[1] ࢻَرِسَوَا سَدُسِیَا إِسَࢽٜ عِیسَىٰ رِجَࢻْتُرُو أَلَمَ لَا سَمٜىٰ تَیِرُو ࢻْلٜجُوُورُو تِیَ کٜوُورُو؞
[2] عِیسَیٜ تَیِرُو: «کَجِرِجِیَ، ࢽَیِیٜ: ‹کَسَمْ کْجِ ࢻَࢽْدِیٜ، سَمٜ کِمٜجْࢽَ ࢽَࢽْغَرُو،› ࢽُوِ؞
[3] کُورُو دُࢽِیَ وَجِیَ، ࢽَیِیٜ: ‹کُ إِࢽْغِ ثُدُرِ، سَمٜ کٜىٰرَ کِمٜ ثِتَّرُو وَلْجْࢽَ ࢽَࢽْغَرُو،› ࢽُوِ؞ أَوُو سَمٜࢽْ ࢻْلٜدِدَ ࢻِسَرْدُ ࢽُوࢽُوَّ، أَمَّ أَوُو جَمَࢽْ أَدْࢽْ وَکَّجِدَ ࢻِسَرْدُدْ ࢽَیِرُو کَتْکٜرُو!
[4] أَمْ أَࢽْسِیَ اللَّهیٜ جَمَࢽْ دِوِ أَدْیٜسُو أَلَمَ مَجَیْ، أَمَّ أَلَمَ ࢽَوِ یُونُسّٜ غْࢽِیَ، أَلَمَ ࢻِمَ تَیِرُو ࢻْلٜدِیوَوُو،» یٜࢽُو؞ دَجِ تَیِیَ کُولْجٜ لٜىٰࢽُو؞
[5] ࢻُوُرَوَدْ بْرْمْ ࢻَلْجَࢽٜ ثِ تُودْرُو کُویٜرَࢽِّیَ، ࢽغٜسَّࢽٜ بُرُودِ ࢽغُوجَࢽِّرُو أَسُیٜرَ؞
[6] دَجِ عِیسَیٜ تَیِرُو: «یِسْ ࢻَرِسَوَا سَدُسِیَایٜرُو حَࢽْغَلْ غْࢽَࢽُواْ!» یٜࢽُو؞
[7] تَیِدْ کَتّٜࢽْجَࢽْ: «بُرُودِ ࢽغُوࢽِیٜࢽْدٜ ࢽَࢽْغَرُو ࢽغَیْ وُلْجِ،» ثَࢽٜ مَࢽَ بَدِیٜرَ؞
[8] عِیسَى أَدَ أَسُجٜ تَیِرُو: «ࢽَیِ کَمْبْرْسٜ غَࢽَاسُو، أَوِرُو کْلَ بُرُودِ ࢽَࢽْدُوࢽْ بَوُویٜࢽْ کَتّٜࢽْدُوࢽْ مَࢽَࢽُوِدْ؟
[9] رَ، کُوَ یَیٜ أَسُࢽُوِّ وَ؟ بُرُودِ أُوُ أَمْ دْوُ أُوُرُو دَغَرْغَادَدَ جُواْ ࢽدَوُ ثَمُّوَّادَ ࢽغٜسُّوَّ وَ؟
[10] رَ، بُرُودِ تُلُرْ أَمْ دْوُ دٜوُرُو دَغَرْغَادَدَ جُواْ کَلَرَمْ ࢽدَوُ ثَمُّوَّادَ ࢽغٜسُّوَّ وَ؟
[11] تُو، أَوِرُو غْلٜ أَسُࢽُوِّدْ؟ وُ کْلَ بُرُودِیٜࢽْ غْࢽِ مَࢽَࢽْجَغَکِّ، یِسْ ࢻَرِسَوَا سَدُسِیَایٜرُو حَࢽْغَلْ غْࢽَࢽُواْ یٜکُّو!»
[12] دَجِ ࢻُوُرَوَدْ یِسْ بُرُودِیٜرُو غْࢽِ، أَلَمْدُ ࢻَرِسَوَا سَدُسِیَایٜرُو حَࢽْغَلْ غْࢽَجَ وُلْجْغْࢽَرُو أَسُیٜرَ؞
[13] عِیسَى ثِجٜ ثِدِ بْرْࢽِ کَیْسَرِیَ ࢻِلِبِیٜرُو کَدِࢽِّیَ، ࢻُوُرَوَࢽْجُرُو: «وُࢽْدُرُو تَدَ کَمْبٜدَ أَمْسُودْ ࢽغُویٜرَ؟» ثْࢽٜ تَیِیَ کِوُورُو؞
[14] تَیِیٜ: «أَمْ لَا یَحْیـَى کَسَلَمَ ثَࢽِ، لَایٜ ࢽَوِ إِلْیَ ثَࢽِ، لَایٜ ࢽَوِ إِرِمِیَ بِ ࢽَوِیَ کُرٜىٰ ࢻَلْࢽْجَ ثَࢽِ،» یٜرَ؞
[15] تِیٜ: «ࢽَیِدْ، وُࢽْدُرُو وُوَ ࢽغُوسٜوْ؟» ثْࢽٜ تَیِیَ کِوُورْࢽِّیَ،
[16] سِمَࢽْ بِتُرُسّٜ: «ࢽِمَ أَلْمَسِیوُ تَدَ اللَّه کْࢽْدْغَیْمَیٜدْ وُو!» یٜࢽُو؞
[17] دَجِ عِیسَیٜ تِرُو: «بَرْغَࢽْمْ سِمَࢽْ تَدَ یُونُسّٜ، دَلِلْࢽْجُدْ کَمْ غْࢽِ، بَوَࢽِ مَیْ سَمٜمَ أَدَ إِسَࢽُوࢽْجْغْࢽَ ࢽَࢽْغَرُو؞
[18] ࢽِرُو وُلْࢽْجْغْکِّ، ࢽِمَ بِتُرُسْ، کْلَ کَوْ أَدْیٜمَࢽْ جَمَ وُوَ غَوُ تَࢽْدْکِّ، کُورُو کْࢽْدُوُو کَࢽُّیٜ کْلَࢽْجَࢽْ کْࢽَّسَرْ ثُوَࢽْدِوَوُو؞
[19] ࢽِرُو ثُوُرَمْ ࢽُودُو بَرْغَا مَیْ سَمٜمَیٜ ࢽجِکِّ؞ أَوِ دُوُوࢽْ دُࢽِیَࢽْ غٜرْمِدْ سَمٜ یٜࢽْ تِکّٜرْࢽَ، کُورُو أَوِ دُوُوࢽْ دُࢽِیَࢽْ وُیْࢽْمِدْ سَمٜ یٜࢽْ وُیْدْࢽَ،» یٜࢽُو؞
[20] دَجِ عِیسَى سْمُوࢽْجَ کَسّٜ تَیِرُو بَرٜ وُࢽْدُمَرُو تِمَ أَلْمَسِیوُدْ وُورُو وُلْجَغَࢽِّ یٜࢽُو؞
[21] کُوَ أَدْࢽْ ࢻُوُࢽْ عِیسَى ࢻُوُرَوَࢽْجُرُو اللَّه کَدَرْجْࢽَ جٜرُجَلٜمْبُو لٜجٜ مُکُّو أَمْوُرَوَا وُرَوَ رِمَࢽَّیٜیَ مَلْمْبَ أَتَّوْرَیٜیَیٜࢽْ کُتُّ تَیْ دَجٜ ثَࢽٜ تِیَ رُورُو ثٜىٰسِ، کُورُو کَوُ یَکُّوَ رُووَرُو وَلْجٜ ثِجِ ثْࢽٜ تَیِیَ أَلَمْدُ بَدِیٜࢽُو؞
[22] دَجِ بِتُرُسْ تِیَ سْغْرِرُو ثُتُّلُوٜ جْکَّدٜ: «أَ! کْمَ، اللَّه ࢽِیَ أَدْرُو دَمْࢽْجُوُو! أَدْ تْمَّرُو ࢽِرُو وَکَّࢽْجِیوَوُو!» یٜࢽُو؞
[23] أَمَّ عِیسَى سُوُورْدٜ بِتُرُسُّو: «ࢽَࢽِ کُولّٜ، إِوُلِیسْ! جَوَلْࢽِلَࢽْ تَکَّلُّو وَلْسْغْمَّ؞ أَوُو کَرْوُࢽْمْلَࢽْ تَمَّدْ اللَّهیٜ غْࢽِ، کَمْبٜ!» یٜࢽُو؞
[24] دَجِ عِیسَیٜ ࢻُوُرَوَࢽْجُرُو: «کَمْ لَا وُوَ غَ ثْرَاࢽَا، مْرَدُ کْلَࢽْجُیٜ وَجُو کْسْکَࢽْجُ کَرْمُویٜ ࢽغُوجُو وُوَ سْغَ؞
[25] دَلِلْࢽْجُدْ وُࢽْدُ دُوُوࢽْ رُوࢽْجُ رِوُو ثْرَاࢽَمَدْ رُوࢽْجُدَ ثُوَتْکِ، أَمَّ وُࢽْدُ دُوُوࢽْ وُ ࢽَࢽْغَرُو رُوࢽْجُ ثُوَتْکْࢽَمَدْ رُوࢽْجُدَ ثُوَࢽْدِ؞
[26] کَمْ دُࢽِیَ أَدْ ࢽغَا جْغَࢽْدٜ رُوࢽْجُ أَسَرْجِیَ، ࢽدَ رِوَࢽْجُ؟ رَ، أَوِ غْلٜ کَمْ ثٜ رُوࢽْجُ ثُوَࢽْدِ؟
[27] دَلِلْࢽْجُدْ تَدَ کَمْبٜدْ ثُرُو دَرَجَ بَوَࢽْجُیٜࢽْ مَلَیْیَوَࢽْجُوَ رُوکُّو إِسِیَ، دَجِ وُࢽْدُ یَیٜرُو کْلَ أَوُو ثْدْࢽَسُویٜࢽْ کَلْکَلُّو ثِ ࢽَࢽْغَرُو؞
[28] جِرٜمَرُو ࢽَیِرُو وُلْࢽْجَغَکِّ، أَمْ لَا ࢽَ أَدْࢽْ دَادَ مبٜجِ، کَوُ کَوُࢽْجَ دَجِدْرُو، تَدَ کَمْبٜ کْرْمَیْࢽْجُࢽْ إِسِ ثَرُیْ،» یٜࢽُو؞