[1] عِیسَى مَࢽَ أَࢽِیَ ثْدٜ کٜرْࢽِّیَ، ثِدِ غَلِلٜىٰیَ کُولْجٜ ثِدِ یَحُدِیَیٜ ࢽغَوُو بْرْمْ جُورْدَࢽِیٜࢽْ دْغَࢽَرُو لٜىٰࢽُو؞
[2] جَمَ کَدَ کَدَمِ عِیسَىٰ جَاࢽٜ ࢽَدْࢽْ أَمْ دُوࢽْدِیَ إِسَࢽْغَیٜىٰࢽُو؞
[3] ࢻَرِسَوَ لَا عِیسَىٰ رِجَࢻْتُرُو إِسَࢽٜ تِرُو: «کْلَ دَلِلْ ࢻِیٜࢽْ یَیٜ کَمْ کَمُࢽْجُ دْࢻْتَدْ حَلَلْ وَ؟» ثَࢽٜ تِیَ کٜوُورُو؞
[4] عِیسَیٜ تَیِرُو: «ࢽغَلْتٜمَ کِتَوُلَࢽْ أَدَ کْرَࢽُوِّ وَ؟ ‹بَدِدُرَمْࢽِࢽْ أَلَکْتُمَدْ تَیِیَ کُوࢽغوَا کَمُوَرُو أَلَکّٜࢽُو؞›
[5] کُورُو تِیٜ: ‹دَلِلْ أَدْیٜرُو کوَ بَوَࢽْجُوَ یَࢽْجُوَا کُولْجٜ کَمُࢽْجُرُو کْرْدِیٜ تَیِ یِࢽْدِسُو تِیے ࢻَلُّو وَلْجَیْ،› ثْࢽَّ؞
[6] أَدْغَیْمَ کُوَ أَدْࢽْ ࢻُوُࢽْ تَیِدْ یِࢽْدِ غْࢽِ، تِلُورُو وَلْجَࢽَ؞ أَدْ ࢽَࢽْغَرُو أَوُو اللَّه کْلْجْࢽَدَ بَرٜ کَمْ ࢻِرْجْࢽِّ!» یٜࢽُو؞
[7] ࢻَرِسَوَدْیٜ تِرُو: «تُو، أَوِرُو غْلٜ ࢽَوِ مُوسَى کَمْ کَمُࢽْجُرُو کَکَّدُ دْࢻْتَیٜ ثُو دُوُوࢽْ کُولْجُورُو وَدَ کَیْࢽُو؟» ثَࢽٜ تِیَ کٜوُورُو؞
[8] عِیسَیٜ تَیِرُو: «کْلَکِبُّࢽْدُو ࢽَࢽْغَرُو ࢽَوِ مُوسَى کَمُ دْࢻْتَ ࢽَیِرُو أَمَرْࢽْغٜىٰرَ، أَمَّ بَدِدُرَمْࢽِࢽْ ࢽغَیْ غْࢽِ؞
[9] ࢽَیِرُو وُلْࢽْجَغَکِّ، وُࢽْدُ دُوُوࢽْ کَمُࢽْجُوَ کْلَ کْࢽْجْࢽَیٜࢽْ غْࢽِ دْࢻْثٜ غَدٜ ࢽِیَجْࢽَدْ کْࢽْجْࢽَ ثْدْࢽَ،» یٜࢽُو؞
[10] دَجِ ࢻُوُرَوَࢽْجُیٜ تِرُو: «أَدْمَ ࢽَࢻْتُ کَمْ کَمُࢽْجُوَیٜیَ، ࢽِیَ دِیُوࢽَمْبُدْمَ ࢽغَلْوُو!» یٜرَ؞
[11] عِیسَیٜ تَیِرُو: «کَمْ ࢽغُسُوࢽْ غْࢽِ رَکْثٜ مَࢽَ أَدَ ࢽغُوجِ، سَیْ أَمْ دُوُوࢽْ تَیِرُو تِࢽَمَسُودْ؞
[12] دَلِلْࢽْجُدْ أَمْ لَا ثُرُو یَࢽْجَیٜمَࢽْ أَدِمْ تَیِیَ ثَسَمْبْࢽَ مبٜجِ، أَمْ لَا یٜ أَمْ تَیِیَ أَدِمْبُو ثَدْࢽَ مبٜجِ، کُورُو أَمْ لَا یٜ ࢽُودُو بَرْغَا مَیْ سَمٜمَیٜ ࢽَࢽْغَرُو کْلَࢽْجَ أَدِمْبُو ثَدْࢽَ مبٜجِ؞ کَمْ مَࢽَ أَدَ رَکْثٜ ࢽغُوجِمَدْ ࢽغُوجُو!» یٜࢽُو؞
[13] دَجِ أَمْ لَا عِیسَى مُکُّوࢽْجُ کْلَ یَلَّࢽْجَ سَࢽَࢽَیٜرُو غْࢽَجُوُو مُودُوَ ثْدُّورُو تَیِیَ ࢽَࢽْجُرُو کٜوُدْࢽِّیَ، ࢻُوُرَوَدْ أَمْدَ وُسَیٜرَ؞
[14] أَمَّ عِیسَیٜ ࢻُوُرَوَࢽْجُرُو: «یَلَّ سَࢽَࢽَدَ کُولُّواْ ࢽَࢽِرُو إِسَ، بَرٜ تَیِرُو دَࢻْکْوِّ! ࢽُودُو بَرْغَا مَیْ سَمٜمَیٜدْ أَمْ تَیِ غَیْیٜ ࢽُوَࢽْجَ، دِیٜ!» یٜࢽُو؞
[15] دَجِ کْلَࢽْجَرُو مُکُّو غْࢽَیٜىٰࢽِّیَ، ࢽَدَ کُولْجٜ لٜىٰࢽُو؞
[16] دَجِ جَیْرُو لَا إِسٜ عِیسَرُو: «سَیِࢽَّ، أَوِ ࢽغْلَ دِکّٜ رُو سَوِسُویٜ ࢻَࢽْدْکِّ؟» ثْࢽٜ تِیَ کِوُورُو؞
[17] عِیسَیٜ تِرُو: «أَوِرُو کْلَ أَوُو ࢽغْلَیٜࢽْ وُوَ سُوُورْمِدْ؟ تِ ࢽغْلَدْ تِلُو لُوࢽْ! رُو سَوِسُویٜ ࢻَࢽْدُو رَامَّا، وَدَوَدَ غَیْ!» یٜࢽُو؞
[18] جَیْرُودْیٜ: «وَدَ ࢻِسُو؟» ثْࢽٜ تِیَ کِوُورْࢽِّیَ، عِیسَیٜ: «بَرٜ رُو کَمْبٜ تُلُوُمِّ، بَرٜ کْࢽْجْࢽَ دِمِّ، بَرٜ ࢽَمْبَرْوُ دِمِّ، بَرٜ شٜدَکَمْبُ دِمِّ،
[19] بَوَࢽْمْبَ یَࢽْمْبَرُو دَرَجَ یٜ، کُورُو کْمَسْکِࢽْمْ یٜیَ کْلَࢽْمْ غَیْرُو رَیٜ!» یٜࢽُو؞
[20] جَیْرُودْیٜ: «وَدَ أَࢽِ سَمَّا غَکّْࢽَ، أَوِ غْلٜ وُوَ مَوْسُو؟» یٜࢽُو؞
[21] عِیسَیٜ: «کَلْکَلْ دِیُومَرُو وَلْدُ رَامَّا، لٜࢽٜ کْࢽْدَࢽْمْ لَدٜ تَلَاوَرُو یٜ، أَرْسِیے سَمٜلَࢽْ ࢻَࢽْدْمِ؞ دَجِ أَرٜ وُوَ سْغَیْ!» یٜࢽُو؞
[22] جَیْرُودْ مَࢽَ أَدَ ࢻَࢽْغٜࢽِّیَ، تِ جَوْرُو غَرِوُ ࢽَࢽْغَرُو کَرْوُ کُتُّوَرُو سَࢻْکَدَࢽْ؞
[23] دَجِ عِیسَیٜ ࢻُوُرَوَࢽْجُرُو: «جِرٜمَرُو ࢽَیِرُو وُلْࢽْجَغَکِّ، غَرِوُیٜ ࢽُودُو بَرْغَا مَیْ سَمٜمَیٜرُو ࢽغَوُوࢽْجُ جَوْرُو جَوْ، دِیٜ!
[24] کُورُو وَلْدْکّٜ ࢽَیِرُو وُلْࢽْجَغَکِّ، غَرِوُیٜ ࢽُودُو بَرْغَا اللَّهیٜرُو ࢽغَوُوࢽْجُدْرُو کَرِمُویٜ ثُوُرِ رِوُرَیٜࢽْ کُودُࢽْجُمَ بُدُ وُو!» یٜࢽُو؞
[25] ࢻُوُرَوَدْ أَدَ ࢻَࢽْغٜرَࢽِّیَ، جَوْرُو أَجَࢻْثَࢽٜ: «أَسْشَ! أَدْغَیْیَ، وُࢽْدُ غْلٜ ࢽجْکَّوُو ثُوَࢽْدِ؟» یٜرَ؞
[26] عِیسَى تَیِیَ ࢽِࢽِجٜ: «کَمْبُو یُوجِوَوُو، أَمَّ اللَّهرُو أَوِسُو یُوجِ!» یٜࢽُو؞
[27] دَجِ بِتُرُسّٜ تِرُو: «أَکُّو أَࢽْدِ أَوِࢽْدٜسُو کُولِّیٜ ࢽِیَ ࢽجْغَیْیٜࢽَدْ، أَوِ غْلٜ ࢻَࢽْدِیٜ؟» یٜࢽِّیَ،
[28] عِیسَیٜ: «جِرٜمَرُو ࢽَیِرُو وُلْࢽْجَغَکِّ، لٜیْرَ وَکَّجٜ تَدَ کَمْبٜدْ کُرِسْࢽْجُ کْرْمَیْیٜ دَرَجَالَࢽْ ࢽَࢻْثِیَ، ࢽَیِ وُوَ سْغَوَّدْ یٜ کُرِسْ کْرْمَیْیٜ مٜوُࢽْ یِࢽْدِࢽْلَࢽْ ࢽَمُّوٜ جِرِ إِسْرَاءِیلَیٜ مٜوُࢽْ یِࢽْدِࢽْدَ ࢽُودُوِ؞
[29] کُورُو وُࢽْدُ دُوُوࢽْ ثُࢽِ ࢽَࢽْغَرُو ࢻَدُو، بِ یٜیْیَ، بِ کَࢽَّ، بِ بَوَ، بِ یَ، بِ یَلَّ، بِ کُلُو کُولْجْࢽَدْ مِیَ مِیَ ثُوَࢽْدِ، کُورُو رُو سَوِسُویٜ یٜ وَرَسَجِ؞
[30] أَمَّ أَمْ بُرْوُویٜ ࢽغْوُ دَرْیٜىٰرُو وَلْجَیْ، کُورُو دَرْیٜىٰ یٜ بُرْوُویٜرُو وَلْجَیْ،» یٜࢽُو؞