[1] عِیسَى ࢻُوُرَوَࢽْجُ مٜوُࢽْ یِࢽْدِࢽْدَ بُواْجٜ تَیِرُو کْࢽْدُوُو سٜدَࢽْ دُدَیٜیَ أَمْ کَسُوَ سُو، کْࢽْدُوࢽْدِ سُو جِرِ ࢻِ یَیٜیَ إِسَࢽْغَدُوُیٜیَ کَیْࢽُو؞
[2] ثُوَ کْࢽْغَیَمْبَࢽْجُ مٜوُࢽْ یِࢽْدِࢽْدْیٜدْ تَیِمَ سِمَࢽْ کَمْ تِرُو بِتُرُسْ ثَࢽِدْ، یَࢽْجُغْࢽَ أَࢽْدَرَوُسْ، یَعْࢼُوبَ تَدَ جَبَدِیٜ، یَࢽْجُغْࢽَ یَحْیـَى،
[3] ࢻِلِبُسْ، بَرْتُولُومِ، تُومَ، مَتِیُ أَکِّ مُواْمَ، یَعْࢼُوبَ تَدَ أَلْࢻَوُسّٜ، تَدَوُسْ،
[4] سِمَࢽْ کَمْ کَࢽْعَࢽَیٜ، یَحُسَ إِسْکَرِیُوتْ کَمْ مُکُّو کْلَدُووَیٜرُو عِیسَىٰ سْرْتُّوُمَدْ؞
[5] عِیسَى تَیِ مٜوُࢽْ یِࢽْدِࢽْ أَࢽِرُو وَدَ ثٜ کِࢽُودُو؞ تَیِرُو: «بَرٜ ࢽَ کْرْدِیَیٜرُو لٜࢽُوِّ بِ بْلَوَ سَمَرِیَوُیٜرُو ࢽغَوُوِّ،
[6] بِیَ ࢽَ جَمَ إِسْرَاءِیلَ تَیِ دِمِیَ ࢻَثَّاࢽَدْ غَیْیٜرُو لٜࢽُواْ!
[7] لٜࢽُوِلَࢽْ، أَمْبُو: ‹ࢽُودُو بَرْغَا مَیْ سَمٜمَیٜ دٜلْ کَرْࢽْجْࢽَ!› وُلْغْࢽُواْ؞
[8] أَمْ دُوࢽْدِیَ إِسَࢽْغَغْࢽُواْ، أَمْ سَࢽُࢽَا رُووَرُو کَلَࢽْغُواْ، أَمْ بَرَسُوَا إِسَࢽْغَغْࢽُواْ تَیِرُّو وَلْجَ، سٜدَࢽَّ دُࢽُواْ؞ دٜرُو کِوَࢽْدُوْ، ࢽَیِ یٜ دٜرُو یُواْ؞
[9] «بَرٜ کُࢽْغُࢽَ دِࢽَرّٜ، بِ رِوُلَّیٜ، بِ کُلُّویٜ ࢽغُوࢽُوِّ،
[10] کُورُو بَرٜ ࢽغْرْوُ، بِ غْمَجٜ یِࢽْدِ، بِ سُࢽُو غَدٜ، بِ کَ ࢽغُوࢽُوِّ، کِدَمَرُو ࢽغْࢽْوُرَمْࢽْجُ وَجِࢻْثْغْࢽَ ࢽَࢽْغَرُو؞
[11] «بْلَا بْلَدٜیَا ࢻِ یَیٜرُو ࢽغَوُوِیَ، کَمْ ࢽغْلَمَ مَࢽُواْ ࢻَࢽّجُࢽْ جْمُّواْ ࢽَمُّواْ، حَرْ کَوُ ࢽَدَ کُولُّوِرُو؞
[12] ࢻَࢽّجُرُو ࢽغَوُوِیَ، بَرْغَ دْࢻْکْࢽُواْ؞
[13] أَمْ ࢻَدُودْیٜ ࢽغْلَرُو ࢽجَمُویِیَ، بَرْغَࢽْدُودْ تَیِلَࢽْ دْغَ؞ أَمَّ ࢽَیِیَ مُواْ وَࢽْجَیْیَ، بَرْغَࢽْدُودْ ࢽَࢽْدُورُو وَلْدُو؞
[14] وُࢽْدُمَ ࢽَیِیَ ࢽجَمُواْࢽِّ بِ مَࢽَࢽْدُو ࢽغُوجْࢽِّیَ، ࢻَدُودَ بِ بْلَدَ کُولُّوِیَ، کَتِّ سِࢽْدُویٜ کَغَࢽْغُواْ؞
[15] جِرٜمَرُو ࢽَیِرُو وُلْࢽْجَغَکِّ، کِیَمَ وَکَّجِیَ، وُواْمْ أَمْ بْلَ أَدْیٜدْ أَمْ بْرْࢽِ سُودُومْبٜیَ غُومُورّٜیَدَ ࢽَࢽْجَوْࢽِࢽْ کُوجِ؞
[16] «ࢻَࢽُّواْ، دِمِیَ ثُرُو بُلْدُوَیٜرُو ࢽغَسَاࢽَ غَیْرُو ࢽَیِیَ ࢽجَࢽُودْکِّ؞ أَدْ ࢽَࢽْغَرُو کَدِ غَیْ بُرْوُووَرُو وَلُّواْ، کُورُو بُلَّمْ غَیْ بِوُ بَوُووَرُو دْغَیْوُو؞
[17] أَمْسُورُو حَࢽْغَلْ غْࢽَࢽُواْ، دَلِلْࢽْجُدْ ࢽَیِیَ ࢽجَدَࢽٜ ࢻُوُ مَجِلِسّٜرُو ࢽجَسَدٜ دَࢽْدَلْࢽْجَسُولَࢽْ کُواْࢽْجَیْ،
[18] کُورُو وُ ࢽَࢽْغَرُو ࢻُوُ غُومْࢽَ سُو، مَیْ سُویٜرُو ࢽجَسَدِ، تَیِیَ کْرْدِیَارُو شٜدَرُو وَلُّواْرُو؞
[19] شَرَرُو ࢽجَسَدِیَ، بَرٜ کْلَ جِرِ مَࢽَࢽُوِ بِ أَوُو وُلُّوِیٜࢽْ کَرْوُࢽْغَیْ دِوِّ؞ سَدْࢽْ أَوُو وُلُّوِدَ ࢽَیِرُو ࢽجَدِ،
[20] دَلِلْࢽْجُدْ ࢽَیِ غْࢽِ مَࢽَࢽُوِ، رُحُ بَوَࢽْدُویٜدْمَ ࢽَیِیٜࢽْ مَࢽَجِ ࢽَࢽْغَرُو؞
[21] یَاࢽَ یَࢽْجُغْࢽَا سْرْثِّیٜ رُورُو ثٜىٰسِ، بَوَ یٜ تَدَࢽْجُوَ ࢽغَیْ، تَدَوَ یٜ بَوَࢽْجَا یَࢽْجَارُو تُرُ ثَدّٜ ثَسَکّٜ تَیِیَ رُورُو ثٜىٰسِ؞
[22] ثُࢽِ ࢽَࢽْغَرُو أَمْ سَمَّ ࢽَیِیَ وَࢽْجَیْ، أَمَّ کَمْ مْرْجٜ حَرْ سَ ࢽجٜرُورَمْبٜرُو دْغَࢽَمَدْ ࢽجْکَّوُو ثُوَࢽْدِ؞
[23] بْلَ لَاࢽْ ࢽَیِیَ بَسَرْࢽْجَیْیَ، بْلَ غَدٜرُو کَسُواْ لٜࢽُواْ؞ جِرٜمَرُو ࢽَیِرُو وُلْࢽْجَغَکِّ، کَوُ تَدَ کَمْبٜدْ وَلْدٜ إِسِدْرُو، بْلَوَ إِسْرَاءِیلَوُیٜ سَمَّا غَ یٜرُوَّوُو؞
[24] «ࢻُوُرَ مَلْمْࢽْجُوَ کُوجِوَوُو، کُورُو وُولُودِ کْمَࢽْجُوَ کُوجِوَوُو؞
[25] ࢻُوُرَ مَلْمْࢽْجُ غَیْرُو وَلْجِیَ، ثْدْࢽَ؞ وُولُودِ یٜ کْمَࢽْجُ غَیْرُو وَلْجِیَ، جُسّْࢽَ؞ کْمَ ࢻَدُویٜدَ بٜلْجَبُلَّࢽْ بُواْیٜرَا، بَلّٜ أَمْ ࢻَࢽّجُیٜ؟
[26] «أَدْ ࢽَࢽْغَرُو بَرٜ تَیِیَ رِࢽُوِّ؞ أَوِمَ جَکَّدَ ࢻٜدٜرُو ثُلُوِوَوُودْ بَوُو، کُورُو أَوِمَ أَسْرّٜ إِسَࢽُودِوَوُودْ بَوُو؞
[27] أَوُو ثُرُو بُࢽٜىٰࢽْ ࢽَیِرُو وُلْࢽْجَغَکّْࢽَدَ کَوْسُلَࢽْ وُلُّواْ، کُورُو أَوُو ثُرُو سْمُوࢽْدُویٜࢽْ تَتَࢻْثَࢽٜ ࢻَࢽُّوَّدْ یٜیَ ࢻَرْسَمْلَࢽْ کُرُࢽْغُواْ؞
[28] أَمْ تِیے ثٜىٰسِ رُو رَکْثَࢽٜ ثَتُّلُوِوَوُودَ بَرٜ رِࢽُوِّ؞ أَمَّ تِ رُووَ تِییَ سَمَّا رَکْثٜ کَࢽُّ جَاࢽَمَیٜࢽْ سِجِیدَ رِࢽُواْ!
[29] بِࢽَرُ یِࢽْدِ غُرْسُ تِلُورُو ثَلَدِ، غْࢽَ؟ أَدْ یَیٜ بَوَࢽْدُویٜ ࢽُودُࢽْجُࢽْ غْࢽِیَ، ࢻَلْࢽْجَمَ ثِدِرُو ثُکُّرِوَوُو؞
[30] ࢽَیِدْ، کَࢽْدُرِ کْلَࢽْدُویٜمَ سَمَّ کُومْغَدَ؞
[31] أَدْ ࢽَࢽْغَرُو بَرٜ رِࢽُوِّ، بِࢽَرُ ࢽغْوُوَ دَرَجَࢽْ کُوࢽُوَّ؞
[32] وُࢽْدُ دُوُوࢽْ ࢻُوُ أَمْبٜࢽْ وُوَ کَسَࢽْسْࢽَمَدْ، وُ یٜ ࢻُوُ بَوَࢽِ مَیْ سَمٜمَیٜࢽْ تِیَ کَسَدّْکِّ؞
[33] أَمَّ وُࢽْدُ دُوُوࢽْ ࢻُوُ أَمْبٜࢽْ وُوَ أَࢽْغْرْسْࢽَمَدْ، وُ یٜ ࢻُوُ بَوَࢽِ مَیْ سَمٜمَیٜࢽْ تِیَ أَࢽْغْرْࢽْکِّ؞
[34] «بَرٜ دُࢽِیَرُو ࢽَࢽْلٜوَ کُدُورُو کَدِکُّورُو تْمَࢽُوِّ؞ أَعَ، ࢽَࢽْلٜوَ غْࢽِ، کَشَغَرْ کُدُورُو کَدِکُّو؞
[35] أَوُووَ أَمْبَ ࢻِرْدُرُو کَدِکُّو، تَدَ کْلَدُو بَوَࢽْجُیٜرُو وَلْجِ، ࢻٜرُو یٜ کْلَدُو یَࢽْجُیٜرُو وَلْجِ، کَمُ تَدَیٜ یٜ کْلَدُو کْسَیْࢽْجُیٜرُو وَلْجِ؞
[36] أَدْغَیْمَ کَمْبٜ وَدُوُࢽْجُدْ أَمْ ࢻَࢽّجُیٜرُو وَلْجَیْ؞
[37] وُࢽْدُ دُوُوࢽْ بَوَࢽْجُ بِ یَࢽْجُوَ وُمَا کُوجْࢽَرُو ثْرَاࢽَمَدْ کَکّٜرُو وَلْدُ تِࢽِّ؞ وُࢽْدُ دُوُوࢽْ تَدَࢽْجُ بِ ࢻٜرُوࢽْجُوَ وُمَا کُوجْࢽَرُو ثْرَاࢽَمَدْ کَکّٜرُو وَلْدُ تِࢽِّ؞
[38] کُورُو وُࢽْدُ دُوُوࢽْ کْسْکَࢽْجُ کَرْمُویٜ ࢽغُوجٜ وُوَ سْغَࢽِّمَدْ کَکّٜرُو وَلْدُ تِࢽِّ؞
[39] کَمْ دُوُوࢽْ رُوࢽْجُ ࢻَࢽْدُو ثْرَاࢽَمَدْ رُوࢽْجُدَ ثُوَتْکِ، أَمَّ کَمْ دُوُوࢽْ وُ ࢽَࢽْغَرُو رُوࢽْجُ ثُوَتْکْࢽَمَدْ رُوࢽْجُدَ ثُوَࢽْدِ؞
[40] «کَمْ ࢽَیِیَ ࢽجَمُواْࢽَمَدْ وُمَا سْمُواْ، کُورُو کَمْ وُوَ سْمُواْࢽَمَدْ یٜ تِ وُوَ سُࢽُودْࢽَدْمَا ثْمُواْ؞
[41] کَمْ دُوُوࢽْ ࢽَوِیَ تِ ࢽَوِ ࢽَࢽْغَرُو ثْمُواْࢽَمَدْ مُکُووَ ࢽَوِیٜ ثُوَࢽْدِ، کُورُو کَمْ جِرٜمَا تِ جِرٜمَ ࢽَࢽْغَرُو ثْمُواْࢽَمَدْ مُکُووَ کَمْ جِرٜمَیٜ ثُوَࢽْدِ؞
[42] وُࢽْدُ دُوُوࢽْ تَیِ أَࢽِیٜ غَࢽَࢽْجَ لَارُو تِ ࢻُوُرَࢽِ ࢽَࢽْغَرُو إِࢽْغِ کْࢽْجَیٜ سَمْسُ ثِࢽَمَدْ، جِرٜمَرُو ࢽَیِرُو وُلْࢽْجَغَکِّ، تْمَّرُو مُکُووَࢽْجُ ࢻُثِّوَوُو،» یٜࢽُو عِیسَیٜ؞