[1] أَکُّو بَدِدُرَمْ کَوُرِ کْجِ عِیسَى أَلْمَسِیوُ تَدَ اللَّهیٜدْ؞
[2] کُرٜࢽْ ثُرُو کِتَوُ ࢽَوِ إِشَیَیٜࢽْ رُوُوَدَدْ غَیْ: «ࢽِࢽْ ࢻُوُࢽُّو کْࢽْغَیَمِّ ࢽُودْکّٜ، جَوَلْࢽْمْ ثَسَّیْ؞
[3] تِدْ کَمْ لَا کَرَاࢽْ کُواْ سَࢻْثٜ: ‹کْمَࢽْدٜرُو جَوَلْ دَبَّرْغْࢽُواْ، کُودُرَمْࢽْجُ ثْکُّو دٜوُو!› ثْࢽٜ مَوُوجِ؞»
[4] ࢽَوِ یَحْیـَى کَسَلَمَ ࢻْلٜدِیٜ کَرَاࢽْ جَمَرُو کَوُرِ کَسَلَ تُوَیٜ بِوُوَ غَوُرْدُیٜ ثْدِّ کْرْغَ؞
[5] أَدْغَیْمَ أَمْ لَرْدُ یَحُدِیَیٜیَ بْرْࢽِ جٜرُجَلٜمْبٜیَ سَمَّ ࢽَࢽْجُرُو إِسَࢽٜ بِوُࢽْجَ وُلْجَࢽٜ ثُرُو بْرْمْ جُورْدَࢽِیٜࢽْ تَیِرُو کَسَلَ تُوَیٜ کِدُّو؞
[6] یَحْیـَیٜ کَجْمُࢽْجُدْ کَࢽْدُرِ کَرِمُویٜࢽْ ثَآدَ، ثَࢽْجَࢽْجُ یٜ ࢽغِرِࢽْ تِکّٜرْࢽَ؞ کْمْبُوࢽْجُ یٜ کَوِیَ کْمَغْࢽَّ؞
[7] جَمَرُو کَوُرِ ثْدّٜ: «کَمْ لَا وُوَ کْࢽْدُوُوࢽْ کُوسْࢽَ جٜ سُࢽُوࢽْجُیٜ ࢽغُࢽْمٜ وُیْدُمَ تِکّْࢽِ ࢽغَوُوࢽِࢽْ إِسِ؞
[8] وُدْ إِࢽْغِلَࢽْ ࢽَیِرُو کَسَلَ ࢽغٜدّْکُّو، أَمَّ تِدْ رُحُ اللَّهیٜلَࢽْ ࢽَیِرُو کَسَلَ ࢽجَدِّ،» یٜࢽُو؞
[9] یِمْ أَࢽِࢽْ عِیسَى بْلَ ࢽَجَرَتْ ثِدِ غَلِلٜىٰدْࢽْ ثِجٜ بْرْمْ جُورْدَࢽِیٜرُو إِسٜ ࢽَوِ یَحْیـَى تِرُو کَسَلَ کِدُّو؞
[10] عِیسَى إِࢽْغِدْلَࢽْ کِلُوُࢽِّیَمَ، سَمٜ ࢻَرَکُّو ࢻْرْمْدٜ رُحُ اللَّهیٜ أَلَمَ بُلَّمْ غَیْ تِرُو جْࢻْثِیے کِرُو؞
[11] کُورُو سَمٜلَࢽْ کُواْ ࢽُکْثٜ: «ࢽِمَ تَدَࢽِ وُو، ࢽجْرَاکّْࢽَ؞ ࢽِرَمْࢽِࢽْ جَوْرُو کَرْوُࢽِ کْجِجْࢽَ!» یٜࢽُو؞
[12] سَدْمَࢽْ رُحُ اللَّهیٜدْ تِیَ ثَکّٜ کَرَا دْرِرُو کِلُوُو؞
[13] کَرَادْࢽْ کَوُ ࢻِدٜوُرُو إِوُلِیسْ تِیَ جَرَࢻْثِ کْرْغَ؞ تِ بُࢽْدِیَ کَرَایٜیَ رُوکُّو، مَلَیْیَوَ یٜ تِرُو کِسَّغَیْ؞
[14] ࢽغَوُو ࢽَوِ یَحْیـَىٰ کُوسُورُو ثَسَکّْࢽَیٜࢽْ، عِیسَى ثِدِ غَلِلٜىٰرُو وَلْدٜ جَمَرُو کَوُرِ کْجِ اللَّهیٜ وُلْدُوُ بَدِیٜࢽُو؞
[15] تِیٜ: «سَدْ ثْدْࢽَ، ࢽُودُو بَرْغَا اللَّهیٜ دٜلْ کَرْࢽْجْࢽَ! تْمُّواْ، کَوُرِ کْجِ اللَّهیٜدَ کَسَدُّواْ!» یٜࢽُو؞
[16] یِمْ لَا عِیسَى ثِ بْرْمْ غَلِلٜىٰیَ جْغَیْ دُوُوࢽْ، سِمَࢽَّ یَࢽْجُغْࢽَ أَࢽْدَرَوُسَّ بُࢽِ تَرَمْࢽْجَ بْرْمْدْرُو ࢻِجَغَیْ کِرُو؞ تَیِدْ بُࢽِ تَوُ؞
[17] عِیسَیٜ تَیِرُو: «أَرُواْ وُوَ سْغَیْوُو، ࢽَیِیَ کَمْ تَوُرُو ࢽجَدْکِّ،» یٜࢽُو؞
[18] سَدْمَࢽْ بُࢽِ تَرَمْࢽْجَ کُولْجَࢽٜ تِیَ غٜیَ؞
[19] کُورُو غَࢽَ ࢻُوُیٜࢽِّیَ، یَعْࢼُوبَ تَدَ جَبَدِیٜیَ یَࢽْجُغْࢽَ یَحْیـَىٰ ثُرُو مَارَیٜࢽْ بُࢽِ تَرَمْࢽْجَ ثَاسَّیْ کِرُو؞
[20] سَدْمَࢽْ تَیِیَ بُواْجٜ ثِجَࢽٜ بَوَࢽْجَ جَبَدِیَ کِدَوُࢽْجُوَا ثُرُو مَارَدْیٜࢽْ کُولْجَࢽٜ تِیَ غٜیَ؞
[21] دَجِ عِیسَىٰ ࢻُوُرَوَࢽْجُوَ بْرْࢽِ کَࢻَرْࢽَامبٜرُو کَدِرَ؞ یِمْ تُسْتُیٜ کِدْࢽِّیَمَ، عِیسَى دَࢽْدَلُّو ࢽغَیٜ جَمَا أَلَمْدُ بَدِیٜࢽُو؞
[22] جَمَدْ أَلَمْدُࢽْجُدَ أَجَࢻْکٜرَ، دَلِلْࢽْجُدْ أَلَمْدُࢽْجُدْ مَلْمْبَ أَتَّوْرَیٜدْ غَیْ غْࢽِ، کْࢽْدُوُووَرُو مَࢽَجِ ࢽَࢽْغَرُو؞
[23] سَ أَدْࢽْ ثُرُو دَࢽْدَلْࢽْجَدْیٜࢽْ کَرُوَمَ لَا بُرْوُ ثَکّٜ:
[24] «أَ! أَوِ لَمْبُوࢽْمْ أَࢽْدِرُو، عِیسَى کَمْ ࢽَجَرَتّٜ؟ أَࢽْدِیَ سِدُوُرُو وَ کَدِمْ؟ ࢽِیَ أَسُࢽْجْکّْࢽَ، ࢽِمَ تَیِرْ اللَّهیٜدْ وُو!» یٜࢽُو؞
[25] أَمَّ عِیسَى سٜدَࢽْدْرُو جْکَّدٜ مَࢽَ دَࢻْثِیٜ: «ثِࢽْمْ جَࢽْغٜ کَمْدَ کُولّٜ لُوٜ!» یٜࢽُو؞
[26] دَجِ سٜدَࢽْدْ بُرْوُ دُࢽُووَ ثَکّٜ کَمْدَ جْجْکْثٜ کُولْجٜ کِلُوُو؞
[27] تَیِ سَمَّ أَجَࢻْثَࢽٜ أَمَࢽْجَرُو: «أَتّْ أَوِ؟ أَلَمْدُ جِرِ بْرِࢽْ، دِیٜ! کْࢽْدُوُووَرُو سٜدَࢽْسُورُو وَدَ ثِیَ، جَغَیْ!» ثَࢽِ؞
[28] سَدْمَࢽْ لَوَرْ عِیسَیٜ ثِدِ غَلِلٜىٰ ࢽغَرُو تَتَرْغَادَ؞
[29] دَࢽْدَلْدْࢽْ کٜلُوُࢽِّیَمَ، عِیسَىٰ یَعْࢼُوبَا یَحْیـَىٰ رُوکُّو ࢻَدُو سِمَࢽّٜیَ أَࢽْدَرَوُسّٜیَرُو لٜىٰرَ؞
[30] یَ کْسَیْ سِمَࢽّٜدْ دُوࢽْدِ بُووَدَ، کَࢽْغٜ تِیَ ثْدَࢽَ؞ دَجِ عِیسَرُو لَوَرْࢽْجُ وُلْیٜىٰرَࢽِّیَ،
[31] ࢽَࢽْجُرُو لٜجٜ مُکُّوࢽْجُ ثْدَࢽٜ تِیَ کِسَࢽْغُو؞ کَࢽْغٜدْ تِیَ کُولْجٜ، تِ یٜ تَیِیَ سُوسَدُ بَدِیٜࢽُو؞
[32] یِمْ أَدَ کْࢽْغَلْ کِکُّرْࢽِّیَ، أَمْ دُوࢽْدِیَ کَرُوَمَسُووَ سَمَّا ࢽَ عِیسَیٜرُو کٜوُدُو؞
[33] أَمْ بْرْࢽِدْیٜ سَمَّ ثِ ࢻَدُودْیٜࢽْ ثَࢻْتَࢽَ دُوُوࢽْ،
[34] عِیسَى أَمْ کَدَ کَسُوَ جِرِ جِرِیَ إِسَࢽْغَیٜىٰࢽُو، کُورُو سٜدَࢽَّ کَدَ دُیٜࢽُو؞ أَمَّ سٜدَࢽَّدْرُو مَࢽَدُ أَمَرْجْغْࢽِّ، تِ وُࢽْدُرُو ࢽُوجَࢽَ ࢽَࢽْغَرُو؞
[35] وَجْࢽَࢽْجُوَ سُوَ لْࢻْ عِیسَى تَوَجٜ ثُلُوٜ ࢽَ وُࢽْدُمَ بَوُورُو لٜجٜ ࢽَدْࢽْ مُودُوَ کِدُو؞
[36] سِمَࢽَّ أَمَࢽْجُوَ یٜ تِیَ مَدَرُو کٜلُوُو؞
[37] کٜوَࢽْدْࢽِّیَ، تِرُو: «أَمْ سَمَّ ࢽِیَ مَࢽْجَیْ،» یٜرَ؞
[38] عِیسَیٜ تَیِرُو: «بْلَوَ غَدٜرُو لٜࢽِیُو، أَمْࢽْجَ یٜرُو مَࢽَ اللَّهیٜ یِدّْکُّو! أَدْمَ ࢽَࢽْغَرُو کَدِکُّو،» یٜࢽُو؞
[39] أَدْغَیْمَ عِیسَى بْلَ بْلَرُو لٜجٜ دَࢽْدَلْࢽْجَࢽْ أَمْبُو مَࢽَ اللَّهیٜ وُلْجِیے، سٜدَࢽَّ یٜ دُجِ ࢽغَیْ دُوُوࢽْ، ثِدِ غَلِلٜىٰ سَمَّا دِرِیٜࢽُو؞
[40] کَمْ بَرَسُوَ لَا ࢽَ عِیسَیٜرُو إِسٜ تُࢽْغُرُمْجٜ تِیَ لُواْجٜ: «رَامَّا، رَࢽْغْمٜ وُوَ إِسَࢽْغَسْغْمٜ تَیِرُّو وَلّْکِّ،» یٜࢽُو؞
[41] عِیسَى کَمْدَ ࢽجُࢽُوجٜ مُکُّو سَجِیٜ تِیَ لٜجٜ: «رَاکّْࢽَ، تَیِرُّو وَلّٜ!» یٜࢽُو؞
[42] سَدْمَࢽْ بَرَسُدْ تِیَ کُولْجٜ تَیِرُّو وَلْیٜࢽُو؞
[43] دَجِ عِیسَى تِرُو مَرْمَرٜیَ ثْدّٜ تِیَ سَلَمْغٜࢽُو؞
[44] تِرُو: «بَرٜ أَوِمَ وُࢽْدُمَرُو وُلْغْمِّ، أَمَّ لٜࢽٜ رِمَࢽْدْرُو ࢻْلٜدْغْࢽٜ؞ تَیِرُّو وَلّْمَّدْ، سَدَا ࢽَوِ مُوسَى وُلْجْࢽَدَ دٜ، جَمَرُو شٜدَرُو وَلْجُو!» یٜࢽُو؞
[45] أَدْ یَیٜ کَمْدْ لٜجٜ ࢽغْوُرُو مَࢽَجٜ لَوَرْدَ ࢽدَرَسُورُو تَتَرْیٜىٰࢽُو، حَرْ عِیسَى بْلَ ࢻِمَرُو رَکْثٜ ࢻٜدٜرُو ࢽغَیِوَوُو، سَیْ کَرَا وُࢽْدُمَ بَوُولَࢽْ دْغَیْ؞ کُورُو جَمَ ࢽدَرَسُوࢽْ یَیٜ ࢽَࢽْجُرُو إِسَیْ؞