[1] عِیسَى ࢻَدُو اللَّهیٜࢽْ ثُلُوُࢽَ لٜجِ دُوُوࢽْ، ࢻُوُرَوَࢽْجُ ࢽَࢽْجُرُو إِسَࢽٜ تِرُو تَࢽْدُو تَࢽْدُو ࢻَدُو اللَّهیٜدَ ࢻْلٜدُوُرُو بَدِیٜرَ؞
[2] أَمَّ عِیسَیٜ تَیِرُو: «أَوُو أَࢽِ سَمَّا رُوَّ، غْࢽَ؟ جِرٜمَرُو ࢽَیِرُو وُلْࢽْجَغَکِّ، کَوْ أَࢽِ سَمَّا وُرْجَࢽٜ ࢻِجَیْ، حَرْ تِلُومَ کْلَ کَمَࢽْجُیٜࢽْ غَࢻْثِوَوُورُو وَلْجِ،» یٜࢽُو؞
[3] عِیسَى کْلَ کَوْ جَیْتُࢽّٜࢽْ ࢽَࢻْثْࢽَ دُوُوࢽْ، ࢻُوُرَوَࢽْجُ رُࢽْجَࢽْ إِسَࢽٜ تِرُو: «أَࢽْدِرُو وُلْسَغَࢽٜ، سَوِ أَوُو أَࢽِ وَکَّجَیْ؟ کُورُو سَ کْࢽْدٜࢽْمْبَ سِدُ دُࢽِیَیٜیَیٜ ثْدِیَ، أَوِ أَلَمَ دُوُوࢽْ أَمْبُو ࢻْلٜدِیدْ وُو؟» ثَࢽٜ تِیَ کٜوُورُو؞
[4] عِیسَیٜ تَیِرُو: «حَࢽْغَلْ غْࢽَࢽُواْ، بَرٜ وُࢽْدُمَ ࢽَیِیَ ࢽجَوَتْکْࢽِّ!
[5] أَمْ ࢽغْوُ ثُࢽِلَࢽْ إِسَࢽٜ: ‹وُمَ أَلْمَسِیوُدْ وُو!› ثَࢽٜ أَمْ کَدَا ثَوَتْکِ؞
[6] کْرِوُ ࢽَ کَرْࢽْسُووَ کُرُوُسُووَلَࢽْ ࢽُکْثْࢽَرُو ࢻَࢽُّوِیَ، بَرٜ حَࢽْغَلْࢽْدُو ثِجْࢽِّ! سَیْ أَوُو أَࢽِ بُرْوُوࢽْ وَکَّجَیْیَ دُوُوࢽْ، أَمَّ سَ ࢽجٜرُورَمْبٜ کُوَ یَیٜ ثْدْࢽِّ؞
[7] لَرْدُوَ لَرْدُ غَدٜیَ لَوَلَدَیْ، کُورُو کْرْمَیْیَ کْرْمَیْ غَدٜیَ یٜ کَتّٜࢽْجَࢽْ کْرِوُ غْرْجَیْ؞ کْࢽَ یٜ ࢽَ ࢽَرُو ࢽغَیِ، کُورُو ثِدِ یٜ ࢽَ غَدٜغَدٜࢽْ لُولُوجِ؞
[8] أَوُو أَࢽِ سَمَّ بَدِدُرَمْ بُوࢽٜىٰ بَسْ، أَلَمَ کَمُ تِیَ ثُرُو لٜجْࢽَ غَیْ؞
[9] «دَجِ ࢽَیِیَ ࢽجَدَࢽٜ بَسَرْࢽْجَࢽٜ رُورُو ࢽجٜىٰسِ، کُورُو ثُࢽِ ࢽَࢽْغَرُو جَمَ دُࢽِیَیٜ سَمَّ وَࢽْجَیْ؞
[10] دَجِ أَمْ ࢽغْوُ یٜ وُوَ غَࢽْجَ کُولْجَیْ؞ لَا أَمَࢽْ أَمَࢽْجَیٜ جَوُیْ، لَا غَدٜ یٜیَ وَجَیْ؞
[11] کُورُو ࢽَوِیَ کَتُّوُیٜ إِسَࢽٜ أَمْ کَدَا جَمْبَجَࢽٜ ثَوَتْکِ؞
[12] کْلَ جِرٜࢽَمْبُ تْرْغَࢽَیٜࢽْ کْرَوُو أَمْ ࢽغْوُیٜ تْغْرْدِ؞
[13] أَمَّ کَمْ مْرْجٜ حَرْ سَ ࢽجٜرُورَمْبٜرُو دْغَࢽَمَدْ ࢽجْکَّوُو ثُوَࢽْدِ؞
[14] کُورُو کَوُرِ کْجِ ࢽُودُو بَرْغَایٜ أَدْ یٜ جَمَ دُࢽِیَیٜ سَمَّرُو شٜدَرُو وُلْدِیے دُوُوࢽْ، دَجِ ࢽجٜرُورَمْدْ إِسِ؞
[15] «أَدْ ࢽَࢽْغَرُو سَ دُوُوࢽْ أَوُو وَادَ جَوْرُو بَتِّ مَسِوَ کُدُومَ لَوَرْࢽْجُ ࢽَوِ دَࢽِیٜلْ رُوُجْࢽَدْ ࢽَ جَوْرُو دَرَجَاࢽْ دَادَ رُوِیَ، (کْرَدُمَدْ أَسُجُو!)،
[16] دَجِ أَمْ لَرْدُ یَحُدِیَیٜࢽْ دَسَاࢽَدْ ثِجَ کَوْرُو ثَغَسُو لٜجَ!
[17] کَمْ کْلَ سُورُوࢽْجُیٜࢽْ دْغَࢽَدْ بَرٜ جْࢻْثٜ کَرٜ ࢽغُودُرُو ثُرُو سُورُودْیٜرُو ࢽغَاࢽِّ!
[18] کُورُو کَمْ کُلُولَࢽْ دْغَࢽَدْ یٜ بَرٜ کَلْوُࢽْجُ ࢽغُودُرُو وَلْدْࢽِّ!
[19] یِمْ أَࢽِࢽْ کَمُ ثُرُووَ سُو، ࢽغَࢽْجِ ثْمْبِیَ سُودْ، کُتُّࢽْجَ!
[20] بَرٜ کَسُوࢽْدُو سَ کَکُیٜࢽْ بِ یِمْ تُسْتُیٜࢽْ وَکَّجْࢽِّرُو اللَّهَ کُورُواْ!
[21] دَلِلْࢽْجُدْ سَدْࢽْ بُوࢽٜ جَوْرُو کُتُّ مبٜجِ، بُوࢽٜ دُوُوࢽْ سَ دُࢽِیَ أَلَکْتْࢽَدْࢽْ تَیْ کُرُو کُدٜرُو ࢽغَلْتٜمَ جِرِࢽْجُ تُوَࢽْدْࢽِّ ࢻُوُ یٜࢽْ ࢻَغَتْ تُوَࢽْدِوَوُو ࢽَࢽْغَرُو؞
[22] کُورُو ثَ کْمَࢽْدٜ بُوࢽٜ أَدْیٜ کَوُࢽْجُ ࢻُلُجْࢽِّیَ، وُࢽْدُمَ ࢽجْکَّوُو ثُوَࢽْدِوَوُو؞ أَمَّ أَمْ کْرٜجْࢽَدْ ࢽَࢽْغَرُو کَوُدَ ࢻُلُجِ؞
[23] سَ أَدْࢽْ کَمْ لَایٜ ࢽَیِرُو: ‹أَکُّوࢽْجُ أَلْمَسِیوُدْ!› بِ ‹تُواْࢽْجُ تِ!› ثْࢽِیَ، بَرٜ تِیَ یَسَرَوِّ!
[24] دَلِلْࢽْجُدْ أَلْمَسِوُوَ کَتُّوُیٜسُووَ ࢽَوِیَ کَتُّوُیٜسُووَ إِسَࢽٜ أَلَمَ کُرَ سُو، أَوُو أَجَبَّ سُو ثَدٜ، یُویٜࢽُووَ، حَرْ أَمْ کْرٜجْࢽَدْمَا جَمْبَجَࢽٜ ثَوَتْکِ؞
[25] أَکُّو کَوُ وَکَّجِدْرُو، أَدَ ࢽَیِرُو وُلْࢽْجَغَکّْࢽَ؞
[26] أَدْ ࢽَࢽْغَرُو أَمْ لَایٜ ࢽَیِرُو: ‹تُواْࢽْجُ تِ کَرَالَࢽْ!› ثَࢽِیَ، بَرٜ لٜࢽُوِّ؞ بِ ‹أَکُّوࢽْجُ تِ ثُرُو ࢽغِمْبٜࢽْ!› ثَࢽِیَ، بَرٜ تَیِیَ یَسَرَوِّ؞
[27] جِرِ سَمٜ أَدِࢽَّمْلَࢽْ حَرْ ࢻْدٜرُو ثُوَلْدٜ وَسِّدْ غَیْ، کْࢽْدٜ تَدَ کَمْبٜدْ یٜ ࢽغَیْ؞
[28] ࢽَ رِوَ دْغَࢽَلَࢽْ کُووُوَسُو یٜ ثَࢻْتَیْ؞
[29] «سَدْمَࢽْ ࢽغَوُو بُوࢽٜ یِمْ أَࢽِیٜࢽْ کْࢽْغَلْ ثْلْمْبُو وَلْجِ، کُمْبَلْ یٜ ࢽُرْࢽْجُ ثِوَوُو، سِلُّووُوَسُو یٜ سَمٜلَࢽْ ثَسُرِ، کُورُو کْࢽْدُوُووَ سَمٜىٰ یٜ جَوْرُو لُولُوجَیْ؞
[30] دَجِ أَلَمَ تَدَ کَمْبٜدْ سَمٜلَࢽْ ࢻْلٜدِیے؞ دَجِ جَمَ دُࢽِیَیٜ سَمَّ کَرْوُࢽْجَ کُتَّجِ، کُورُو تَدَ کَمْبٜ کْࢽْدُوُووَا جَوْرُو دَرَجَآ کْلَ ࢻُوࢻُووْ سَمٜىٰࢽْ إِسِ ثَرُیْ؞
[31] أَدْغَیْمَ مَلَیْیَوَࢽْجُوَ ࢽُکْتُ کُرَ کَࢽْغَدِیٜࢽْ ثُࢽُودٜ تَلْغْمُو دُࢽِیَیٜ دٜوُ سَمَّࢽْ تَیْ ثِ دَجِرَمْ سَمٜىٰسُورُو یَدٜ أَمْࢽْجُ کْرٜجْࢽَدَ ثَࢻْثَیْ؞
[32] «یَ تَرْمُیٜࢽْ مِسَلْ أَدَ أَسُࢽُواْ! سَ ࢻْکْتُ بَدِجٜ کَلُ رِجِیَ، ࢽَࢽْغْرِ کَرْࢽْجْࢽَرُو ࢽُوࢽُوَّ؞
[33] ࢽغَیْمَ أَوُو أَࢽِ سَمَّ وَکَّجَیْ رُوِیَ، تِ ثِࢽَّلَࢽْ دٜلْ کَرْࢽْجْࢽَرُو ࢽُوࢽُواْ!
[34] جِرٜمَرُو ࢽَیِرُو وُلْࢽْجَغَکِّ، أَمْ جَمَࢽْ أَدْیٜ سَࢽُیْوَوُو، سَیْ أَوُو أَࢽِ سَمَّ وَکَّجَیْیَ دُوُوࢽْ؞
[35] سَمٜیَ ثِدِیَ بَوُورُو وَلْجَیْ، أَمَّ مَࢽَࢽِ تْمَّرُو بَوُورُو وَلْجِوَوُو؞
[36] «أَمَّ یِمْ بِ سَ دُوُوࢽْ أَوُو أَࢽِ وَکَّجَیْدَ وُࢽْدُمَ ࢽُوجْࢽِّ؞ بَوَدْرُو کَجِیَ، مَلَیْیَوَ سَمٜلَࢽْ دَسَاࢽَ یٜ ࢽُوجَࢽِّ، تَدَدْ یٜ ࢽُوجْࢽِّ؞
[37] کْࢽْدٜ تَدَ کَمْبٜدْیٜ أَلَمَࢽْجُ جَمَࢽْ ࢽَوِ نُوحُیٜ غَیْ؞
[38] أَوُووَ جَمَࢽْ أَدْࢽْ کَوُ إِࢽْغِ تُࢻَࢽَیٜ إِسِدْرُو، أَمْسُو جَوُیْ یٜ، ثَسَیْ یٜ، لَرُسَ سُو، ࢽِیَ سُو ثَدِ یٜ ࢽغَیْ دُوُوࢽْ، حَرْ یِمْ إِسٜ ࢽَوِ نُوحُ ثُرُو مَارَدْیٜرُو کْرْغَوُو؞
[39] ࢽَࢽْجَمَ ࢽَࢽْغِ دُوُوࢽْ، إِࢽْغِ تُࢻَࢽَیٜ إِسٜ تَیِ سَمَّا سِیٜىٰࢽُو؞ کْࢽْدٜ تَدَ کَمْبٜدْیٜ یٜ أَدْغَیْرُو وَلْجِ؞
[40] دَجِ یِمْ أَدْࢽْ کُوࢽغوَ یِࢽْدِ کُلُولَࢽْ دُوُوࢽْ، ࢻَلْ ࢽغُوجَࢽٜ ࢻَلْ کُولْجَیْ؞
[41] کُورُو کَمُ یِࢽْدِ یٜ ࢽٜدُ ثَدِ دُوُوࢽْ، ࢻَلْ ࢽغُوجَࢽٜ ࢻَلْ کُولْجَیْ؞
[42] «أَدْ ࢽَࢽْغَرُو ࢻَادَرُو دْغَیْوُو، دَلِلْࢽْجُدْ یِمْ کْمَࢽْدُو إِسِدَ ࢽُوࢽُوِّ ࢽَࢽْغَرُو؞
[43] أَمَّ أَدَ ࢽُوࢽُواْ، ثَ کْمَ ࢻَدُویٜدْ سَ بَرْوُ بُࢽٜ ࢻَࢽّجُرُو إِسِدَ ࢽُوجْࢽَا، ࢻَادَرُو دْغَࢽٜ تِیَ کُولْجٜ ࢻَࢽّجُرُو ࢽغَیِوَوُو؞
[44] أَدْغَیْمَ ࢽَیِ یٜ ࢻَادَرُو دْغَیْوُو، دَلِلْࢽْجُدْ سَ تْمَࢽُوِّلَࢽْ تَدَ کَمْبٜدْ إِسِ ࢽَࢽْغَرُو؞
[45] «وُࢽْدُ غْلٜ وُولُودِ أَمَࢽَّ یٜ، حَࢽْغَلَّ یٜدْ وُو، تِ دُوُوࢽْ کْمَࢽْجَ تِیَ کْرٜجٜ وُولُودِیَ أَمَࢽْجُرُو ࢽُوَࢽْجَ کْمْبُویٜ سَ تْرَاࢽَࢽْ ࢽجُورُو غَلَجْࢽَدْ؟
[46] کْجِࢽْجُ وُولُودِ کْمَࢽْجُ وَلْدِیَ، ࢽغَیْ ثْدِ ࢽَجِیدْ!
[47] جِرٜمَرُو ࢽَیِرُو وُلْࢽْجَغَکِّ، کْمَدْ کْࢽْدَࢽْجُ سَمَّا مُکُّو وُولُودِ أَدْیٜرُو ثَکِّ؞
[48] أَمَّ وُولُودِ أَدْ تِ کَمْ بَتِّ دُوُوࢽْ کَرْوُࢽْجُࢽْ: ‹کْمَࢽِ دُوَࢽْ إِسِوَوُو،› ثْࢽٜ
[49] وُولُودِیَ أَمَࢽْجُوَ بَبَکْتُ بَدِجٜ مبَلْمَسُووَ کَلُّو جَوُࢽٜ ثَسَیْرُو وَلْیٜࢽُووَ،
[50] دَجِ وُولُودِ أَدْیٜ کْمَࢽْجُ یِمْ تْمَجْࢽِّیَ سَ ࢽُوجْࢽِّیَلَࢽْ إِسٜ
[51] تِیَ کِرْوُولَࢽْ جَجَرْجٜ ثُرُو مْࢽَࢻْکَّیٜرُو ثَکِّ؞ ࢽَدْࢽْ سُو یٜ تْدِ، شٜرِ یٜ ࢽَلْدِ؞