[1] سَ أَدْࢽْ ࢻُوُرَوَدْ ࢽَ عِیسَیٜرُو إِسَࢽٜ تِرُو: «ثُرُو ࢽُودُو بَرْغَا مَیْ سَمٜمَیٜࢽْ وُࢽْدُ کُرَ وُو؟» ثَࢽٜ تِیَ کٜوُورُو؞
[2] دَجِ عِیسَى تَدَاࢽَ لَآ بُواْجٜ دَوُࢽْجَࢽْ إِسَدَجِیٜ
[3] تَیِرُو: «جِرٜمَرُو ࢽَیِرُو وُلْࢽْجَغَکِّ، کَرْوُࢽْدُو ࢻَلْدٜ تَدَوَ سَࢽَࢽَ غَیْرُو وَلُّوِّیَ، تْمَّرُو ࢽُودُو بَرْغَا مَیْ سَمٜمَیٜرُو ࢽغَوُوَّوُو؞
[4] أَدْ ࢽَࢽْغَرُو وُࢽْدُ دُوُوࢽْ تَدَاࢽَ أَدْ غَیْ کْلَࢽْجُوَ أَوِمَرُو ࢽغُوجْࢽِّدْ، ثُرُو ࢽُودُو بَرْغَا مَیْ سَمٜمَیٜࢽْ تِمَ کُرَ وُو؞
[5] «کُورُو وُࢽْدُ دُوُوࢽْ تَدَاࢽَ أَدْ غَیْیَ ثُࢽِلَࢽْ ثْمُواْࢽَمَدْ، وُمَا سْمُواْ؞
[6] أَمَّ وُࢽْدُ دُوُوࢽْ تَدَوَ سَࢽَࢽَ وُوَ مْرْسَسَࢽَسُو أَࢽِیٜ ࢻَلْࢽْجَا ثَکّٜ تَلْجٜ بِوُ ثْدِدْ، کَمْدْیٜ دَوْࢽْجُرُو کَوْ ࢽٜدُرَمْ مَࢻْࢽْدِ لُجَغَࢽٜ بْرْمْ کُرُوُرُو غْࢻْثَاࢽَمَ تِرُو ࢽغَلْوُو؞
[7] «کُتُّࢽْجَ أَمْ دُࢽِیَیٜسُو، دَلِلْࢽْجُدْ أَوُووَ تَیِیَ ثَسَکّٜ تَلْجَࢽٜ بِوُ ثَدِ مبٜجِ؞ جَرَࢻْتَسُو کَدُ بَوُورُو إِسَیْ، أَمَّ کُتُّࢽْجُ کَمْ تِیٜࢽْ إِسَیْدْ!
[8] مُکُّوࢽْمْ بِ سِࢽْمْ ࢽجَکّٜ تَلّْمٜ بِوُ دِمِیَ، تِیَ کَمّٜ ࢽِࢽْ کُرُوُࢽُّو غْمّٜ! مُکُّو یِࢽْدِیَ بِ سِ یِࢽْدِیَ کَࢽُّ تْمَّرُو ࢽُیْوَوُورُو ࢽغَوُودْرُووَ، مَسْکِࢽْ بِ دُࢽْغُ رُو سَوِسُویٜرُو ࢽغَامَّمَ ࢽِرُو ࢽغَلْوُو؞
[9] کُورُو سِمّْمْ ࢽجَکّٜ تَلّْمٜ بِوُ دِمِیَ، تِیَ کُلَیْࢽٜ ࢽِࢽْ کُرُوُࢽُّو غْمّٜ! سِمْ یِࢽْدِیَ کَࢽُّ جَاࢽَمَیٜدْرُو ࢽغَوُودْرُووَ، سِمْ ࢻَلَّ رُو سَوِسُویٜرُو ࢽغَامَّمَ ࢽِرُو ࢽغَلْوُو؞
[10] «حَࢽْغَلْ غْࢽَࢽُواْ، بَرٜ تَدَوَ سَࢽَࢽَ أَࢽِیٜ ࢻَلْࢽْجَمَرُو رُدُ غْࢽَغْوِّ! ࢽَیِرُو وُلْࢽْجَغَکِّ، سَمٜلَࢽْ مَلَیْیَوَࢽْجَ سَوِسُورُو ࢻْکَّ بَوَࢽِ مَیْ سَمٜمَیٜ ثَرُیْ کَسَرْغَ؞
[11] [أَوُووَ تَدَ کَمْبٜدْ أَوُو ࢻَثّْغْࢽَسُودَ مَࢽْمٜ ࢽجْکَّوُورُو إِسْࢽَ؞]
[12] أَوِ غْلٜ تْمَࢽُوْ؟ کَمْ لَا دِمِࢽْجُ مِیَا دُوُوࢽْ، ࢻَلْ ࢻَتْکٜىٰࢽُووَ، ࢻِلْغَرْ لْغَرِدَ کْرِسُولَࢽْ کُولْجٜ لٜجٜ ࢻَلْ ࢻَثّْغْࢽَدَ مَجِ، مَرٜ؟
[13] جِرٜمَرُو ࢽَیِرُو وُلْࢽْجَغَکِّ، کِوَࢽْدُووَ، کَرْوُکْجِ دُوُوࢽْ کْلَ ࢻَلْدْیٜࢽْ ثْدِدْ کْلَ ࢻِلْغَرْ لْغَرِ ࢻَثَّاࢽِّدْیٜࢽْ ثْدِدْمَا کُوجْࢽَ؞
[14] أَدْغَیْمَ بَوَࢽْدُو مَیْ سَمٜمَ یٜ تَدَوَ سَࢽَࢽَ أَࢽِیٜ ࢻَلْࢽْجَیٜ ࢻَتُّوُ ثْرَاࢽِّ؞
[15] «کْرَمِࢽْمْ بِوُ ࢽِرُو ࢽجْدِّیَ، لٜࢽٜ کَتّٜ ࢽَیِ یِࢽْدِ رُࢽْدُویٜࢽْ تِرُو بِوُࢽْجُدَ وُلْغْࢽٜ؞ مَࢽَࢽْمْ ࢻَࢽْجِیَ، کْرَمِࢽْمْدَ مُواْمَّ؞
[16] ࢻَࢽْجِوَوُووَ، کَمْ ࢻَلْ بِ یِࢽْدِ ࢽغُوࢽٜ کَلُّو لٜࢽُواْ؞ أَدْغَیْࢽِࢽْ مَࢽَ ࢻِ یَیٜ ثِ شٜدَ یِࢽْدِ بِ یَکُّیٜࢽْ تَبَّتِّیے؞
[17] تَیِ یٜیَ ࢻَࢽْدُرُو وَجِیَ، جَمَ وُوَ غَوُرُو وُلْغْࢽٜ؞ کُورُو یَیٜ جَمَ وُوَ غَوُدْمَا ࢻَࢽْدُرُو وَجِیَ، کْرْدِ بِ أَکِّ مُواْمَ غَیْرُو تِیَ ࢽغُوࢽٜ؞
[18] جِرٜمَرُو ࢽَیِرُو وُلْࢽْجَغَکِّ، أَوِ دُوُوࢽْ دُࢽِیَࢽْ غٜرُوِدْ سَمٜ یٜࢽْ تِکّٜرْࢽَ، کُورُو أَوِ دُوُوࢽْ دُࢽِیَࢽْ وُیْࢽُوِدْ سَمٜ یٜࢽْ وُیْدْࢽَ؞
[19] کُورُو ࢽَیِرُو وُلْࢽْجَغَکِّ، دُࢽِیَࢽْ کَمْࢽْدُو یِࢽْدِ کْلَ أَوِ یَیٜࢽْ أَرْدِجَࢽٜ بَوَࢽِ مَیْ سَمٜمَا ثَوُورِیَ، تَیِرُو ثِ؞
[20] دَلِلْࢽْجُدْ ࢽَ دُوُوࢽْ کَمْ یِࢽْدِ بِ یَکُّ ثُࢽِلَࢽْ ثَࢻْتَࢽَدْ، وُ یٜ دَوُࢽْجَࢽْ،» یٜࢽُو؞
[21] دَجِ بِتُرُسْ ࢽَ عِیسَیٜرُو إِسٜ تِرُو: «کْمَ، کْرَمِࢽِ وُرُو بِوُ سْدِّیَ، ࢽدَوُرُو تِیَ غَوُرْࢽْکِّ؟ حَرْ غَدٜغَدٜ تُلُرُّو؟» ثْࢽٜ تِیَ کِوُورُو؞
[22] عِیسَیٜ تِرُو: «أَعَ، حَرْ غَدٜغَدٜ تُلُرُّو غْࢽِ وُلْࢽْغٜىٰکُّو، ࢻِتُلُرْ غَدٜغَدٜ تُلُرُّو تِیَ غَوُرْࢽٜ!
[23] أَدْ ࢽَࢽْغَرُو ࢽُودُو بَرْغَا مَیْ سَمٜمَیٜ أَلَمَࢽْجُ مَیْ لَا وُولُودِیَࢽْجُوَ کْلَ کَسُࢽْجَیٜࢽْ بَلَسْ دِیُو ثْرَاࢽَدْ غَیْ؞
[24] مَیْدْ بَلَسْ دِیُو بَدِیٜࢽِّیَ، کَمْ تَلَࢽْتِ دْوُ مٜوُرُو جْغَیْمَا تِرُو کٜکُّدُو؞
[25] کَمْدْ أَوُوࢽْجُ رْمْبُویٜ بَوُودْ، کْمَࢽْجُ وَدَ ثٜ تِیَ کَمُࢽْجُوَ یَلَّࢽْجُوَ کْࢽْدَࢽْجُ سَمَّآ ثَلَدُو کَسُدْ تْرْمْبُو یٜࢽُو؞
[26] أَمَّ کَمْدْ ࢻُوُ کْمَࢽْجُیٜࢽْ تُࢽْغُرُمْجٜ تِرُو: ‹بَرْغَࢽْمِّࢽْ، کَࢽَدِ تَیْ، سَمَّا رْمْبْکِّ، دِیٜ!› یٜࢽُو؞
[27] دَجِ کْمَ وُولُودِدْیٜ تِیَ ࢽجُࢽُوجٜ کَسُدَ وَجِیٜ تِیَ کُولْجٜ لٜىٰࢽُو؞
[28] «کِلُوُࢽِّیَ، وُولُودِ أَدْ یٜ کَمَࢽْجُ لَا دِࢽَرِیُسْ مِیَرُو جْغَیْمَا کِرُو؞ تِیَ دَوْیٜࢽْ رْࢻْثِیٜ کِمِلْجِیٜ: ‹أَوُو ࢽِیَ ࢽجْغَکِّدَ رْمْبٜ!› یٜࢽُو؞
[29] دَجِ کَمَࢽْجُدْ ࢻُوُࢽْجُࢽْ تُࢽْغُرُمْجٜ تِیَ لُواْجٜ: ‹مَرْࢽٜ، کَࢽَدِ تَیْ، رْمْبْکِّ، دِیٜ!› یٜࢽُو؞
[30] أَمَّ وَجٜ تِیَ کُوسُورُو ثَکّٜ، حَرْ کَسُدَ ثْرْمْبِرُو یٜࢽُو؞
[31] «وُولُودِیَ أَمَࢽْجُدْ أَوُو وَکَّجْࢽَدَ کٜرُࢽِّیَ، کَرْوُࢽْجَ جَوْرُو بَࢽَّدٜ لٜجَࢽٜ کْمَࢽْجَرُو أَوُو وَکَّجْࢽَ سَمَّا وُلْیٜىٰرَ؞
[32] دَجِ کْمَࢽْجَدْ کُورُو وَلْدٜ وُولُودِدَ بُواْجٜ تِرُو: ‹ࢽِ وُولُودِ کْلَدُو! لُواْسْمَّ ࢽَࢽْغَرُو، کَسُࢽْمْ أَدْ سَمَّا وَࢽْغٜىٰکُّو؞
[33] ࢽجُࢽُوࢽْجْکّْࢽَدْ غَیْ، وُولُودِ کَمَࢽْمْبَ ࢽجُࢽُودُدْ ࢽِرُو وَجِمْࢽْجْغْࢽَ، غْࢽَ؟› ثْࢽٜ
[34] غْرْغَجٜ تِیَ مُکُّو أَمْ تِرُو أَجَوُ ثَدِّیٜرُو ثَکّٜ، حَرْ تِ یٜ سَمَّا ثْرْمْبِرُو یٜࢽُو؞
[35] أَدْغَیْمَ وُࢽْدُࢽْدُو یَیٜ کَرْوُࢽْجُࢽْ کَمَࢽْجُوَ غَوُرْجِوَوُووَ، بَوَࢽِ مَیْ سَمٜمَ یٜ تِرُو ࢽغَیْدْمَا ثْدِّ،» یٜࢽُو عِیسَیٜ؞