[1] یِمْ أَدْمَࢽْ عِیسَى ࢻَدُودْࢽْ ثُلُوٜ لٜجٜ ثِ بْرْمْبٜࢽْ ࢽَࢻْکٜࢽِّیَ،
[2] أَمْ کَدَ کَدَمِ ࢽَࢽْجُࢽْ ثَࢻْتَࢽٜ، حَرْ ثِجٜ مَارَرُو ࢽغَیٜ ࢽَࢻْکٜࢽُو؞ أَمْدْ سَمَّ یٜ ثِ بْرْمْبٜࢽْ دَجَࢽَ ࢽغَیْ دُوُوࢽْ،
[3] أَوُو کَدَ مِسَلْࢽِࢽْ تَیِرُو وُلْدُوُ بَدِیٜࢽُو؞ تِیٜ: «کَمْ لَا کُلُورُو أَلْغَمَ جْجْرْدُرُو کِلُوُو؞
[4] جْجْرْجِ ࢽغَیْ دُوُوࢽْ، کَسُࢽِ لَا جَوَلْࢽِࢽْ ࢻِیَدَ؞ دَجِ ࢽغُدُووَ إِسَࢽٜ ثُوتُّو غٜوُو؞
[5] کَسُࢽِ لَا یٜ ࢽَ کَوْ کَوْوَ کَتِّ ࢽغْوُ بَوُووَلَࢽْ ࢻِیَدَ؞ کَتِّ ࢽغْوُ بَوُودْرُو، سَدْمَࢽْ رِیٜࢽُو؞
[6] أَمَّ کْࢽْغَلْ سَمٜرُو تَتْکٜࢽِّیَ، کَوْسُ جَوْجٜ ࢻْرْدُ بَوُو ࢽَࢽْغَرُو رِمْجٜ ࢽغَمْغٜࢽُو؞
[7] کَسُࢽِ لَا یٜ ࢽَ ࢽغِوِیَࢽْ ࢻِیَدَ؞ ࢽغِوِدْ رِجٜ أَلْغَمَدَ کِمِتْکٜىٰࢽُو؞
[8] أَمَّ کَسُࢽِ لَادْ یٜ ࢽَ کَتِّ ࢽغْلَاࢽْ ࢻِیَدَࢽِّیَ، رِجٜ ࢽٜمَ کٜکُّو، لَا تَدَ مِیَ مِیَ، لَا ࢻِرَکُّ ࢻِرَکُّ، لَا ࢻِیَکُّ ࢻِیَکُّ؞
[9] کَمْ سْمُوࢽْجُوَمَدْ ࢻَࢽْجُو!» یٜࢽُو؞
[10] دَجِ ࢻُوُرَوَ عِیسَیٜ ࢽَࢽْجُرُو إِسَࢽٜ تِرُو: «أَوِ ࢽَࢽْغَرُو جَمَدْرُو مِسَلْࢽِࢽْ مَࢽَغْمِدْ؟» ثَࢽٜ تِیَ کٜوُورُو؞
[11] عِیسَیٜ: «ࢽَیِرُو أَسْرْ ࢽُودُو بَرْغَا مَیْ سَمٜمَیٜ ࢽُودُرُو أَمَرْدْغْࢽَ، أَمَّ تَیِرُو أَمَرْدْغْࢽِّ؞
[12] کَمْ ࢽَࢽْجُࢽْ أَوُووَمَدْ، تِرُو ثَسَرْغَࢽٜ ࢽغْوُرُو وَلْجِ، أَمَّ کَمْ ࢽَࢽْجُࢽْ بَوُومَدْ، أَوُو ثْدَࢽَدْمَا تِلَࢽْ ثَمُویِ؞
[13] أَکُّو دَلِلْ مِسَلْࢽِࢽْ تَیِرُو مَࢽَغْکِّدْ: ثَرُیْمَ، أَسُجَیْوَوُو؞ ࢻَࢽْجَیْمَ، ثَرِوَوُو، کْلَࢽْجَ یٜرُو ࢽغَیِوَوُو؞
[14] ࢽغَیْمَ کْلَࢽْجَࢽْ أَوُو کْمَࢽْدٜ کُرٜࢽْ ثِ ࢽَوِ إِشَیَیٜࢽْ وُلْجْࢽَدْ وَکَّجِ؞ تِیٜ: «‹ࢽغْلَرُو ࢻَࢽُّوِ دُوُوࢽْ، کْلَࢽْدُورُو تْمَّرُو ࢽغَیِوَوُو؞ کُورُو ࢽغْلَرُو رُوِ دُوُوࢽْ، تْمَّرُو أَسُࢽُوَّوُو؞
[15] أَوُووَ کَرْوُ جَمَ أَدْیٜدْ کِبَّجْࢽَ، کِیَدِّࢽْ سْمُوࢽْجَ ࢻَࢽْجَیْ، سِمْࢽْجَ یٜیَ جَکْثَࢽَ، بَرٜ سِمْࢽْجَࢽْ ثَرُࢽِّ، سْمُوࢽْجَࢽْ ࢻَࢽْجَࢽِّ، کُورُو کَرْوُࢽْجَࢽْ أَسُجَࢽِّرُو؞ ࢽغَیْ غْࢽِیَ، ࢽَࢽِرُو وَلْدَࢽٜ تُوَ ثَدٜ تَیِیَ إِسَࢽْغَغْکِّ،› ثْࢽَّ؞
[16] «أَمَّ سِمْࢽْدُو بَرْغَࢽْجَ، ثَرُیْ ࢽَࢽْغَرُو، سْمُوࢽْدُو یٜ، ࢻَࢽْجَیْ ࢽَࢽْغَرُو؞
[17] جِرٜمَرُو ࢽَیِرُو وُلْࢽْجَغَکِّ، کُرٜࢽْ ࢽَوِیَ سُو، جِرٜوُ سُو کَدَ أَوُو رُوَّدَ کُرُورُو جَوْرُو ثَرَاࢽَ، أَمَّ ثَرُࢽِّ؞ کُورُو أَوُو ࢻَࢽُّوَّدَ ࢻَࢽْدُرُو ثَرَاࢽَ، أَمَّ ࢻَࢽْجَࢽِّ؞
[18] «تُو، مَاࢽَ مِسَلْ کَسُࢽِ جْجْرْدُمَیٜدَ ࢻَࢽُّواْ!
[19] وُࢽْدُ دُوُوࢽْ مَࢽَ کْلَ ࢽُودُو بَرْغَادْیٜࢽْ ࢻَࢽْجٜ کْلَࢽْجُرُو ࢽغَاࢽِّمَدْ، کْلَدُودْ إِسٜ مَࢽَ کَرْوُࢽْجُࢽْ ࢻِدْࢽَدَ ثُوتُّو ثُتُّلُوِ؞ تِمَ کَسُࢽِ کْلَ جَوَلّٜࢽْ ࢻِدْࢽَدْ وُو؞
[20] کَسُࢽِ ࢽَ کَوْوَࢽْ ࢻِدْࢽَدْ یٜ، تِمَ کَمْ مَࢽَدَ ࢻَࢽْجِیَمَ، کَرْوُ کْجِیَرُو ثْمُویِدْ وُو؞
[21] أَمَّ تِلَࢽْ ࢻْرْدُ بَوُو ࢽَࢽْغَرُو، تُسِّوَوُو؞ کْلَ مَࢽَدْیٜࢽْ کُتُّ ثَیْیَ، بِ أَمْ تِیَ بَسَرْجَیْیَمَ، وَجٜ کُولْجِ؞
[22] کَسُࢽِ ࢽَ ࢽغِوِیَࢽْ ࢻِدْࢽَدْ یٜ، تِمَ کَمْ مَࢽَدَ ࢻَࢽْجْࢽَ دُوُوࢽْ، کَرْوُࢽْغَیْ دِیُو سُو، أَرْسِیے مَࢽْغَرْدُ سُو مَࢽَدَ کْࢻْثَࢽٜ تِرُو ࢻَیْدَجِیوَوُودْ وُو؞
[23] أَمَّ کَسُࢽِ ࢽَ کَتِّ ࢽغْلَاࢽْ ࢻِدْࢽَدْ، تِمَ کَمْ مَࢽَدَ ࢻَࢽْجٜ کْلَࢽْجُࢽْ رُوجْࢽَ تِرُو ࢻَیْدَجِیے، ࢽٜمَ لَا تَدَࢽْجُ مِیَ مِیَ، لَا ࢻِرَکُّ ࢻِرَکُّ، لَا ࢻِیَکُّ ࢻِیَکُّ ثَکِّدْ وُو،» یٜࢽُو؞
[24] عِیسَى تَیِرُو مِسَلْ غَدٜ یٜ وُلْجِیٜ: «ࢽُودُو بَرْغَا مَیْ سَمٜمَیٜدْ أَلَمَࢽْجُ کَمْ کُلُوࢽْجُࢽْ کَسُࢽِ أَلْغَمَیٜ ࢽغْلَ جْجْرْجْࢽَدْ غَیْ؞
[25] أَمَّ أَمْ سَمَّ کْࢽْمْ ثَدِ دُوُوࢽْ، کْلَدُوࢽْجُ إِسٜ ثُرُو أَلْغَمَدْیٜرُو کَسُࢽِ کَجِمْبٜ جْجْرْجِیٜ سَࢻْکَدَࢽْ؞
[26] أَلْغَمَدْ رِجٜ کْلَ ࢻِتْکٜࢽِّیَ، کَجِمْدْ یٜ أَسُدِرُو وَلْیٜࢽُو؞
[27] کِدَوُدْ إِسَࢽٜ بَࢽْجَ ࢽغِمْبَرُو: ‹بَرْغَࢽْمِّࢽْ، ࢽِ کَسُࢽِ أَلْغَمَیٜ ࢽغْلَ غْࢽَ کُلُوࢽْمْلَࢽْ جْجْرْࢽْمْ؟ تُو، ࢽدَیِلَࢽْ غْلٜ کَجِمْبَدْ؟› ثَࢽٜ تِیَ کٜوُورُو؞
[28] بَࢽْجَ ࢽغِمْبَیٜ تَیِرُو: ‹کْلَدُو لَا أَدَ ثْدُو!› یٜࢽُو؞ دَجِ کِدَوُدْیٜ تِرُو: ‹لٜࢽِیٜ تُلُوِیٜیَ، رَامَّ وَ؟› ثَࢽٜ کٜوُورْࢽِّیَ،
[29] تِیٜ: ‹أَعَ، لٜࢽُوٜ کَجِمْدَ تُلُوُوِیَ، أَلْغَمَدْ یٜیَ مْࢽْغُوِ؞
[30] کُولُّواْ، حَرْ کَلَرُو رُوکُّو رِجَ؞ بِیلَجِیَ، کَلَوُدْرُو کَجِمْدَ کَمْجَ کْلَ کْلَرُو ثٜکّٜرُو کَࢽُّࢽْ وَرْجَ دُوُوࢽْ، دَجِ أَلْغَمَدْ یٜیَ ثَࢻْثَ بْرَࢽِلَࢽْ غْࢽَجَ ࢽْکِّ،›» یٜࢽُو؞
[31] کُورُو عِیسَى وَلْدٜ تَیِرُو مِسَلْ غَدٜ وُلْجِیٜ: «ࢽُودُو بَرْغَا مَیْ سَمٜمَیٜدْ أَلَمَࢽْجُ کَسُࢽِ مُتَرّٜ کَمْ لَا ࢽغُوجٜ کُلُوࢽْجُلَࢽْ ࢻِجْࢽَ غَیْ؞
[32] کَسُࢽِ مُتَرّٜدْ، ثُرُو کَسُࢽِیَ سَمَّیٜࢽْ تِمَ تْࢽْغْرِ وُو؞ أَمَّ رِجٜ وُرَجِیَ، کْسْکَوَ جْرْوُلَࢽْ سَمَّرُو کُرَرُو وَلْجٜ، حَرْ ࢽغُدُوسُو دْلَمْبَࢽْجُࢽْ ࢻَࢽّجَ ثَدَࢽْدِ،» یٜࢽُو؞
[33] کُورُو وَلْدٜ تَیِرُو مِسَلْ غَدٜ وُلْجِیٜ: «ࢽُودُو بَرْغَا مَیْ سَمٜمَیٜدْ أَلَمَࢽْجُ یِسْ کَمُ لَا ࢽغُوجٜ رُࢽْغُو أَلْغَمَیٜ جَا یَکُّوَ کْلْجٜ دِجٜ، حَرْ ࢻُمْ ࢻُجْࢽَ غَیْ،» یٜࢽُو؞
[34] عِیسَى جَمَ ثَࢻْتَࢽَدْرُو أَوُو أَࢽِ سَمَّا مِسَلْࢽِࢽْ وُلْیٜىٰࢽُو؞ مِسَلْࢽِࢽْ غْࢽِیَ، أَوِمَ تَیِرُو وُلْجْغْࢽَ بَوُو؞
[35] أَدْغَیْمَ أَوُو کْمَࢽْدٜ کُرٜࢽْ ثِ ࢽَوِیٜࢽْ وُلْجْࢽَدْ وَکَّیٜࢽُو؞ تِیٜ: «مِسَلْࢽِࢽْ مَࢽَࢽْکِّ، أَوُووَ تْࢽْ دُࢽِیَ أَلَکْتْࢽَمَࢽْ غْرَادَدَ وُلّْکِّ،» ثْࢽَّ؞
[36] دَجِ عِیسَى جَمَدَ کُولْجٜ ࢻَدُودْرُو کَسَرْغَوُو؞ ࢻُوُرَوَࢽْجُ یٜ ࢽَࢽْجُرُو إِسَࢽٜ تِرُو: «مَرْࢽٜ، أَࢽْدِرُو مَاࢽَ مِسَلْ کَجِمْ کُلُویٜدَ ࢻِسَرْسَغَࢽٜ،» یٜرَ؞
[37] عِیسَیٜ تَیِرُو: «کَمْ کَسُࢽِ ࢽغْلَ جْجْرْجْࢽَمَدْ، تِمَ تَدَ کَمْبٜدْ وُو،
[38] کُلُودْ دُࢽِیَ، کَسُࢽِ ࢽغْلَدْ أَمْ ࢽُودُو بَرْغَادَ کَسَثَّࢽَدْ؞ کَجِمْدْ أَمْ کْلَدُودَ جَاࢽَدْ،
[39] کْلَدُو کَجِمْدَ جْجْرْجْࢽَمَدْ إِوُلِیسْ؞ بِیلَدْ ثِࢽُواْ دُࢽِیَیٜ، کَلَوُسُودْ مَلَیْیَوَ؞
[40] جِرِ کَجِمْدَ ثَࢻْثَࢽٜ کَࢽُّࢽْ وَرْجَیْدْ غَیْ، دُࢽِیَ ثِجِیَ، أَدْغَیْ وَکَّجِ؞
[41] تَدَ کَمْبٜدْ مَلَیْیَوَࢽْجُوَ جُوَجٜ لٜجَࢽٜ ثُرُو ࢽُودُوࢽْجُ بَرْغَایٜࢽْ أَمْ أَمْ غَدٜیَ ثَسَکّٜ بِوُ ثَدِسُووَ أَمْ دِوِ ثَدِسُووَ سَمَّا ثَࢻْثَࢽٜ
[42] کَࢽُّرُو ࢻِجَغَیْ؞ ࢽَدْࢽْ سُو یٜ تْدِ، شٜرِ یٜ ࢽَلْدِ؞
[43] دَجِ جِرٜوُدْ ثُرُو ࢽُودُو بَرْغَا بَوَࢽْجَیٜࢽْ کْࢽْغَلْ غَیْرُو ࢽُرَّرُو وَلْجَیْ؞ کَمْ سْمُوࢽْجُوَمَدْ ࢻَࢽْجُو!
[44] «ࢽُودُو بَرْغَا مَیْ سَمٜمَیٜدْ أَلَمَࢽْجُ أَوُو لَا جَوْمَرُو تَمَࢽَّ کُلُولَࢽْ رْࢻْکَدَ غَیْ؞ کَمْ تِیَ ثُوَࢽْدِیَ، ثَیٜ غَیْرُو رْࢻْثٜ کَرْوُ کْجِیَرُو لٜجٜ کْࢽْدَࢽْجُ سَمَّا ثْلَدٜ کُلُودَ ثِوِ؞
[45] «کُورُو ࢽُودُو بَرْغَا مَیْ سَمٜمَیٜدْ أَلَمَࢽْجُ سَوُرْمَ لَا مُرْسَمْ ࢽغْلَ مَجِ غَیْ؞
[46] مُرْسَمْ جَوْرُو تَمَࢽَّ لَا ثُوَࢽْدِیَ، لٜجٜ کْࢽْدَࢽْجُ سَمَّا ثْلَدٜ مُرْسَمْدَ ثِوِ؞
[47] «کُورُو ࢽُودُو بَرْغَا مَیْ سَمٜمَیٜدْ أَلَمَࢽْجُ بُࢽِ تَرَمْ لَا بُࢽِ تَوُ تِیَ بْرْمْبُو غْࢻْثَغَࢽٜ بُࢽِ جِرِ جِرِ ثَدَیْ غَیْ؞
[48] ثْمْبْرْࢽَرُو وَلْجِیَ، غْرْجَࢽٜ ثِ بْرْمْبٜرُو ثَوُدٜ ࢽَࢻْثَࢽٜ ࢽغْلَ ࢽغْلَدَ کْرٜجَࢽٜ جُواْرُو ࢻِجَغَیْ، أَمَّ بَتِّ بَتِّدَ وَجَࢽٜ یِرْجَیْ؞
[49] دُࢽِیَ ثِجِیَ، أَدْغَیْمَ وَکَّجِ؞ مَلَیْیَوَ إِسَࢽٜ جِرٜࢽَمْبُوُوَ ثُرُو جِرٜوُیٜࢽْ ࢻِرْجَࢽٜ
[50] کَࢽُّرُو ࢻِجَغَیْ؞ ࢽَدْࢽْ سُو یٜ تْدِ، شٜرِ یٜ ࢽَلْدِ،» یٜࢽُو؞
[51] عِیسَیٜ ࢻُوُرَوَࢽْجُرُو: «أَوُو أَࢽِ سَمَّ کْلَࢽْدُورُو ࢽغَاࢽَ وَ؟» ثْࢽٜ تَیِیَ کِوُورْࢽِّیَ، تِرُو: «آه،» یٜرَ؞
[52] دَجِ تَیِرُو: «أَدْغَیْمَ مَلْمْ أَتَّوْرَیٜ ࢻِ یَیٜ ࢻُوُرَ ࢽُودُو بَرْغَا مَیْ سَمٜمَیٜدْرُو وَلْجْࢽَدْ أَلَمَࢽْجُ کْمَ ࢻَدُویٜ أَجَرَمْࢽْجُࢽْ لْمَࢽْ دِࢽَا بْرِࢽَّ ࢽغُوجٜ ثُتُّلُوِدْ غَیْ،» یٜࢽُو عِیسَیٜ؞
[53] عِیسَى مِسَلْ أَࢽِیَ ثْدٜ کٜرْࢽِّیَ، ࢽَدَ کُولْیٜࢽُو؞
[54] بْلَ وُرَجْࢽَدْرُو لٜجٜ دَࢽْدَلْࢽْجَࢽْ جَمَا أَلَمْدُ بَدِیٜࢽُو؞ أَمْدْ تِیَ أَجَࢻْثَࢽٜ: «ࢽدَرَࢽْ کَمْ أَتّْ ࢽَࢽْرَشِدُوَ کْࢽْدُوُووَ أَࢽِیَ کِوَࢽْدُو؟
[55] تِ غْࢽَ تَدَ کَتَکُو کَرُومَدْیٜ وُو؟ یَࢽْجُیٜ ثُࢽْجُدْ مَرْیَمْ، غْࢽَ؟ یَࢽْجُغْࢽَسُودْ یٜ یَعْࢼُوبَا یُوسُࢻُوَ سِمَࢽَّ یَحُسَا، غْࢽَ؟
[56] کُورُو یَࢽْجُغْࢽَوَ ࢻٜرُووَ سَمَّا رُوکُّو کْرْغَیْیٜ، غْࢽَ؟ تُو، ࢽدَرَࢽْ غْلٜ تِ أَدْ أَوُو أَࢽِ سَمَّا کِوَࢽْدُو؟» ثَࢽٜ
[57] تِیَ کَسَتُّرُو وَیٜرَ؞ أَمَّ عِیسَیٜ تَیِرُو: «ࢽَوِ ثُرُو بْلَࢽْجَیٜیَ أَمْ ࢻَࢽّجَیٜیَرُو کَجِیَ، دَرَجَࢽْجُوَ،» یٜࢽُو؞
[58] کَمْبْرْسٜࢽَمْبُࢽْجَ ࢽَࢽْغَرُو، ࢽَدْࢽْ أَوُو أَجَبَّ ࢽغْوُ ثْدْࢽِّ؞