hinata ruwarqan. Chaymantataq payta nillarqantaq: —P'achaykiwan p'achakuspa qatikamuway, nispa.
[9] Lloqsispantaq qatikurqan. Ichaqa manataqmi angelpa ruwasqan cheqaq kasqanta entiendirqanchu. Aswanmi, rikhuriytapas rikushanman hina paypaqqa karqan.
[10] Ñawpaq kaq guardiatapas, iskay kaq guardiatapas pasarqankun. Hinan llaqta qhawashaq fierro punkuman chayarqanku. Chay punkutaqmi kikillanmanta kicharikurqan. Lloqsispankutaq, aswanta huk kallenta risharqanku. Hinan angelqa paymanta qonqaylla chinkarapurqan.
[11] Hinaqtinmi Pedroqa, yuyayninta hap'ikuspa nirqan: —Señorqa huk angelninta kachamuspan Herodespa makinmanta kacharichiwasqanta kunanqa cheqaqmantan entiendini. Judío runakunaq lliw suyakusqanmantapas horqowanmi, nispa.
[12] Chaymanta kuentata qokuspantaqmi, Maríaq wasinta rirqan. Chaypin askha runakuna huñunasqa kasharqanku, hinallataq Diosman parlasharqanku. Mariaqa, Markos sutiwan sutichasqa Juanpa mamitanmi karqan.
[13] Kalle-punkuta Pedro takaykuqtintaq, Rode sutiwan sutichasqa huk sipas uyariq lloqsimurqan.
[14] Sipastaqmi, Pedroq kunkanta reqsiruspa, ancha kusikuymanta mana punkuta kicharqanchu. Aswanpas ukhuman phawaykuspanmi, punkupi Pedroq kashasqanta willamurqan.
[15] Paykunataq sipasta nirqanku: —¡Waq'ayarqonkichá! nispanku. Sipastaq ichaqa nirqan: —Pedropunin, nispa. Hinaqtinmi paykunaqa nirqanku: —¡Angelninchá! nispanku.
[16] Pedrotaq ichaqa, punkuta takakusharqanpuni. Kichamuspankutaq, payta rikururqanku. Hinan utirayarqanku.
[17] Pedrotaq ichaqa, makinwan señaschaspan, upallachirqan. Hinan imaynatachus karselmanta Señorqa horqomusqa karqan, chayta paykunaman willarqan. Chaymantataqmi nirqan: —Jakoboman, hinallataq wawqe-panakunamanpas chayta willamuychis, nispa. Hinan Pedroqa, lloqsispan wak cheqasman ripurqan.
[18] P'unchayaramuqtintaqmi, soldadokuna ukhupi imachus Pedrowan pasasqanmanta sinchi ch'aqwaray karqan.
[19] Herodestaqmi ichaqa, Pedrota maskhachirqan, hinaspan manapuni tarirqanchu. Guardiakunata allin-allinta tapuspantaq, paykuna wañuchisqa kanankupaq kamachikurqan. Chaymantataqmi Herodesqa, Judea suyumanta Cesarea llaqtaman uraykurqan. Hinan chaypi qhepakurqan.
[20] Tiro suyupi, hinallataq Sidón suyupi runakunapaqmi, Herodesqa sinchi phiñasqa kasharqan. Paykunataqmi ichaqa, rimanakuspa reypa qayllanman rirqanku. Reytaqmi chay suyunkuman mikhunata apachiq. Chayraykun reypa puñunanta allichaq kurak kamachin Blastota uyachispanku, thak kayta mañakurqanku.
[21] Huk señalasqan p'unchaypitaqmi, Herodesqa rey kanan p'achanwan p'acharukuspa, tribunalpi tiyaykurqan. Hinan kallpachay simikunata paykunaman rimaykurqan.
[22] Llaqta runakunataqmi qaparirqanku: —¡Kayqa, Diospa kunkanmi, manamá runaq kunkanchu! nispanku.
[23] Herodesqa, manan hatunchayta Diosman qorqanchu. Chaymi qonqayllamanta, Señorpa huk angelnin k'irirurqan. Hinan kurukunaq mikhusqan wañukapurqan.
[24] Diospa simintaqmi ichaqa, wiñarqan, hinallataq yapakurqan.
[25] Hinan ruwanankuta hunt'aspanku, Bernabepiwan, Saulopiwan, Markos sutiwan sutichasqa Juanta pusarikuspa, Jerusalén llaqtaman kutimpurqanku.