[1] «سَ أَدْࢽْ ࢽُودُو بَرْغَا مَیْ سَمٜمَیٜ أَلَمَࢽْجُ ࢻٜرُووَ کْلَیَکُّ مٜوُ ࢻَتْلَࢽْجَ ࢽغُوجَࢽٜ مَیْ لَرُسَیٜدَ کَࢻْتُوُرُو ثَلُوُࢽَدْ غَیْ؞
[2] ثُرُوࢽْجَࢽْ أُوُ حَࢽْغَلْ بَوُووَ، أُوُ یٜ حَࢽْغَلَّ؞
[3] تَیِ حَࢽْغَلْ بَوُووَدْ ࢻَتْلَࢽْجَ ࢽغُویٜرَࢽِّیَ، کْࢽْدَوُ ࢽغُوجَࢽِّ؞
[4] أَمَّ تَیِ حَࢽْغَلَّدْ ࢻَتْلَࢽْجَا کَلْوُو ثُرُوࢽْ کْࢽْدَوُ غَدٜیَا ࢽغُویٜرَ؞
[5] مَیْ لَرُسَیٜدْ دُوَࢽْ إِسْࢽِّدْ، تَیِ سَمَّا کْࢽْمْ ࢽغُویٜࢽُو؞
[6] دَوُ بُࢽٜىٰࢽْ کُواْ لَا ࢽُکْثٜ: ‹أَکُّوࢽْجُ مَیْ لَرُسَیٜدْ! لُوُواْ تِیَ کَࢻْکْࢽُواْ!› یٜࢽُو؞
[7] دَجِ کْلَیَکُّ أَࢽِ سَمَّ ثِجَࢽٜ ࢻَتْلَࢽْجَ دَبَّرْدُ بَدِیٜرَ؞
[8] أَمَّ تَیِ حَࢽْغَلْ بَوُووَدْیٜ حَࢽْغَلَّدْرُو: ‹أَࢽْدِرُو کْࢽْدَوُ غَࢽَ سَدُواْ، ࢻَتْلَوَࢽْدٜ ࢽُو ثَدِ!› یٜرَࢽِّیَ،
[9] حَࢽْغَلَّدْیٜ: ‹أَعَ، أَࢽْدِیَ ࢽَیِیَا سَدِوَوُو؞ لٜࢽُواْ ࢽَ لَدُومَسُویٜࢽْ یُوُواْ!› یٜرَ؞
[10] کْࢽْدَوُ ࢽجُوُورُو لٜدُ ثَدِ دُوُوࢽْ، مَیْ لَرُسَیٜدْ کَدِیُو؞ تَیِ دَبَّرْدَࢽَدْ تِیَ کَلُّو ࢽَ ࢽغْمْرِ لَرُسَیٜرُو ࢽغَسَیٜ ثِࢽَّدْ جَکّٜرَ؞
[11] ࢽغَوُو أَدْیٜࢽْ کْلَیَکُّ غَࢻْثَࢽَدْ یٜ إِسَࢽٜ تِرُو: ‹بَرْغَࢽْمِّࢽْ، بَرْغَࢽْمِّࢽْ، أَࢽْدِرُو ثِࢽَّدَ ࢻْرْمْسَغَࢽٜىٰ!› یٜرَ؞
[12] أَمَّ مَیْ لَرُسَیٜدْیٜ: ‹جِرٜمَرُو ࢽَیِرُو وُلْࢽْجَغَکِّ، ࢽَیِیَ ࢽُوࢽْجَکّْࢽِ،› یٜࢽُو؞
[13] تُو، ࢽَیِ یٜ ࢻَادَرُو دْغَیْوُو، دَلِلْࢽْجُدْ یِمْࢽْجُ بِ سَࢽْجُ ࢽُوࢽُوِّ ࢽَࢽْغَرُو؞
[14] «کُورُو ࢽُودُو بَرْغَا مَیْ سَمٜمَیٜ أَلَمَࢽْجُ کَمْ لَا بْلَوُرُو ثْدِ ثْࢽٜ وُولُودِیَࢽْجُوَ بُواْجٜ کْࢽْدَࢽْجُ مُکُّوࢽْجَرُو ثَکّْࢽَدْ غَیْ؞
[15] وُࢽْدُࢽْجَ یَیٜرُو کْلَ رَکْتُࢽْجُیٜࢽْ تَلَࢽْتِ کَیْࢽُو؞ کَمْ ࢻَلُّو أُوُ ثٜ، ࢻَلُّو یِࢽْدِ ثٜ، ࢻَلْ یٜرُو ࢻَلْ کَیْࢽُو؞ دَجِ بْلَوُرُورُو لٜىٰࢽُو؞
[16] سَدْمَࢽْ کَمْ تَلَࢽْتِ أُوُ ثْمُواْࢽَمَدْ لٜجٜ تَیِلَࢽْ سَوُرْ ثْدٜ رِوَ أُوُیٜ کِوَࢽْدُو؞
[17] کَمْ یِࢽْدِ ثْمُواْࢽَمَدْ یٜ أَدْغَیْ ثْدٜ رِوَ یِࢽْدِیٜ کِوَࢽْدُو؞
[18] أَمَّ کَمْ تَلَࢽْتِ ࢻَلْ ثْمُواْࢽَمَدْ لٜجٜ بْلَا لَجٜ وُرِ کْمَࢽْجُیٜ غْرَیٜࢽُو؞
[19] «ࢽغَوُو کَوُ کَدَیٜࢽْ کْمَ وُولُودِیَ أَࢽِیٜدْ بْلَوُرُوࢽْ کَدِࢽِّیَ، تَیِیَ بَلَسْ کٜدُو؞
[20] کَمْ تَلَࢽْتِ أُوُ ثْمُواْࢽَمَدْ إِسٜ غَدٜ أُوُ ثُوُدٜ تِرُو: ‹بَرْغَࢽْمِّࢽْ، تَلَࢽْتِ أُوُ سِمَّدْ، أَکُّو غَدٜ أُوُ رِوَرُو ࢻَࢽْدْکّْࢽَ،› یٜࢽُو؞
[21] کْمَࢽْجُیٜ تِرُو: ‹وُسٜ، وُولُودِ ࢽغْلَمَ، أَمَࢽْمَ! أَوُو غَࢽَࢽْ أَمَࢽْ دِمَّدْ، أَوُو ࢽغْوُ مُکُّوࢽْمْبُو یَکّْکِّ؞ أَرٜ کَلُّو کْجِ ࢻَࢽِّیُو!› یٜࢽُو؞
[22] کَمْ تَلَࢽْتِ یِࢽْدِ ثْمُواْࢽَمَدْ یٜ إِسٜ تِرُو: ‹بَرْغَࢽْمِّࢽْ، تَلَࢽْتِ یِࢽْدِ سِمَّدْ، أَکُّو غَدٜ یِࢽْدِ رِوَرُو ࢻَࢽْدْکّْࢽَ،› یٜࢽِّیَ،
[23] کْمَࢽْجُیٜ تِرُو: ‹وُسٜ، وُولُودِ ࢽغْلَمَ، أَمَࢽْمَ! أَوُو غَࢽَࢽْ أَمَࢽْ دِمَّدْ، أَوُو ࢽغْوُ مُکُّوࢽْمْبُو یَکّْکِّ؞ أَرٜ کَلُّو کْجِ ࢻَࢽِّیُو!› یٜࢽُو؞
[24] دَجِ کَمْ تَلَࢽْتِ ࢻَلْ ثْمُواْࢽَمَدْ یٜ إِسٜ تِرُو: ‹بَرْغَࢽْمِّࢽْ، ࢽِ کَمْ جَوْرُو ࢽُوکّْࢽَ؞ ࢽَ ࢽَدْمِّلَࢽْ کَلَࢽْمِ، کُورُو ࢽَ کَسُࢽِ ࢻِࢽْمِّلَࢽْ مُواْمِ ࢽَࢽْغَرُو،
[25] رِࢽْجْکّٜ لٜکّٜ بْلَا لَکّٜ وُرِࢽْمْدَ غْرَیٜکُّو؞ أَکُّو أَوُوࢽْمْ،› یٜࢽُو؞
[26] أَمَّ کْمَࢽْجُیٜ تِرُو: ‹ࢽِ وُولُودِ کْلَدُو، کَمْ بُووُیٜ! ࢽَ ࢽَدْکّْࢽِلَࢽْ کَلَࢽْکِّ، کُورُو ࢽَ کَسُࢽِ ࢻِࢽْکّْࢽِلَࢽْ مُواْکِّرُو ࢽُوࢽْمَّ، غْࢽَ؟
[27] ثَ وُرِࢽِدَ بَࢽْکِلَࢽْ غْࢽَࢽْمَّا، وَلْدُࢽِدْࢽْ وُرِࢽِ رِوَࢽْجُوَ مُواْکّْࢽَ؞
[28] تُو، تَلَࢽْتِ ࢻَلْدَ ࢽَࢽْجُࢽْ مُووُواْ، کَمْ ࢽَࢽْجُࢽْ مٜوُوَدْرُو یُواْ!
[29] وُࢽْدُ دُوُوࢽْ ࢽَࢽْجُࢽْ أَوُووَمَدْ، تِرُو ثَسَرْغَࢽٜ ࢽغْوُرُو وَلْجِ، أَمَّ کَمْ ࢽَࢽْجُࢽْ بَوُومَدْ، أَوُو ثْدَࢽَدْمَا تِلَࢽْ ثَمُویِ؞
[30] وُولُودِ ࢻَیْدَ بَوُووَ أَدَ دٜیَࢽْ ثُرُو دُوُ ثْلْمْ ࢻْتّٜرُو غْࢻْکْࢽُواْ، ࢽَدْࢽْ سُو یٜ تْدِ، شٜرِ یٜ ࢽَلْدِ،› یٜࢽُو؞
[31] «سَ تَدَ کَمْبٜدْ دَرَجَࢽْجُوَ مَلَیْیَوَ سَمَّࢽْ کُࢽْدٜࢽُّو وَلْدٜ إِسِیَ، کْلَ کُرِسْࢽْجُ کْرْمَیْیٜ دَرَجَایٜࢽْ ࢽَࢻْثِ؞
[32] جَمَ دُࢽِیَیٜ سَمَّ ࢻُوُࢽْجُࢽْ ثَࢻْتَیْ، جِرِ سْࢽِ دِمِیَا کَࢽِیَآ ࢻِرْجِدْ غَیْ، کَمْ کَمَࢽْجُوَا ࢻِرْجٜ تَیِیَ کْوُ یِࢽْدِرُو یَکْثِ؞
[33] دِمِیَدَ کْمْبُورَمْࢽْجُرُو ثَکِّ، کَࢽِیَدْ یٜیَ وَیْلَࢽْجُرُو؞
[34] دَجِ مَیْدْیٜ تَیِ کْمْبُورَمْࢽْجُیٜدْرُو: ‹ࢽَیِ بَوَࢽِ بَرْغَ دْمْࢽْجَاࢽَدْ، أَرُواْ ࢽُودُو بَرْغَا دُوُوࢽْ کَوُ دُࢽِیَ أَلَکْتْࢽَیٜࢽْ ࢽَیِرُو دَبَّرْغَادَدَ غَࢽْدُواْ!
[35] أَوُووَ کْࢽَࢽِیَ دُوُوࢽْ، أَوُو کْمْبُویٜ سٜوْ؞ ࢽغُدُࢽِیَ یٜࢽْ، أَوُو کْࢽْجَیٜ سٜوْ؞ وُ کُسُوتُّو یٜࢽْ، سِسَوُوْ؞
[36] کَجْمُࢽِ بَوُو یٜࢽْ، أَوُو جَکْتُیٜ سٜوْ؞ وُ دُوࢽْدِ یٜࢽْ، کِسّٜىٰوْ؞ کُوسُورُو سَسَکّْࢽَ یٜࢽْ، ࢽَࢽِرُو کَدِوْ،› ثْࢽِ؞
[37] دَجِ أَمْ جِرٜوُ أَࢽِیٜ تِرُو: ‹کْمَ، یِمْبِ ࢽِیَ کْࢽَࢽْمْبَ ࢽغِرُیْیٜ دُوُوࢽْ، أَوُو کْمْبُویٜ ࢽغٜیْیٜ؟ رَ، ࢽغُدُࢽْمْبَ دُوُوࢽْ، أَوُو کْࢽْجَیٜ ࢽغٜیْیٜ؟
[38] یِمْبِ کُسُوتُّورُو وَلْیٜمْ دُوُوࢽْ، ࢽجُرُیْیٜ ࢽِرُو کِسْکٜیْیٜ؟ رَ، کَجْمُࢽْمْ بَوُو دُوُوࢽْ، أَوُو جَکْتُیٜ ࢽغٜیْیٜ؟
[39] یِمْبِ ࢽِ دُوࢽْدِ بِ کُوسُولَࢽْ دُوُوࢽْ، ࢽجُرُیْیٜ ࢽَࢽْمْبُو کَدِیٜ؟› ثَࢽِ؞
[40] مَیْدْیٜ: ‹جِرٜمَرُو ࢽَیِرُو وُلْࢽْجَغَکِّ، سَوِ دُوُوࢽْ کْرَمِیَࢽِ أَࢽِیٜ غَࢽَࢽْجَرُو سٜرْ یِدُّوِیَ، وُمَرُو سِدُّوْ،› ثْࢽِ؞
[41] «دَجِ مَیْدْیٜ تَیِ وَیْلَࢽْجُیٜدْرُو: ‹ࢽَیِ بَسْکُوَدَدْ، ࢽَࢽِ کُولُّواْ کَࢽُّ تْمَّرُو ࢽُیْوَوُو إِوُلِیسَّ مَلَیْیَوَࢽْجُوَرُو دَبَّرْجَاࢽَدْرُو ࢽغَوُواْ!
[42] أَوُووَ کْࢽَࢽِیَ دُوُوࢽْ، أَوُو کْمْبُویٜ سِوِّ؞ ࢽغُدُࢽِیَ یٜࢽْ، أَوُو کْࢽْجَیٜ سِوِّ؞
[43] وُ کُسُوتُّو یٜࢽْ، سْسَاوِّ؞ کَجْمُࢽِ بَوُو یٜࢽْ، أَوُو جَکْتُیٜ سِوِّ؞ وُ دُوࢽْدِ یٜࢽْ، کُوسُولَࢽْ یٜࢽْ ࢽَࢽِرُو إِسُوِّ،› ثْࢽِ؞
[44] دَجِ تَیِ یٜ تِرُو: ‹کْمَ، یِمْبِ کْࢽَࢽْمْبَ ࢽِیَ ࢽغِرُیْیٜ؟ بِ ࢽغُدُࢽْمْبَ، بِ کُسُوتُّو، بِ کَجْمُࢽْمْ بَوُووَ، بِ دُوࢽْدِ، بِ کُوسُولَࢽْ دُوُوࢽْ، ࢽِیَ ࢽجُرُیْیٜ ࢽِرُو کِسْتُوُرُو وَیٜیْیٜ؟› ثَࢽِیَ،
[45] مَیْدْیٜ: ‹جِرٜمَرُو ࢽَیِرُو وُلْࢽْجَغَکِّ، سَوِ دُوُوࢽْ تَیِ أَࢽِیٜ غَࢽَࢽْجَرُو سٜرْ ࢽجْدُّورُو وَࢽُوِیَ، وُمَرُو ࢽجْدُّورُو وَࢽُوْ،› ثْࢽِ؞
[46] دَجِ تَیِدْ أَجَوُ سَوِسُویٜرُو ࢽغَسَیِ، أَمَّ جِرٜوُدْ رُو سَوِسُویٜرُو ࢽغَسَیِ،» یٜࢽُو عِیسَیٜ؞