[1] Chay imaymanakuna qhepatataq, Jesusqa yachachisqankunaman Tiberias qochapi wakmanta rikhurirqan.
[2] Kay hinatataqmi rikhurirqan. Simón Pedro, Dídimo nispa sutichasqa Tomás, Galilea probinsiapi kashaq Kaná llaqtamanta Natanael, Zebedeoq iskay churinkuna, hinallataq iskay wak yachachisqankunapiwanmi kuska kasharqanku.
[3] Simón Pedron paykunata nirqan: —Challwaqmi rishani, nispa. Paykunataq Pedrota nirqanku: —Ñoqaykupas qanwan risaqku, nispanku. Kasqan ratupacha lloqsispankutaqmi, barkaman haykurqanku. Hinan chay tutapiqa, mana ima challwatapas challwarqankuchu.
[4] Pacha illariramushaqtintaqmi, Jesusqa qocha kantupi rikhurirqan. Yachachisqankunataqmi ichaqa, Jesús kasqanta mana kuentata qokurqankuchu.
[5] Hinan Jesusqa paykunata nirqan: —Wawallaykuna, ¿Imallapas mikhunaykichispaq kashanchu? nispa. Paykunataq kutichirqanku: —Manan, nispanku.
[6] Jesustaq paykunata nirqan: —Barkaq paña ladonman challwana llikata wikch'uykuychis, hinaspan tarinkichis, nispa. Wikch'uykurqankun, hinan askha challwakunaq kasqanrayku, mana llikata aysaytapas atisharqankuraqchu.
[7] Chay hinaqa, mayqen yachachisqantachus Jesusqa munakurqan, chay yachachisqanmi Pedrota nirqan: —¡Señormi! nispa. Simón Pedroqa Señor kasqanta uyarispanmi, mana p'achayoq kasqanrayku p'achanwan churakurqan. Hinan qochaman wikch'uykukurqan.
[8] Wakin yachachisqankunataqmi, challwana llikata challwakunayoqta chutaspanku, barkapi chayarqanku. Hallp'amantaqa manan sinchi karupiñachu, aswanpas iskay pachak maki khukuchupi hinallañan kasharqanku.
[9] Barkamanta hallp'aman uraykuspankutaq, nina sansa patapi huk challwatawan, t'antatawan rikurqanku.
[10] Hinan Jesusqa paykunata nirqan: —Kunan challwamusqaykichis challwakunata apamuychis, nispa.
[11] Hinaqtinmi Simón Pedroqa, barkaman wichaspan, challwana llikata pachak phisqa chunka kinsayoq hatun challwakunayoqta, hunt'ata pampaman horqomurqan. Chay hina askhaña kaqtinpas, manan challwana llikaqa llik'ikurqanchu.
[12] Jesustaq paykunata nirqan: —Hamuspa mikhuychis, nispa. Señor kasqantaqa yacharqankun. Chayraykun mana mayqen yachachisqanpas tapuyta atirqankuchu: ‘¿Qanri, pitaq kanki?’ nispankuqa.
[13] Hinaqtinmi Jesusqa hamuspan, t'antata hap'ispa paykunaman qorqan. Chay hinallatataqmi challwatapas qollarqantaq.
[14] Wañusqakunamanta kawsarimpusqan qhepata, Jesuspa kinsa kutinpi yachachisqankunaman rikhurisqanmi chayqa karqan.
[15] Mikhusqanku qhepamantaqmi Jesusqa, Simón Pedrota nirqan: —Jonaspa churin Simón, ¿paykunamanta aswantapunichu munakuwanki? nispa. Pedrotaq kutichispa nirqan: —Arí, Señor. Qanqa, qanpaq munakuyniy kasqantaqa yachankin, nispa. Jesustaq payta nirqan: —Korderoykunaman mikhuchiy, nispa.
[16] Hinan Jesusqa iskay kutinpi Pedrota nillarqantaq: —Jonaspa churin Simón, ¿munakuwankipunichu? nispa. Paytaq kutichirqan: —Arí, Señor. Qanqa, qanpaq munakuyniy kasqantaqa yachankin, nispa. Jesustaq payta nirqan: —Obehaykunata michiy, nispa.
[17] Hinan Jesusqa, payta kinsa kutinpi nirqan: —Jonaspa churin Simón, ¿ñoqapaq munakuyniyki kanchu? nispa. Pedrotaqmi kinsa kutinpi: ‘¿Munakuyniyki kanchu?’ nispa nisqanwan anchata llakikurqan. Hinan Pedroqa Jesusta nirqan: —Señor, qanqa tukuy imaymanakunatan yachanki. Qanqa, qanpaq munakuyniy kasqantaqa yachankin, nispa. Jesustaq payta nirqan: —Obehaykunaman mikhuchiy.
[18] Cheqaqta, cheqaqtan niyki: ‘Waynallaraq kashaspaykiqa, kikiykin p'achakurqanki. Hinan maymanchus munaq kanki chayman rirqanki. Machuyapuqtiykitaqmi ichaqa, makiykita hoqarinki, hinan huk p'achachisunki. Hinaspataqmi, maymanchus mana munanki chayman apasunki,’ nispay, nispa.
[19] Imayna wañuywanchus Pedroqa Diosta hatunchanan karqan, chayta señalaspanmi chaytaqa nirqan. Chayta nispantaqmi, Jesusqa Pedrota nirqan: —Qatikuway, nispa.
[20] Pedroqa qhepaman kutirispanmi, Jesuspa munakusqan yachachisqanta paykuna qatikusqanta rikurqan. Payqa senashaqtinku, Jesusman k'iraykuspa tiyaykuqmi karqan. Hinan payqa Jesusta nisqa karqan: ‘Señor, ¿pitaq hap'ichisunkiri?’ nispa.
[21] Pedrotaqmi payta rikuspan, Jesusta nirqan: —Señor, ¿imaynataq kay runamantari kanqa? nispa.
[22] Jesustaq payta nirqan: —Sichus kutimunaykama paypa qhepananta ñoqa munayman chayri, ¿imataq qanmanri qokusunki? Qanqa qatikuway, nispa.
[23] Chay hinaqa, Jesuspa chay yachachisqan, mana wañunan rimaymi llapan wawqe-panakunapurapi ch'eqerirqan. Jesustaqmi ichaqa, mana paypa mana wañunanmantachu rimasharqan. Aswanpas nishallarqanmi: ‘Sichus kutimunaykama paypa qhepananta ñoqa munayman chayri, ¿imataq qanmanri qokusunki?’ nispan.
[24] Chay yachachisqaqa ñoqan kani. Chay imaymanakunamanta willakuspay qelqaqqa, ñoqan kani. Willakusqay cheqaqpuni kasqantaqa yachanchismi.
[25] Jesusqa ancha askha imaymanakunatapas ruwallarqantaqmi. Sichus sapanka ch'ulla-ch'ullamanta qelqasqa kanman chayqa, yuyaykusqayman hinaqa, manachu hina kay pachaman chay librokuna kabinmanchu. Ahinapuni kachun.