[1] عِیسَى مَࢽَ أَࢽِ سَمَّا ثْدٜ کٜرْࢽِّیَ، ࢻُوُرَوَࢽْجُرُو:
[2] «سَلَ لَیَ ࢽجْکَّیِرَمْبٜرُو کَوُ یِࢽْدِ غَࢻْثُورُو ࢽُوࢽُوَّ، کُورُو تَدَ کَمْبٜدَ مُکُّو أَمْبٜرُو سْرْثَّغَࢽٜ کْسْکَرُو تِیَ جَجَغَࢽٜ رُورُو ثٜىٰسِ،» یٜࢽُو؞
[3] دَجِ وُرَوَ رِمَࢽَّیٜیَ أَمْوُرَوَ جَمَیٜیَ ࢻَدُو رِمَࢽْ کُرَ تِرُو کَیْࢻَسْ ثَࢽِیٜࢽْ ثَࢻْتَࢽٜ
[4] سَوَرْدَࢽٜ عِیسَىٰ ࢽَࢽْغَلَࢽْ تَمٜ رُورُو ࢽجٜجُویٜ ࢽِیَ ࢽغُویٜرَ؞
[5] أَمَّ تَیِیٜ: «سَیْ سَلَ کُوجِیَ دُوُوࢽْ، بَرٜ جَمَ حَࢽْغَلْسَࢽْغُو ثَسَࢽْغْࢽِّ!» یٜرَ؞
[6] عِیسَى بْلَ بَیْتَࢽِیٜلَࢽْ ࢻَدُو سِمَࢽْ دْرِمَیٜࢽْ
[7] مَسْࢽَ ثْدِ دُوُوࢽْ، کَمُ لَا سْࢽْدَلْ ثُرُوࢽْجُࢽْ کَوُدِ جَوْرُو تَمَࢽَّا ࢽغُوجٜ إِسٜ کَوُدِدَ کْلَ عِیسَیٜرُو ࢻِیٜىٰࢽُو؞
[8] ࢻُوُرَوَدْ أَدَ کٜرُࢽِّیَ، کُتُّرُو ثَرُࢽٜ کَتّٜࢽْجَࢽْ: «أَوِرُو کَوُدِدَ بَسَرْجِدْ؟
[9] ثَ أَدَ وُرِ کَدَرُو ثَلَدٜ وُرِدَ تَلَاوَرُو ثَدْࢽَ!» یٜرَ؞
[10] عِیسَى أَدَ أَسُجٜ تَیِرُو: «أَوِرُو کَمُ أَدَ سُوُولُّوِ؟ وُرُو أَوُو جَوْرُو ࢽغْلَ سْدّْࢽَ؞
[11] تَلَاوَسُودْ سَوِسُورُو ثُرُوࢽْدُوࢽْ مبٜجِ، أَمَّ وُدْ سَوِسُورُو غْࢽِ ثُرُوࢽْدُوࢽْ دْغَکِّ؞
[12] کَوُدِ أَدَ تِیࢽِرُو ࢻِدُوُࢽْجُدْ، سِتّْرَࢽِرُو وُوَ دَبَّرْسٜىٰࢽُو؞
[13] جِرٜمَرُو ࢽَیِرُو وُلْࢽْجَغَکِّ، ࢽدَرَࢽْ یَیٜ ثُرُو دُࢽِیَ ࢽغَیٜࢽْ کَوُرِ کْجِ أَدَ وُلْجَیْ ࢽغُسُوࢽْ، کَمُ أَدَ تَکْتُرُو أَوُو سْدّْࢽَدْ یٜیَ وُلْجَیْ،» یٜࢽُو؞
[14] دَجِ مٜوُࢽْ یِࢽْدِࢽْدْیٜ ࢻَلْࢽْجَ، کَمْ تِرُو یَحُسَ إِسْکَرِیُوتْ ثَࢽِدْ، ࢽَ وُرَوَ رِمَࢽَّیٜرُو لٜجٜ
[15] تَیِرُو: «عِیسَىٰ مُکُّوࢽْدُورُو یَکّْکِّیَ، أَوِ وُرُو سِوِ؟» ثْࢽٜ تَیِیَ کِوُورْࢽِّیَ، ثُࢽْغُو رِوُلَّیٜ ࢻِیَکُّ مُکُّوࢽْجُرُو کٜسَکُّو؞
[16] دَجِ سَ أَدْࢽْ یَحُسَ دَمَ عِیسَىٰ تَیِرُو سْرْتُّوُیٜ مَدَ بَدِیٜࢽُو؞
[17] یِمْ بُرْوُویٜ سَلَ بُرُودِ یِسْ بَوُووَیٜ کِدْࢽِّیَ، ࢻُوُرَوَدْ ࢽَ عِیسَیٜرُو إِسَࢽٜ تِرُو: «ࢽدَرَࢽْ مَسْࢽَ لَیَیٜدَ ࢽِرُو دَبَّرْࢽْجْغْیْیٜ بُمِ؟» ثَࢽٜ تِیَ کٜوُورُو؞
[18] عِیسَیٜ: «بْرْࢽِدْرُو ࢽغَوُواْ، ࢽَ کَمْ لَایٜرُو لٜࢽُواْ تِرُو وُلُّواْ: ‹سَیِࢽَّیٜ ࢽِرُو سَࢽْجُ دٜلْ کَرْࢽْجْࢽَ، ࢻُوُرَوَࢽْجُوَ رُوکُّو مَسْࢽَ لَیَیٜدَ ࢻَࢽّْمْلَࢽْ ثَدِ،› یٜࢽُو؞»
[19] دَجِ ࢻُوُرَوَدْ جِرِ عِیسَى تَیِرُو وُلْجْغْࢽَدْ غَیْ کٜدُو؞ أَدْغَیْمَ مَسْࢽَ لَیَیٜدَ دَبَّرْیٜرَ؞
[20] کْࢽْغَلْ کِکُّرْࢽِّیَ، عِیسَى مٜوُࢽْ یِࢽْدِࢽْدَ رُوکُّو مَسْࢽَرُو ࢽَࢻْکٜرَ؞
[21] مَسْࢽَ ثَدِ دُوُوࢽْ، عِیسَیٜ: «جِرٜمَرُو ࢽَیِرُو وُلْࢽْجَغَکِّ، کَمْࢽْدُو ࢻَلْ وُوَ مُکُّو کْلَدُووَیٜرُو سْرْࢽْسِیے،» یٜࢽُو؞
[22] کَرْوُࢽْجَ جَوْرُو کُتَّجٜ ࢻَلْ ࢻَلّٜࢽْ وُࢽْدُ یَیٜ: «کْمَ، وُمَ وَ؟» ثْࢽٜ تِیَ کُورُو بَدِیٜࢽُو؞
[23] عِیسَیٜ تَیِرُو: «کَمْ دُوُوࢽْ وُوَ بُوُرُرُو مُکُّو یَکِّیٜࢽَدْ، تِمَ وُوَ سْرْتُّوُمَدْ وُو؞
[24] تَدَ کَمْبٜدْ سَࢻْتِدْمَ، جِرِ کْلَࢽْجُࢽْ کِتَوُلَࢽْ رُوُوَدَدْ غَیْ، أَمَّ کَمْ دُوُوࢽْ تَدَ کَمْبٜدَ کْلَدُووَࢽْجُرُو سْرْثِّیدْ، کُتُّࢽْجُ! ثَ کَمْ أَدْ تَمْبْࢽِّمَ تِرُو ࢽغَلْوُو!» یٜࢽُو؞
[25] دَجِ یَحُسَ کَمْ تِیَ سْرْتُّوُمَدْیٜ: «سَیِࢽَّ، وُمَ وَ؟» یٜࢽِّیَ، عِیسَیٜ تِرُو: «ࢽِمَیٜ وُلّْمَّ،» یٜࢽُو؞
[26] مَسْࢽَ ثَدِ دُوُوࢽْ، عِیسَى بُرُودِ ࢽغُوجٜ اللَّهرُو أَرْدِیٜࢽِّیَ، ࢻْسَکْثٜ ࢻُوُرَوَدْرُو ثٜ: «ࢽغُوࢽُواْ بُیْوُو، أَدْ تِیࢽِ،» یٜࢽُو؞
[27] کُورُو کْࢽْجَرَمْ ࢽغُوجٜ اللَّهرُو أَرْدِیٜࢽِّیَ، تَیِرُو ثٜ: «ࢽَیِ سَمَّ یَیْوُو،
[28] دَلِلْࢽْجُدْ أَدْمَ بُࢽِ أَمَࢽْ ࢽدْࢻْتَیٜ دُوُوࢽْ بِوُ أَمْ کَدَیٜ غَوُرْدُ ࢽَࢽْغَرُو ࢻِدْࢽَدْ وُو؞
[29] ࢽَیِرُو وُلْࢽْجَغَکِّ، ࢽَ أَدْࢽْ ࢻُوُࢽْ غَدٜرُو إِࢽْغِ إِࢽَبّٜ أَدَ یَکِّوَوُو، حَرْ یِمْ ࢽَیِیَ رُوکُّو ࢽُودُو بَرْغَا بَوَࢽِیٜلَࢽْ بْرِࢽُّو یَکِّرُو،» یٜࢽُو؞
[30] دَجِ أَیْیَ اللَّهَ ࢽجُࢽْغُورُویٜ یٜىٰرَࢽِّیَ، ثَلُوٜ کَوْ جَیْتُࢽّٜرُو لٜىٰرَ؞
[31] دَجِ عِیسَیٜ ࢻُوُرَوَࢽْجُرُو: «بُࢽٜ أَدْمَࢽْ ࢽَیِ سَمَّ کْلَ وُیٜࢽْ ࢽغَوُورُو وَلْدُوِ، أَکُّو أَوُو کِتَوُلَࢽْ رُوُوَدَدْ: ‹سْࢽِدَ بَࢽْغْکِّیَ، دِمِیَ بْرِیٜدْ تَتَرْدَیْ؞›
[32] أَمَّ کَرْمُولَࢽْ ثِکِّیَ، ࢽَیِیَ بُرْوُوࢽْجَکّٜ ثِدِ غَلِلٜىٰرُو لٜکِّ،» یٜࢽُو؞
[33] بِتُرُسّٜ تِرُو: «تَیِ سَمَّ کْلَ ࢽِیٜࢽْ ࢽغَوُورُو وَلْدَیْ یَیٜ، وُدْ تْمَّرُو ࢽغَوُورُو وَلْدْکِّوَوُو!» یٜࢽُو؞
[34] عِیسَیٜ: «جِرٜمَرُو ࢽِرُو وُلْࢽْجْغْکِّ، کُ بُࢽٜ أَدْمَࢽْ کَوُ غُدُواْمْ کُوکُّورٜ ثَکِّدْرُو، وُوَ یَکُّرُو أَࢽْغْرْسْمِ،» یٜࢽُو؞
[35] أَمَّ بِتُرُسّٜ تِرُو: «دُولٜ ࢽِیَ رُوکُّو ࢽُیْیٜرُو وَلْیٜࢽُو یَیٜ، تْمَّرُو ࢽِیَ أَࢽْغْرْࢽْجْکِّوَوُو!» یٜࢽُو؞ ࢻُوُرَوَ سَمَّ یٜ ࢽغَیْ وُلْیٜرَ؞
[36] عِیسَى ࢻُوُرَوَࢽْجُوَ ࢽَ تِرُو غٜسّٜمَࢽِ ثَࢽِدْرُو کَدِرَࢽِّیَ، تَیِرُو: «ࢽَ أَدْࢽْ ࢽَمُّواْ دُوُوࢽْ، ࢽَ تُودْرُو لٜکّٜ مُودُوَ دِکّٜ،» یٜࢽُو؞
[37] دَجِ بِتُرُسَّ تَدَ یِࢽْدِ جَبَدِیٜدَا ࢽغُوجٜ رُوکُّو لٜجَࢽٜ کَرْوُࢽْجُ کُتَّجٜ رُوࢽْجُ جَوْرُو بَࢽَّدُ بَدِیٜࢽُو؞
[38] تَیِرُو: «کَرْوُࢽِ جَوْرُو کُتَّجْࢽَ، حَرْ ࢽُکِّ غَیْ؞ ࢽَ أَدْࢽْ دَࢽُواْ، ࢻَادَرُو وُوَ کَلُّو دْغَیْوُو!» یٜࢽُو؞
[39] غَࢽَ لَا کُرُوُجٜ ࢻْدْرْیٜرُو تْمْدٜ مُودُوَ ثْدٜ: «بَوَࢽِ، یُوجِیَ، کْࢽْجَرَمْ أَدَ وُلَࢽْ ࢽغُوࢽٜ! أَدْ یَیٜ رَوُوࢽِدْ غْࢽِ، کَاࢽْمْدْمَ تِ وُو!» یٜࢽُو؞
[40] ࢽَ ࢻُوُرَوَࢽْجُیٜرُو وَلَّدَࢽِّیَ، کْࢽْمْ ثَدِ ࢽَیٜىٰࢽُو؞ بِتُرُسُّو: «أَسْشَ! سَ ࢻَلُّو رَࢽْغُوٜ وُوَ کَلُّو ࢻَادَرُو دْغَوَّوُو وَ؟
[41] بَرٜ جَرَࢻْتُوِّرُو ࢻَادَرُو دْغَیْوُو، مُودُوَ دٜوُو! رُحُ کَمْبٜدْ ثْرَاࢽَ، أَمَّ تِیࢽْجُدْ دُࢽُو کْسْکٜیَ!» یٜࢽُو؞
[42] کُورُو وَلْدٜ یِࢽْدِیٜرُو لٜجٜ مُودُوَ ثْدٜ: «بَوَࢽِ، کْࢽْجَرَمْ أَدَ وُلَࢽْ ࢽغُوࢽْمْبَوُو سَیْ یَکِّیَمَا، رَوُوࢽْمْدْمَ تْدُو!» یٜࢽُو؞
[43] ࢽَࢽْجَرُو وَلَّدَࢽِّیَ، ثَیٜ غَیْ کْࢽْمْ ثَدِ ࢽَیٜىٰࢽُو، سِمْࢽْجَ ࢽغَ کُرْوُووُجْࢽَ ࢽَࢽْغَرُو؞
[44] کُورُو وَلْدٜ تَیِیَ کُولْجٜ یَکُّیٜرُو لٜجٜ مَࢽَࢽْجُ ثَیٜدْلَࢽْ مُودُوَ کِدُو؞
[45] دَجِ ࢽَ ࢻُوُرَوَدْیٜرُو وَلَّدَࢽِّیَ، تَیِرُو: «کُوَمِسُوࢽْ کْࢽْمْبُو بُووَدَࢽْدُو تُسُّوِ وَ؟ سَدْ ثْدْࢽَ، تَدَ کَمْبٜدَ مُکُّو بِوُمَسُویٜرُو سْرْثَّاࢽَ؞
[46] ثِࢽُواْ، لٜࢽِیُو! أَکُّوࢽْجُ کَمْ وُوَ سْرْࢽْسِیمَدْ دٜلْ کَرْࢽْجْࢽَ!» یٜࢽُو؞
[47] عِیسَى مَࢽَ ثْدِ ࢽغَیْ دُوُوࢽْ، یَحُسَ مٜوُࢽْ یِࢽْدِࢽْدْیٜ ࢻَلْࢽْجَ کَدِیُو؞ جَمَ کَدَ یٜ ࢽَ وُرَوَ رِمَࢽَّیٜیَ أَمْوُرَوَ جَمَیٜیَیٜࢽْ کَشَغَرْ سُو، کَ سُو مُکُّوࢽَّ تِیَ رُوکُّو کَدِرَ؞
[48] ثَمَࢽْ تِ سْرْتُّوُمَࢽْجُدْ تَیِرُو بْلَاࢽَࢽْ إِسَࢽُوجِیٜ: «کَمْ تِرُو لٜوَ کْرَوُویٜ یِدّْکِّدْ، تِمَ! تِیَ تَیْوُو!» ثْࢽَّ؞
[49] سَدْمَࢽْ یَحُسَ ࢽَ عِیسَیٜرُو إِسٜ: «وُسٜ، سَیِࢽَّ!» ثْࢽٜ تِرُو لٜوَ کْرَوُویٜ کِدُّو؞
[50] عِیسَیٜ تِرُو: «سَوَࢽِ، أَوُو کْࢽْدُورُو إِسْمَّدَ دٜ!» یٜࢽُو؞ دَجِ أَمْدْ ࢻُوُجَࢽٜ عِیسَىٰ مُکُّوࢽْ دَࢻْ کٜدَ؞
[51] أَمْ ࢽَ عِیسَیٜࢽْ دَجَࢽَدْیٜ ࢻَلْࢽْجَ مُکُّو سَجِیٜ کَشَغَرْ ࢻِثّٜ وُولُودِ رِمَࢽْ کُرَیٜیَ بَکْثٜ سْمُوࢽْجُ تْࢽْ کَمْغٜࢽُو؞
[52] دَجِ عِیسَیٜ تِرُو: «کَشَغَرْࢽْمْبَ ࢻَࢽّجُرُو کَلَࢽْغٜ! وُࢽْدُ دُوُوࢽْ کَشَغَرْ ࢻِثّْࢽَمَدْ کَشَغَرْلَمَࢽْ ࢽُیْ؞
[53] رَ، ࢽُوࢽْمِّ وَ رَࢽْغْکّٜ بَوَࢽِیَ بُواْࢽْکّٜ سَدْمَࢽْ وُرُو مَلَیْیَوَ کْوُ مٜوُࢽْ یِࢽْدِࢽْمَا کُوجْࢽَا جُوَسِیدْ؟
[54] أَمَّ ࢽغَیْرُو وَلْیٜࢽُووَ، جِرِ ࢻِࢽْ غْلٜ أَوُو اللَّه ثَمَࢽْ کَدَرْجٜ کِتَوُلَࢽْ وُلْجْࢽَدْ وَکَّجِ؟» یٜࢽُو؞
[55] سَ أَدْࢽْ عِیسَیٜ جَمَدْرُو: «أَ! ࢽَیِ کَشَغَرْ سُو، کَ سُو مُکُّوࢽَّ وُوَ غْࢽْدٜمَ غَیْ تَرُو وَ إِسُوِدْ؟ یِمْ ࢽغُسُوࢽْ ࢻَدُو اللَّهیٜࢽْ ࢽَࢻْکَدَ جَمَا أَلَمّْکِّ دُوُوࢽْ، وُوَ سْدَوِّ؞
[56] أَمَّ أَوُووَ ࢽَوِیَ کِتَوُلَࢽْ رُوُجَࢽَسُودْ وَکَّجَرُو أَوُو أَࢽِ سَمَّ تَدْࢽَ،» یٜࢽُو؞ دَجِ ࢻُوُرَوَࢽْجُ سَمَّ تِیَ کُولْجَࢽٜ کٜیَسُو؞
[57] دَجِ أَمْ عِیسَىٰ ثَدَࢽَدْ تِیَ ࢽَ کَیْࢻَسْ رِمَࢽْ کُرَدْیٜرُو کٜسَدُو، ࢽَ دُوُوࢽْ مَلْمْبَ أَتَّوْرَیٜیَ أَمْوُرَوَ جَمَیٜیَ یٜ ثَࢻْتَࢽَدْ؞
[58] بِتُرُسْ یٜ کَتّٜ کَسْکَدَارُو حَرْ بَلْبَلَّ ࢻَدُو رِمَࢽْ کُرَیٜدْرُو تِیَ جْغَࢽٜ کْرْغَاࢽِّیَ، أَوُو وَکَّجِدَ کُرُورُو دَوُ غُرٜدُوُ ࢻَدُو اللَّهیٜࢽْ ࢽَࢻْکٜࢽُو؞
[59] وُرَوَ رِمَࢽَّیٜیَ مَجِلِسْوُ سَمَّا عِیسَىٰ رُورُو ࢽجٜجُورُو شٜدَ کَتُّوُیٜ مَیٜرَ،
[60] أَمَّ شٜدَوُ کَتُّوُیٜ کَدَ إِسَࢽَ یَیٜ، ثَوَࢽْدْࢽِّ؞ دَرْیٜ أَمْ یِࢽْدِ إِسَࢽٜ:
[61] «کَمْ أَدْیٜ رَکْثٜ ࢻَدُو اللَّهیٜدَ وُرْجٜ ثُرُو کَوُ یَکُّیٜࢽْ ثْدَࢽْدِ ثْࢽَّ،» یٜرَ؞
[62] دَجِ رِمَࢽْ کُرَدْ ثِجٜ دَجٜ عِیسَرُو: «جَاوُࢽْمْ بَوُو وَ؟ أَوِ غْلٜ أَمْ أَࢽِ کْلَࢽْمْࢽِࢽْ شٜدَجَیْدْ؟» ثْࢽٜ تِیَ کِوُورُو؞
[63] أَمَّ عِیسَى ثِࢽْجُ کَجْࢽِّ؞ کُورُو رِمَࢽْ کُرَدْ وَلْدٜ تِرُو: «اللَّه کْࢽْدْغَیْمَ ࢽَࢽْغَرُو، جِرٜ وُلْسَغَࢽٜ! ࢽِمَ وَ أَلْمَسِیوُ تَدَ اللَّهیٜدْ وُو؟» ثْࢽٜ تِیَ کِوُورُو؞
[64] عِیسَیٜ تِرُو: «ࢽِمَ وُلّْمْ، وُمَ! کُورُو ࢽَیِرُو وُلْࢽْجَغَکِّ، کُوَ أَدْࢽْ ࢻُوُࢽْ تَدَ کَمْبٜدْ مُکُّو کْمْبُورَمْ مَیْ کْࢽْدُوُومَیٜࢽْ ࢽَࢻْکَدَ یٜ، ثُرُو ࢻُوࢻُووْ سَمٜىٰࢽْ کْࢽْدٜ ثْدِ یٜ رُوِ،» یٜࢽُو؞
[65] دَجِ رِمَࢽْ کُرَدْ کَلْوُࢽْجُ کَرْجٜ: «أَ! تِ اللَّهَ غَسْکَجُو! شٜدَ جِرِ ࢻِ غْلٜ غَدٜ مَࢽِیٜ؟ ࢽَیِ کْلَࢽْدُو اللَّهَ غَسْکَدُࢽْجُدَ ࢻَࢽُّوَّ؞
[66] أَوِ غْلٜ تْمَࢽُوْ؟» ثْࢽٜ تَیِیَ کِوُورْࢽِّیَ، تِرُو: «رُوࢽْجُ تُلُوُومَ جُسُّو!» یٜرَ؞
[67] دَجِ لَاࢽجَ ࢻْکَّࢽْجُرُو لَلَّرِ تْوَتْوَجَغَࢽٜ تِیَ بَبَکّٜرَ، لَاࢽجَ یٜ مَرِࢽْ بَکْثَࢽٜ
[68] تِرُو: «حَ! أَلْمَسِیوُ، ࢽَوِࢽَوِ دٜ! وُࢽْدُ ࢽِیَ بَࢽّجُو؟» یٜرَ؞
[69] بِتُرُسْ بَلْبَلَّ ࢻَدُویٜدْࢽْ ࢽَࢻْکَدَ دُوُوࢽْ، کِرْ لَا إِسٜ تِرُو: «ࢽِ یٜ عِیسَى کَمْ ثِدِ غَلِلٜىٰیَ رُوکُّو کْرْغَوْ!» یٜࢽُو؞
[70] أَمَّ بِتُرُسْ ࢻُوُ تَیِ سَمَّیٜࢽْ أَࢽْغْرْجٜ: «أَوُو وُلّْمِدَ ࢽُوکّْࢽِ،» یٜࢽُو؞
[71] دَجِ ثِࢽَّ ࢽغَوُورَمْبُو کِلُوُࢽِّیَ، کِرْ غَدٜ تِیَ ثُرٜ أَمْ ࢽَدْࢽْ دَسَاࢽَدْرُو: «کَمْ أَدْ یٜ عِیسَى کَمْ ࢽَجَرَتّٜیَ رُوکُّو!» یٜࢽُو؞
[72] کُورُو بِتُرُسْ وَلْدٜ تِیَ أَࢽْغْرْجٜ کَࢽْسِ جُوٜ: «تِیَ ࢽُوکّْࢽِ،» یٜࢽُو؞
[73] غَࢽَ سَمْ کِدْࢽِّیَ، أَمْ ࢽَدْࢽْ دَسَاࢽَدْ إِسَࢽٜ بِتُرُسُّو: «ࢻَغَتُّو ࢽِ یٜ کَمْࢽْجَ ࢻَلْ، تْلَمّْمْلَࢽْ أَسُࢽْغٜیْیٜ،» یٜرَ؞
[74] أَمَّ بِتُرُسْ کْلَࢽْجُ بَسْکُجٜ کَࢽْسِ جُوٜ: «کَمْ أَدَ ࢽُوکّْࢽِ!» یٜࢽُو؞ سَدْمَࢽْ غُدُواْمْ کُوکُّورٜ کٜکُّو؞
[75] دَجِ بِتُرُسْ أَوُو عِیسَى تِرُو وُلْࢽْجْغْࢽَدَ تَکّٜࢽُو؞ عِیسَیٜ: «کَوُ غُدُواْمْ کُوکُّورٜ ثَکِّدْرُو، وُوَ یَکُّرُو أَࢽْغْرْسْمِ،» ثْࢽَّ؞ تَکّٜࢽِّیَ، دٜیَرُو ثُلُوٜ تَیْ دَجٜ سُو ࢽغُویٜࢽُو؞