[1] «بَرٜ وُࢽْدُمَرُو شَرَ یِدُّوِّ، ࢽَیِ یٜرُو شَرَ ࢽجَدِّوَوُو؞
[2] جِرِ أَمْبُو شَرَ یِدُّوِدْ غَیْ، ࢽَیِ یٜرُو شَرَ ࢽجَدِّ؞ کُورُو جِرِ أَمْبُو ࢽغَلْغْوِدْ غَیْ، ࢽَیِ یٜرُو ࢽغَلْࢽْجَغَیْ؞
[3] «أَوِرُو کَلْمْ سِمْ کَمَࢽْمْبٜࢽْ رُمِ دُوُوࢽْ، کَرْجْمْ ثُرُو سِمّْمْبٜࢽْ أَسُࢽْمْبَوُودْ؟
[4] أَکُّو ࢽِ سِمّْمْلَࢽْ کَرْجْمْبَدْ، أَوِیَوِࢽْ غْلٜ کَمَࢽْمْبُو: ‹کُولّٜ کَلْمْ سِمّْمْبٜدَ تُلُوُکّٜ،› ࢽْمِ؟
[5] مْࢽَࢻْکْ، کَرْجْمْ سِمّْمْبٜدَ تُلُوُمِیَ دُوُوࢽْ، دَجِ ࢽغْلَرُو رُمٜ کَلْمْ سِمْ کَمَࢽْمْبٜدَ تُلُوُمِ؞
[6] «بَرٜ أَوُو تَیِرْدَ کْرِیَرُو یِوِّ، کُورُو بَرٜ أَوُوࢽْدُو دَرَجَا ࢻُوُ أَلَدٜیَیٜࢽْ کُولُّوِّ؞ کُولُّوِیَ، تَیِیَ غُغُوَثَّیْ، کْرِیَ یٜ سُوُورْدَࢽٜ ࢽَیِیَ ࢽجَࢽْجَࢽّجَیْ؞
[7] «کُورُواْ ࢽجَدِ، مَࢽُواْ ࢻَࢽْدُوِ، ثِࢽَّ بَࢽْغُواْ کَࢽْجَغَیْ؞
[8] وُࢽْدُ دُوُوࢽْ ثُوُورِمَدْرُو ثَدِ، کَمْ مَجِمَدْ یٜ ثُوَࢽْدِ، کُورُو کَمْ ثِࢽَّ بَکْثِمَدْ یٜرُو کَجَغَیْ؞
[9] «وُࢽْدُࢽْدُو تَدَࢽْجُ تِیَ بُرُودِرُو ثُوُورِیَ، دُوࢽْغُرْ کَوْیٜ ثِدْ؟
[10] بِ بُࢽِرُو ثُوُورِیَ، کَدِ ثِدْ؟
[11] ࢽَیِ دِوِسُو أَوُووَ ࢽغْلَ تَدَوَࢽْدُورُو ࢽجُو ࢽُوࢽُوَّا، بَلّٜ بَوَࢽْدُو مَیْ سَمٜمَ أَوُووَ ࢽغْلَ أَمْ تِیَ ثَوُورِرُو ثِدْ!
[12] أَدْ ࢽَࢽْغَرُو أَوُو دُوُوࢽْ أَمْسُو ࢽَیِرُو ࢽجَدِّیَ رَاوَّدَ ࢽَیِ یٜ تَیِرُو یِدُّواْ! أَدْمَ مَاࢽَ أَتَّوْرَا کِتَوُوَ ࢽَوِیَیٜیَیٜ وُو؞
[13] «ࢽغَوُورَمْ جْکَّدْیٜࢽْ ࢽغَوُواْ، دَلِلْࢽْجُدْ ࢽغَوُورَمْ ࢻَرَکْ، جَوَلْࢽْجُ یٜ کْسْکٜدْ، تِمَ ࢽغَوُورَمْ کَࢽُّیٜدْ وُو، کُورُو أَمْ تِیٜࢽْ ࢽغَسَیِدْ کَدَ؞
[14] أَمَّ ࢽغَوُورَمْ جْکَّ، جَوَلْࢽْجُ یٜ جَوْدْ، تِمَ ࢽغَوُورَمْ رُو سَوِسُویٜرُو ثَدِمَدْ وُو، کُورُو أَمْ تِیَ ثَوَࢽْدِدْ غَࢽَمَ؞
[15] «ࢽَوِیَ کَتُّوُیٜرُو حَࢽْغَلْ غْࢽَࢽُواْ! تَیِدْ ࢽَࢽْدُورُو إِسَیْیَ، أَلَمَࢽْجَ دِمِ غَیْ، أَمَّ کَرْوُࢽْجَ جَوْرُو دِوِ بُلْدُیٜ غَیْ؞
[16] تَدَ ثَسَکِّدْلَࢽْ تَیِیَ أَسُࢽُوِ؞ إِࢽَبْ ثُوثُّورِلَࢽْ ࢽجَکْثَیْ وَ؟ کُورُو تَرْمُ کُولُولَّࢽْ ثَدُورِ وَ؟
[17] کْسْکَ ࢽغْلَ ࢽغُسُوࢽْ تَدَ ࢽغْلَ ثَکِّ، کُورُو کْسْکَ دِوِ یٜ تَدَ دِوِ ثَکِّ؞
[18] کْسْکَ ࢽغْلَدْ رَکْثٜ تَدَ دِوِ ثَکِّوَوُو، کُورُو کْسْکَ دِوِدْ یٜ رَکْثٜ تَدَ ࢽغْلَ ثَکِّوَوُو؞
[19] کْسْکَ ࢻِ دُوُوࢽْ تَدَ ࢽغْلَ ثَکِّوَوُودَ ثَلْجَࢽٜ کَࢽُّرُو ࢻِجَغَیْ؞
[20] أَدْ ࢽَࢽْغَرُو تَدَࢽْجَلَࢽْ تَیِیَ أَسُࢽُوِ؞
[21] «أَمْ وُرُو: ‹کْمَ! کْمَ!› ثَࢽِ سَمَّ غْࢽِ ࢽُودُو بَرْغَا مَیْ سَمٜمَیٜرُو ࢽغَسَیِ، سَیْ کَمْ أَوُو بَوَࢽِ مَیْ سَمٜمَ ثْرَاࢽَا ثْدِمَدْ؞
[22] یِمْ أَدْࢽْ أَمْ ࢽغْوُ وُرُو: ‹کْمَ، کْمَ، ثُࢽْمْلَࢽْ ࢽَوِࢽَوِ کِدِیٜ، ثُࢽْمْلَࢽْ سٜدَࢽْسُو دُیٜیْیٜ، کُورُو ثُࢽْمْلَࢽْ أَوُو أَجَبَّ کَدَ یٜ کِدِیٜ، غْࢽَ؟› ثَࢽِ؞
[23] دَجِ وُیٜ تَیِرُو: ‹ࢽغَلْتٜمَ ࢽَیِیَ ࢽُوࢽْجَکّْࢽِ؞ ࢽَیِ دِوِ دِیُومَسُو، وُࢽْ کُرُوُࢽُّو لٜࢽُواْ!› ࢽْکِّ؞
[24] «أَدْ ࢽَࢽْغَرُو وُࢽْدُ دُوُوࢽْ مَࢽَࢽِ أَࢽِیَ ࢻَࢽْجٜ جْغَࢽَمَدْ، تِ أَلَمَ کَمْ حَࢽْغَلَّ سُورُوࢽْجُ کْلَ کَوْیٜࢽْ ثْدَࢽْدْࢽَدْ غَیْ؞
[25] إِࢽْغِ سَمٜىٰ ثُدُرٜ بْرْمْ ࢻَلَ تَرْجٜ، کَرُوَ یٜ ثِجٜ سُورُودَ بَبَکّٜࢽِّیَ، سُورُودْ وُرْدْࢽِّ، دَلِلْࢽْجُدْ ࢻْرْدُࢽْجُ کْلَ کَوْیٜࢽْ تْدَࢽْدْࢽَ ࢽَࢽْغَرُو؞
[26] أَمَّ وُࢽْدُ دُوُوࢽْ مَࢽَࢽِ أَࢽِیَ ࢻَࢽْجْࢽَ جْغَࢽِّمَدْ، تِ أَلَمَ کَمْ حَࢽْغَلْ بَوُووَ سُورُوࢽْجُ کْلَ ثِدِ کٜسَیٜࢽْ ثْدَࢽْدْࢽَدْ غَیْ؞
[27] إِࢽْغِ سَمٜىٰ ثُدُرٜ بْرْمْ ࢻَلَ تَرْجٜ، کَرُوَ یٜ ثِجٜ سُورُودَ بَبَکّٜࢽِّیَ، وُرْدٜ تْغْمْبُو ࢻِیَدَ،» یٜࢽُو عِیسَیٜ؞
[28] عِیسَى مَࢽَ أَࢽِیَ ثْدٜ کٜرْࢽِّیَ، جَمَ ثَࢻْتَࢽَدْ أَلَمْدُࢽْجُدَ أَجَࢻْکٜرَ،
[29] دَلِلْࢽْجُدْ مَلْمْبَࢽْجَ أَتَّوْرَیٜ غَیْ غْࢽِ، کْࢽْدُوُووَرُو تَیِیَ أَلَمْجِ ࢽَࢽْغَرُو؞