[1] ࢽغَوُو أَدْیٜࢽْ کَوُ أَرَکُّوَ عِیسَى ثِجٜ بِتُرُسَّ یَعْࢼُوبَا یَࢽْجُغْࢽَ یَحْیـَىٰ رُࢽْجَا ࢽغُوجٜ کْلَ کَوْ کُرُوُ لَایٜرُو غٜوَ؞
[2] ࢻُوُࢽْجَࢽْ عِیسَیٜ أَلَمَࢽْجُ ࢻَلْدٜ ࢻْکَّࢽْجُ کْࢽْغَلْ غَیْ تَیْ دَجٜ یِیلْیٜࢽُو، کُورُو کَجْمُࢽْجُ یٜ ࢽُرْ غَیْ بُلْ ࢻُوکُّو وَلْیٜࢽُو؞
[3] سَدْمَࢽْ ࢽَوِ مُوسَىٰ ࢽَوِ إِلْیَا تَیِرُو ࢻْلٜدَغَࢽٜ عِیسَىٰ جَࢽْدٜدُ بَدِیٜرَ؞
[4] دَجِ بِتُرُسّٜ عِیسَرُو: «کْمَ، أَࢽْدِ ࢽَ أَدْࢽْ مبٜجِدْ جَوْرُو ࢽغْلَ؞ رَامَّا، ࢽغُرْوُو یَکُّ ࢽَ أَدْࢽْ لَمّْکِّ: ࢻَلْ کَاࢽْمْ، ࢻَلْ ࢽَوِ مُوسَیٜ، ࢻَلْ یٜ ࢽَوِ إِلْیَیٜ،» یٜࢽُو؞
[5] مَࢽَجِ ࢽغَیْ دُوُوࢽْ، ࢻُوࢻُووْ ࢽُرَّ إِسٜ تَیِیَ جَکّٜࢽُو؞ ثُرُو ࢻُوࢻُووْدْیٜࢽْ کُواْ ࢽُکْثٜ: «أَدْمَ تَدَࢽِ وُو، تِیَ جَوْرُو رَاکّْࢽَ؞ تِمَ کَرْوُࢽِ جَوْرُو کْجِجُوُو؞ مَࢽَࢽْجُ ࢻَࢽُّواْ!» یٜࢽُو؞
[6] أَدَ ࢻَࢽْغٜرَࢽِّیَ، ࢻُوُرَوَدْ ࢻْدْرْیٜرُو رْبْتْ تْمْدَࢽٜ کَرْوُࢽْجَ تَیْ دَجٜ کَمْغَدَ؞
[7] أَمَّ عِیسَى إِسٜ تَیِیَ لٜجٜ: «ثِࢽُواْ، بَرٜ رِࢽُوِّ!» یٜࢽُو؞
[8] کْلَ سَࢻْکٜرَࢽِّیَ، عِیسَى تِلُوࢽْجُ لُوࢽْ غْࢽِیَ، وُࢽْدُمَا ثَرُࢽِّ؞
[9] کْلَ کَوْدْیٜࢽْ جْࢻْثَیْ دُوُوࢽْ، عِیسَیٜ تَیِرُو وَدَ ثٜ: «بَرٜ أَوُو رُوَّ أَدَ وُࢽْدُمَرُو وُلْغْوِّ، سَیْ تَدَ کَمْبٜدْ کَرْمُولَࢽْ ثِجِیَ دُوُوࢽْ،» یٜࢽُو؞
[10] دَجِ ࢻُوُرَوَدْیٜ تِرُو: «أَوِرُو غْلٜ مَلْمْبَ أَتَّوْرَیٜدْ سَیْ ࢽَوِ إِلْیَ بُرْوُوجٜ إِسِ ثَࢽِدْ؟» ثَࢽٜ تِیَ کٜوُورُو؞
[11] عِیسَیٜ تَیِرُو: «جِرٜمَرُو ࢽَوِ إِلْیَ إِسٜ أَوِسُو کَلْکَلُّو کَلَکْثِ؞
[12] أَمَّ ࢽَیِرُو وُلْࢽْجَغَکِّ، ࢽَوِ إِلْیَ إِسْࢽَ دُوُوࢽْ، تِیَ أَسُجَࢽِّ، کُورُو أَوِسُو کُتُّ رُوࢽْجَ ثْرَاࢽَا تِرُو کٜدُّو؞ أَدْغَیْمَ تَدَ کَمْبٜدْ یٜ مُکُّوࢽْجَࢽْ کُتُّ ثَیْ،» یٜࢽُو؞
[13] دَجِ ࢻُوُرَوَدْ کْلَ یَحْیـَى کَسَلَمَیٜࢽْ تَیِرُو مَࢽَ ثْدِّرُو أَسُیٜرَ؞
[14] ࢽَ جَمَ ثَࢻْتَࢽَدْرُو کَدِرَࢽِّیَ، کَمْ لَا إِسٜ ࢻُوُ عِیسَیٜࢽْ تُࢽْغُرُمْجٜ
[15] تِرُو: «کْمَ، تَدَࢽِیَ ࢽجُࢽُوࢽٜ! تِ سٜدَࢽْ کُورُویٜیَ جَوْرُو سُوُولْجْࢽَ، کُورُو ࢽغْوُرُو کَࢽُّ سُو، إِࢽْغِ سُورُو ثُکُّرْࢽَ؞
[16] ࢻُوُرَوَࢽْمْبُو تِیَ کِکِّیَدْکّْࢽِیَ، تِیَ إِسَࢽْغَدُوُ تَیِرُو کَتْکٜرُو،» یٜࢽُو؞
[17] عِیسَیٜ تَیِرُو: «ࢽَیِ أَمْ جَمَࢽْ أَدْیٜسُو کَمْبْرْسٜࢽَمْبُوُ کَرْوُ یٜسْکَدَا، حَرْ سَوِ غَیْرُو دَوُࢽْدُوࢽْ دْغَکِّ؟ کُورُو سَوِ غَیْرُو ࢽَیِیَ رَࢽّجَکِّ؟ تَدَدَ وُرُو سُکُّدُواْ!» یٜࢽُو؞
[18] عِیسَى سٜدَࢽْدْرُو کِکَّدْࢽِّیَ، تَدَدَ کُولْجٜ ثُلُوٜ سَدْمَࢽْ ࢽغَیٜࢽُو؞
[19] دَجِ ࢻُوُرَوَدْ ࢽَ عِیسَیٜرُو إِسَࢽٜ رُࢽْجَࢽْ تِرُو: «أَوِرُو سٜدَࢽْدَ دُدَ أَࢽْدِرُو کَتْکٜرُو؟» ثَࢽٜ تِیَ کٜوُورُو؞
[20] عِیسَیٜ تَیِرُو: «کَمْبْرْسٜࢽْدُو غَࢽَ ࢽَࢽْغَرُو؞ جِرٜمَرُو ࢽَیِرُو وُلْࢽْجَغَکِّ، ثَ کَمْبْرْسٜࢽْدُو مبٜجِیَ، کَسُࢽِ مُتَرّٜ غَیْ یَیٜ، کَوْ کُرُوُ أَدْرُو: ‹ثِࢽٜ ࢽَ تُودْرُو لٜࢽٜ!› وُلُّوِیَ، ثِجٜ لٜجِ؞ أَوِمَ ࢽَیِرُو تِیٜرِ بَوُو!
[21] [أَمَّ سٜدَࢽْ جِرِ أَدْیٜدْ ثُلُوِوَوُو، سَیْ مُودُوَ دِوٜ أَسٜمْ تَوِیَ دُوُوࢽْ؞]»
[22] ࢻُوُرَوَࢽْجُ ثِدِ غَلِلٜىٰلَࢽْ ثَࢻْکَدَرَࢽِّیَ، عِیسَیٜ تَیِرُو: «تَدَ کَمْبٜدَ مُکُّو أَمْبٜرُو سْرْثَّغَࢽٜ
[23] تِیَ رُورُو ثٜىٰسِ، کُورُو کَوُ یَکُّوَ رُووَرُو وَلْجٜ ثِجِ،» یٜࢽُو؞ دَجِ ࢻُوُرَوَدْ کَرْوُࢽْجَ جَوْرُو کُتَّیٜࢽُو؞
[24] بْرْࢽِ کَࢻَرْࢽَامبٜرُو کَدِرَࢽِّیَ، أَکِّ ࢻَدُو اللَّهیٜ مُواْمَسُو ࢽَ بِتُرُسّٜرُو إِسَࢽٜ تِرُو: «مَلْمْࢽْدُودْ أَکِّ ࢻَدُو اللَّهیٜدَ بِیَجِوَوُو وَ؟» ثَࢽٜ تِیَ کٜوُورُو؞
[25] بِتُرُسّٜ: «أَعَ، بِیَجِ،» یٜࢽُو؞ ࢻَدُورُو کَدِࢽِّیَ، عِیسَیٜ بُرْوُوࢽْ تِرُو: «سِمَࢽْ، أَوِ تْمَࢽْمْ؟ ࢽَ وُࢽْدُسُویٜࢽْ مَیْیَ دُࢽِیَیٜسُودْ أَکِّ ثَمُویِ؟ ࢽَ تَدَوَࢽْجَیٜࢽْ رَ ࢽَ أَمْ غَدٜسُویٜࢽْ؟» ثْࢽٜ تِیَ کِوُورُو؞
[26] بِتُرُسّٜ: «ࢽَ أَمْ غَدٜسُویٜࢽْ،» یٜࢽِّیَ، عِیسَیٜ تِرُو: «أَدْغَیْیَ، تَدَوَࢽْجَسُودْ دَوُࢽْ بَوُو، دِیٜ!
[27] أَدْ یَیٜ بَرٜ یَکِّیٜ کَرْوُࢽْجَ وَجْࢽِّرُو، لٜࢽٜ بْرْمْبُو مُیْ کُولْغْࢽٜ بُࢽِ بُرْوُوࢽْ تَمَّدَ ࢽغُوࢽٜ ثِࢽْجُ کَࢽٜ؞ کَࢽْمِیَ، غُرْسُ ࢻَلْ ࢻَࢽْدْمِ؞ ࢽغُوࢽٜ یَدٜ أَکِّ مُواْمَسُودْرُو یٜ، وُوَ ࢽِیَیٜرُو،» یٜࢽُو؞