[1] عِیسَى کْلَ کَوْدْیٜࢽْ جْࢻْکٜࢽِّیَ، أَمْ کَدَ کَدَمِ تِیَ غٜیَ؞
[2] کَمْ بَرَسُوَ لَا إِسٜ ࢻُوُࢽْجُࢽْ تُࢽْغُرُمْجٜ تِرُو: «کْمَ، رَامَّا، رَࢽْغْمٜ وُوَ إِسَࢽْغَسْغْمٜ تَیِرُّو وَلّْکِّ،» یٜࢽُو؞
[3] عِیسَى مُکُّو سَجِیٜ کَمْدَ لٜجٜ: «رَاکّْࢽَ، تَیِرُّو وَلّٜ!» یٜࢽُو؞ سَدْمَࢽْ بَرَسُدْ تِیَ کُولْجٜ تَیِرُّو وَلْیٜࢽُو؞
[4] دَجِ عِیسَیٜ تِرُو: «بَرٜ وُࢽْدُمَرُو أَدَ وُلْغْمِّ، أَمَّ لٜࢽٜ رِمَࢽْدْرُو ࢻْلٜدْغْࢽٜ، کُورُو سَدَا ࢽَوِ مُوسَى وُلْجْࢽَدَ دٜ، جَمَرُو شٜدَرُو وَلْجُو!»
[5] عِیسَى بْرْࢽِ کَࢻَرْࢽَامبٜرُو کْرْغَاࢽِّیَ، سُوجِ کُرَ رُومْبٜ لَا ࢽَࢽْجُرُو إِسٜ تِیَ لُواْجٜ:
[6] «کْمَ، کَرٜیَࢽِ دُوࢽْدِ ࢻَدُوࢽْ بُووَدَ، تِیࢽْجُ ࢽُࢽَ جَوْرُو بَسَرْدِ،» یٜࢽُو؞
[7] عِیسَیٜ تِرُو: «لٜکّٜ تِیَ إِسَࢽْغَغْکِّ،» یٜࢽُو؞
[8] أَمَّ سُوجِ کُرَدْیٜ تِرُو: «کْمَ، ࢽِیَ ࢻَࢽِّࢽْ سَوُو تِکّْࢽِ؞ بِیَ وَدَ یٜ، کَرٜیَࢽِ ࢽغَجِ؞
[9] وُدْ ثِدِیَ کْࢽْدُوُو أَمْبٜࢽْ کْرْغَکُّو، ࢻْرْدُࢽِ یٜࢽْ سُوجِیَ تَکّْࢽَ؞ ࢻَلْࢽْجَرُو: ‹لٜࢽٜ!› ࢽْکِّیَ، لٜجِ؞ ࢻَلْ لَارُو: ‹أَرٜ!› ࢽْکِّیَ، إِسِ؞ کُورُو کَرٜیَࢽِرُو: ‹أَدَ دٜ!› ࢽْکِّیَ، ثْدِ؞»
[10] عِیسَى أَدَ ࢻَࢽْغٜࢽِّیَ، أَجَࢻْثٜ جَمَ تِیَ جَغَیْدْرُو: «جِرٜمَرُو ࢽَیِرُو وُلْࢽْجَغَکِّ، ثُرُو جَمَ إِسْرَاءِیلَیٜࢽْ کَمْبْرْسٜ کُرَ أَدْ غَیْ ࢻَࢽْدْکّْࢽِ!
[11] ࢽَیِرُو وُلْࢽْجَغَکِّ، أَمْ کَدَ أَدِࢽَّمْبَ ࢻْدٜیَلَࢽْ إِسَࢽٜ ࢽَوِ إِبْرَاهِیمْبَ ࢽَوِ إِسْحَٰࢼُوَ ࢽَوِ یَعْࢼُوبَا رُوکُّو ࢽُودُو بَرْغَا مَیْ سَمٜمَیٜࢽْ مَسْࢽَ دِیُورُو ࢽَࢻْثَیْ؞
[12] أَمَّ تَدَوَ ࢽُودُو بَرْغَایٜدَ دٜیَࢽْ ثُرُو دُوُ ثْلْمْ ࢻْتّٜرُو غْࢻْثَغَیْ، ࢽَدْࢽْ سُو یٜ تْدِ، شٜرِ یٜ ࢽَلْدِ،» یٜࢽُو؞
[13] دَجِ عِیسَیٜ سُوجِ کُرَدْرُو: «لٜࢽٜ، کَمْبْرْسٜࢽْمْ ࢽَࢽْغَرُو، أَوُو سُوُورْمَّدْ ࢽِرُو وَکَّࢽْجُوُو!» یٜࢽُو؞ کَرٜیَࢽْجُدْ سَ أَدْمَࢽْ ࢽغَیٜࢽُو؞
[14] عِیسَى ࢻَدُو بِتُرُسّٜرُو کَدِࢽِّیَ، یَ کْسَیْ بِتُرُسّٜ کَࢽْغٜیَ بُووَدَ کِرُو؞
[15] عِیسَى مُکُّوࢽْجُ لٜىٰࢽِّیَ، کَࢽْغٜدْ تِیَ کُولْجٜ، تِ یٜ ثِجٜ عِیسَىٰ سُوسَدُ بَدِیٜࢽُو؞
[16] یِمْ أَدَ کْࢽْغَلْ کِکُّرْࢽِّیَ، بْرْࢽِوُدْ کَرُوَمَسُو کَدَ ࢽَ عِیسَیٜرُو کٜوُدُو؞ مَࢽَࢽْجُلَمَࢽْ سٜدَࢽَّدَ دُیٜࢽُو، کُورُو أَمْ دُوࢽْدِ سَمَّا إِسَࢽْغَیٜىٰࢽُو؞
[17] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِ إِشَیَیٜࢽْ وُلْجْࢽَدْ وَکَّیٜࢽُو؞ تِیٜ: «کْࢽْدُوࢽْدِࢽْدٜ کْلَࢽْجُرُو ࢽغُوجٜ کَسُوَࢽْدٜࢽْ إِسَࢽْغَسٜىٰرَ،» ثْࢽَّ؞
[18] یِمْ لَا عِیسَى جَمَ کَدَ تِیَ دِرِجَࢽٜ کْلْجَࢽَدَ کِرُࢽِّیَ، ࢻُوُرَوَࢽْجُرُو وَدَ بْرْمْدَ ࢻَلْدَیٜ کَیْࢽُو؞
[19] دَجِ مَلْمْ أَتَّوْرَیٜ لَا ࢽَࢽْجُرُو إِسٜ تِرُو: «سَیِࢽَّ، ࢽدَرَ لٜࢽْمِ یَیٜ ࢽِیَ ࢽجْغَکِّ،» یٜࢽُو؞
[20] عِیسَیٜ تِرُو: «کْلُوُسُو بْلَاࢽجَا، ࢽغُدُوسُو سَمٜىٰ یٜ ࢻَࢽّجَا، أَمَّ تَدَ کَمْبٜدْ ࢽَࢽْجُ تُسْتُیٜمَ بَوُو،» یٜࢽُو؞
[21] کُورُو ࢻُوُرَࢽْجُ لَا یٜ تِرُو: «کْمَ، أَمَرْسْغْࢽٜ لٜکّٜ بَوَࢽِیَ سِتّْرَکِّیَ دُوُوࢽْ،» یٜࢽُو؞
[22] أَمَّ عِیسَیٜ تِرُو: «وُوَ سْغَیْ، کُولّٜ أَمْ سَࢽُࢽَ أَمَࢽْجَ سَࢽُࢽَدَ سِتّْرَجَ!» یٜࢽُو؞
[23] عِیسَى ثُرُو مَارَیٜرُو کْرْغَاࢽِّیَ، ࢻُوُرَوَࢽْجُ یٜ تِیَ جَاࢽٜ کَسَرْغَوُو؞
[24] سَدْمَࢽْ کَرُوَ دُࢽُووَ ثِجٜ إِࢽْغِ بْرْمْبٜ ثَمْبَلْجٜ، حَرْ إِࢽْغِ مَارَدْرُو ࢻِدُوُ بَدِیٜࢽُو؞ سَدْࢽْ عِیسَى کْࢽْمْ ثْدِ؞
[25] ࢻُوُرَوَࢽْجُدْ إِسَࢽٜ تِیَ کْࢽْمْࢽِࢽْ کٜسَࢽْغْرَࢽِّیَ، تِرُو: «کْمَ، أَࢽْدِیَ سَمُویٜ، ࢽُیْیٜ!» یٜرَ؞
[26] عِیسَیٜ تَیِرُو: «أَوِرُو یَایٜوْ، ࢽَیِ کَمْبْرْسٜ غَࢽَادْ؟» یٜࢽُو؞ دَجِ ثِجٜ کَرُوَدَ بْرْمْدَرُو کِکَّدْࢽِّیَ، دَجَࢽٜ دُࢽِیَ غْمْبُو وَلْیٜࢽُو؞
[27] ࢻُوُرَوَࢽْجُدْ أَجَࢻْثَࢽٜ: «أَ! کَمْ جِرِ ࢻِ أَتّْ؟ کَرُوَا بْرْمْبَمَ مَࢽَࢽْجُ جَغَیْ!» یٜرَ؞
[28] عِیسَى بْرْمْدَ ࢻَلْجٜ کُوجٜ ثِدِ غَدَرَوُیٜرُو کَدِࢽِّیَ، کَرُوَمَ یِࢽْدِ کَوْرِلَلَࢽْ ثَلُوٜ تِیَ کَࢻْکٜىٰرَ؞ تَیِدْ جَوْرُو جَوْ، حَرْ وُࢽْدُمَ رَکْثٜ جَوَلْدْیٜࢽْ کُوجِوَوُو؞
[29] دَجِ یِلْجَࢽٜ: «أَوِ لَمْبُوࢽْمْ أَࢽْدِرُو، تَدَ اللَّهیٜ؟ سَࢽْجُ ثْدْࢽِّࢽْ أَࢽْدِرُو أَجَوُ غْࢽَدُوُرُو وَ کَدِمْ؟» یٜرَ؞
[30] کُرُوُࢽْجَࢽْ أَلَدٜ کَدَ ࢽٜوُو ثَدِ یٜ مبٜجِ؞
[31] دَجِ سٜدَࢽَّدْ عِیسَىٰ لُواْجَࢽٜ: «دُسَمِیَ، أَلَدٜیَدْرُو دُسَغَࢽٜ ثُرُوࢽْجَرُو ࢽغَیِیُو!» یٜرَ؞
[32] عِیسَیٜ تَیِرُو: «تُو، لٜࢽُواْ!» یٜࢽِّیَ، سٜدَࢽَّدْ ثَلُوٜ ثُرُو أَلَدٜیَدْیٜرُو کَسَرْغَوُو؞ دَجِ أَلَدٜیَدْ سَمَّ ࢽغْرْمْجَࢽٜ کَوْلَࢽْ جْࢻْثَࢽٜ بْرْمْدْرُو ࢻِدَغَࢽٜ إِࢽْغِیٜ ࢽغُوجٜ کَسُࢽُو؞
[33] سْࢽِیَ أَلَدٜیَیٜدْ ثَغَسٜ بْلَرُو لٜجَࢽٜ أَوُو کْلَ کَرُوَمَسُو أَࢽِیٜࢽْ وَکَّجْࢽَدَ أَمْبُو وُلْیٜىٰرَ؞
[34] دَجِ أَمْ بْلَیٜ سَمَّ یٜ عِیسَىٰ کَࢻْتُوُرُو ثَلُوٜ کٜرُࢽِّیَ، ثِدِࢽْجَ کُولْجُورُو تِیَ لُواْیٜرَ؞