[1] یِمْ تُسْتُیٜ کُویٜࢽِّیَ، مَوُیٜ یِمْ بُرْوُویٜیَ سُوَ لْࢻْ مَرْیَمْ مَغْدَلَا مَرْیَمْ ࢻَلْدَ کَوْرِدَ کُرُورُو لٜىٰرَ؞
[2] سَدْمَࢽْ ثِدِ لُولُویٜࢽُو، مَلَیْیَ کْمَࢽْدٜىٰ لَا سَمٜلَࢽْ جْࢻْثٜ کَوْ کُرَدَ تْمْبَلْجٜ کْلَدْࢽْ ࢽَࢻْکٜࢽُو؞
[3] ثَمُࢽُوࢽْجُ مْلْکْثِ غَیْ، کَجْمُࢽْجُ یٜ بُلْ ࢻُوکْ؞
[4] سُوجِیَدْ رِدُࢽْجُرُو جَوْرُو لُولُوجَࢽٜ أَمْ سَࢽُࢽَ غَیْرُو وَلْیٜرَ؞
[5] أَمَّ مَلَیْیَدْیٜ کَمُوَدْرُو: «بَرٜ رِࢽُوِّ! عِیسَى کَمْ کْسْکَرُو جَجَاࢽَدَ مَࢽُوِرُو ࢽُوکّْࢽَ؞
[6] وُلْجْࢽَدْ غَیْ، تِ ࢽَ أَدْࢽْ بَوُو، ثِجْࢽَ! أَرُواْ ࢽَ تِیَ سْࢽَجَࢽَدَ رُیْوُو!
[7] دَجِ دُوَࢽْ لٜࢽُواْ ࢻُوُرَوَࢽْجُرُو: ‹کَرْمُولَࢽْ ثِجْࢽَ؞ تِ ࢽَیِیَ بُرْوُوࢽْجَࢽٜ ثِدِ غَلِلٜىٰرُو لٜجِ، ࢽَدْࢽْ تِیَ رُوِ،› وُلْغْࢽُواْ؞ أَکُّو أَدَ ࢽَیِرُو وُلْࢽْجَغَکّْࢽَ،» یٜࢽُو؞
[8] دَجِ کَمُوَدْ کَرْوُࢽْجَ کَمْدْࢽَ یٜ، جَوْرُو کْجِ ࢻَࢽْجَیْ یٜرُو کَوْرِدْࢽْ ثَلُوٜ ثَغَسٜ لَوَرْدَ ࢻُوُرَوَࢽْجُرُو ࢽجَدُورُو لٜىٰرَ؞
[9] سَدْمَࢽْ عِیسَى تَیِیَ کَࢻْثِیٜ: «وُسُواْ!» یٜࢽِّیَ، ࢽَࢽْجُرُو إِسَࢽٜ سِࢽْجُرُو کَمْدَغَࢽٜ تِرُو أَمْبْتْکٜىٰرَ؞
[10] دَجِ عِیسَیٜ تَیِرُو: «بَرٜ رِࢽُوِّ! لٜࢽُواْ کْرَمِیَࢽِرُو وُلْغْࢽُواْ ثِدِ غَلِلٜىٰرُو لٜجَ، ࢽَدْࢽْ وُوَ سَرُیْ،» یٜࢽُو؞
[11] کَمُوَدْ لٜدُ ثَدِ دُوُوࢽْ، سُوجِیَ غُرٜدُوُیٜ لَاࢽجَ بْرْࢽِدْرُو وَلْدَࢽٜ وُرَوَ رِمَࢽَّیٜدْرُو أَوُو وَکَّجْࢽَ سَمَّا وُلْیٜىٰرَ؞
[12] تَیِ یٜ أَمْوُرَوَدَ رُوکُّو ثَࢻْتَࢽٜ ࢽِیَ ࢽغُویٜرَࢽِّیَ، وُرِ ࢽغْوُ سُوجِیَدْرُو ثَدٜ
[13] تَیِرُو: «أَکُّو أَوُو وُلُّوِدْ: ‹بُࢽٜ کْࢽْمْ دِیٜ دُوُوࢽْ، ࢻُوُرَوَࢽْجُسُو إِسَࢽٜ کَمِࢽّجُدَ ࢽدَلْیٜرَ؞›
[14] کُورُو غُومْࢽَدْ أَوُو أَدَ ࢻَࢽْجِیَ، تِیَ لُواْࢽِیٜ ࢽَیِیَ ࢽجَمُویِیٜ،» یٜرَ؞
[15] دَجِ سُوجِیَدْ وُرِدَ ثَمُویٜ لٜجَࢽٜ تَیِرُو وُلْجَاࢽَدْ غَیْ کٜدُو؞ أَدْغَیْمَ کُ کُࢽْدٜࢽُّو مَࢽَ أَدْ ثُرُو یَوْدِیَیٜࢽْ تَتَرْغَدَ؞
[16] دَجِ ࢻُوُرَوَ مٜوُࢽْ تِلُوࢽْدْ ثِدِ غَلِلٜىٰرُو لٜجَࢽٜ کَوْ کُرُوُ عِیسَى تَیِرُو وُلْجْغْࢽَدْرُو کَدِرَ؞
[17] تِیَ کٜرُࢽِّیَ، تِرُو أَمْبْتْکٜىٰرَ، أَمَّ لَاࢽجَ دَکّٜرَ؞
[18] دَجِ عِیسَى ࢽَࢽْجَرُو إِسٜ تَیِرُو: «کْࢽْدُوُو سَمٜىٰیَ ثِدِیٜیَ سَمَّا وُرُو سَدْࢽَ؞
[19] أَدْمَ ࢽَࢽْغَرُو لٜࢽُواْ جَمَ دُࢽِیَیٜ سَمَّا ࢻُوُرَوَࢽِرُو دٜوُو، تَیِرُو ثُ بَوَدْیٜیَ تَدَدْیٜیَ رُحُدْیٜیَلَࢽْ کَسَلَ یِدُّواْ؞
[20] کُورُو وَدَوَ ࢽَیِرُو ࢽجَدْکّْࢽَ سَمَّا جَارُو تَیِیَ أَلَمُّواْ؞ ࢽُوࢽُواْ، وُ سَوِسُورُو ࢽَیِیَ رُوکُّو، حَرْ ثِدُ دُࢽِیَیٜرُو،» یٜࢽُو؞