[1] سَ أَدْࢽْ مَیْ حِرُدُسْ لَوَرْ عِیسَیٜ ࢻَࢽْغٜࢽِّیَ،
[2] کُواْࢽَوَࢽْجُسُورُو: «کَمْ أَدْ یَحْیـَى کَسَلَمَ، تِمَ رُووَرُو وَلْجٜ ثِجُو! أَدْمَ ࢽَࢽْغَرُو کْࢽْدُوُو أَوُو أَجَبَّ أَجَبَّ دِیُویٜ ࢽَࢽْجُࢽْ مبٜجِ،» یٜࢽُو؞
[3] ثَمَࢽْ کْلَ لَمَرْ یَ حِرُدِیَ کَمُ یَࢽْجُغْࢽَ مَیْ ࢻِلِبُسّٜࢽْ مَیْ حِرُدُسْ یَحْیـَىٰ ثْدَࢽٜ، ثٜکّٜرٜ کُوسُورُو کٜسَکُّو،
[4] دَلِلْࢽْجُدْ یَحْیـَیٜ مَیْ حِرُدُسُّو: «کَمُ یَࢽْمْغْࢽَیٜ مُواْدْ حَرَمْ!» ثْࢽَّ ࢽَࢽْغَرُو؞
[5] کُورُو مَیْ حِرُدُسْ یَحْیـَىٰ رُورُو ࢽجٜجُورُو مَجِ دُوُوࢽْ، جَمَدَ رِیٜࢽُو، تِیَ ࢽَوِرُو ࢽغُوجَࢽَ ࢽَࢽْغَرُو؞
[6] ࢽغَیْمَ دُوُوࢽْ سَاࢽدُرِ مَیْ حِرُدُسْ تَمْبْࢽَیٜ کِدْࢽِّیَ، ࢻٜرُو یَ حِرُدِیَیٜ إِسٜ ࢻُوُࢽْجَࢽْ بِکّٜ کِرَࢽْدُو؞ کَرْوُ مَیْدْیٜ جَوْرُو کْجِجٜ
[7] تِرُو أَوِ یَیٜ رُوࢽْجُ ثْرَاࢽَا ثِ ثْࢽٜ وَدُ ࢽغُوجٜ کَࢽْسِ غِوُو؞
[8] ࢻٜرُودْ یٜ لٜجٜ یَࢽْجُ تِرُو غَلَ ثٜ وَلْدٜ مَیْدْرُو: «وُرُو ࢽَ أَدْࢽْ کْلَ یَحْیـَى کَسَلَمَیٜ ثُرُو بُوُرُیٜࢽْ سٜ!» یٜࢽُو؞
[9] مَیْدْیٜ کَرْوُࢽْجُ جَوْرُو کُتُّ یَیٜ، کَࢽْسِ بُوࢽْجُوَ کُسُوتُّووَࢽْجُوَ ࢽَࢽْغَرُو وَدَ ثٜ
[10] أَمْࢽْجُ ثُࢽُودٜ لٜجَࢽٜ کُوسُولَࢽْ کْلَ یَحْیـَیٜ کَمْغٜرَ؞
[11] دَجِ کْلَࢽْجُدَ بُوُرُلَࢽْ ثَوُدٜ ࢻٜرُودْرُو کٜدُو، تِ یٜ ࢽغُوجٜ یَࢽْجُرُو کِکِّیَدُو؞
[12] ࢻُوُرَوَ یَحْیـَیٜ إِسَࢽٜ کَمِࢽّجُ ࢽغُوجَࢽٜ ثَادٜ سِتّْرَیٜرَ، کُورُو لٜجَࢽٜ عِیسَرُو لَوَرْ أَدَ وُلْیٜىٰرَ؞
[13] عِیسَى أَوُو وَکَّجْࢽَدَ ࢻَࢽْغٜࢽِّیَ، تِ رُࢽْجُ مَارَرُو ࢽغَیٜ ࢽَدَ کُولْجٜ کَرَا ࢽَ وُࢽْدُمَ بَوُورُو لٜىٰࢽُو؞ أَمَّ جَمَدْ أَدَ ࢻَࢽْغٜرَࢽِّیَ، تَیِ یٜ بْلَࢽْجَسُولَࢽْ ثَلُوٜ سِلَࢽْ عِیسَىٰ غٜیَ؞
[14] عِیسَى مَارَدْࢽْ جْࢻْکٜࢽِّیَ، جَمَ کَدَ ثَࢻْتَࢽَدَ ثُرٜ تَیِیَ ࢽجُࢽُوجٜ أَمْࢽْجَ دُوࢽْدِیَ إِسَࢽْغَیٜىٰࢽُو؞
[15] دُࢽِیَ لْمْغٜࢽِّیَ، ࢻُوُرَوَࢽْجُ إِسَࢽٜ تِرُو: «ࢽَ أَدْ کَرَا بُووُ، کُورُو دُࢽِیَ یٜ لْمْجْࢽَ؞ جَمَدَ سَلَمّٜ، بْلَدٜیَسُورُو لٜجَ أَوُو کْمْبُویٜ ثٜسِوُو!» یٜرَ؞
[16] أَمَّ عِیسَیٜ تَیِرُو: «أَعَ! سَیْ لٜجَیْیَ غْࢽِ، ࢽَیِمَ أَوُو کْمْبُویٜ تَیِرُو یُواْ!» یٜࢽُو؞
[17] تِرُو: «أَ! بُرُودِ أُوُوَ بُࢽِ یِࢽْدِیَ غْࢽِیَ، أَوِمَ غَدٜ تَیْیٜࢽْدٜ،» یٜرَ؞
[18] عِیسَیٜ: «وُرُو تَیِیَ سُکُّدُواْ!» ثْࢽٜ
[19] وَدَ ثٜ جَمَدْ کْلَ کَجِمْبٜࢽْ ࢽَࢻْثَ یٜࢽُو؞ دَجِ بُرُودِ أُوُدَ بُࢽِ یِࢽْدِدَ ࢽغُوجٜ کْلَ سَمٜرُو سَࢻْثٜ اللَّهرُو أَرْدِیٜࢽِّیَ، بُرُودِدَ ࢻْسَکْثٜ ࢻُوُرَوَࢽْجُرُو ثٜ، تَیِ یٜ جَمَدْرُو کٜدُو؞
[20] تَیِ سَمَّ جَوُࢽٜ کُلْیٜرَ؞ ࢻُوُرَوَدْ غَࢻْتُواْ سَمَّا ثَࢻْکٜرَࢽِّیَ، جُواْ مٜوُࢽْ یِࢽْدِࢽْ کٜسْمْبْرُو؞
[21] أَمْ دُوُوࢽْ کْمْبُو أَدَ جَوُࢽَدْ کَمُوَا تَدَوَا دَوُࢽْ بَوُورُو کُوࢽغوَ أَلَمَ دْوُ أُوُ غَیْ؞
[22] سَدْمَࢽْ عِیسَى ࢻُوُرَوَࢽْجُدَ ثَکّٜ تِࢽْ ࢻُوُࢽُّو بْرْمْدَ کُوجَ ثِ تُودْرُو لٜجَرُو مَارَرُو کَسَرْغَوُو، تِ یٜ جَمَدَ سَلَمْجِ یٜࢽُو؞
[23] تَیِیَ سَلَمْغٜࢽِّیَ، تِ رُࢽْجُ مُودُوَ دِیُورُو کْلَ کَوْ کُرُوُیٜرُو غِوَ؞ ࢽَدْࢽْ تِ تِلُوࢽْجُ لُوکْ دُوُوࢽْ، دُࢽِیَ لْمْغٜࢽُو؞
[24] کُورُو سَ أَدْلَࢽْ کَرُوَ دُࢽُووَ ثِجٜ إِࢽْغِ بْرْمْبٜدَ ثَمْبَلْجٜ مَارَدَ بَبَکْثٜ، حَرْ مَارَدْ ثِ إِࢽْغِیٜیَ کُرُوُࢽُّو لٜىٰࢽُو؞
[25] سَ یَکُّ بُࢽٜىٰࢽْ عِیسَى کْلَ إِࢽْغِیٜࢽْ سِلَࢽْ ࢽَࢽْجَرُو کَدِیُو؞
[26] ࢻُوُرَوَدْ عِیسَى کْلَ إِࢽْغِیٜࢽْ سِلَࢽْ لٜدُ ثْدِدَ کٜرُࢽِّیَ، کَرْوُࢽْجَ ࢻْتْ کَمْدٜ: «کَیْمٜ کَمْ ࢽُࢽَیٜ!» ثَࢽٜ رِدُرُو بُرْوُ کٜسَکُّو؞
[27] سَدْمَࢽْ عِیسَى تَیِرُو مَࢽَجِیٜ: «کَرْوُࢽْدُو غٜرُواْ، وُمَ! بَرٜ رِࢽُوِّ!» یٜࢽُو؞
[28] دَجِ بِتُرُسّٜ تِرُو: «کْمَ، ࢽِمَا، أَمَرْسْغْࢽٜ کْلَ إِࢽْغِیٜࢽْ ࢽَࢽْمْبُو إِسْکُّو،» یٜࢽُو؞
[29] عِیسَیٜ: «أَرٜ!» یٜࢽِّیَ، بِتُرُسْ ثُرُو مَارَدْیٜࢽْ ثُلُوٜ تِیَ ࢽَدُوُرُو کْلَ إِࢽْغِدْیٜࢽْ سِلَࢽْ لٜدُ بَدِیٜࢽُو؞
[30] أَمَّ کَرُوَ دُࢽُووَدَ کِرُࢽِّیَ، یَاجٜ تِیَ لْࢻْتُ بَدِیٜࢽُو؞ دَجِ کُواْ سَࢻْثٜ: «کْمَ، وُوَ سْمُویٜ!» یٜࢽُو؞
[31] سَدْمَࢽْ عِیسَى مُکُّوࢽْجُ سَجِیٜ تِیَ ثْدَࢽٜ: «ࢽِ کَمْبْرْسٜ غَࢽَادْ، أَوِرُو شٜکُّ کٜکّْمْ؟» یٜࢽُو؞
[32] دَجِ مَارَدْرُو کَسَرْغَاࢽِّیَ، کَرُوَدْ غْمْ ࢽْمْغٜࢽُو؞
[33] أَمْ ثُرُو مَارَدْیٜدْ عِیسَرُو أَمْبْثَّغَࢽٜ: «جِرٜمَرُو ࢽِ تَدَ اللَّهیٜ!» یٜرَ؞
[34] دَجِ بْرْمْدَ ࢻَلْجَࢽٜ کُویٜرَࢽِّیَ، ثِدِ غٜࢽٜسَرٜتّٜࢽْ جْࢻْکٜرَ؞
[35] أَمْ ࢽَدْیٜ عِیسَىٰ أَسُیٜرَࢽِّیَ، لَوَرْࢽْجُ ثِدِدْ ࢽغَرُو تَتَرْغَادَ؞ أَمْࢽْجَ دُوࢽْدِسُو سَمَّا ࢽَ عِیسَیٜرُو ثَوُدٜ
[36] ثِ کَلْوُࢽْجُیٜدْمَا لٜجَرُو تِیَ لُواْیٜرَ؞ أَمْ کَلْوُࢽْجُدَ لٜجَࢽَ سَمَّ ࢽغَیٜرَ؞