[1] عِیسَى ࢻُوُرَوَࢽْجُ مٜوُࢽْ یِࢽْدِࢽُّو وَدَ ثٜ کٜرْࢽِّیَ، ࢽَدَ کُولْجٜ بْلَ بْلَرُو لٜجٜ جَمَا أَلَمْجٜ تَیِرُو کَوُرِ کْجِ وُلْدُوُ بَدِیٜࢽُو؞
[2] ࢽَوِ یَحْیـَى کُوسُولَࢽْ أَوُو أَلْمَسِیوُ ثْدِدَ ࢻَࢽْغٜࢽِّیَ، ࢻُوُرَوَࢽْجُ لَا ࢽَࢽْجُرُو ثُࢽُودٜ
[3] تِرُو: «ࢽِمَ وَ ࢻُوُࢽْ إِسِمَدْ وُو، رَ غَدٜ غُرٜࢽِیٜ؟» ثَࢽٜ تِیَ کٜوُورُو؞
[4] عِیسَیٜ تَیِرُو: «وَلْدْࢽُواْ، أَوُو ࢻَࢽُّوَّا رُوَّآ یَحْیـَرُو وُلْغْࢽُواْ:
[5] کَمْبُوَ سِمْ ثَوَࢽْدِ، ࢽغُرْدِییَ یٜ سِࢽْجَࢽْ لٜجَیْ، أَمْ بَرَسُوَ ࢽغَجَࢽٜ تَیِرُّو وَلْجَیْ، مُوَسُو یٜ ࢻَࢽْجَیْ، أَمْ سَࢽُࢽَ رُووَرُو وَلْجَیْ، کُورُو تَلَاوَ یٜ کَوُرِ کْجِدَ ࢻَࢽْجَیْ؞
[6] بَرْغَࢽْجُ کَمْ وُ ࢽَࢽْغَرُو تَلْجِوَوُودْ!» یٜࢽُو؞
[7] ࢻُوُرَوَ یَحْیـَیٜدْ سَࢻْکَدَرَࢽِّیَ، عِیسَى کْلَ یَحْیـَیٜࢽْ جَمَدْرُو مَࢽَ ࢽجْدُّو بَدِیٜࢽُو؞ تِیٜ: «أَوِ ثُرُو کَرَایٜࢽْ کُرُورُو لٜىٰوْ؟ ࢽغْلَیْ لَا کَࢽْجِ کَࢽْجِرُو کَرُوَیٜ ثَکّٜ مُوجِ ثْدِ وَ؟
[8] أَعَ؞ أَوِ غْلٜ کُرُورُو لٜىٰوْ؟ کَمْ کَجْمُ شَوَ ثَکّْࢽَا وَ؟ أَعَ، أَمْ کَجْمُ شَوَ ثَسَکّْࢽَدْ مَیْرِلَࢽْ کَسَرْغَ؞
[9] تُو، أَوِ غْلٜ کُرُورُو لٜىٰوْ؟ ࢽَوِیَ وَ؟ آه، ࢽَیِرُو وُلْࢽْجَغَکِّ، ࢽَوِمَا کُوجْࢽَ؞
[10] تِمَ کَمْ دُوُوࢽْ کْلَࢽْجُࢽْ کِتَوُلَࢽْ أَدْ رُوُوَدَدْ: ‹ࢽِࢽْ ࢻُوُࢽُّو کْࢽْغَیَمِّ ࢽُودْکّٜ، ࢽِرُو جَوَلْࢽْمْ ثَسَّیْ؞›
[11] جِرٜمَرُو ࢽَیِرُو وُلْࢽْجَغَکِّ، ثُرُو کَمْ کَمُلَࢽْ تَمْبْࢽَ سَمَّیٜࢽْ وُࢽْدُمَ یَحْیـَى کَسَلَمَا کُوجْࢽَ بَوُو؞ أَمَّ ثُرُو ࢽُودُو بَرْغَا مَیْ سَمٜمَیٜࢽْ تْࢽْغْرِدْ تِیَ کُوجْࢽَ؞
[12] جَمَࢽْ یَحْیـَى کَسَلَمَیٜࢽْ تَمِیَ حَرْ کُرُو کُدٜرُو ࢽُودُو بَرْغَا مَیْ سَمٜمَیٜ کِیَدِّࢽْ ࢻُوُ جُوُیْ، أَمْ تِرُو ࢻُوُ بُو دَࢻْثَاࢽَدْ کْࢽْدُوُودَ دُࢽُودُࢽُوࢽْ مُواْ مَجَیْ؞
[13] دَلِلْࢽْجُدْ کِتَوُوَ ࢽَوِیَیٜیَ أَتَّوْرَ ࢽَوِ مُوسَیٜیَ ࢽَوِࢽَوِ ثَدْࢽَ ࢽغَیْ دُوُوࢽْ، حَرْ یَحْیـَى کَدِیُو؞
[14] مَࢽَدَ ࢽغُودُ کَسَدُّوَّا، تِمَ ࢽَوِ إِلْیَ ࢻُوُࢽْ إِسِمَدْ وُو؞
[15] کَمْ سْمُوࢽْجُوَمَدْ ࢻَࢽْجُو!
[16] «وُࢽْدُسُورُو أَمْ جَمَࢽْ أَدْیٜدَ رَتَّلْغْکِّ؟ تَیِ أَلَمَ یَلَّ ثِ کَسُوُیٜࢽْ ࢽَࢻْکَدَ کُواْ سَࢻْثَࢽٜ أَمَࢽْجَرُو:
[17] ‹أَلْغَیْتَ ࢽَیِرُو ࢻُࢽْجَغَیْیٜࢽَ دُوُوࢽْ، بِکّٜ رَࢽْدُوِّ؞ کُورُو سُو لَغَرَࢽّٜ دِیٜࢽَ دُوُوࢽْ، یِرُوِّ،› ثَࢽِ غَیْ؞
[18] تُو، یَحْیـَى إِسٜ جُوُࢽِّ یٜ، ثَࢽِّ یٜ، ‹تِ کَرُوَمَ!› یٜرَ؞
[19] کُورُو تَدَ کَمْبٜدْ إِسٜ جُوُیْ، ثَیْ، ‹أَکُّو کْمْبُومَ، کْࢽْجَمَ، سَوَ أَکِّ مُواْمَسُووَ بِوُمَسُووَیٜ!› یٜرَ؞ أَمَّ ࢽَࢽْرَشِدُدْ کْࢽْدُوࢽْجُلَࢽْ أَسُدِ؞»
[20] دَجِ عِیسَى أَمْ بْرْࢽِیَ ثُرُوࢽْجَࢽْ أَوُو أَجَبَّ ࢽغْوُ ثْدْࢽَدْیٜیَ تْمْجَࢽِّ ࢽَࢽْغَرُو وُسَدُ بَدِیٜࢽُو؞ تِیٜ:
[21] «کُتُّࢽْدُو أَمْ بْرْࢽِ کُورَجِࢽّٜ! کُتُّࢽْدُو أَمْ بْرْࢽِ بَیْتْسَیْدَیٜ! ثَ أَوُو أَجَبَّ أَجَبَّ ࢽَࢽْدُوࢽْ تْدْࢽَسُودْ بْرْࢽِ تِرّٜیَ سِدُوࢽّٜیَلَࢽْ تْدْࢽَا، تْࢽْ کُرٜࢽْ أَمْࢽْجَ أَجَجَا بُوُوَلَࢽْ ࢽَࢻْثَࢽٜ تُوَ ثَدْࢽَ؞
[22] أَمَّ ࢽَیِرُو وُلْࢽْجَغَکِّ، کِیَمَ وَکَّجِیَ، وُواْمْࢽْدُو أَمْ بْرْࢽِ تِرّٜیَ سِدُوࢽّٜیَیٜدَ ࢽَࢽْجَوْࢽِࢽْ کُوجِ؞
[23] ࢽَیِ یٜ أَمْ بْرْࢽِ کَࢻَرْࢽَامبٜ، سَمٜرُو وَ سَمْࢽْجَیْ تْمَیٜوْ؟ أَعَ، کَࢽُّرُو کُولْࢽْجَغَیْ؞ ثَ أَوُو أَجَبَّ أَجَبَّ ࢽَࢽْدُوࢽْ تَدْࢽَدْ بْرْࢽِ سُودُومْبٜࢽْ تَدْࢽَا، کُوَ غَیْرُو دْغَیْ؞
[24] أَمَّ ࢽَیِرُو وُلْࢽْجَغَکِّ، کِیَمَ وَکَّجِیَ، وُواْمْࢽْدُو بْرْࢽِ سُودُومْبٜدَ ࢽَࢽْجَوْࢽِࢽْ کُوجِ،» یٜࢽُو؞
[25] سَ أَدْࢽْ عِیسَیٜ: «بَوَ کْمَ سَمٜیَ دُࢽِیَایٜ، ࢽِیَ ࢽجُࢽْغُورْکِّ، دَلِلْࢽْجُدْ أَوُو أَࢽِیَ إِلْمُوُ سُو، رَشِدُوَ سُورُو غْرَامٜ یَلَّرُو إِسَࢽُوغْمَّ ࢽَࢽْغَرُو؞
[26] آه، بَوَ، أَدْمَ أَوُو جَوْرُو رَامَّدْ وُو؞
[27] «بَوَࢽِ أَوُو سَمَّا مُکُّوࢽِرُو ثَکّْࢽَ؞ تِ غْࢽِیَ، وُࢽْدُمَ تَدَدَ ࢽُوجْࢽِّ؞ کُورُو وُࢽْدُمَ بَوَدَ ࢽُوجْࢽِّ، سَیْ تَدَدَ أَمْ تَیِرُو تَدَدْ إِسَࢽُوجِییَ ثْرَاࢽَا؞
[28] «أَرُواْ ࢽَࢽِرُو، ࢽَیِ کَرٜ کُرْوُووُ ࢽغُووَدَ یِمْبَرُوَّ سَمَّ، تُسْتُ ࢽجَدْکِّ؞
[29] وُدْ رُوکُرَا غْࢽِ، کَرْوُ ࢽغْلَا ࢽَࢽْغَرُو، دُیْࢽِ دَوْࢽْدُورُو ࢽغُوغْࢽُواْ، کُولْسْࢽُواْ أَلَمْࢽْجَکُّو، کَرْوُࢽْدُوࢽْ تُسْتُ ࢻَࢽْدُوِ؞
[30] أَوُووَ دُیْࢽِ یٜ کْسْکٜ، کَرٜࢽِ یٜ کَمْبُویْ،» یٜࢽُو؞