[1] دَجِ ࢻَرِسَوَا مَلْمْبَ أَتَّوْرَیٜیَ لَا جٜرُجَلٜمْلَࢽْ ثِجَࢽٜ ࢽَ عِیسَیٜرُو إِسَࢽٜ تِرُو:
[2] «أَوِرُو ࢻُوُرَوَࢽْمْدْ أَدَ أَمْوُرَوَࢽْدٜىٰیَ کُولْجَࢽٜ مُکُّوࢽْجَ تُلْجَࢽِّࢽْ کْمْبُو جَوُیْدْ؟» ثَࢽٜ تِیَ کٜوُورُو؞
[3] عِیسَیٜ تَیِرُو: «ࢽَیِدْ ࢽدَ، أَوِرُو وَدَ اللَّهیٜ کُولُّوٜ أَدَࢽْدُو غَوِدْ؟
[4] أَوُووَ اللَّهیٜ: ‹بَوَࢽْمْبَ یَࢽْمْبَرُو دَرَجَ یٜ!› کُورُو ‹کَمْ دُوُوࢽْ بَوَࢽْجُ بِ یَࢽْجُوَ رُجْࢽَمَدْ، تِیَ رُورُو ثٜىٰسُو!› ثْࢽَّ؞
[5] أَمَّ ࢽَیِیٜ: ‹کَمْ بَوَࢽْجُ بِ یَࢽْجُرُو: أَوُو ࢽَࢽِࢽْ ࢽُوَࢽْدُورُو تْمَࢽُوَّدَ اللَّهرُو غْࢽَغْکّْࢽَ، ثْࢽِیَ،
[6] بَرٜ تِلَࢽْ بَوَࢽْجُوَ یَࢽْجُوَرُو سٜرْ ثْدّٜ دَرَجَ ثِࢽِّ،› ࢽُوِ؞ أَدْغَیْمَ أَدَࢽْدُو ࢽَࢽْغَرُو مَࢽَ اللَّهیٜدَ بُووُرُو کَلَکّٜوْ؞
[7] ࢽَیِ مْࢽَࢻْکَّسُو، أَوُو ࢽَوِ إِشَیَیٜ کْلَࢽْدُوࢽْ وُلْجْࢽَدْ جِرٜ؞ تِیٜ:
[8] «‹جَمَ أَدْ ثِلَࢽْ وُرُو دَرَجَ سَدِ، أَمَّ کَرْوُࢽْجَࢽْ ࢽَࢽِࢽْ کُرُوُجَࢽَ؞
[9] دٜ سُلُّو وُرُو أَمْبْࢽْسَغَیْ، أَلَمْدُࢽْجَدْ وَدَ کَمْبٜ،› ثْࢽَّ؞»
[10] دَجِ عِیسَى جَمَدَ ࢽَࢽْجُرُو بُواْجٜ تَیِرُو: «ࢻَࢽُّواْ، أَسُࢽُواْ!
[11] أَوُو ثِ کَمْبٜرُو ࢽغَیِدْ کَمْدَ تَیِرْ غْࢽِرُو ثْدِوَوُو، أَمَّ أَوُو ثِࢽْجُࢽْ ثُلُوِدْ، تِمَ کَمْدَ تَیِرْ غْࢽِرُو ثْدِ وُو،» یٜࢽُو؞
[12] دَجِ ࢻُوُرَوَدْ ࢽَࢽْجُرُو إِسَࢽٜ تِرُو: «ࢻَرِسَوَدْ مَࢽَ أَدَ کُتُّرُو ࢻَࢽْجَࢽَرُو ࢽُوࢽْمَّ وَ؟» ثَࢽٜ تِیَ کٜوُورُو؞
[13] عِیسَیٜ تَیِرُو: «کْسْکَ ࢻِ دُوُوࢽْ بَوَࢽِ مَیْ سَمٜمَ غْࢽِ کُوکْثُومَدْ، ࢻْرْدُیٜࢽْ تِیَ مْکْثَیْ؞
[14] کُولُّواْ تَیِیَ، کَمْبُ کَمْبُوَ جٜدُمَسُو! کَمْبُ کَمْبُ کَمَࢽْجُوَ جٜجِیَ، تَیِ یِࢽْدِ سَمَّ بْلَارُو ثَسُکُّرِ؞»
[15] دَجِ بِتُرُسّٜ تِرُو: «مِسَلْ أَدَ أَࢽْدِرُو ࢻِسَرْسَغَࢽٜ،» ثْࢽٜ عِیسَىٰ کِوُورْࢽِّیَ،
[16] عِیسَیٜ: «أَ! ࢽَیِ یٜ کُوَمِسُوࢽْ کْلَ جَکَّدَا وَ؟
[17] أَوِ یَیٜ ثِ کَمْبٜرُو ࢽغَاࢽَدْ ثُرُوࢽْجُرُو کُوجٜ دَجِ تِیࢽْجُیٜࢽْ ثُلُوِرُو ࢽُوࢽُوِّ وَ؟
[18] أَمَّ أَوُو ثِ کَمْبٜࢽْ ثُلُوِدْ ثُرُو کَرْوُࢽْجُیٜࢽْ إِسْࢽَ، تِمَ کَمْدَ تَیِرْ غْࢽِرُو ثْدِ وُو؞
[19] دَلِلْࢽْجُدْ ࢽِیَدِوِ سُو، کَمْ ࢽجٜجُو سُو، کْࢽْجْࢽَ سُو، جَرَوَ سُو، ࢽَمْبَرْوُ سُو، شٜدَکَمْبُ سُو، أَدْلَمْدُ سُو سَمَّ ثُرُو کَرْوُدْیٜمَࢽْ ثَلُوِ،
[20] أَࢽِسُودْمَ کَمْدَ تَیِرْ غْࢽِرُو ثَدِدْ وُو؞ مُکُّو تُلْجْࢽِّࢽْ بْرِ بُودْ کَمْدَ تَیِرْ غْࢽِرُو ثْدِوَوُو،» یٜࢽُو؞
[21] دَجِ عِیسَى ࢽَدَ کُولْجٜ لَرْدُ بْرْࢽِ تِرّٜیَ سِدُوࢽّٜیَیٜرُو لٜىٰࢽُو؞
[22] کَمُ کَࢽْعَࢽَمَ ثِدِدْࢽْ دْغَࢽَ لَا ࢽَࢽْجُرُو إِسٜ کُواْ سَࢻْثٜ تِرُو: «کْمَ، تَدَ مَیْ دَاوُدَیٜ، وُوَ ࢽجُࢽُوسْࢽٜ! ࢻٜرُوࢽِ جَوْمَرُو کَرُوَا،» یٜࢽُو؞
[23] أَمَّ عِیسَى تِرُو مَࢽَ ࢻَلْمَ کَلَکْثْغْࢽِّ؞ دَجِ ࢻُوُرَوَࢽْجُ ࢽَࢽْجُرُو إِسَࢽٜ تِیَ لُواْجَࢽٜ: «تِیَ سَلَمّٜ لٜجُو، کُواْ سَࢻْثِیَرُو أَࢽْدِیَ سَغَیْ،» یٜرَ؞
[24] عِیسَیٜ: «دِمِیَ ࢻَتَّاࢽَ إِسْرَاءِیلَیٜرُو غْࢽِیَ، اللَّه وُوَ وُࢽْدُیٜمَرُو سُࢽُودْࢽِّ،» یٜࢽُو؞
[25] أَمَّ کَمُدْ إِسٜ ࢻُوُࢽْجُࢽْ تُࢽْغُرُمْجٜ تِرُو: «کْمَ، وُوَ بَࢽَسْغْࢽٜ!»
[26] عِیسَیٜ: «کْمْبُو یَلَّیٜدَ ࢽغُوࢽْمٜ کْرِسُورُو ࢽجُودْ جُسّْࢽِّ!» یٜࢽِّیَ،
[27] کَمُدْیٜ: «آه، کْمَ؞ أَدْ یَیٜ کْرِسُودْمَ کْمْبُو ثِدِرُو ثُکُّرْࢽَدَ جَوُیْ،» یٜࢽُو؞
[28] دَجِ عِیسَیٜ کَمُدْرُو: «کَمْبْرْسٜࢽْمْدْ جَوْرُو کُرَ، دِیٜ! أَوُو رَامَّدْ وَکَّجُو!» یٜࢽُو؞ سَدْمَࢽْ ࢻٜرُوࢽْجُدْ ࢽغَیٜࢽُو؞
[29] دَجِ عِیسَى ࢽَدَ کُولْجٜ لٜجٜ ثِ بْرْمْ غَلِلٜىٰ جْغَࢽٜ کْلَ کَوْ کُرُوُیٜࢽْ جُوَࢽٜ ࢽَࢻْکٜࢽُو؞
[30] أَمْ کَدَ کَدَمِ إِسَࢽٜ ࢽغُرْدِیے سُو، کَمْبُ سُو، دُࢽْغُ سُو، مُوَ سُو، أَمْ دُوࢽْدِ غَدٜ ࢽغْوُ سُووَ ࢽَࢽْجُرُو ثَوُدٜ ࢻُوُࢽْجُࢽْ غْࢽَجَࢽٜ تَیِیَ إِسَࢽْغَیٜىٰࢽُو؞
[31] جَمَدْ مُوَسُو مَࢽَجَیْ، دُࢽْغُسُو یٜ ࢽغَرُو وَلْجَࢽَ، ࢽغُرْدِییَ یٜ سِࢽْجَࢽْ لٜجَیْ، کُورُو کَمْبُوَ یٜ سِمْ ثَوَࢽْدْࢽَرُو کٜرُࢽِّیَ، أَجَࢻْثَࢽٜ اللَّه جَمَ إِسْرَاءِیلَیٜدَ جَجَکّٜرَ؞
[32] دَجِ عِیسَى ࢻُوُرَوَࢽْجُوَ ࢽَࢽْجُرُو بُواْجٜ تَیِرُو: «جَمَ أَدَ ࢽجُࢽُوکّْࢽَ، دَلِلْࢽْجُدْ کُ وُوَ رُوکُّو کَوُࢽْجَ یَکُّ، کُورُو أَوِمَ کْمْبُویٜ ࢽَࢽْجَࢽْ بَوُو ࢽَࢽْغَرُو؞ کْࢽَࢽْجَا دُوُوࢽْ تَیِیَ سَلَمّْکِّیَ، رَاکّْࢽِ، بَرٜ جَوَلَّࢽْ دُࢽُوࢽْجَ بَوُورُو وَلْجْࢽِّرُو،» یٜࢽُو؞
[33] ࢻُوُرَوَࢽْجُدْیٜ تِرُو: «ࢽدَرَࢽْ غْلٜ کَرَا أَدْࢽْ کْمْبُو سَرَیْ ࢻَࢽْدِیٜ جَمَ کَدَ أَدَ أَمْبَࢽِیٜ؟» یٜرَ؞
[34] عِیسَیٜ تَیِرُو: «بُرُودِ ࢽدَوُ ࢽَࢽْدُوࢽْ؟» ثْࢽٜ کِوُورْࢽِّیَ، تِرُو: «تُلُرْ بُࢽِ سَࢽَࢽَ لَآ،» یٜرَ؞
[35] دَجِ عِیسَى جَمَدَ ثَکّٜ ثِدِࢽْ ࢽَࢻْکٜرَࢽِّیَ،
[36] بُرُودِ تُلُرْدَ بُࢽِیَدَ ࢽغُوجٜ اللَّهرُو أَرْدِجٜ ࢻْسَکْثٜ ࢻُوُرَوَࢽْجُرُو ثٜ، تَیِ یٜ جَمَدْرُو کٜدُو؞
[37] تَیِ سَمَّ جَوُࢽٜ کُلْیٜرَ؞ ࢻُوُرَوَدْ غَࢻْتُواْدَ ثَࢻْکٜرَࢽِّیَ، جُواْ کَلَرَمْ تُلُرْ کٜسْمْبْرُو؞
[38] أَمْ دُوُوࢽْ کْمْبُو أَدَ جَوُࢽَدْ، کَمُوَا تَدَوَا دَوُࢽْ بَوُورُو کُوࢽغوَ دْوُ دٜوُ؞
[39] دَجِ عِیسَى جَمَدَ سَلَمْغٜࢽِّیَ، مَارَرُو ࢽغَیٜ ثِدِ مَغَدَࢽّٜرُو لٜىٰࢽُو؞